1-2. Kinembelo kya Musapwishi 11:6 kyakwatankana byepi na mwingilo wa kusapwila mambo awama a Bufumu?

MU BYALO bimo, bantu batambwila mambo awama na lusekelo. Bakebesha bingi kumvwa mambo awama. Pakuba mu byalo bikwabo, bantu bavula kechi batako muchima kufunda pe Lesa nangwa pa Baibolo ne. Nga ku mpunzha yenu kiji byepi? Nangwa baswa nangwa bakana, Yehoba ukeba’mba tutwajijile kusapwila kufikatu ne kimye kyo akamba’mba kyapwa.

² Kimye kyatongola Yehoba inge kyafika, mwingilo wa kusapwila ukapwa kabiji ‘mpelo ikafika.’ (Mat. 24:14, 36) Pa kino kimye twakonsha kukookela byepi mukambizho wa kuba’mba “kange mwikaletu ne”? *—Tangai Musapwishi 11:6.

3. Tusakwisamba pa ka mu uno mutwe?

³ Mutwe wafumako waambile pa bintu bina byo twafwainwa kuba pa kuba’mba twingilenga bulongo mwingilo wa “kukwata bantu.” (Mat. 4:19) Uno mutwe waamba pa mashinda asatu akonsha kwitukwasha kutwajijila kwingila mwingilo wa kusapwila nangwa kya kuba tubena kupita mu makatazho. Tusakufunda buneme bwa (1) kuta muchima pa mwingilo wa kusapwila, (2) kutekanya, ne (3) kwikala na lwitabilo lwakosa.

4. Mambo ka o twafwainwa kutela muchima pa mwingilo witupa Yehoba?

⁴ Yesu waambijile jimo bintu bikamwekanga mu moba a kupelako, ne kuba’mba bino bintu bikalengela baana banji ba bwanga kuleka kuta muchima pa mwingilo wa kusapwila. Wabuujile baana  banji ba bwanga ‘kulaba ne kukenkenta.’ (Mat. 24:42) Lelo jino, kuji bintu byavula bingi byakonsha kwitulabika bipasha na byalengejile bantu bajingako mu moba a Nowa kubula kuta muchima kuji lujimuno lwapainenga Nowa. (Mat. 24:37-39; 2 Pe. 2:5) Onkao mambo, twafwainwa kuta muchima pa mwingilo witupa Yehoba.

5. Kinembelo kya Byubilo 1:6-8 kimwesha byepi kuba’mba mwingilo wa kusapwila ukakumbana mu byalo byonse?

⁵ Lelo jino, twafwainwa kuteshako bingi muchima ku mwingilo wa kusapwila pa Bufumu. Yesu waambijile jimo kuba’mba baana banji ba bwanga bakatwajijila kusapwila inge aye wafwa, kabiji bakengila kukila ne byo aingijile. (Yoa. 14:12) Yesu byo afwile, baana banji ba bwanga bamo babwelele ku busulu bwabo bwa masabi. Byo asangwilwe, Yesu waubile kya kukumya kupichila mu kukwasha baana banji ba bwanga bamo kukwata masabi avula bingi. Byo aubile kino kya kukumya, wakoseshe kishinka kya kuba’mba kusapwila ne kufunjisha bantu kwikala baana ba bwanga ye mwingilo wanemene bingi kukila mingilo ikwabo. (Yoa. 21:15-17) Kabiji byo kwashajiletu pacheche kuba’mba aye mwiulu, Yesu wabuujile baana banji ba bwanga amba bakengila mwingilo wa kusapwila mu byalo bikwabo kechi mu Isalela monkatu ne. (Tangai Byubilo 1:6-8.) Byo papichile myaka, Yesu wamwesheshe mutumwa Yoano kimwesho kya bintu bikamwekanga “mu juba ja Nkambo.” * Kintu kimo Yoano kyo amwene ke malaika wajinga na “mambo awama a myaka ne myaka” a kusapwila “ku bisaka bya bantu byonse ne ku mikoka yonse ku ba njimi yonse ne ku mitundu yonse ya bantu.” (Lum. 1:10; 14:6) Kino kimwesha’mba kyaswa muchima wa Yehoba ke kya kuba’mba twingilenga mwingilo mukatampe wa kusapwila kufikatu ne byo akapwa.

