MUTWE WA KUFUNDA 41
Bya Kufunjisha Muntu Baibolo Kufika ne ku Lubatizhilo—Lubaji 1
“Bemumwesha’mba yenu nkalata ya kwa Kilishitu yanembele atweba ba mingilo.”—2 KO. 3:3.
LWIMBO 78 ‘Kufunjisha Mambo a Lesa’
BIJI MU UNO MUTWE *
Kipwilo kisangalala bingi inge kyamona muntu ufunda Baibolo ye batemwa wabatizhiwa. (Monai jifuka 1)
1. Kinembelo kya 2 Kolinda 3:1-3 kyaamba’mba ñanyi kintu kitukwasha kuyuka kuba’mba ke kya bupe kyanema bingi kufunjisha muntu Baibolo kufika ne ku lubatizhilo? (Monai kipikichala kya pa nkupiko.)
MUMVWA byepi inge mwamona umo ufunda Baibolo mu nyaunda ya kipwilo kyenu wabatizhiwa? Mumvwa bingi bulongo. (Mat. 28:19) Kabiji inge yenu mwafunjishanga yeo mwana wa bwanga wa katataka, mwakonsha kumvwa bingi bulongo pa kumumona na kubatizhiwa. (1 Tesa. 2:19, 20) Baana ba bwanga babatizhiwa katataka ke “makalata a kuleta” kwi anweba mwibafunjishanga ne ku bonse mu kipwilo.—Tangai 2 Kolinda 3:1-3.
2. (a) Ñanyi bwipuzho bwanema bo twafwainwa kulangulukapo, kabiji mambo ka? (b) Kufunjisha muntu Baibolo kulumbulula ka? (Monai tubyambo twa munshi.)
2 Kituletela bingi lusekelo pa kumvwa sawakya wa kuba’mba pa myaka ina yapitapo bantu pepi na 10 milyonyi bafunda Baibolo * pa ñondo pa ñondo mwaya ntanda yonse. Kabiji mu ino myaka ina, bantu kukila pa 280,000 babatizhiwenga pa mwaka pa mwaka ne kwikala Bakamonyi ba kwa Yehoba kabiji baana ba bwanga ba kwa Yesu Kilishitu bakatataka. Twakonsha kukwasha byepi bantu bavula babena kufunda Baibolo kubatizhiwa? Byo kiji kuba’mba Yehoba watekenya bantu ne kwibapa kimye kya kwikala baana ba bwanga ba kwa Kilishitu, twafwainwa kwingila papelela bulume bwetu kwibakwasha kufikilamo kubatizhiwa lonka luno. Kimye kyashalako kyakepa bingi.—1 Ko. 7:29a; 1 Pe. 4:7.
3. Ñanyi bintu byo tusakufunda mu uno mutwe byaamba pa kufunjisha bantu Baibolo?
3 Mambo a kuba’mba kyanema bingi kufunjisha bantu kwikala baana ba bwanga, Jibumba Jitangijila jabuujile maofweshi a misampi kwitukwasha byo twafwainwa kuba pa kuba’mba tukwashe bantu bavula bo tufunjisha Baibolo kufikilamo kubatizhiwa. Mu uno mutwe ne walondelapo, tusakumona byo twakonsha kufunjilako ku bapainiya, bamishonale ne bakalama ba myanzo. * (Maana 11:14; 15:22) Balumbulula basapwishi ne bo bafunjisha Baibolo byo bafwainwa kuba pa kuba’mba bamwenemo mu kufunda Baibolo. Mu uno mutwe, tusakufunda pa bintu bitanu byafwainwa kuba bonse bafunda Baibolo pa kuba’mba bafikilemo kubatizhiwa.
KUKILAUKILANGA NE
Ipuzhai ye mufunjisha inge kyakonsheka kwikalako pa kuba’mba mutwajijile mwisambo wa mu Baibolo (Monai mafuka 4-6)
4. Ñanyi bintu byo twakonsha kuyuka pa kufunjisha bantu Baibolo kimye kichechetu?
