Balongo ba pa Betele baingijile kukila pa mwaka umo kushimika kishimikwa kya waileshi wa WBBR pa jikuji ja Staten mu muzhi wa New York. Byo bapwishishe kuwamisha mpunzha pa kushimikila, bashimikile nzubo ikatampe mwa kwikala bamingilo ne kishimikwa kikwabo mwa kulamina bipe. Byo bapwishishe uno mwingilo, balongo batendekele kusokankanya biñambañamba pa kuba’mba waileshi atendeke kwingila. Pano bino, kwajinga makatazho avula bingi.

Balongo kibakatezhe bingi kusokankanya ka kyela kakwata mwela pa kuba’mba waileshi engilenga bulongo. Bafwainwe kukobeka ka kyela kakwata mwela kalepa mamita 91, pakachi ka tumapulanga tubiji, tonse twalepele mamita 61. Kimye kitanshi kyo basokankenyenga, bakankelwe. Nangwa byonkabyo, na bukwasho bwa Yehoba balongo basokankenye. Mulongo Calvin Prosser waingijileko uno mwingilo waambile’mba: “Inge kya kuba twasokankenye bulongo ka kyela kakwata mwela kimye kitanshi, inge twipumine mu kyaji ne kwamba’mba, ‘Twamukonsha uno mwingilo.’” Balongo basanchijile Yehoba byo ebakwashishe kupwisha bulongo uno mwingilo. Nangwa byonkabyo, kwajinga ne lukatazho lukwabo.

 Jishinda ja kusapwilamo kwingijisha waileshi jajinga jakatataka kabiji kitukatezhe bingi kupota biñambañamba bya kwingijisha. Onkao mambo, balongo bapotele kiñambañamba kyo baingijishapo kala kilengela mawi kwenda mu mwela kyo basokankenyejile jimo. Mu kifulo kya kupota kya kwambilamo kya katataka, baingijishe kakwambilamo ka ku foni. Juba jimo bufuku mu February, balongo bafuukwilepo kweseka kino kiñambañamba pa kuba’mba bayuke inge kyakonsheshe kwingila bulongo. Bakebelenga byambo bya kwamba pa waileshi. Onkao mambo, balongo batendekele kwimba nyimbo ya Bufumu. Mulongo Ernest Lowe wavulukile’mba, kimye balongo kyo baimbilenga ino nyimbo batambwijile foni kufuma ku Mulongo Judge Rutherford, b waumvwine ino nyimbo yo baimbilenga pa waileshi wanji mu muzhi wa Brooklyn, palepele makilomita 25 na ko baimbijilenga.

Mulongo Rutherford wibambijile’mba: “Lekai kuba kyungye. Mubena kumvwanyika nobe mubena kuwowotatu.” Balongo baumvwine bingi bumvu kabiji ponkapotu balekele kuba byonse byo baubilenga, pano bino, abo bayukile’mba waileshi ubena kwingilatu bulongo.

Kabiji balongo benengezhezhe kutendeka kutelekeshako bantu. Kimye kitanshi kyo bashinkwile uno waileshi pa 24 February, 1924, Mulongo Rutherford ye waambile jashi ja kupana kishimikwa kya waileshi wa WBBR pa kuba’mba bengijishenga uno waileshi “kutundaikilamo bufumu bwa Bumesiasa.” Waambile’mba nkebelo ya uno waileshi “ke ya kukwasha bantu kumvwisha bukine buji mu Baibolo ne kuyuka buneme bwa moba o tubena kwikalamo.”

Mutanchi mutanshi waingijile bingi bulongo. Uno waileshi wa WBBR bamwingijishe pa myaka 33 kusampenyamo mitanchi ya bantu ba Yehoba.

Mu July 1924, bafunda Baibolo bataainwe ku kushonkena kwajingako mu muzhi wa Columbus, Ohio. Bantu baishile na kutaanwa ku kuno kushonkena bafumine mwaya ntanda yonse kabiji batelekele ku majashi mu mulaka wa Kialabya, Kizungu, Kifulenchi, Kingiliki, Kiitalya, Kipolishi ne mu milaka ya ku German, Hungary, Lithuania, Russia, Scandinavia, ne Ukraine. Bantu batelekelenga ku majashi amo pa waileshi kabiji balongo baambijile banemba pepala wa byambo kunemba mitwe ya kushonkena pa moba onse o bashonkene.

Pa Kina pa 24 July, bantu kukila 5,000 baishile ku kushonkena bayile mu mwingilo wa kusapwila. Bapele bantu mabuku nobe 30,000 kabiji batendekele kufunjisha Baibolo bantu bavula bingi. Kyamba kya Usopa kyaambile’mba: “Bantu bajinga bingi na lusekelo kukila moba akwabo a kushonkena.”