6. Ñanyi kintu kitukwasha kutwajijila kuta muchima pa mwingilo wa kusapwila?

 ⁶ Twakonsha kuta muchima pa mwingilo wa kusapwila inge ke tulanguluke pa bibena kuba Yehoba. Ubena kwitupa kajo ka ku mupashi kavula bingi, ko kuba’mba mabuku o bapulinta ne aji pa Intaneti, byambo byo bakopela jimo ne mavidyo, ne TV wa pa Intaneti. Akilangulukai pa kino: Pa keyala wetu wa pa Intaneti paji bibaaba ne mabuku mu milaka kukila pa 1,000. (Mat. 24:45-47) Bantu mu ntanda baabenamo na mambo a kutundaika bipanyi bya bumulwila ntanda byapusana-pusana, kwikala mu mabumba a bupopweshi apusana-pusana, kabiji bakwabo banonka, bino bakwabo bayanda. Pano bino, bakalume ba Lesa bakila pa 8 milyoni bakwatankana mu bwanabwankazhi bwa ntanda yonse. Pa Kitanu pa 19 April, 2019, Bakamonyi mwaya ntanda yonse bakwatankene na kwisamba kinembelo kya juba. Pa jonkaje juba mabanga, bantu 20,919,041 bakonkene pamo ku Kivuluko kya lufu lwa kwa Yesu. Inge twalanguluka pa munema ye tuji nanji wa kwimwena kya kukumya kibena kubiwa mu ano moba ne kwivwangamo, kitutundaika kutwajijila kuta muchima pa mwingilo wa Bufumu.

7. Kulondela mu ngayo ya kwa Yesu kwitukwasha byepi kutwajijila kuta muchima pa mwingilo wa kusapwila?

⁷ Kintu kikwabo kyakonsha kwitukwasha kuta muchima pa mwingilo wa kusapwila, ke kulondela mu ngayo ya kwa Yesu. Kechi waswishishepo kintu nangwa kimo kumulengela kubula kushimuna bukine ne. (Yoa. 18:37) Kechi wajimbaikilwe kimye Satana kyo amumwesheshe “bufumu bonse bwa pano pa ntanda ne lukumo lwabo” ne. Kabiji kechi waswile kimye bantu kyo bakebelenga kumukwata’mba ekale mfumu ne. (Mat. 4:8, 9; Yoa. 6:15) Kechi wajinga na muchima wa kukebesha bunonshi, nangwa kumvwa moyo kimye kyo bamwimenejile ku ntundwa ne. (Luka 9:58; Yoa. 8:59) Inge lwitabilo lwetu lwaesekwa, twakonsha kutwajijila kuta muchima pa mwingilo wa kusapwila inge twavuluka lujimuno lwapaine mutumwa Paulo. Watundaikile bakwabo bena Kilishitu kulondela mu ngayo ya kwa Yesu pa kuba’mba babule “kukooka ne kulefulwa.”—Hebe. 12:3.