4 Balongo ne banyenga bavula bafunjisha bantu Baibolo kimye kichechetu. Nangwa kya kuba kyawama kufunjisha bantu mu jino jishinda pa kuba’mba mwibalengele kwikala na kizaku kya kufunda bukine, bino kechi kusenda kimye kyabaya ne. Kabiji kampe kechi mwakonsha kufunjishanga muntu kimye kyonse ne. Pa kuba’mba balengele muntu kwikala na kizaku kya kufunda, balongo ne banyenga bamo batambula manambala a mafoni a bantu bakeba kufunda pa kuba’mba bebatuminenga tubyambo nangwa kwisamba nabo byambo bya mu Binembelo. Bakonsha kwisamba nabo pa bañondo bavula kwa kubula kutendeka kwibafunjisha Baibolo. Nanchi muntu ye besamba nanji wakonsha kufikilamo kwipana kwi Lesa ne kubatizhiwa inge kya kuba kechi wikala na kimye kyabaya kya kufunda Mambo a Lesa nyi? Ine.
5. Kwesakana na byaamba Luka 14:27-33, Yesu waambile pa ñanyi bintu byo twakonsha kuba pa kukwasha bo tufunjisha Baibolo kufikilamo kwikala baana ba bwanga?
5 Pa kimye kimo, Yesu waingijishe kimwesho kyamwesheshenga muntu byo afwainwa kuba pa kuba’mba ekale mwananji wa bwanga. Waambile pa muntu ukeba kushimika nzubo ne pa mfumu ukeba kuya ku nkondo. Yesu waambile’mba muntu ukeba kushimika nzubo ‘ukikala panshi ne kubala mali o akengijisha’ pa kuba’mba amone kana uji na avula a kupwishisha nzubo. Kabiji mfumu naye wafwainwa “kukikala panshi ne kumona kana” bashilikale banji bakonsha kushinda. (Tangai Luka 14:27-33.) Po pamotu ne muntu ukeba kwikala mwana wa bwanga. Yesu wayukile’mba muntu ukeba kwikala mwananji wa bwanga wafwainwa kulangulukishapo pa byo kilumbulula kumulondela. Onkao mambo, twafwainwa kutundaika bantu bo tufunjisha Baibolo kuba’mba twibafunjishenga pa mulungu pa mulungu. Twakonsha kuba byepi bino?
6. Twakonsha kweseka kuba byepi pa kuba’mba tukwashe botufunjisha Baibolo kuyilako palutwe?
6 Mwakonsha kutendeka kufunjisha bantu kimye kyabaya bo mwafunjishangatu kimye kicheche. Kampe mwakonsha kwisamba nabo byepelo bibiji bya mu Baibolo. Inge kya kuba mwina nzubo wapijilwa kwisamba nanji kimye kyabaya, mwipuzhai inge kyakonsheka kwikalako pa kuba’mba mutwajijile kwisamba. Mukumbu wanji wakonsha kumwesha inge wanemeka kufunda Baibolo nangwa ne. Pa kuba’mba mumukwashe kufunda byavula, mwakonsha kumwipuzha inge kyakonsheka kufundanga jibiji mu mulungu. Nangwa byonkabyo, kuji byavula byo afwainwa kuba kechi kufundatu jimo nangwa jibiji mu mulungu ne.
NENGEZHAINGA SAKA MUKYANGYE KUYA NA KUFUNJISHA
Nengezhainga bulongo saka mukyangye kuya na kufunjisha muntu Baibolo, kabiji mweshai ye mufunjisha bya kunengezha (Monai mafuka 7-9)
7. Musapwishi wakonsha kunengezha byepi saka akyangye kuya na kufunjisha muntu Baibolo?
7 Byo muji bafunjishi, mwafwainwa kunengezha bulongo saka mukyangye kuya na kufunjisha muntu Baibolo. Mwakonsha kutendekelapo kutanga kibaaba kyo musa kuya na kufunjisha muntu ne kutanga binembelo bijimo. Umvwishai bishinka biji mu kyo kyo kibaaba. Langulukai pa mutwe, tumitwe tucheche, mepuzho ajimo, binembelo byo baamba’mba “tangai,” bipikichala ne mavidyo akonsha kukwasha ye mufunjisha Baibolo kumvwisha bishinka. Kepo mwakonsha kulanguluka pa biji muntu ye mufunjisha Baibolo ne byo mwakonsha kulumbulula bulongo byambo mu jishinda japeela pa kuba’mba omvwishe ne kwibingijisha.—Ne. 8:8; Maana 15:28a.