 Pa Kitanu pa 25 July, kwamwekele kintu kikwabo kyanema pa kushonkena. Mulongo Rutherford watangile byambo byaambile pa mingilo yatama ingila bantangi ba bupopweshi. Kabiji byaambile’mba bantangi ba bumulwila ntanda, ba bupopweshi ne ba busulu “bakainyenga bantu kufunda bukine bwaamba pa Bufumu bwa Lesa bukalengela bantu kwikala mu mutende kulutwe.” Kunungapo, bino byambo byamwesheshe’mba bano banabalume “balengele kipamo kya League of Nations ne kwamba’mba: ‘Kyo kibena kwimenako Bufumu bwa Lesa pano pa ntanda.’” Bafunda Baibolo bafwainwe kuchinchika pa kuba’mba basapwile bino byambo ku bantu.

Kwamba pa byajinga kushonkena, Kyamba kya Usopa kyaambile’mba: “Ino nzhita icheche ya Nkambo yataainwe ku kushonkena kwajingako mu muzhi wa Columbus yakosejileko mu lwitabilo . . . kabiji yaikele na bulume bwa kutwajijila kusapwila na kuchinchika kechi na mambo a kwibakanya ne.” Mulongo Leo Claus wataainwe ku kuno kushonkena waambile’mba: “Byo twapwishishe kushonkena, twaikele na kizaku kya kusapwila bino byambo mu nyaunda yetu.”

Mu October, Bafunda Baibolo basampenye talakiti wajinga na mutwe wa kuba’mba Ecclesiastics Indicted, mwajinga ne byambo byatangile Mulongo Rutherford, byaambilenga pa mingilo yatama ingila bantangi ba bupopweshi. Mu muzhi mucheche wa Cleveland mu kibunji kya Oklahoma, Mulongo Frank Johnson wapwishishe kusampanya matalakiti mu maminiti 20, byo apembelejilenga basapwishi bakwabo kwiya na kumusenda. Pa kupembelela kechi waimene po bakonsheshe kumumona ku bantu ne, mambo banabalume ba mu uno muzhi bazhingijile bingi na mambo a byambo byo asapwijilenga kabiji bamukebelenga’mba bamukwate. Mulongo Johnson wafuukwilepo kufyama mu chechi wajinga kipikipi. Byo ataaine’mba mu uno chechi kafwamo bantu, wabikile talakiti wa kuba’mba Ecclesiastics Indicted mu Baibolo waingijishanga ntangi wa mu uno chechi kabiji washile matalakiti akwabo pa bipona byonse mu chechi. Kepo afuminemo mu chechi bukiji bukiji. Byo kwakijinga kimye, waubile kintutu kimo ne mu machechi akwabo abiji.

Mulongo Frank byo apwishishe kuba bino, wabwelele pa mpunzha po baumvwañene na basapwishi bakwabo kuba’mba beye bamusende. Wafyamine kunyuma ya kishimikwa po bapoteshelanga manyi saka akenkenta kuchiina’mba banabalume bamukebelenga bakamukwata. Bano banabalume baubiletu kebe, pano bino, kechi bamumwene ne. Bano banabalume bamukebelenga byo bayile. Basapwishi bakwabo basapwijilenga kipikipi bafikile ne kumusenda mu motoka.

Mulongo umo waambile’mba: “Byo twafuminenga mu ino mpunzha, twapichile pa machechi asatu. Byo twapichilenga, twamwene bantu 50 saka baimana kulutwe ya ano machechi. Bantu bamo batangilenga talakiti, bakwabo bamulamine mu maboko kuba’mba bamweshe ntangi wabo. Twaubile bingi bulongo kufumapo bukiji. Twasanchijile Yehoba Lesa wetu pa kwituzhikijila ne pa kwitukwasha kusapwila ku bano balwanyi ba Bufumu kwa kubula kwitukwata.”

Mu byalo bikwabo, Bafunda Baibolo nabo basapwijilenga na kuchinchika. Ku buyeke bwa France, Mulongo Józef Krett wasapwijile ku bantu bafumine ku Poland baishile na kwingila pa mukochi. Waambile jashi jajinga na mutwe wa kuba’mba, “Katatakatu Bafwa Bakebasangule.” Balongo ne banyenga byo baichilenga bantu ba mu yewa muzhi kwiya na kutaanwako ku jino jashi, pulishiti wakainye bantu babo kwiya na kutaanwako. Pano bino, bantu kechi bamumvwijile ne. Bantu kukila pa 5,000 bataainwe ku jashi, kuvwangakotu ne pulishiti mwine wibakainyenga. Mulongo Krett waichile uno pulishiti kuba’mba ambe pa byo aitabilamo, pano bino, wakaine. Panyuma ya jashi, Mulongo Krett wapele bantu mabuku onse o ajinga nao mambo bakebelenga kuyukilapo bikwabo pa Mambo a Lesa.—Amo. 8:11.

