1-2. (a) Mambo ka Amagedonyi o yaikela sawakya wawama ku bantu ba Lesa? (b) Ñanyi mepuzho o tusakukumbula mu uno mutwe?

NANCHI mwakyumvwapo bantu na kwingijisha kyambo kya “Amagedonyi” pa kwamba pa nkondo ya mabomba ashinta nangwa pa bya malwa biponakotu bine nyi? Pakuba byamba Baibolo pa Amagedonyi byavwangamo sawakya wawama uleta lusekelo. (Lum. 1:3) Nkondo ya Amagedonyi kechi ikonauna bantu ne, pakuba ikebapulusha. Mu ñanyi jishinda?

² Baibolo umwesha kuba’mba nkondo ya Amagedonyi ikapulusha bantu kupichila mu kufumyapo bukalama bwa bantu. Ino nkondo ikapulusha bantu kupichila mu konauna babi ne kupokolola baoloka. Kabiji ikapulusha bantu kupichila mu kuzhikijila ntanda. (Lum. 11:18) Pa kuba’mba tumvwishe bino bishinka, twayai tukumbule ano mepuzho ana: Amagedonyi yo ika? Ñanyi bintu bikamweka Amagedonyi saka ikyangye kutendeka? Twakonsha kuba byepi pa kuba’mba tukekale pa boba bakapuluka pa Amagedonyi? Twakonsha kutwajijila byepi kwikala ba kishinka Amagedonyi byo yafwenya pepi?

3. (a) Kyambo kya “Amagedonyi” kilumbulula ka? (b) Kwesakana na byaamba Lumwekesho 16:14, 16, mambo ka o twakonsha kwambila’mba Amagedonyi kechi jizhina ja mpunzha ne?

³ Tangai Lumwekesho 16:14, 16. Kyambo kya “Amagedonyi” kitanwamotu jimo mu Binembelo, kabiji kyafuma ku kyambo kya Kihebelu kilumbulula “Mutumba wa Megido.” (Lum. 16:16; tubyambo twa munshi.) Megido wajinga muzhi wa mu Isalela. (Yosh. 17:11) Pano bino, Amagedonyi kechi jizhina ja mpunzha iji pano pa ntanda ne. Kino kyambo kilumbulula kimye “bamfumu  ba pano pa ntanda ponse” kyo bakebakonkanya pamo na kulwisha Yehoba. (Lum. 16:14) Pano bino, mu uno mutwe, tusakwingijisha kyambo kya “Amagedonyi” pa kwamba pa nkondo ikatendeka inge bamfumu ba pano pa ntanda bakebakonkanye pamo. Twayuka byepi kuba’mba Amagedonyi ilumbulula mpunzha ya kifwanyikizho? Kitanshi, kafwako mutumba uji na jizhina ja Megido ne. Kya bubiji, mpunzha ya Megido yakepa bingi kya kuba kechi bakonsha kukonkenako bonse “bamfumu ba pano pa ntanda ponse” ne mazhita abo a nkondo ne bilwilo byabo ne. Kya busatu, byonka byo tusakufunda mu uno mutwe, nkondo ya Amagedonyi ikatendeka kimye “bamfumu” ba pano pa ntanda kyo bakalukuka bantu ba Lesa bekala mwaya ntanda yonse.

4. Mambo ka Lesa o atumbijile nkondo ikatampe amba Megido?

⁴ Mambo ka Yehoba o atumbijile nkondo ikatampe amba Megido? Megido ne Kimpachiko kya Yezelela ajinga mapunzha ko balwilanga makondo avula. Pa bimye bimo, Yehoba wakwashishe bantu banji kushinda ano makondo. Kimye kimo, Lesa wakwashishe Mutonyi wa bena Isalela aye Balaka kushinda nzhita ya bena Kenana yo batangijilenga ku mukulumpe wa bashilikale aye Sisela. Balaka ne ngauzhi wa mukazhi Debola basanchijile Yehoba pa kwibakwasha kushinda mu jishinda ja kukumya. Baimbile’mba: “Tubangabanga mwiulu twalwile . . . ne Sisela. Kakola ka Kishonyi kebakumpwile.”—Mito. 5:19-21.

5. Nkondo ya Amagedonyi ikapusana byepi na nkondo yalwile Balaka?

⁵ Balaka ne Debola bapwishishe lwimbo wabo na bino byambo: “Onkao mambo, anweba Yehoba, balwanyi benu bonse bonaike, bino aba bemutemwa bekale nobe juba jisela na lukumo lwajo.” (Mito. 5:31) Kimye kya nkondo ya Amagedonyi, balwanyi ba Lesa bakebonauna, pakuba bantu batemwa Lesa bakebapulusha. Pano bino, paji lupusano lukatampe pa ano makondo abiji. Pa nkondo ya Amagedonyi, bantu ba Lesa kechi bakalwako ne. Kechi bakekalapo nangwa na kilwilo kimo ne. Bulume bwabo bukafuma mu kwikala ‘batekanya ne kuketekela’ mwi Yehoba ne mazhita anji a mwiulu.—Isa. 30:15; Lum. 19:11-15.