8. Byambo bya kwa Paulo byanembwa pa Kolose 1:9, 10, bitufunjishapo ka pa kulombelako muntu ye tufunjisha Baibolo?
8 Kimye kyo mubena kunengezha bya kufunjisha, lombelaiko ne muntu ye mufunjisha ne bintu byo akankalwa kuba. Lombai Yehoba kwimukwasha kufunjisha kwingijisha Baibolo mu jishinda jisakufika pa muchima muntu ye mufunjisha. (Tangai Kolose 1:9, 10.) Langulukilai jimo pa mafunjisho akonsha kukatazha kumvwa nangwa kuswa ye mufunjisha. Vulukainga kuba’mba kikonkwanyi kyenu ke kukwasha muntu kufikilamo kubatizhiwa.
9. Musapwishi wakonsha kukwasha byepi muntu ye afunjisha Baibolo kunengezhanga bulongo byo akafunda? Lumbululai.
9 Twaketekela kuba’mba inge ke tufunjishe muntu Baibolo bimye byavula ukayuka bintu byamubila Yehoba ne Yesu kabiji ukakeba kufunjilapo byavula. (Mat. 5:3, 6) Pa kuba’mba muntu ubena kufunda amwenemo mu lufunjisho lo abena kufunda, wafwainwa kutako muchima ku byo abena kufunda. Pa kuba’mba mumukwashe kuba bino, mubuulai buneme bwa kunengezhezha jimo lufunjisho lo akafunda ne kulanguluka pa byo abena kufunjilako aye mwine. Musapwishi wakonsha kukwasha byepi ye afunjisha bya kunengezha? Nengezhezhai pamo na ye mufunjisha Baibolo pa kuba’mba mumumweshe bya kunengezha. * Mulumbulwilai bya kutaana mikumbu yakumbula mepuzho, kabiji mumweshai kushila paji mikumbu byo kwakonsha kumukwasha kubula kulubamo bishinka. Kepo mumubuule kukumbula mu byambo byanji. Inge wauba bino, mukayuka inge ubena kumvwisha byo abena kufunda nangwa ne. Kuji ne bintu bikwabo byo mwakonsha kutundaika ye mufunjisha Baibolo kuba.
MUFUNJISHAI KWISAMBA NE YEHOBA PA JUBA PA JUBA
Kwashai ye mufunjisha bya kwisamba ne Yehoba (Monai mafuka 10-11)
10. Mambo ka o kyanemena kutanga Baibolo moba onse, kabiji ufunda Baibolo wafwainwa kuba byepi pa kuba’mba amwenengamo mu kutanga Baibolo?
10 Kununga pa kufunda Baibolo pa mulungu pa mulungu, ufunda Baibolo wakonsha kumwenamo inge ke obeko bintu bikwabo aye mwine moba onse. Wafwainwa kwisambanga ne Yehoba. Wakonsha kuba byepi bino? Kupichila mu kuteleka kwi Yehoba ne kulomba kwi aye. Wakonsha kuteleka kwi Lesa kupichila mu kutanga Baibolo moba onse. (Yosh. 1:8; Sala. 1:1-3) Mumweshai bya kwingijisha “Mutanchi wa kutanga Baibolo” uji pa jw.org. * Nangwa byonkabyo, pa kuba’mba mukwashe muntu ye mufunjisha Baibolo kumwenamo mu byo abena kutanga mu Baibolo, mutundaikai kulanguluka-langulukapo pa bibena kumufunjisha Baibolo pe Yehoba ne byo akonsha kwibingijisha mu bwikalo bwanji.—Byu. 17:11; Yako. 1:25.
11. Ye mufunjisha Baibolo wakonsha kuyuka byepi kulomba, kabiji kulomba kwi Yehoba kimye kyonse kwanemena ka kwi aye?
11 Tundaikai ye mufunjisha Baibolo kwisambanga ne Yehoba kupichila mu kulomba pa juba pa juba. Lombainga kufuma panshi ya muchima kuntatwilo ne ku mpelo ya lufunjisho, kabiji mutongolainga pa jizhina ye mufunjisha pa kulomba. Byo ateleka ku milombelo yenu, ukafunda bya kulomba kwi Yehoba Lesa kufuma panshi ya muchima kupichila mwi Yesu Kilishitu. (Mat. 6:9; Yoa. 15:16) Kutanga Baibolo pa juba pa juba (kuteleka kwi Yehoba) ne kulomba kimye kyonse (kwisamba ne Yehoba) kukakwasha ye mufunjisha Baibolo kufwenya kwipi ne Lesa. (Yako. 4:8) Inge ke obe bino pa juba pa juba, kikamukwasha kufikilamo kwipana kwi Lesa ne kubatizhiwa.
