MUTWE WA KUFUNDA 37
Nekenenainga Yehoba
‘Nanchi kechi twafwainwa kukilamo kumunekenena Shetu nenyi?’—HEBE. 12:9, Buku wa Lesa.
LWIMBO 9 Yehoba ye Mfumu Wetu!
BIJI MU UNO MUTWE *
1. Mambo ka o twafwainwa kunekenenanga Yehoba?
TWAFWAINWA kunekenenanga * Yehoba mambo ye Mulenga wetu. Na mambo a kino, uji na luusa lwa kwitubuula bya kuba. (Lum. 4:11) Pano bino, tuji na kishinka kikwabo kitulengela kumukookela. Yehoba ke kalama wawama bingi. Pa myaka yavula yapitapo, bantu bavula balama bantu bakwabo. Pano bino, inge twaesakanya bukalama bwabo na bukalama bwa Yehoba, tusakumona kuba’mba Yehoba ke Kalama uji bingi na maana, butemwe, lusa ne kifyele.—Lupu. 34:6; Loma 16:27; 1 Yoa. 4:8.
2. Ñanyi bishinka biji mu Bahebelu 12:9-11 bitulengela kunekenena Yehoba?
2 Yehoba kechi ukeba’mba tumukoolenga na mambo a kuba’mba tumuchina ne, bino na mambo a kuba’mba twamutemwa kabiji tumumona’mba Shetu witutemwa. Mu nkalata yo anembejile Bahebelu, Paulo walumbulwile’mba twafwainwa ‘kumunekenena Shetu’ mambo witufunjisha pa kuba’mba “tumwenemo.”—Tangai Bahebelu 12:9-11.
3. (a) Tumwesha byepi amba tunekenena Yehoba? (b) Ñanyi mepuzho o tusakukumbula?
3 Tunekenena Yehoba inge ke tumukookele mu bintu byonse ne kubula kuketekela mu milangwe yetu. (Maana 3:5) Kitupelela kukookela Yehoba inge twafunda byavula pa byubilo byanji byawama. Mambo ka? Mambo byubilo byanji bimwekela mu bintu byonse byo oba. (Sala. 145:9) Umvwe twafunda byavula pe Yehoba, tukamutemwa bingi. Kabiji inge twatemwa Yehoba, kechi tukakebanga mutanchi wa mizhilo yavula ya kwitubuula byo twafwainwa kuba ne byo twafwainwa kubula kuba ne. Twibikako kufunda bilanguluka Yehoba byo akeba’mba tulangulukenga ne kuchinuzhuka kuba bintu byatama. (Sala. 97:10) Pano bino, bimye bimo kyakonsha kwitukatazha kukookela Yehoba. Mambo ka? Kabiji bakulumpe mu kipwilo, bansemi babalume ne babakazhi bakonsha kufunjilako ka ku byaubile Kinemanga Nehemiya, Mfumu Davida ne Maliya inanji Yesu? Uno mutwe usakukumbula ano mepuzho.
ENE MAMBO O KYAKONSHA KWITUKATEZHA KUNEKENENA YEHOBA
4-5. Kwesakana na byaamba Loma 7:21-23, mambo ka o kyakonsha kukatezha kunekenena Yehoba?
4 Kishinka kimo kyakonsha kulengela kukatazha kunekenena Yehoba ke bundengamambo bo twaswana ne bumbulwa kulumbuluka. Onkao mambo, kino kitulengela kubula kukeba kukookela Lesa kimye kyonse. Adama ne Evwa byo basatukijile Lesa ne kuja kipangwa kya ku kichi kyo bebakainye kujako, basajilepo kwifuukwilanga abo bene kyawama ne kyatama. (Nte. 3:22) Ne lelo jino, bantu bavula balengulula mikambizho ya Yehoba byonkatu byaubile Adama ne Evwa ne kukeba kwifuukwila abo bene kyawama ne kyatama.
5 Nangwatu boba bamuyuka Yehoba ne kumutemwa, kyakonsha kwibakatazha kumunekenena na muchima yense. Abino byo byapichilemo ne mutumwa Paulo. (Tangai Loma 7:21-23.) Byonkatu byajinga Paulo, ne atweba tukeba kuba byaoloka kwi Yehoba. Pano bino, twafwainwa kutwajijila kwibikako kushinda muchima wa kukeba kuba byatama.