6. Yehoba ukashinda byepi balwanyi banji pa Amagedonyi?

⁶ Lesa ukashinda byepi balwanyi banji pa nkondo ya Amagedonyi? Wakonsha kwingijisha mashinda apusana-pusana. Wakonsha kwingijisha bitentanshi, mvula wa mabwe ne tupenyi. (Yoba 38:22, 23; Ezi. 38:19-22) Wakonsha kulengela balwanyi kwialukilamo bene na bene. (2 Moba 20:17, 22, 23) Kabiji wakonsha kwingijisha bamalaika kwipaya babi. (Isa. 37:36) Kana ukengijisha ñanyi bintu, kishinka ke kya kuba’mba Lesa ukashinda. Balwanyi banji bonse bakebonauna. Kabiji baoloka bonse bakebapulusha.—Maana 3:25, 26.

7-8. (a) Kwesakana na byaamba 1 Tesalonika 5:1-6, ñanyi kintu bantangi ba pano pa ntanda kyo bakabijika? (b) Mambo ka kino kyo bakabijika o kikekela bubela bwatama bingi?

⁷ “Juba ja Yehoba” jikafika inge babijikatu’mba “mutende ne luzhikijilo.” (Tangai 1 Tesalonika 5:1-6.) Pa 1 Tesalonika 5:2, “juba ja Yehoba” jilumbulula “malwa akatampe.” (Lum. 7:14) Tukayuka byepi kuba’mba malwa akatampe katataka atendeke? Baibolo witubuula’mba bantu bakabijikapo kintu kimo. Kino kyo bakabijika kyo kikekala kiyukilo kya kuba’mba malwa akatampe katataka atendeke.

⁸ Kino kyo bakabijika kyo kyokya kyaambijilwe jimo kuba’mba bakamba’mba “mutende ne luzhikijilo.” Mambo ka bantangi ba pano pa ntanda o bakabijikila bino? Nanchi ne bantangi ba bupopweshi nabo bakemvwangamo nyi? Byo kyamweka. Nangwa byonkabyo, twayuka  kuba’mba bandemona bo bakatundaika bantangi ba pano pa ntanda kubijika bino. Pano bino, buno bubela bukatama bingi mambo bukalengela bantu kulanguluka’mba bazhikijilwa, bino saka kwashalatu pacheche malwa akatampe kutendeka. Kya kine, “ponkapotu lonaiko lukebasolomokela, nobe bisanso bifikila mwanamukazhi waimita.” Nga bakalume ba Yehoba ba kishinka ki ka kikebamwekela? Na mambo a kuba’mba kechi bayuka jine juba jikatendekelapo malwa akatampe ne, bakakonsha kukumya inge kyamweka, pano bino, bakenengezhezha jimo.

9. Nanchi Lesa ukonauna ntanda ya kwa Satana yonse pa kimye kimotu nyi? Lumbululai.

⁹ Yehoba kechi ukonauna ntanda ya kwa Satana pa kimye kimotu byonka byo kyajinga mu moba a Nowa ne. Bino ukonauna ntanda ya kwa Satana mu bipungu bibiji. Patanshi, ukonauna Babilona Mukatampe, ko kuba’mba bupopweshi bwa bubela bonse. Kepo pa Amagedonyi akonauna ntanda yonse ya kwa Satana, kubikapo ne bamulwila ntanda, bashilikale ne bipamo bya busulu. Twayai twisambe bishinka byavula pa bino bintu bibiji byanema bikamweka.

10. Kwesakana na byaamba Lumwekesho 17:1, 6 ne 18:24, mambo ka Yehoba o akonawina Babilona Mukatampe?

¹⁰ “Luzhachisho lwa . . . pite mukatampe.” (Tangai Lumwekesho 17:1, 6; 18:24.) Babilona Mukatampe wauba bintu byavula bingi byaleta mwenga pa jizhina ja Lesa. Ufunjisha bya bubela pe Lesa. Nobe mwanamukazhi pite, bupopweshi bwa bubela bumwesha kuba’mba kechi bwa kishinka kwi Lesa ne, mambo bwichina kala na makafulumende a bantu. Bupopweshi bwa bubela buyanjisha bantu bayamo ne kwibajiila mali. Kabiji bwaichila mashi a bantu bavula, kubikapotu ne a bakalume ba Lesa. (Lum. 19:2) Yehoba ukonauna byepi Babilona Mukatampe?