KWASHAI YE MUFUNJISHA KWIKALA NA BULUNDA BWAKOSA NE YEHOBA
12. Musapwishi wakonsha kukwasha byepi ye afunjisha Baibolo kwikala na bulunda bwakosa ne Yehoba?
12 Bintu bifunda muntu mu Baibolo byafwainwa kumufika pa muchima. Mambo ka? Tukeba ye tufunjisha Baibolo kufunda pe Yehoba, kabiji byo afunda byafwainwa kumufikanga pa muchima pa kuba’mba ebingijishenga mu bwikalo bwanji. Yesu wafunjishe bantu bintu byavula bingi kabiji bakebeshanga kufunda kwi aye. Kabiji bantu bamulondejilenga mambo byo ebafunjishanga bibafikanga pa muchima. (Luka 24:15, 27, 32) Muntu ye mufunjisha wafwainwa kwingijilanga Yehoba mambo a kumuyuka bulongo, kwikala na bulunda bwakosa ne kumumona amba Shanji, Lesa wanji kabiji Mulunda nanji. (Sala. 25:4, 5) Kimye kyo mubena kufunjisha muntu Baibolo, mukwashai kuyuka bulongo byubilo bya Lesa. (Lupu. 34:5, 6; 1 Pe. 5:6, 7) Pa mutwe yense ye mubena kufunjisha muntu, tai muchima pa kumukwasha kuyuka biji Yehoba. Kwashai ye mufunjisha kutemwa byubilo bya Yehoba nabiji butemwe, lusa ne kifyele. Yesu waambile’mba “mukambizho mukatampe kabiji . . . mutanshi” ke wa kuba’mba ‘temwa Yehoba Lesa wobe.’ (Mat. 22:37, 38) Kwashai ye mufunjisha Baibolo kutemwa Lesa na muchima wanji yense.
13. Ambai byo mwakonsha kukwasha ye mufunjisha Baibolo kufunda byubilo bya Yehoba.
13 Inge mubena kwisamba na ye mufunjisha, ambainga byo mwatemwa Yehoba. Kino kyakonsha kumukwasha kuyuka’mba ne aye wafwainwa kwikala na bulunda bwakosa ne Lesa. (Sala. 73:28) Nanchi mu mutwe ye mubena kumufunjisha mujipo kinembelo nangwa byambo bibena kumwesha byubilo bya Yehoba nabiji butemwe, maana, bunchibamambo bwaoloka nangwa bulume bimufika pa muchima nyi? Buulai ye mufunjisha Baibolo kuyuka’mba kyo kishinka kimo kimulenga kutemwa Shetu wa mwiulu. Kuji kintu kikwabo kyakonsha kuba ye mufunjisha Baibolo pa kuba’mba afikilemo kubatizhiwa.
TUNDAIKAI YE MUFUNJISHA KUTENDEKA KUPWILA
Tundaikai ye mufunjisha kutendeka kutanwa ku kupwila aku mutendekatu kumufunjisha (Monai mafuka 14-15)
14. Kinembelo kya Bahebelu 10:24, 25 kitubuulapo amba ka pa kupwila byo kwakonsha kukwasha ye tufunjisha Baibolo kuyilako palutwe?
14 Atweba bonse tukeba bo tufunjisha kufikilamo kubatizhiwa. Jishinda jimo jo twakonsha kubilamo bino ke kwibatundaika kutendeka kupwila. Basapwishi baingijila Yehoba pa myaka yavula baamba’mba bafunda Baibolo batanwa ku kupwila bayilako palutwe bukiji. (Sala. 111:1) Basapwishi bamo bamba’mba bafunda Baibolo bafunda bintu byavula pa kupwila kukila byo bakonsha kufunda pa kwibafunjisha Baibolo. Tangai Bahebelu 10:24, 25 na ye mufunjisha Baibolo ne kumulumbulwila byo akamwenamo inge ke atanwe ku kupwila. Mutambishai vidyo wa kuba’mba Ñanyi Bintu Byubiwa pa Nzubo ya Bufumu? * Kwashai ye mufunjisha Baibolo kupwilanga kimye kyonse.
