1. Twayuka byepi kuba’mba tubena kwikala mu “moba a kupelako”?

ABYA mwasemenwe mwaka wa 1914 saka apita kala nyi? Inge byo byo kiji, ko kuba’mba mwaikala bwikalo bwenu bonse mu “moba a kupelako” a buno bwikalo. (2 Timo. 3:1) Atweba bonse twaumvwa masawakya a bintu byaambijile jimo Yesu amba bikamwekanga mu kino kimye kyetu. Bino bintu ke makondo, bipowe bya nzala, bitentanshi, myalo, kuvujilako kwa bubi, ne kumanyika bantu ba Yehoba. (Mat. 24:3, 7-9, 12; Luka 21:10-12) Kabiji tubena kumona bantu baji na byubilo byaambilepo mutumwa Paulo. (Monai kakitenguluzha ka kuba’mba “ Bantu byo Baji ano Moba.”) Atweba bapopweshi ba Yehoba twashiinwa kuba’mba tubena kwikala “mu moba a ku mpelo.”—Mika 4:1.

2. Ñanyi mepuzho o twafwainwa kukumbula?

² Kufuma mu mwaka wa 1914 kufika lelo jino, papita kimye kyabaya bingi, onkao mambo, tubena kwikala ku mpelo ya “moba a kupelako.” Na mambo a kuba’mba mpelo ijitu pepi, twafwainwa kuyuka mikumbu ya mepuzho amo anema bingi: Ñanyi bintu bikamweka ku mpelo ya “moba a kupelako”? Kabiji Yehoba ukeba’mba tubenga ka byo tubena kupembelela bino bintu kumweka?

3. Kwesakana na bungauzhi buji pa 1 Tesalonika 5:1-3, bisaka bya bantu bikabijika’mba ka?

³ Tangai 1 Tesalonika 5:1-3. Paulo waambile pa “juba ja Yehoba.” Mu kino kinembelo, juba ja Yehoba jikatendeka kimye kyo bakalukuka “Babilona Mukatampe,” ko kuba’mba bupopweshi bwa bubela bwa ntanda yonse, kabiji jikapwa pa Amagedonyi. (Lum. 16:14, 16; 17:5) Byo kukashalatu pacheche jino “juba” kutendeka, bisaka bya bantu bikabijika’mba “Mutende ne luzhikijilo!” (Mu  Mabaibolo amo abino byambo byatuntululwa’mba: “Mutende ne bukikizhi.”) Bantangi ba pano pa ntanda bimye bimo bengijisha byambo bya uno mutundu pa kwamba pa kuwamisha lumvwañano pakachi ka byalo. * Nangwa byonkabyo, kubijika’mba “mutende ne luzhikijilo” ko baambapo mu Baibolo kukapusanako. Mambo ka? Inge kino kyaubiwa, bantu bakalanguluka’mba bantangi ba pano pa ntanda baingila na ngovu kuleta mutende ne luzhikijilo. Pano bino, kishinka ke kya kuba’mba “ponkapotu lonaiko lukebasolomokela” kya kubazhimukilatu “malwa akatampe” byo akatendeka.—Mat. 24:21.

4. (a) Ki ka kyo twafwainwa kupembelelanga kumona pa mambo a kubijika kwa “mutende ne luzhikijilo”? (b) Ki ka kyo twayukila jimo?

⁴ Atweba twayukako bimo pa kubijika kwa “mutende ne luzhikijilo.” Pano bino, kuji bintu bimo byo twabula kuyuka. Kechi twayuka kikalengela bantangi ba byalo kubijika bino nangwa byo bakabijika ne. Kabiji kechi twayuka kana kuno kubijika kukobiwa bimye byavula mu kulondankana nangwa kukobiwatu pa kimye kimo ne. Monse mo kikekela, atweba twayuka kuba’mba: Kechi twafwainwa kulanguluka’mba bantangi ba mu byalo bakaleta mutende pano pa ntanda ne. Bino Baibolo witubuula kutengelanga kuno kubijika kwa mutende ne luzhikijilo. Kikekala kiyukilo kya kuba’mba “juba ja Yehoba” jiji pepi kutendeka.