11. “Lukinyama wachijisha” wimenako ka, kabiji Lesa ukamwingijisha byepi konauna Babilona Mukatampe?

¹¹ Yehoba ukengijisha “nsengo jikumi” ya “lukinyama wachijisha” konauna “pite mukatampe.” Uno lukinyama wa kifwanyikizho wimenako kipamo kya United Nations. Nsengo jikumi imenako makafulumende atundaika kino kipamo. Pa kimye kya Lesa kyatongolwa,  makafulumende a bantu akalukuka Babilona Mukatampe. ‘Bakumonauna ne kumuvuula’ kupichila mu kupukula bunonshi bwanji ne kusolola patoka byubilo byanji byatama. (Lum. 17:3, 16) Bakamonaunatu mu kimye kicheche, kabiji kino kikalengela boba bamutundaika kukumya bingi. Bakakumya mambo Babilona Mukatampe witota amba: “Amiwa nemfumu wa mukazhi uji pa jitanda, kabiji kechi nemwanamukazhi wafwilwa ne, kabiji kechi nkajilapo ne.”—Lum. 18:7, 8.

12. Ñanyi kintu Yehoba kyo akabula kaswisha bisaka bya bantu kuba, kabiji mambo ka?

¹² Lesa kechi ukaswisha bisaka bya bantu konauna bantu banji ne. Bantu banji batelwa pa jizhina janji, kabiji bakookela mukambizho wanji wa kufumamo mu Babilona Mukatampe. (Byu. 15:16, 17; Lum. 18:4) Kabiji baingila na ngovu kukwasha bakwabo kufumamo mu Babilona Mukatampe. Onkao mambo, bakalume ba Yehoba kechi bakapita “mu binkunka byanji ne.” Nangwa byonkabyo, lwitabilo lwabo lukesekwa.

13. (a) Gogi ye mu ka? (b) Kwesakana na byaamba Ezikyo 38:2, 8, 9, ki ka kikalengela Gogi kwiya ku mpunzha ya kifwanyikizho itelwa’mba Amagedonyi?

¹³ Kulukuka kwa Gogi. (Tangai Ezikyo 38:2, 8, 9.) Inge Yehoba waonauna bupopweshi bwa bubela, kukekalatu bupopweshi bumo pa ntanda. Bantu ba Yehoba bo bonkatu bakashalapo. Pano bino, Satana ukazhingila. Ukamwesha bukaji bwanji kupichila mu kwingijisha byambo bya bujimbijimbi bya bandemona, “byambo . . . byatama bya mipashi,” kutundaika bisaka bya bantu kukwatankana pamo ne kulukuka bakalume ba Yehoba. (Lum. 16:13, 14) Abino bisaka bya bantu bikakwatankana pamo byo bitelwa’mba “Gogi wa mu ntanda ya Magogi.” Kimye bisaka bya bantu kyo bikalukuka bantu ba Lesa, nkondo ya Amagedonyi popo ikatendeka.—Lum. 16:16.

14. Ñanyi kintu kikayuka Gogi?

¹⁴ Gogi ukaketekela mu “mu bulume bwa bantu,” ko kuba’mba mazhita a bashilikale. (2 Moba 32:8) Tukaketekelatu mwi Yehoba Lesa wetu, kabiji kino kikamweka nobe bumbulwa maana ku bisaka bya bantu. Mambo  ka? Mambo Babilona Mukatampe umweka nobe uji na bulume, bino balesa banji bakakankalwa kumupulusha ku “lukinyama” ne ku “nsengo [yanji] jikumi.” (Lum. 17:16) Onkao mambo, Gogi ukalanguluka’mba kechi kikakatazha kwitonauna ne. Ukalukuka bantu ba Yehoba “byonkatu makumbi byo avweta pa kyalo.” (Ezi. 38:16) Bino mu kimye kichechetu Gogi ukamona’mba witwezha mu kizumba kikatampe. Byonkatu byo kyamwekele kwi Felo pa Kalunga Kachila, Gogi naye ukayuka kuba’mba ubena kulwa ne Yehoba.—Lupu. 14:1-4; Ezi. 38:3, 4, 18, 21-23.

15. Kilishitu ukoba byepi pa nkondo ya Amagedonyi?

¹⁵ Kilishitu ne mazhita anji a mwiulu bakazhikijila bantu ba Lesa ne kuzhiya Gogi ne mazhita anji. (Lum. 19:11, 14, 15) Ki ka kikamwekela mwine mulwanyi wa Yehoba, aye Satana yenka ukajimbaika bisaka bya bantu kulukuka bantu ba Lesa pa Amagedonyi? Yesu ukakasa Satana ne bandemona banji ne kwibataya mu kalengwa kabula kupela, mo bakebashinkila pa myaka kiumbi.—Lum. 20:1-3.