6-7. Ñanyi kishinka kikwabo kyakonsha kwitulengela kukatazha kunekenena Yehoba? Shimikizhaipo kyamwekele.
6 Kishinka kikwabo kyakonsha kwitulengela kukatazha kunekenena Yehoba ke na mambo a bisho ne bilanguluka bantu baji ku mpunzha ko twakomena. Bantu bavula bakonsha kwitubuula bintu byapusana na bikeba Yehoba. Onkao mambo, twafwainwa kutwajijila kwibikako kuchinuzhuka kulanguluka byonka byo balanguluka. Twayai twisambeko pa milanguluko imo ya bantu.
7 Mu mapunzha amo, bantu batundaika banyike kwingila na ngovu pa kuba’mba bakekale na mali avula. Nyenga wa jizhina ja Mary * wapichile mu luno lukatazho. Saka akyangye kufunda pe Yehoba, wayile na kufunda pa sukulu waya bingi nkuwa mu kyalo mo ekala. Kisemi kyanji kyamukanjikizhenga kutwela nkito ya kufola muzema wa mali pa kuba’mba bantu bakamunemekenga. Mary naye byo byo akebelenga. Nangwa byonkabyo, byo afunjile pe Yehoba ne kumutemwa, walekele kulanguluka bino. Pano bino, waambile’mba: “Bimye bimo mmona mashinda akonsha kundengela kwikala na mali avula bingi, bino mmona kuba’mba ano mashinda akonsha kundengela kubula kwingijila Yehoba bulongo byonka byo mbena kuba. Na mambo a byo bankomeshe, kinkatazha kukana. Ndomba kwi Yehoba kunkwasha kuchinuzhuka luno lweseko lwa kutwela nkito ikandengela kuleka kwingijila Yehoba.”—Mat. 6:24.
8. Tusakwisamba pa ka?
8 Tumwenamo bintu byawama mu kunekenena Yehoba. Pano bino, aba bo bapa mwingilo wa kutangijila bakwabo, nabiji bakulumpe mu kipwilo, bansemi babalume ne babakazhi, inge ke banekenene Lesa, bakonsha kulengela bakwabo nabo kumwenamo. Twayai twisambe pa bantu banembwa mu Baibolo bo twakonsha kufunjilako bya kwingijisha luusa lo betupa mu jishinda jisakangajika Yehoba.
BAKULUMPE MU KIPWILO BYO BAKONSHA KUFUNJILAKO KWI NEHEMIYA
Bakulumpe mu kipwilo babena kwingila pa Nzubo ya Bufumu byonkatu Nehemiya byo aingijileko mwingilo wa kushimukulula Yelusalema (Monai mafuka 9-11) *
9. Ñanyi makatazho apichilemo Nehemiya?
9 Yehoba wapa bakulumpe mu kipwilo mwingilo wanema bingi wa kutangijila bantu banji. (1 Pe. 5:2) Bakulumpe mu kipwilo bakonsha kufunjilako byavula kwi Nehemiya byo atangijilanga bantu ba Yehoba. Nehemiya byo ajinga kinemanga mu Yuda, wajinga bingi na bulume. (Ne. 1:11; 2:7, 8; 5:14) Akilangulukai pa makatazho amo apichilemo Nehemiya. Wataaine bantu bazhilulula Nzubo ya Lesa kabiji kechi bapainenga bupe bwa kukwasha bena Levi byonka byaambile Mizhilo ne. Bayudea kechi bakookejilenga muzhilo wa Sabado ne, kabiji banabalume bamo basongwele banabakazhi ba mu bisaka bikwabo. Kinemanga Nehemiya wakonsheshe kuba byepi na luno lukatazho?—Ne. 13:4-30.
10. Nehemiya waubile byepi na makatazho o apichilemo?
10 Nehemiya kechi waingijishe bulume bwanji kukanjikizha bantu ba Lesa kulondela byo akebelenga ne. Pano bino, walombele lulombelo lwa kufuma panshi ya muchima kuba’mba Yehoba amukwashe, kabiji wafunjishe bantu Mizhilo ya Yehoba. (Ne. 1:4-10; 13:1-3) Kabiji Nehemiya waingijile pamo na balongo banji ne kwibakwasha kushimukulula masakwa a Yelusalema.—Ne. 4:15.