5. Kinembelo kya 1 Tesalonika 5:4-6 kitukwasha byepi kwinengezhezha jimo “juba ja Yehoba” saka jikyangye kufika?

⁵ Tangai 1 Tesalonika 5:4-6. Paulo witubuula atweba bonse byo twafwainwa kuba pa kuba’mba “juba ja Yehoba” jiketutaane saka twinengezha. Kechi “tulaale tulo byonka byuba bantu bakwabo ne.” Twafwainwa ‘kulabanga’ ne kwikala bajimuka. Twafwainwa kuyuka bizumba biji mu kwivwanga mu bintu bya pano pa ntanda ne kubula kwitwezha mu bya bumulwila ntanda. Inge twivwanga mu bino bintu, twakonsha kwikala “ba pano pa ntanda.” (Yoa. 15:19) Twayuka’mba Bufumu bwa Lesa bo bonkatu bukaleta mutende pano pa ntanda.

6. Twafwainwa kukwasha bantu kuba byepi, kabiji mambo ka?

⁶ Kununga pa kwikala balaba, twafwainwa ne kukwasha bantu kufunda byaamba Baibolo pa bintu bikamwekela ino ntanda. Twafwainwa kuvulukanga’mba inge malwa akatampe atendekatu, kechi kukekala kimye kya kufunjisha bantu kuba’mba bengijilenga Yehoba ne. O ene mambo mwingilo wa kusapwila o abena kukebewa kumwingila bukiji bukiji. *

7. Yehoba ukeba’mba tubenga byepi luno?

⁷ Mu kimye kicheche kyashalako “juba” janji saka jikyangye kutendeka, Yehoba ubena kukeba’mba tupayankane mu mwingilo wa kusapwila. Twafwainwa kumona kuba’mba tuji “na bya kuba byavula mu mwingilo wa Nkambo.” (1 Ko. 15:58) Yesu waambijile jimo byo twafwainwa kubanga. Kimye kyo aambile pa buneme bwa bintu byonse bibena kumweka mu ano moba a  kupelako, wanungilepo’mba: “Kabiji mambo awama afwainwa kusapwilwa patanshi mu bisaka byonse.” (Mako 13:4, 8, 10; Mat. 24:14) Akilangulukaipotu: Kimye kyonse kyo muya mu mwingilo, mukwashako kufikizha buno bungauzhi bwa mu Baibolo.

8. Twayuka byepi kuba’mba mwingilo wa kusapwila pa Bufumu ubena kuyilako palutwe?

⁸ Twakonsha kwambapo’mba ka pa mwingilo wa kusapwila pa Bufumu? Pa mwaka pa mwaka, bantu bavula bingi babena kumvwa mambo awama a Bufumu. Akilangulukai pa kuvujilako kwa basapwishi ba Bufumu mu ano moba a kupelako. Mu 1914, basapwishi bajinga 5,155 mu byalo 43. Lelo jino, basapwishi bakila pa 8.5 milyonyi mu byalo 240. Nangwa byonkabyo, mwingilo wetu kechi wapwa ne. Twafwainwa kutwajijila kutaya mbila ya Bufumu bwa Lesa mambo bo bukapwisha makatazho onse abena kupitamo bantu.—Sala. 145:11-13.

9. Mambo ka o twafwainwa kutwajijila kusapwila byambo bya Bufumu?

⁹ Tukalekatu kwingila mwingilo wetu wa kusapwila pa Bufumu inge Yehoba akambe’mba kyapwa. Kwashala kimye kyabaya byepi pa kuba’mba bantu bayuke Yehoba Lesa ne Yesu Kilishitu? (Yoa. 17:3) Kechi twayuka ne. Pano bino, twayuka kuba’mba kufikatu ne kimye kikatendeka malwa akatampe, bantu baji “na michima ya bukishinka ya kukeba bumi bwa myaka ne myaka” bakonsha kutambwila mambo awama ne kusalapo kwingijila Yehoba. (Byu. 13:48) Pano twakonsha kukwasha byepi bano bantu kimye saka kikyangye kupwa?