8. Kutekanya kulumbulula ka, kabiji mambo ka o kwanemena kikatakata luno?

⁸ Kutekanya ke kubula kulukusha muchima pa kupembelela lupimpu. Twafwainwa kutekanya inge tubena kupembelela bintu byatama kuba’mba bipimpulwe nangwa inge tubena kutengela kufika kwa kintu kyo twapembelela pa kimye kyabaya. Ngauzhi Habakuka wakebeshe bingi kuba’mba byubilo bya bukapondo byajinga mu Yuda bipwe. (Ha. 1:2) Baana ba bwanga ba kwa Yesu baketekejilenga’mba Bufumu “busakumweka ponkapotu” ne kwibapokolola mu lumanamo lwibamanyikilenga bufumu bwa bena Loma. (Luka 19:11) Ne atweba tubena kutengela kimye Bufumu bwa Lesa kyo bukafumyapo bubi bonse ne kuleta ntanda ipya ya bololoke. (2 Pe. 3:13) Nangwa byonkabyo, twafwainwa kutekanya ne kupembelela kimye kyatongola Yehoba. Langulukai pa mashinda amo Yehoba mo etufunjishisha butekanye.

9. Ñanyi bintu bimo bimwesha’mba Yehoba watekanya?

⁹ Yehoba ye mwine ye tufunjilako butekanye. Wapele Nowa kimye kyabaya kuba’mba afiike bwato ne kwikala “musapwishi wasapwilanga bololoke.” (2 Pe. 2:5; 1 Pe. 3:20) Yehoba watelekelenga kimye Abalahama kyo azhinaukilenga kyo afuukwilepo kya konauna bangikazhi ba mu mizhi yatamine bingi ya Sodoma ne Gomola. (Nte. 18:20-33) Pa myaka yavula, Yehoba wamwesheshe butekanye bukatampe ku kisaka kyabujile bukishinka kya bena Isalela. (Ne. 9:30, 31) Tubena kwimwena butekanye bwa Yehoba ano moba byo apana kimye ku bantu bonse bo akeba kwikala balunda nanji kuba’mba “balapile.” (2 Pe. 3:9; Yoa. 6:44; 1 Timo. 2:3, 4)  Butekanye bwa Yehoba bwitulengela ne atweba kutekanya byo twatwajijila kusapwila ne kufunjisha. Kabiji witufunjisha kupichila mu kimwesho kyanembwa mu Mambo anji.

10. Kinembelo kya Yakoba 5:7, 8, kitufunjishapo ka pa njimi?

¹⁰ Tangai Yakoba 5:7, 8. Kimwesho kya njimi ujima bijimwa kitufunjisha byo twafwainwa kwikala batekanya. Kya kine, bijimwa bimo bikoma bingi lubilo. Pano bino, bijimwa byavula, kikatakata bipangwa, papita kimye pa kuba’mba bikome. Mu Isalela, papitanga bañondo batanu na umo pa kuba’mba kajo kapye. Banjimi bakusanga nkunwa mvula mutanshi inge wanokatu, kabiji banowanga kajo kimye kinoka mvula wa kupelako kimye kya mwela wa mebele. (Mako 4:28) Onkao mambo, kyanema bingi kulondela butekanye bwa njimi. Pano bino, kechi kyapeela kuba bino ne.

11. Butekanye buketukwasha byepi mu mwingilo?

¹¹ Javula bantu bambulwa kulumbuluka bakeba kumona bukiji bintu bifuma mu mingilo yabo. Pano bino, inge tukeba bijimwa byetu kukoma ne kupanga bipangwa, twafwainwa kutwajijila kujimaunamo, kujimba, kusekwila, ne kutekezha. Ne mwingilo wa kufunjisha bantu kwikala baana ba bwanga naye ukebewa kwingila na ngovu. Papita kimye pa kuba’mba tukwashe bo tufunjisha Baibolo kuleka misalululo ne kwikala na butemwe. Butekanye buketukwasha kubula kubwela panyuma inge bantu babula kutako muchima ku byo twamba. Nangwatu inge bantu baswa kuteleka kwi atweba, napotu twafwainwa kutekanya. Kechi twakonsha kukanjikizha muntu ye tufunjisha Baibolo kwikala na lwitabilo ne. Bimye bimo, ne baana ba bwanga ba kwa Yesu kechi bakwatakanyanga bukiji byo afunjishanga ne. (Yoa. 14:9) Twayai tuvulukenga kuba’mba twakonsha kubyala ne kutekezha, bino Lesa ye wiikomesha.—1 Ko. 3:6.

