Lesa uji na Bulume Bukatampe, Bino Ulangulukilako Bantu
“[Yehoba] wayuka bulongo byo twalengwa, uvuluka’mba twi lukungu.”—SALA. 103:14.
1, 2. (a) Yehoba wapusana byepi na bantangi balama bisaka bya bantu? (b) Ñanyi bintu byo tusakufunda mu uno mutwe?
BANTANGI balama bisaka bya bantu “bobila bunkambo” bantu ne kwibayanjisha. (Mat. 20:25; Sapwi. 8:9) Bino Yehoba kechi byobyo alama bantu ne. Nangwa kya kuba uji na Bulume Bukatampe, ulangulukilako bantu bambulwa kulumbuluka. Uji na lusa kabiji wituta muchima ne kwitupa byo tukeba. Na mambo a kuba “uvuluka’mba twi lukungu,” kechi witukebela kuba bintu byakila pa bulume bwetu ne.—Sala. 103:13, 14.
2 Mu Baibolo muji mashimikila amwesha’mba Yehoba ulangulukilako bantu kupichila mu byo alamanga bakalume banji. Twayai twisambeko pa mashimikila asatu. Jishimikila jitanshi jaamba pe Lesa byo akwashishe kalombwana aye Samwela kuya na kwamba byambo bya luzhachisho ku Ñanga Mukatampe aye Eli. Ja bubiji, jaamba pe Yehoba byo atekenyejile Mosesa byo alangulukilenga’mba kechi wakonsha kutangijila bena Isalela. Kabiji ja busatu, jaamba pe Lesa byo alangulukijileko bena Isalela kimye kyo
ebafumishe mu Ijipita. Byo tusakwisambanga pa ano mashimikila, twayai tumone byo tusakufunjilako kwi Yehoba ne byo twakonsha kwingijisha bishinka byo tusakufunda.WALANGULUKIJILEKO KALOMBWANA
3. Ñanyi kintu kya kukumya kyamwekejile kalombwana aye Samwela juba jimo bufuku, kabiji ñanyi bwipuzho bo twakonsha kwipuzha? (Monai kipikichala kitanshi.)
3 Samwela watendekele ‘kwingijila Yehoba’ pa tente wa lusambakeno saka akijitu kalombwana. (1 Sam. 3:1) Bufuku bumo Samwela saka alaala, kwamwekele kintu kya kukumya. * (Tangai 1 Samwela 3:2-10.) Waumvwine muntu saka amwita pa jizhina janji. Samwela walangulukilenga’mba Ñanga Mukatampe aye Eli ye wamwichilenga, kabiji ponkapotu, wayile lubilo ko ajinga ne kwitaba’mba: “Amiwa bano, mambo mwaji kungita.” Eli wakaine. Kabiji byo kyabwelelepo kukila pa bimye bibiji, Eli popo ayukile’mba Lesa ye waichilenga Samwela. Onkao mambo, Eli wabuujile kalombwana bya kukumbula, ne aye Samwela wakookejile. Mambo ka Yehoba kupichila mwi malaika wanji o abujile kumubuulatu pa kimye kitanshi kuba’mba ye wamwichilenga? Baibolo kechi waambapo ne, bino bishinka bimwesha’mba Yehoba waubile bino mambo wamulangulukijileko kalombwana aye Samwela. Mu ñanyi jishinda?
4, 5. (a) Samwela waubile byepi na mwingilo wamupele Lesa, kabiji ñanyi kintu kyamwekele byo bwakile? (b) Jino jishimikila jitufunjishapo ka pe Yehoba?
4 Tangai 1 Samwela 3:11-18. Mizhilo ya Yehoba yakambizhe baana kunemeka bakulumpe kikatakata bo bapele luusa lwa kutangijila bakwabo. (Lupu. 22:28; Levi 19:32) Kechi kyapeelejile kalombwana Samwela kubukatu lukelo ne kuya kwi Eli na kubuula byambo bya luzhachisho byafumine kwi Lesa ne. Kabiji jishimikila jitubuula’mba Samwela “wachiine kumubuula Eli kimwesho.” Nangwa byonkabyo, Lesa wakwashishe Eli kuyuka’mba ye waichilenga Samwela. Onkao mambo, Eli waambijile Samwela amba amubuule kyamwekele. Eli wamwambijile’mba: ‘Kange ubule kumbuula byonse byo aji kukubuula ne.’ Samwela wakookejile kabiji “wamubuujile byonsetu.”
