Kino kibamba kyajinga pa kibelo pa kutwelela kuya mu kibamba Kyazhila kya mu nzubo ya Lesa. Kwesakana na byo batuntulula Baibolo wa Binembelo bya Ntanda Ipya, “kibamba kya pa kibelo mu bula kyalepele makyubichi 20, kyaesakene na bwipi bwa nzubo ine, kabiji mu kimino kyalepele 120.” (2 Moba 3:4) Kabiji Mabaibolo akwabo aamba’mba kibamba kya pa kibelo kyalepele “makyubichi 120” mu kimino, kibena kulumbulula’mba kyalepele mamita 53 kuya mwiulu.

Nangwa byonkabyo, Baibolo wa Binembelo bya Ntanda Ipya wa mu Kizungu ye bapulinchile mu 2023 waamba pa kibamba kya pa kibelo ya nzubo ya Lesa yashimikile Solomone amba: “Mu kimino kyalepele makyubichi 20,” nangwa’mba mamita 9 mu kulepa. a Twayai twisambe pa ene mambo o twapimpwilako bino.

Kimino nangwa’mba kulepa kwa kibamba kya pa kibelo kechi bekwambapo pa 1 Bamfumu 6:3 ne. Pa kino kyepelo, nembi aye Yelemiya waambatu pa bula ne bwipi bwa kino kibamba. Kechi waambapo pa kimino kyakyo ne. Mu kitango kyalondelapo, walumbulula bintu bikwabo byanema bya nzubo ya Lesa nabiji kizhiba kya kyela, bikochikala jikumi ne mashiki abiji a mukuba ajinga pangye ya pa kibamba kya pa kibelo. (1 Mfu. 7:15-37) Inge kibamba kya pa kibelo kyalepele mamita kukila pa 50 ne kulepa kukila nzubo ine ya Lesa, mambo ka Yelemiya o abujijile kwamba pa kimino kyakyo? Nangwatu byo papichile myaka yavula, banembi Bayudea kechi baambilepo amba kibamba kya pa kibelo kyalepele kukila nzubo ya Lesa yashimikile Solomone ne.

Bashayuka bazhinauka inge lubumbulu lwa nzubo ya Lesa lwakonsheshe kukwata kibamba kya pa kibelo kyalepele makyubichi 120 ne kwikilengela kukosa kwakubula kupona. Bishimikwa byo bashimikanga na mabwe ne matafwali mu moba a kala nabiji binzhilo bikatampe bya ku nzubo ya Lesa yajinga mu Ijipita, byabayile kunshi bino kwiulu saka byazwelumuka. Pano bino, nzubo ya Lesa yashimikile Solomone ayo yapuseneko. Bashayuka bamba’mba bibumbulu bya ku ino nzubo kechi byajinga na mujita, makyubichi 6 nangwa’mba mamita 2.7 ne. Onkao mambo, Shayuka wa bya kushimika bya kala aye Theodor Busink waambile’mba: “Na mambo a kuba’mba mujita wa kibelo kya ku nzubo ya Lesa wajinga mucheche, kibamba kya pa kibelo kya nzubo ya Lesa inge kechi kyalepele makyubichi 120 ne.”

Kyamweka byambo biji pa 2 Byambo bya Moba 3:4 kechi bebikopolwele bulongo ne. Nangwa kya kuba mu mamanyusikilipiti amo a kala banembamo “120” pa kino kyepelo, bino mu mamanyusikilipiti akwabo aketekelwa o banembele mu myaka kitota kya butanu a kuba’mba Codex Alexandrinus ne a mu myaka kitota kya butanu na kamo a kuba’mba Codex Ambrosianus banembelemo amba “makyubichi 20.” Mambo ka bantu bakopolwelenga o banembejile “120”? Byambo bya kuba’mba kitota ne makyubichi mu Kihebelu bipasha bingi. Onkao mambo, kampe bakopolwelenga banembele kyambo kya kuba’mba “kitota” mu kifulo kya kunemba’mba “makyubichi.”

Nangwa kya kuba tukebesha kumvwisha bishinka ne kweseka kwiilumbulula byonka byo yajinga, tuta muchima pa byaimenangako ino nzubo ya Lesa ko kuba’mba nzubo ikatampe ya Lesa ya ku mupashi. Tumusanchila bingi Yehoba mambo waita bakalume banji bonse kumupopwela pa ino nzubo yanji.—Hebe. 9:11-14; Lum. 3:12; 7:9-17.