Kino kyepelo kyaamba’mba: “Inge mwamona mu kyalo kimo amba babena kuyanjisha balanda, kabiji baangata na lupata buchibamambo bwaoloka ne bololoke, kechi mukumye ne; mambo mukulumpe bamutala ku wamukila, kabiji ko baji ne bakijishatu bebakila bonse babiji.”—Sapwi. 5:8, Buku wa Lesa.

Mu ndangulukilo yetu ya bumuntu, bino byambo byakonsha kumvwanyika nobe bibena kwambatu pa bantu baji mu makafulumende. Pano bino, inge twalangulukapo bulongo, kino kyepelo kibena kwamba ne pe Yehoba. Kino kishinka kyafwainwa kwitutekenesha bingi.

Kinembelo kya Musapwishi 5:8 kyaamba pa kalama umanyika muyanji ne kubula kumuchibila mambo mo aolokela. Kabiji kwakonsha kwikala ne bantu bakwabo baji pa bifulo bikatampe. Bino kyatamakotu ke kya kuba’mba mu makafulumende a bantu, bonse baji pa bifulo bakonsha kutemwa bingi mazhikakanwa, kabiji bayanji bafwainwa kutwajijila kutangijilwa na bano bakalama.

Pano bino, nangwa kya kuba kibena kumweka nobe bunga bwapwila pa mpuki, kitutekenesha bingi pa kuyuka’mba Yehoba ‘ubena kwibatala’ bano bakulumpe ba mu makafulumende a bantu. Twakonsha kulomba Lesa kwitukwasha ne kumutwika bisendwa byetu. (Sala. 55:22; Fili. 4:6, 7) Twayuka’mba “meso a Yehoba atalatala pano pa ntanda ponse kuba’mba amweshe bulume bwanji na mambo a boba bamuketekela na muchima wabo yense.”—2 Moba 16:9.

Onkao mambo, kinembelo kya Musapwishi 5:8 kituvululamo bimweka mu ntanda mo twikala ne kuba’mba kuji uji na luusa lwakila bonse. Kyakilamo kunema, kino kyepelo kituvululamo kuba’mba Yehoba ye mwine wakila, kya kine, ye uji na luusa lukatampe. Ye ubena kulama kupichila mu Mwananji, Yesu Kilishitu, Mfumu wa Bufumu bwanji. Lesa wa Bulume Bonse ubena kwibatala bonse ne kumona byonse bibena kubiwa, kabiji kechi uji na misalululo ne. Ne Mwananji naye byo byo aji.