5 Byambo byaambile Samwela kechi byakumishe Eli ne. Mambo a kuba’mba “muntu wa Lesa” wabula kutongolwa jizhina wabuujilepo Eli byambo bipasha na byaambile Samwela. (1 Sam. 2:27-36) Jino jishimikila ja kwa Samwela ne Eli jibena kwitufunjisha Yehoba byo etulangulukilako ne byo aji maana.
6. Tubena kufunjilako ka kwi Lesa byo akwashishe kalombwana Samwela?
6 Nanchi mwi banyike nyi? Umvwe ibyo, jishimikila ja kalombwana Samwela jamwesha’mba Yehoba wayuka makatazho o mubena kupitamo kabiji wayuka ne byo mumvwa. Kampepo mumvwa bumvu kabiji kimukatazha bingi kusapwila byambo bya Bufumu ku bakulumpe nangwa kuba bintu byapusana na byuba banyike bakwenu. Yukai’mba Yehoba ukeba kwimukwasha. Onkao mambo, mubuulai byonse biji ku muchima wenu mu lulombelo. (Sala. 62:8) Langulukainga pa mashimikila a mu Baibolo nabiji jishimikila ja kalombwana Samwela. Kabiji ipuzhai bena Kilishitu bakwenu, banyike ne bakulumpe, kuba’mba bemubuuleko byo bashinjile makatazho epasha na o mubena kupitamo. Bakonsha kwimubuula bimye Yehoba byo ebakwashishe mu makatazho abo, kampe mu mashinda o babujile ne kuketekela.
WAMULANGULUKIJILEKO MOSESA
7, 8. Yehoba wamwesheshe byepi amba wamulangulukijileko Mosesa?
7 Mosesa byo ajinga na myaka 80, Yehoba wamupele mwingilo wabaya bingi. Uno mwingilo Lupu. 3:10) Mosesa wafwainwa wakuminye bingi pa kumupa uno mwingilo, mambo wajinga kafunga ku Mijanyi pa myaka 40. Onkao mambo, Mosesa waambile’mba: “Yami ñanyi kya kuba’mba nkaye kwi Felo ne kukalupula bena Isalela mu Ijipita?” Lesa wamulayile’mba: “Nkekala ne obewa.” (Lupu. 3:11, 12) Kabiji wamulayile’mba, bakulumpe ba mu Isalela “bakomvwina byo ukamba.” Nangwa byonkabyo, Mosesa wakumbwile’mba: “Pano kikekala byepi umvwe bakakane . . . kumvwa?” (Lupu. 3:18; 4:1) Mosesa wapachikilenga Lesa. Bino Yehoba wamutekenyejile. Wapeele Mosesa bulume bwa kuba bya kukumya, kabiji ye muntu mutanshi ye bapeele bulume bwa kuba bino bintu.—Lupu. 4:2-9, 21.
wajinga wa kuya na kufumya bena Isalela bajinga mu buzha mu Ijipita. (8 Nangwa byonkabyo, Mosesa wakebelenga kukana uno mwingilo ne kwamba’mba waluba kwamba. Onkao mambo, Lesa wamwambijile’mba: “Amiwa nkekala ne obewa mu bintu byonse byo ukambanga kabiji nkakubuula bintu byo wafwainwa kwamba.” Nanchi Mosesa waswile uno mwingilo nyi? Ine, mambo walombele Lesa kuba’mba atume muntu mukwabo. Kino kintu kyalengejile Yehoba kuzhingila. Bino wamulangulukijileko Mosesa, kabiji watongwele Alona kwikala wakumwambilako.—Lupu. 4:10-16.
9. Butekanye bwa Yehoba bwakwashishe byepi Mosesa kwikala ntangi wawama?
9 Jino jishimikila jibena kwitufunjishapo ka pe Yehoba? Na mambo a kuba’mba Lesa wa Bulume Bonse, wakonsheshe kumukanjikizha Mosesa kumukookela. Bino Yehoba wamutekenyejile ne kumubila lusa, kabiji wamwambijile’mba ukekala nanji mambo wajinga kalume wanji wipelula. Nanchi jino jishinda jaingijile nyi? Ee. Mosesa waikele ntangi wawama walangulukilangako bakwabo byonka Yehoba byo a mulangulukijileko.—Bala. 12:3.