12. Twakonsha kumwesha byepi butekanye pa kusapwila ku balongo betu babula kwitabila?

¹² Kyakonsha kukatazha bingi kumwesha butekanye pa kusapwila ku balongo betu babula  kwitabila. Jifunde jiji pa Musapwishi 3:1, 7 jakonsha kwitukwasha. Jaamba’mba: “Kuji . . . kimye kya kuzhindama ne kimye kya kwamba.” Byubilo byetu byawama byakonsha kushimuna bukamonyi, pano bino, twafwainwa kwinengezha kimye kyonse kusapwila bukine. (1 Pe. 3:1, 2) Twafwainwa kutekenya bantu bonse, kubikapotu ne balongo betu pa kwibasapwila ne kwibafunjisha na mukoyo.

13-14. Bañanyi bamwesheshe butekanye bo twafwainwa kufunjilako?

¹³ Tufunjilako bya kumwesha butekanye ku bantu ba kishinka banembwa mu Baibolo ne ba mu ano moba. Habakuka wakebeshe bingi kuba’mba bubi bupwe, bino wamwesheshe butekanye byo aambile’mba: “Nkatwajijila kwimana pa kifulo kyami po nsopela.” (Ha. 2:1) Mutumwa Paulo waambile’mba wakebeshe bingi “kupwisha” mwingilo wanji. Pano bino, watekenye ne kutwajijila “kushimuna bulongo mambo awama.”—Byu. 20:24.

¹⁴ Langulukai pa ba mulume ne mukazhi bapwishishe sukulu wa Gileada bo batumine mu kyalo mwakepa Bakamonyi kabiji muji bantu bavula babula kwitabila mu bupopweshi bwa bwina Kilishitu. Bantu bachechetu bo baswilenga kufunda Baibolo. Pakuba bakwabo mo bapwishishe sukulu wa Gileada bayile na kwingijila mu byalo bikwabo bebatuminanga masawakya amwesheshenga kuba’mba bafunjishenga Baibolo ku bantu bavula bingi. Nangwa kya kuba mu nyaunda yabo bantu bachechetu bo baswilenga kufunda Baibolo, bino bano ba mulume ne mukazhi batwajijile kusapwila saka batekanya. Byo baingijile mwingilo wa kusapwila pa myaka itanu na isatu mu ino mpunzha yamwekelenga nobe yakatazha bingi, basangalele bingi pa kumona umo ye bafunjishanga Baibolo wabatizhiwa. Nga ano mashimikila a bantu bajingako kala ne ba mu ano moba abena kwitufunjishapo ka? Bano bantu ba kishinka kechi baubile bukope nangwa kwikalatu kwa kubula kwingila ne, kabiji Yehoba wibapesheshe pa butekanye bwabo. Onkao mambo, twayai tutwajijile “kulondela boba baswana bintu byo alayile Lesa na mambo a lwitabilo ne na butekanye bwabo.”—Hebe. 6:10-12.

15. Mu ñanyi jishinda jimo lwitabilo mo lwitulengela kutwajijila kwingila mwingilo wa kusapwila?

¹⁵ Twaitabila mu byambo byo tusapwila. Onkao mambo, tukebesha kubuulako bantu bavula. Twaketekela mu milaye iji mu Mambo a Lesa. (Sala. 119:42; Isa. 40:8) Twimwena kufika kwa bungauzhi bwa mu Baibolo mu ano moba etu. Tubena kwimwena bantu byo babena kupimpula bwikalo inge batendeka kulondela lujimuno lwa mu Baibolo. Abino bishinka bitulengela kushiinwa kuba’mba bantu bonse bafwainwa kumvwa ano mambo awama a Bufumu.