10. Yehoba ubena kwitukwasha byepi kufunjisha bantu bukine?

¹⁰ Kupichila mu jibumba janji, Yehoba ubena kwitupa byonse bikebewa pa kuba’mba tufunjishe bantu bukine. Kintu kimo kyo abena kwitubila ke kwitufunjisha bya kusapwila mu kupwila kwa mukachi ka mulungu. Kuno kupwila kwitukwasha kuyuka bya kwamba kimye kitanshi ne pa kubwela ku bantu. Kabiji kwitufunjisha ne bya kufunjisha bantu Baibolo. Jibumba ja Yehoba jitunengezhezha ne bingijisho bya kwingijisha pa kufunjisha bantu. Abino bingijisho bitukwasha . . .

• kutendeka misambo na bantu,

• kwamba byambo mu jishinda jilengela bantu kutako muchima,

• kutundaika bantu kukeba kufunjilapo byavula,

• kufunjisha bukine ku bantu bo tufunjisha Baibolo, ne

• kutundaika bantu kuya pa keyala wetu wa pa Intaneti ne kwibeta kwiya pa Mazubo etu a Bufumu.

Pano bino, kechi twafwainwa kupelelatu pa kwikala  na bino bingijisho ne. Twafwainwa kwibingijishanga. * Inge kya kuba’mba mwisamba bulongo na muntu ukeba kuyukilapo byavula, mwakonsha kumushila talakiti nangwa magazini pa kuba’mba akatangengamo kufikatu ne byo mukabwelako jibiji. Twafwainwa kupayankana mu mwingilo wa kusapwila pa Bufumu pa ñondo pa ñondo.

11. Mambo ka o banengezhejile Mafunjisho a mu Baibolo pa Intaneti?

¹¹ Jishinda jikwabo Yehoba jo abena kukwashishamo bantu kufunda bukine ke Mafunjisho a mu Baibolo pa Intaneti aji pa jw.org^®. (Chintai pa BIFUNJISHA BAIBOLO > MAFUNJISHO A MU BAIBOLO PA INTANETI.) Ano mafunjisho beabikijilepo ka? Pa ñondo pa ñondo, bantu bavula bingi mwaya ntanda yonse baya pa Intaneti ne kukeba mafunjisho a mu Baibolo. Mafunjisho aji pa keyala wetu akonsha kukwasha bano bantu kutendeka kufunda bukine bwa mu Mambo a Lesa. Bantu bamo bo mwisamba nabo bakonsha kukankazhama kuswa kwibafunjisha Baibolo. Inge kyaikala bino, mwafwainwa kwibamwesha kino kipungu kya pa keyala wetu wa pa Intaneti nangwa kwibatumina musabilo paji ano mafunjisho. *

12. Muntu wakonsha kufunda ñanyi bintu mu Mafunjisho a mu Baibolo a pa Intaneti?

¹² Mafunjisho etu a mu Baibolo aji pa Intaneti aamba pa ino mitwe: “Baibolo ne Mwine Mwinayo,” “Bantu Banembwa mu Baibolo,” ne “Byambo bya mu Baibolo bya Luketekelo.” Ino mitwe yaamba pa:

• Baibolo byo akonsha kukwasha muntu

• Yehoba, Yesu ne bamalaika byo baji

• Ene mambo Lesa o alengejile bantu

• Ene mambo buyanji ne bubi o byaikelako Ano mafunjisho aamba ne pe Yehoba byo. . .