Nanchi mulondela Yehoba mu byo muba na bakwenu nyi (Monai jifuka 10)
10. Ñanyi bintu byo twakonsha kumwenamo inge twaikala byonka biji Yehoba witulangulukilako?
10 Bintu byo twakonsha kufunjilako: Nanchi mwi banabalume basongola, mwi bansemi, nangwa mwi bakulumpe mu kipwilo nyi? Kolo. 3:19-21; 1 Pe. 5:1-3) Umvwe mwibikako kwikala byonka biji Yehoba ne Yesu Kilishitu, bakwenu bakakasuluka kwisamba ne anweba kabiji mukebatundaikanga. (Mat. 11:28, 29) Kabiji bakwenu bakalondelanga byubilo byenu.—Hebe. 13:7.
Umvwe byo byo kiji, ko kuba’mba muji na luusa lwa kutangijila bakwenu. Onkao mambo, mwafwainwa kulangulukilako bakwenu, kwibobila lusa ne kwibatekenya byonka byuba Yehoba. (ULENGESHA MOYO, BINO MUPULUSHI ULANGULUKILAKO BANTU
11, 12. Kimye Yehoba kyo atangijilenga bena Isalela kufuma mu Ijipita, wibazhikijilenga byepi?
11 Bena Isalela byo bafumine mu Ijipita mu mwaka wa 1513 B.C.E., bafwainwa bavujile kukila pa 3 milyonyi. Pa jino jibumba, pajinga baana, bakulumpe, bakolwa ne bilema. Kutangijila jino jibumba jikatampe kufuma mu Ijipita kwakebewenga ntangi wawama kabiji watele bantu muchima. Mosesa ntangi ye basajile kwi Yehoba byo byo ajinga. Kabiji kino kyalengejile bena Isalela kumvwa’mba bazhikijilwa kimye kyo bafuminenga mu muzhi mo bakomejile.—Sala. 78:52, 53.
12 Yehoba walengejile byepi bantu banji kumvwa’mba bazhikijilwa? Kyalengejile ke kya kuba’mba, wibatangijile kufuma mu Ijipita kabiji baendelenga mu mabumba nobe “mabumba a bashilikale.” (Lupu. 13:18) Kwibatangijila mu jino jishinda kwalengejile bena Isalela kushiinwa’mba Lesa wibatangijilenga. Kabiji mu kimye kya mute wibatangijilenga “na jikumbi” kabiji bufuku “na kyeya kya mujilo,” kino kyamwesheshenga’mba Yehoba wajinga nabo. (Sala. 78:14) Mu jishinda jikwabo, Yehoba waambijilenga bena Isalela amba: “Kange uchine ne. Amiwa nji nobe kabiji nkakutangijila ne ku kuzhikijila.” Kwambatu kine, bakebewenga kwibakosesha na mambo a bintu byajinga kulutwe.
Yehoba wazhikijile byepi bena Isalela pa Kalunga Kachila? (Monai jifuka 13)
13, 14. (a) Yehoba wazhikijile byepi bena Isalela pa Kalunga Kachila? (b) Yehoba wamwesheshe byepi amba wajinga na bulume bukatampe kukila bena Ijipita?
13 Tangai Kulupuka 14:19-22. Fwanyikizhai amba muji pa jibumba ja bena Isalela bo bashinkila pakachi, kunyuma kuji nzhita ya kwa Felo kabiji kulutwe kuji Kalunga Kachila. Lesa waubapo kimo. Jikumbi jaimana mulumbulumbu kunyuma ne kulengela bena Ijipita kwikala mu mfishi. Bino mu kampu wenu muji kyeya. Kepo mwamona Mosesa watanyika kuboko kwanji pa kalunga ka mema kabiji mwela wakosa wa ku musela waabanya mema a pa kalunga. Anweba, kisemi kyenu ne banyama benu mwakunkuluka ku kitulu kya kalunga. Mwamona kya kukumya. Mwataana kuba’mba ku kitulu kechi kuji mateshi ne, mushiji wauma kabiji wakosa kya kuba mwakonsha kwendatu bulongo. Onkao mambo, ne boba benda pachepache baabuka kwa kubula lukatazho.