16. Kwesakana na byaamba Salamo 46:1-3, lwitabilo mwi Yehoba ne Yesu lwitukwasha byepi kutwajijila kusapwila?

¹⁶ Kabiji tuji na lwitabilo mwi Yehoba, mwine mwina byambo byo tusapwila, ne mu yewa ye asala kwikala Mfumu wa Bufumu bwanji, aye Yesu. (Yoa. 14:1) Nangwatu tupite mu bintu bya mutundu ka, Yehoba ukatwajijila kwikala kya kufyamamo kabiji bulume bwetu. (Tangai Salamo 46:1-3.) Kabiji twashiinwa kuba’mba Yesu ubena kutangijila mwingilo wa kusapwila saka aji mwiulu, kwingijisha bulume ne luusa lwamupa Yehoba.—Mat. 28:18-20.

17. Ambaipo kimo kyamwekele kimwesha kuba’mba twafwainwa kutwajijila kusapwila?

¹⁷ Lwitabilo lwitulengela kuketekela kuba’mba Yehoba uketupesha pa kwibikako kwetu. Bimye bimo wakonsha kwitupesha ne mu mashinda o twabula kuketekela. (Sapwi. 11:6) Pa juba pa juba, bantu bavula bingi beya po tutanchika mabuku etu. Nanchi jino jishinda  jibena kwingila bulongo nyi? Ee jibena kwingila. Mu Mwingilo Wetu wa Bufumu wa November 2014 mwajinga sawakya waambile pa mwana wa sukulu umo wa pa sukulu mukatampe wakebelenga kunemba bishinka bimo pa Bakamonyi ba kwa Yehoba. Kechi wataine Nzubo ya Bufumu ne, bino wamwene ka tebulu po batanchikile mabuku pa sukulu, kabiji wataine mabuku o akebelenga pa kuba’mba anembe byambo byo akebelenga. Mu kuya kwa kimye uno mwana wa sukulu waikele musapwishi wabatizhiwa kabiji luno ke painiya wa kimye kyonse. Akino kyamwekele kitutundaika kutwajijila kusapwila mambo kisolola kuba’mba kukiji bantu babena kukeba kumvwa byambo bya Bufumu.

18. Mambo ka o twashiinwa amba mwingilo wa kusapwila pa Bufumu ukapwa pa kimye kyatongola Yehoba?

¹⁸ Twakonsha kushiinwa kuba’mba mwingilo wa kusapwila pa Bufumu ukapwa pa kimye kyafwainwa. Langulukai pa kyamwekele mu moba a Nowa. Yehoba wamwesheshe kuba’mba ulama kimye. Pa myaka kukila pa 120 Yehoba watongwejile jimo kimye kikeshilapo Muyulo. Byo papichile myaka, Yehoba wapele Nowa mwingilo wa kufiika bwato. Kampe saka kwashala myaka 40 nangwa 50 Muyulo kutendeka, Nowa watwajijile kwingila na ngovu. Nangwa kya kuba bantu bakainenga kuteleka ku byambo byo asapwijilenga, aye watwajijile kusapwila byambo bya lujimuno kufikatu ne kimye Yehoba kyo amwambijile kutwezha banyama mu bwato. Kepo pa kimye kyafwainwa, ‘Yehoba washinkile kinzhilo.’—Nte. 6:3; 7:1, 2, 16.

19. Ñanyi bintu byawama byo tubena kutengela kulutwe inge twatwajijila kwingila?

¹⁹ Katatakatu Yehoba akalekeshe mwingilo wa kusapwila pa Bufumu, kabiji ukonauna ntanda yatama ya kwa Satana ne kuleta ntanda ipya mukekala bantu bakookela Lesa. Byo tubena kupembelela kino kimye, twayai tulondelenga Nowa, Habakuka, ne bakalume ba Lesa ba mu ano moba batwajijila kwingila. Twayai tute muchima pa mwingilo wa kusapwila, tutwajijile kutekanya ne kukosesha lwitabilo lwetu mwi Yehoba ne mu milaye yanji.