11. Kwesekana na byaamba 1 Tesalonika 2:7, 8, bakulumpe mu kipwilo bafwainwa kulama byepi kipwilo?
11 Bakulumpe mu kipwilo kechi bakonsha kwikala na lukatazho lwajingapo ne Nehemiya ne, bino bakonsha kufunjilako kwi aye bintu byavula. Bakulumpe mu kipwilo bengila bingi na ngovu kukwasha balongo ne banyenga. Kabiji kechi betota na mambo a mwingilo ye bebapa ne. Pano bino, balama kipwilo na kifyele. (Tangai 1 Tesalonika 2:7, 8.) Na mambo a kuba’mba bepelula kabiji batemwa bakwabo, besamba nabo na kifyele. Ba Andrew baingila mwingilo wa bukulumpe mu kipwilo pa myaka yavula baambile’mba: “Nataana kuba’mba inge mukulumpe mu kipwilo uji na kifyele kabiji wakasuluka, balongo ne banyenga nabo bamukasulukila. Bino byubilo bilengela kipwilo kukwatankana pamo na bakalumpe mu kipwilo.” Mukulumpe mu kipwilo mukwabo aye Tony, waambile’mba: “Ngeseka kwingijisha lujimuno luji pa Filipai 2:3, ne kumona bakwetu amba bankila. Kuba bino kunkwasha kubula kukanjikizha bakwetu kukookela byo nafuukulapo.”
12. Mambo ka o kyanemena bakulumpe mu kipwilo kwipelula?
12 Bakulumpe mu kipwilo bafwainwa kwipelula byonkatu Yehoba byo epelula. Nangwa kya kuba Yehoba ye Nkambo Mfumu wa bilengwa byonse, aye “ukunama” na kwimanya “wakajilwa kufuma mu lukungu.” (Sala. 18:35; 113:6, 7) Baibolo witubuula’mba Yehoba washikwa bantu betota ne kwilundumika.—Maana 16:5.
13. Mambo ka mukulumpe mu kipwilo o afwainwa kulamina “lujimi wanji”?
13 Mukulumpe mu kipwilo unekenena Yehoba wafwainwa kulama “lujimi wanji.” Inge wabula kuba bino, wakonsha kwamba byambo byatama ku muntu wabula kumunemeka. (Yako. 1:26; Nga. 5:14, 15) Ba Andrew bo twisambapo kala, baambile’mba: “Bimye bimo nakebanga kupachila mulongo nangwa nyenga wamweshenga kubula kumpa mushingi. Nangwa byonkabyo, kulanguluka-languluka pa banabulume ba kishinka banembwa mu Baibolo, kwankwashishe kuyuka buneme buji mu kwipelula ne mu kukooka muchima.” Bakulumpe mu kipwilo bamwesha byo banekenena Yehoba kupichila mu kutemwa balongo, banyenga ne bakwabo bakulumpe mu kipwilo ne kwikala na ñambilo yawama.—Kolo. 4:6.
BANSEMI BABALUME BYO BAKONSHA KUFUNJILAKO KU MFUMU DAVIDA
14. Ñanyi mwingilo Yehoba ye apa bansemi babalume, kabiji uketekela’mba bafwainwa kubanga byepi?
14 Yehoba wapa nsemi wamulume mwingilo wa kwikala mutwe wa kisemi, kabiji Lesa ukeba’mba afunjishenga, kutungajila ne kololako baana banji. (1 Ko. 11:3; Efi. 6:4) Bino kino kechi kibena kulumbulula’mba bansemi babalume bafwainwa kwingijishanga luusa lwabo monka mo bakebela ne. Yehoba ye mwine watendekeshe kisemi, onkao mambo, baketotolwela kwi aye pa jishinda jo balaminamo bansemi byabo. (Efi. 3:14, 15) Bansemi babalume bamwesha’mba banekenena Yehoba kupichila mu kwingijisha bulume bo baji nabo mu jishinda jitokesha Lesa ku muchima. Bakonsha kufunjilako byavula kupichila mu kufunda bwikalo bwa Mfumu Davida.