• akafumyapo buyanji ne lufu,

• akasangula bafwa, ne

• kufumyapo makafulumende a bantu akankalwa kulama bulongo bantu ne kupingizhapo Bufumu bwa Lesa.

13. Nanchi mafunjisho a pa Intaneti apingakena pa kufunda Baibolo na Kamonyi nyi? Lumbululai.

¹³ Mafunjisho a mu Baibolo a pa Intaneti kechi afumyapo mutanchi wa kufunjisha bantu Baibolo ne. Yesu witupa mwingilo wa kufunjisha bantu kwikala baana ba bwanga. Twaketekela kuba’mba bantu baji na muchima wa kukeba kufunda bakafunda mafunjisho aji pa Intaneti ne kutemwa bintu byo bakafunda, kabiji bakakeba kufunjilapo byavula. Inge kyaikala bino, kampe bakonsha kuswa kwibafunjisha Baibolo. Ku mpelo ya lufunjisho lonse, muntu ubena kutanga watundaikwa kunemba pepala wa kulomba kuba’mba bamufunjishenga Baibolo ku Bakamonyi. Pa juba pa juba, pa keyala wetu tutambula mazhina a bantu kukila pa 230 bakeba kufunda Baibolo. Kufunda Baibolo na Kamonyi wa kwa Yehoba kwanema bingi.

14. Kwesakana na mikambizho ya kwa Yesu yanembwa pa Mateo 28:19, 20, twafwainwa kwibikako kuba ka, kabiji mambo ka?

¹⁴ Tangai Mateo 28:19, 20. Byo tufunjisha bantu Baibolo, twafwainwa kwibikako kwibakwasha kwikala “baana . . . ba bwanga . . . , ne kwibafunjisha kulama bintu byonse [byakambizhe Yesu].” Twafwainwa kukwasha bantu kuyuka buneme bwa kusalapo kwingijila Yehoba ne kutundaika Bufumu bwanji. Kino kibena kulumbulula kwibatundaika kwingijisha bintu byo bafunda, kwipana kwi Yehoba, ne kubatizhiwa. Inge bauba bino, po po bakapuluka mu juba ja Yehoba.—1 Pe. 3:21.

15. Ñanyi kintu kyo twafwainwa kubula kuba, kabiji mambo ka?

 ¹⁵ Byonkatu byo twaambapo kala, kwashalatu kimye kicheche kufika ku mpelo ya buno bwikalo. Na mambo a kino, kechi tuji na kimye kya kutwajijila kufunjisha bantu Baibolo babula kumwesha’mba bakeba kwikala baana ba bwanga ba kwa Kilishitu ne. (1 Ko. 9:26) Mwingilo wetu ubena kukebewa kumwingila bukiji bukiji. Kuji bantu bavula bingi bakeba kumvwa byambo bya Bufumu kimye saka kikyangye kupwa.

16. Kwesakana na byaamba Lumwekesho 18:2, 4, 5, 8, twafwainwa kuba byepi atweba bonse? (Monai ne tubyambo twa munshi.)

¹⁶ Tangai Lumwekesho 18:2, 4, 5, 8. Abino byepelo bimwesha kintu kikwabo kyafwainwa kuba bapopweshi ba Yehoba. Bena Kilishitu ba kine bonse kechi bafwainwa kwivwanga mu bupopweshi bwa bubela ne. Saka akyangye kufunda bukine, muntu ufunda Baibolo wakonsha kwikala mu bupopweshi bwa bubela. Kampe wapwilanga mu bupopweshi bumo ne kwivwanga mu byonse byo baubanga. Nangwa kampe wapananga ne mali a kutundaika bobo bupopweshi. Muntu ubena kufunda Baibolo saka bakyangye kumwitabizha kwikala musapwishi wabula kubatizhiwa, wafwainwa kusankilapo byonse byo aubanga mu bupopweshi bwa bubela. Wafwainwa kunemba nkalata nangwa kubuulañana kuba’mba waleka kuya mu chechi ye ayangamo kala ne kuleka kuba byonse byakwatankana na Babilona Mukatampe. *