16. (a) Tumwesha byepi amba ‘twayuka Lesa’? (b) Kimye kya nkondo ya Amagedonyi, ki ka kikamwekela bantu bayuka Yehoba?

¹⁶ Nangwa twabanda bukine nangwa twibakatataka, pa kuba’mba tukapuluke pa Amagedonyi, twafwainwa kumwesha’mba ‘twayuka Lesa’ ne kuba’mba “[tukookela] mambo awama a Nkambo yetu Yesu.” (2 Tesa. 1:7-9) ‘Tuyuka Lesa’ inge twayuka bintu byo atemwa, byo ashikwa ne byo akeba. Kabiji tumwesha’mba twayuka Lesa inge twamutemwa ne kumukookela ne kumupopwelatu aye yenka kwapwa. (1 Yoa. 2:3-5; 5:3) Inge twayuka Lesa, tumvwa bingi bulongo pa kuyuka’mba ‘twayukanyikwa kwi aye,’ kabiji kino kyo kiketulengela kupuluka pa Amagedonyi. (1 Ko. 8:3) Mu ñanyi jishinda? Na mambo a kuba’mba ‘kuyukanyikwa kwi aye’ kwakonsha kulumbulula kutalwa bulongo kwi Lesa.

17. “Kukookela mambo awama a Nkambo yetu Yesu” kulumbulula ka?

¹⁷ “Mambo awama a Nkambo yetu Yesu” avwangamo bukine bwafunjishanga Yesu butanwa  mu Mambo a Lesa. Tukookela mambo awama inge ke twiengijishe mu bwikalo bwetu. Kuno kukookela mambo awama kwavwangamo kutangizhako mwingilo wa Lesa mu bwikalo bwetu ne kusapwila pa Bufumu bwa Lesa. (Mat. 6:33; 24:14) Kabiji kwavwangamo kutundaika balongo ba kwa Kilishitu bashingwa byo babena kwingila mwingilo wanema bingi.—Mat. 25:31-40.

18. Balongo ba kwa Kilishitu bashingwa bakafweta byepi mikooko ikwabo pa byo bebatundaika?

¹⁸ Bakalume ba Lesa bashingwa katatakatu bakafwete “mikooko ikwabo” pa byo bebakwasha. (Yoa. 10:16) Mu ñanyi jishinda? Nkondo ya Amagedonyi saka ikyangye kutendeka, ba 144, 000 bonse bakaya mwiulu ne kwikala bilengwa bya mupashi bibula kufwa. Kepo bakekala lubaji lwa mazhita a mwiulu akavingakanya Gogi ne kuzhikijila “jibumba jikatampe” ja bantu baji nobe mikooko. (Lum. 2:26, 27; 7:9, 10) Kya kine, jibumba jikatampe jikasangalala bingi na mambo a kuba’mba batundaikilenga bakalume ba Yehoba bashingwa saka bakiji pano pa ntanda.

19-20. Nangwa kya kuba tupita mu makatazho, twakonsha kutwajijila byepi kwikala ba kishinka Amagedonyi byo yafwenya kala pepi?

¹⁹ Mu ano moba akatazha, bantu ba Yehoba bavula babena kupita mu makatazho avula. Nangwa byonkabyo, twakonsha kuchinchika na lusekelo. (Yako. 1:2-4) Kintu kimo kiketukwasha bingi ke kulomba na mukoyo. (Luka 21:36) Kechi twafwainwa kupelelatu pa kulomba na mukoyo ne, twafwainwa kutanganga Mambo a Lesa ne kulanguluka-langulukapo, kino kyavwangamo kutanga bungauzhi bwa mu Baibolo bwaamba pa bintu bikamweka katataka. (Sala. 77:12) Inge twauba bino byonse, kubikapo ne mwingilo wa kusapwila, tukakosesha lwitabilo ne luketekelo lwetu.

²⁰ Akifwanyikizhai byo mukasangalala kimye kyo bakazhiya Babilona Mukatampe ne kimye kikapwa nkondo ya Amagedonyi. Kyakilamo kunema, fwanyikizhai byo mukasangalala kimye bantu bonse kyo bakanemeka jizhina ja Lesa ne bumfumu bwanji. (Ezi. 38:23) Kya kine, Amagedonyi ke sawakya wawama bingi ku boba bayuka Lesa, bakookela Mwananji, kabiji bakachinchika kufika ne ku mpelo.—Mat. 24:13.