Milombelo ya nsemi wa mulume mwina Kilishitu yafwainwa kumwesha byo epelula (Monai mafuka 15-16) *
15. Mambo ka bansemi babalume o bafwainwa kulondela byaunga Mfumu Davida?
15 Yehoba kechi watongwele Davida kwikalatu mutwe wa kisemi kyanji ne, bino ne kisaka kya Isalela kyonse. Davida byo ajinga mfumu, wajinga bingi na bulume. Pa bimye bimo, kechi waingijishanga bulume bwanji mu jishinda jawama ne, kabiji walengele ne mambo akatampe. (2 Sam. 11:14, 15) Pano bino, wanekenejile Yehoba kupichila mukuswa byo bamolweleko. Walombele kwi Yehoba ne kumubuula byonse byajinga ku muchima wanji. Kabiji wibikangako kukookela lujimuno lwa Yehoba. (Sala. 51:1-4) Kunungapo, wipelwile bingi kya kuba kechi waswangatu bya mololangako banabalumetu ne, bino ne banabakazhi. (1 Sam. 19:11, 12; 25:32, 33) Davida wafunjijileko ku bintu byo alubankanyanga kabiji watele muchima pa kwingijila Yehoba.
16. Ñanyi bintu bansemi babalume byo bakonsha kufunjilako kwi Davida?
16 Akimonai bansemi babalume byo bakonsha kufunjilako ku Mfumu Davida: Kechi mwafwainwa kwingijisha kutama bulume bwimupa Yehoba ne. Swainga inge mwalubankanya, kabiji ne kuswa inge bakwenu baingijisha Baibolo pa kwimololako. Inge ke mube bino, kisemi kyenu kikemunemeka pa kwipelula kwenu. Kabiji inge mubena kulombela pamo na kisemi kyenu, mubuulai Yehoba byonse biji ku muchima wenu, kabiji kisemi kyenu kyafwainwa kumona byo mwaketekela mwi Lesa. Kyakila pa byonse, nemekai mwingilo wa Yehoba kukila bintu byonse. (Mpitu. 6:6-9) Byubilo byenu byawama bo bupe bwanema bo mwakonsha kupa kisemi kyenu.
BANSEMI BABAKAZHI BYO BAKONSHA KUFUNJILAKO KWI MALIYA
17. Ñanyi mwingilo Yehoba ye apa bansemi babakazhi?
17 Yehoba wapa nsemi wamukazhi mwingilo wanema mu kisemi, kabiji wamupako luusa pa baana banji. (Maana 6:20) Byamba bansemi babakazhi ne byo boba byo bikobanga baana babo mu bwikalo bwabo bonse. (Maana 22:6) Akimonai bansemi babakazhi byo bakonsha kufunjilako kwi Maliya inanji Yesu.
18-19. Bansemi babakazhi bakonsha kufunjilako ka kwi Maliya?
18 Maliya wayukile bingi Binembelo. Onkao mambo, wanemekele bingi Yehoba kabiji wajinga na bulunda bwawama ne aye. Wipaine kunekenena mikambizho ya Yehoba, nangwa kya kuba’mba yavwangilemo kupimpula bwikalo bwanji bonse.—Luka 1:35-38, 46-55.
Inge nsemi wamukazhi wakooka nangwa wazhingila, wafwainwa kwibikako kumwesha butemwe ku ba mu kisemi kyanji (Monai jifuka 19) *
19 Anweba bansemi babakazhi mwakonsha kulondela byaunga Maliya mu mashinda avula. Mwakonsha kuba byepi? Kitanshi, mwafwainwa kwikala na bulunda bwakosa ne Yehoba kupichila mu kufunda Baibolo bunke bwenu ne kulomba kimye kyonse bunke bwenu. Kya bubiji, mwafwainwa kuswa kupimpulako byubilo byenu pa kuba’mba musangajike Yehoba ku muchima. Twambe bino, kampe bemukomeshe ku bansemi bazhingila bukiji ne kwamba byambo byatama ku baana babo. Kabiji kampe mulanguluka’mba kijitu bulongo bansemi kukomesha baana babo mu jino jishinda. Nangwatu inge mwafunda pe Yehoba byo akeba’mba mulamenga baana benu, kyakonsha kwimukatazha kwikala bakooka muchima ne kutekanya kikatakata inge baana benu bauba byatama saka mwakooka. (Efi. 4:31) Inge kyaikala bino, kyanema bingi kuketekela mwi Yehoba ne kulomba’mba emukwashe. Nsemi wamukazhi wa jizhina ja Lydia waambile’mba: “Bimye bimo inge mwanami wamulume wabula kunkookela, ndomba na mukoyo pa kuba’mba Lesa ankwashe kubula kumwambila saka nazhingila. Kimye kimo nchibikizha byambo ne kulomba kishinshi kuba’mba Yehoba ankwashe. Lulombelo lunkwasha kubula kuzhingila.”—Sala. 37:5.