14 Tangai Kulupuka 14:23, 26-30. Kimye kibena kumweka bino bintu, Felo na mambo a bwitote ne kubula maana, wakunkuluka pa kalunga ka mema na kwimupupila. Mosesa watanyikila jibiji kuboko pa kalunga ka mema. Pa kikye kimye, mema aji kwimana mulumbulumbu asambakana. Mema apoomokatu nobe kwauba kinkunkwila kikatampe. Felo ne nzhita yanji bazhiyatu bonse shata.—Lupu. 15:8-10.
15. Jino jishimikila jitufunjishapo ka pe Yehoba?
15 Jino jishimikila jibena kwitufunjisha kuba’mba Yehoba kechi Lesa wa bimvulañanya ne, kabiji kino kitulengela kuyuka’mba twazhikijilwa. (1 Ko. 14:33) Kabiji Yehoba wamwesheshe’mba wajinga kafunga watemwa bantu kabiji wibakwashanga mu mashinda apusana pusana. Wibazhikijila ne kwibapokolola ku balwanyi babo. Bino byambo bitutekenesha bingi mpelo ya buno bwikalo byo ibena kufwenya pepi.—Maana 1:33.
16. Twakonsha kufunjilako ka kwi Yehoba byo apokolwele bena Isalela?
Lum. 7:9, 10) Onkao mambo, umvwe mwi banyike nangwa bakulumpe, muji na butuntulu bwa mubiji bwawama nangwa mwalemana, bantu ba Lesa kechi bakalukusha michima nangwa kukakilwa kimye kya malwa akatampe ne. * Bakoba kintu kyapusanako na bakwabo. Bakavuluka byambo bya kwa Yesu Kilishitu bya kuba’mba: “Mukemane ne kwinuna mitwe yenu mambo kupokololwa kwenu kuji pepi.” (Luka 21:28) Bakatwajijila kuchinchika mu kimye kyo bakebalukuka kwi Gogi, ko kuba’mba bisaka bya bantu bikakwatankana pamo kabiji bikamwesha bulume bwakila pe Felo. (Ezi. 38:2, 14-16) Mambo ka bantu ba Lesa o batwajijila kwikala bakosa? Bayuka’mba Yehoba kechi waluka ne. Ukoba byonka byo aubile ku bena Isalela, ko kuba’mba uketulama ne kwitupulusha.—Isa. 26:3, 20.
16 Na lelo jino, Yehoba watwajijila kuta muchima bantu banji. Ukatwajijila kwibata muchima ne mu kimye kya malwa akatampe abena kwiya. (17. (a) Twakonsha kufunjilako ka ku mashimikila a mu Baibolo aamba pe Yehoba byo ata muchima bantu banji? (b) Ñanyi bintu byo tukesambapo mu mutwe walondelapo?
17 Mu uno mutwe twafunda pa mashinda amwesha’mba Yehoba ulangulukilako bantu, kwibata muchima, kwibatangijila ne kupulusha bantu banji. Byo mubena kulanguluka pa ano mashimikila, funjilaipo byubilo bikwabo bya Yehoba byo mwabujile kuyuka. Umvwe mwauba bino, mukayuka byubilo byavula bya Yehoba kabiji butemwe bwenu pe Lesa bukabayilako ne kwikala na lwitabilo lwakosa. Mu mutwe walondelapo, tukafunda pa mashinda mo twakonsha kumweshesha’mba tulangulukilako bakwetu byonka byuba Yehoba. Tukesamba bingi pa byo twafwainwa kulangulukilako ba mu kisemi, ba mu kipwilo ne bantu mu mwingilo.
^ jifu. 3 Shayuka wa bintu byamwekele kala Muyudea aye Josephus waambile’mba Samwela wajingatu na myaka 12 pa kyokya kimye.
^ jifu. 16 Kyamweka pa boba bakapuluka nkondo ya Amagedonyi pakekala ne balemana. Yesu byo ajinga pano pa ntanda, wabukile bantu bajinga na “bulema bwapusana pusana.” Byo aubile bimwesha byo akobila bantu bonse bakapuluka Amagedonyi. (Mat. 9:35) Bakasangulwa bakekala na butuntulu bwa mubiji bwalumbuluka.