Mulongo Claude Brown wayile mu Africa mu kyalo kya Gold Coast, kyo batela luno amba Ghana na kusapwila mambo awama. Majashi o aambile ne mabuku o asampenye byalengejile bantu bavula kumvwa bukine mu kino kyalo. John Blankson wafunjilenga bya michi ya mu kipatela, wataainwe ku jashi jimo jaambile Mulongo Brown. Wafikenejiletu kuyuka’mba wataana bukine. John wavulukile’mba: “Buno bukine bwandengejile kwikala bingi na lusekelo kabiji nabuulangako bakwetu pa sukulu.”

 John wafunjile kuba’mba Baibolo kechi ufunjisha’mba Lesa uji mu balesa basatu ne. Onkao mambo, juba jimo wayile mu chechi na kwipuzha pulishiti pa luno lufunjisho. Uno pulishiti wamupangile ne kumunena’mba: “Obewa kechi wi mwina Kilishitu ne, wi wa kwa Diabola. Fuma papo.”

Byo afikile ku nzubo, John wanembejile nkalata uno pulishiti kumwita kuba’mba akeye na kulumbulula pa byo aitabilamo pa balesa basatu pa mvula bantu. Uno pulishiti naye waambijile John kuya na kumona mukulumpe wa sukulu po bafunjisha bya michi ya mu kipatela kabiji uno mukulumpe waipwizhe John inge wanembejile nkalata pulishiti.

John wamukumbwile’mba: “Emwane, namunembejile.”

Mukulumpe wa sukulu wakambizhe John kunemba nkalata ya kulomba lulekelo lwa mambo. Onkao mambo, John wanembele’mba:

“Kwi anweba bapulishiti, Mufunjishi wami wañambila’mba nemunembele nkalata ya kulomba lulekelo lwa mambo kwi anweba kabiji nenengezha kuba bino kikulutu muswe kuba’mba mufunjisha mafunjisho a bubela.”

Mufunjishi wanji wakuminye bingi ne kumwipuzha’mba: “Obewa Blankson, byo byo ubena kukeba kunemba abye nyi?”

“Emwane ee. Byo byo mbena kukeba kunemba.”

“Mbena kukupanga sukulu, wakonsha kunena byepi pulishiti wa mu chechi wa kafulumende ne kuketekela’mba usakutwajijila kufunda pa sukulu wa kafulumende?”

“Anweba mufunjishi, . . . inge twakankalwa kumvwisha byo mubena kwitufunjisha, nanchi kechi twipuzha mepuzho nenyi?”

“Ee, mwipuzha.”

“Byonka byo mwaamba byo byo naubile. Uno shetu witufunjishenga Baibolo, ne amiwa na mwipwizhe bwipuzho. Inge wakankalwa kukumbula bwipuzho, nga mambo ka o nafwainwa kumunembela nkalata ya kulomba lulekelo lwa mambo?”

Blankson kechi bamupangile sukulu ne. Kabiji kechi wanembelepo nkalata ya kulomba lulekelo lwa mambo ne.

Kwamba pa mingilo yo baingijile mu mwaka, Kyamba kya Usopa kyaambile’mba: “Ne atweba twakonsha kwamba byonka byaambile Davida amba: ‘Anweba mwannyingile bulume bwa kulwa nkondo.’ (Sala. 18:39) Mu uno mwaka mwamweka bintu bitutundaika bingi, mambo twimwena bukwasho bwa Nkambo. Bakalume banji ba kishinka basapwila mambo awama na lusekelo.”

Ku mpelo ya mwaka, balongo balangulukile kwikala na kishimikwa kya waileshi mukwabo wa kusampenyapo mambo awama. Batendekele kushimika kino kishimikwa kikwabo kya waileshi mu U.S.A kwipi na muzhi wa Chicago. Uno waileshi wa katataka bamutelelenga’mba MAMBO. Pa kikye kimye, baingijishe kiñambañamba kyajinga bingi na bulume, kyalengejilenga bantu baji kwalepa kumvwa mambo a Bufumu kukafikatu ne ku buyeke bwa Canada.

Mu 1925, Yehoba wakwashishe balongo kumvwisha byambo biji mu Lumwekesho kitango 12. Na mambo a ñumvwino ya katataka, bantu bamo balefwilwe ne kuleka kwingijila Yehoba. Nangwa byonkabyo, bantu bavula bajinga bingi na lusekelo pa kumvwisha bintu byamwekele mwiulu ne byo byakunzhile bantu ba Lesa pano pa ntanda.