17. Nkito ya mutundu ka mwina Kilishitu yo afwainwa kuchinuzhuka, kabiji mambo ka?

¹⁷ Mwina Kilishitu wa kine wafwainwa kumona kuba’mba nkito yo engila kechi yakwatankana na Babilona Mukatampe ne. (2 Ko. 6:14-17) Mwina Kilishitu wa kine kechi wafwainwa kutwela nkito ku chechi ne. Kikwabo, mwina Kilishitu watwela nkito ku bipamo bimo kechi wafwainwa kwingijilanga pa kishimikwa kyo bengijisha ku bupopweshi bwa bubela ne. Kabiji inge uji na busulu bwanji mwine, kechi wafwainwa kutambula mwingilo nangwa kuswa kwingila nkito yakwatankana na Babilona Mukatampe ne. Mambo ka o tukaina kwivwanga mu bino bintu? Mambo kechi tukeba kwivwanga mu mingilo ne bundengamambo bwa mabumba a bupopweshi atama ku meso a Lesa ne.—Isa. 52:11. *

18. Mulongo umo watwajijile byepi kukakachila ku mafunde a mu Baibolo kutazha ku nkito?

 ¹⁸ Myaka ya kunyumakwe, mukulumpe mu kipwilo wiingijilanga mwine bamulombele ku mwina kampanyi wa bya buntungi kuba’mba akengileko mwingilo wa kufiika bintu pa chechi umo mu taunyi monka mo aikalanga. Uno muntu mwina kampanyi wayukile’mba mulongo kimye kyonse wakananga kwingila nkito pa machechi. Bino pa kikye kimye, uno muntu wakebeshe bingi muntu wa kwingila ino nkito. Nangwa byonkabyo, mulongo wakakachijile ku mafunde a mu Baibolo kabiji wakaine kwingila ino nkito. Mulungu walondejilepo, mu pepala wa byambo mwajinga kipikichala kya kalipentala mukwabo wabikilenga musalaba pa chechi. Inge kya kuba’mba mulongo waswile kwingila ino nkito, kino inge kyajinga kipikichala kyanji mu pepala wa byambo. Fwanyikizhai kino byo kyakonsheshe kutamisha jizhina janji ku bena Kilishitu bakwabo. Kabiji fwanyikizhai byo kyakonsheshe kukozha Yehoba ku muchima.

19-20. (a) Ñanyi bintu byo twafunda mu uno mutwe? (b) Ñanyi bintu bikwabo byo twafwainwa kufunda?

¹⁹ Kwesakana na bungauzhi bwa mu Baibolo, kintu kikamweka katataka ke kya kuba’mba bantangi ba pano pa ntanda bakabijika’mba “mutende ne luzhikijilo!” Na mambo a bintu bitufunjisha Yehoba, twayuka kuba’mba bisaka bya bantu kechi bikaleta mutende wa kine ne. Twafwainwa kuba byepi kino kintu saka kikyangye kumweka ne lonaiko lwa kubazhimukilatu lukalondelapo? Yehoba ubena kukeba’mba tutwajijile kupayankana mu mwingilo wa kusapwila byambo bya Bufumu ne kufunjisha bantu kwikala baana ba bwanga. Kabiji twafwainwa kuchinuzhuka kwivwanga mu bupopweshi bwa bubela. Kino kyavwangamo kuleka byonse byalamata ku bupopweshi bwa bubela ne kuchinuzhuka makito akwatankana na Babilona Mukatampe.

²⁰ Kuji ne bintu bikwabo bikamweka ku mpelo ya “moba a kupelako.” Kabiji kuji ne bintu bikwabo Yehoba byo akeba’mba tubenga. Ñanyi bintu byonkabyo, kabiji twakonsha kwinengezha byepi ku bintu byonse bibena kwiya kulutwe? Tukesamba pa bino mu mutwe walondelapo.