20. Ñanyi lukatazho bansemi babakazhi bamo lo bapitamo, kabiji bakonsha kwilushinda byepi?
20 Lukatazho lukwabo bansemi babakazhi lo bakonsha kwikala nalo ke lwa kuba’mba kibakatazha kumwesha byo batemwa baana babo. (Titu. 2:3, 4) Bansemi bamo bebakomeshe ku bansemi babula kutemwa baana babo. Umvwe bansemi benu byo byo bemukomeshe, kechi mwafwainwa kwikala byo bajinga ne. Nsemi wamukazhi unekenena Yehoba wakonsha kufunda bya kumwesha butemwe ku baana banji. Nangwa kya kuba kyakonsha kumukatazha kupimpula milanguluko yanji ne jishinda jo obilamo bintu, bino wakonsha, kabiji inge wauba bino, ukamwenamo aye mwine ne kisemi kyanji.
TWAJIJILAI KUNEKENENA YEHOBA
21-22. Kwesakana na byaamba Isaya 65:13, 14, tumwenamo ka inge ke tunekenene Yehoba?
21 Mfumu Davida wayukile buwame buji mu kunekenena Yehoba. Wanembele’mba: “Malamuna afuma kwi Yehoba aoloka, asangajika muchima; mikambizho ya Yehoba yawama, ilengela muntu kumona kyeya. Kabiji ino mizhilo ijimunako kalume wenu; ne mu kwiilama, mufuma mfweto ikatampe.” (Sala. 19:8, 11) Lelo jino, tumona lupusano luji pa boba banekenena Yehoba ne boba bakana lujimuno lwanji lwa butemwe. Aba banekenena Yehoba ‘babijika na lusekelo na mambo a kusangalala.’—Tangai Isaya 65:13, 14.
22 Inge bakulumpe mu kipwilo, bansemi babalume ne bansemi babakazhi ke banekenene Yehoba, bwikalo bwabo buwama, mu bisemi byabo mwikala lusekelo, kabiji kipwilo kikwatankana. Kyakilamo kunema, basangajika muchima wa Yehoba. (Maana 27:11) Abino byo bituletela lusekelo lukatampe.
LWIMBO 123 Tukookelenga Lesa mu Bukishinka
^ jifu. 5 Uno mutwe waamba pa ene mambo o twafwainwa kunekenena Yehoba. Kabiji waamba ne pa bakulumpe mu kipwilo, bansemi babalume ne babakazhi byo bakonsha kufunjilako ku byaubile kinemanga Nehemiya, Mfumu Davida ne Maliya inanji Yesu pa kwingijisha luusa lwibapa Yehoba.
^ jifu. 1 KULUMBULULA BYAMBO: Byambo bya kuba’mba kunekenena ne kukookela byumvwanyika kutama ku bantu bo bakanjikizha kukookela muntu. Pano bino, bantu ba Lesa befuukwilapo abo bene kukookela Lesa. Onkao mambo, kechi bamona kunekenena Lesa amba kintu kyatama ne.
^ jifu. 7 Mazhina amo mu uno mutwe apimpulwa.
^ jifu. 62 KULUMBULULA BIPIKICHALA: Mukulumpe mu kipwilo ubena kwingijila pamo na mwananji wamulume kuwamisha mu Nzubo ya Bufumu byonkatu Nehemiya byo akwashisheko kushimukulula masakwa a Yelusalema.
^ jifu. 64 KULUMBULULA BIPIKICHALA: Nsemi wamulume ubena kulombela pamo na kisemi kyanji kwi Yehoba.
^ jifu. 66 KULUMBULULA BIPIKICHALA: Kalombwana wataya kimye kyabaya na kukaya makayo a pa kompyuta kwa kubula kupwisha mingilo yo afwainwa kwingila pa nzubo nangwa ya ku sukulu. Bainanji popo bafumatu ku nkito kabiji bakooka, bino bamufundako mu jishinda jawama kwa kubula kwingijisha ñambilo yatama.