15. Twakonsha kuba byepi pa kuba’mba tutundaike bo tufunjisha kutanwanga ku kupwila kimye kyonse?
15 Mwakonsha kuba byepi inge ye mufunjisha Baibolo ukyangye kutanwapo ku kupwila nangwa inge ukilaukila kupwila? Mubuulaiko bimo byo mwamwenejilemo pa kupwila. Inge waumvwa byo mumwenamo mu kupwila, kyakonsha kumutundaika kutendeka kupwila. Mupai Kyamba kya Usopa nangwa Mutanchi wa Kupwila kwa Bwikalo ne Mwingilo ye mubena kwingijisha pa kupwila mu yeo ñondo. Mubuulai byo mukafunda mulungu wiya, ne kumwipuzha inge pajipo lubaji lo atemwa bingi. Bintu byakonsha kufunda muntu ye mufunjisha inge watanwa ku kupwila kimye kitanshi, byakonsha kukila byonse byo afunda mu bupopweshi bo ayamo. (1 Ko. 14:24, 25) Ukamonañana na balongo ne banyenga baji na byubilo byawama byo akonsha kulondela, kabiji bakamukwasha kufikilamo kubatizhiwa.
16. Twafwainwa kuba byepi pa kuba’mba tukwashe bo tufunjisha Baibolo kufikilamo ku batizhiwa, kabiji tukafunda pa ka mu mutwe walondelapo?
16 Twakonsha kufunjishanga byepi bantu Baibolo pa kuba’mba bafikilemo kubatizhiwa? Twakonsha kwibakwasha kuyuka buneme bwa kufunda Baibolo kupichila mu kwibatundaika kufundanga pa mulungu pa mulungu ne kunengezha byo bakafunda. Twafwainwa kwibatundaika kwisambanga ne Yehoba moba onse ne kwikala na bulunda bwakosa ne aye. Kabiji twafwainwa kwibatundaika kutanwanga ku kupwila. (Monai ka kitenguluzha pa jipa 12 ka kuba’mba “ Bafunda Baibolo byo Bafwainwa Kuba pa Kuba’mba Bafikilemo Kubatizhiwa.”) Nangwa byonkabyo, mutwe walondelapo waamba pa bishinka bikwabo bitanu basapwishi byo bafwainwa kuba pa kukwasha bo bafunjisha kufikilamo kubatizhiwa.
LWIMBO 76 Nanchi Mwatemwa Kusapwila Nyi?
^ jifu. 5 Kufunjisha muntu kulumbulula kumulengela kulanguluka, kumvwa nangwa kumulengela kuba bintu mu jishinda japusanako. Kinembelo kyetu kya mwaka wa 2020 kya Mateo 28:19, kituvululamo buneme bwa kufunjisha bantu Baibolo ne kwibafunjisha byo bafwainwa kuba pa kuba’mba bekale baana ba bwanga babatizhiwa ba kwa Yesu Kilishitu. Mu uno mutwe ne walondelapo, tusakufunda byo twakonsha kuwamishako busendwe bwetu bwa kwingila uno mwingilo wanema.
^ jifu. 2 KULUMBULULA BYAMBO: Inge mwisamba na muntu bimye byavula kwingijisha Baibolo, ko kuba’mba mubena kufunjisha muntu Baibolo. Mwakonsha kubala amba muji na muntu ye mufunjisha Baibolo inge mwamumwesha bya kufunda Baibolo kabiji mwamufunjisha bimye bibiji. Kabiji inge mwashiinwa’mba mukatwajijila kumufunjisha Baibolo.
^ jifu. 3 Mu ino mitwe muji bishinka byafuma mu bibaaba bya kuba’mba “Kufunjishanga Mafunjisho a Baibolo Anunguluka” biji mu Mwingilo Wetu wa Bufumu kutendeka na wa July 2004 kufika mu May 2005.
^ jifu. 9 Tambai vidyo wa maminiti ana wa kuba’mba Kukwasha Bantu bo Tufunjisha Baibolo bya Kunengezha. Mu JW Library, chintai pa MAVIDYO > BYO TUPWILA NE MWINGILO > KUWAMISHAKO BUSENDWE BWETU BWA KUSAPWILA.
^ jifu. 10 Chintai pa BIFUNJISHA BAIBOLO > BINGIJISHO BITUKWASHA KUFUNDA BAIBOLO.
^ jifu. 14 Mu JW Library®, chintai pa MAVIDYO > BYO TUPWILA NE MWINGILO > BYO TWINGIJISHA MU MWINGILO.
