1. Banyenga bengila ñanyi mingilo mu jibumba ja Lesa, kabiji ñanyi makatazho apitamo bavula? (Monai kipikichala kya pa nkupiko.)

TUJI bingi na lusekelo pa kwikala na banyenga bavula bengila na ngovu mu kipwilo. Bakumbulapo pa kupwila, kabiji bengila mwingilo wa kusapwila. Bakwabo bengilako mwingilo wa kuwamisha Mazubo a Bufumu, kabiji bamwesha’mba bata muchima balongo ne banyenga mu kipwilo. Pano bino, bapita mu makatazho. Bamo babena kulama bansemi bakoma. Bakwabo bebakanya kwingijila Lesa ku balongo babo. Kabiji bakwabo babena kukomesha baana bunke bwabo, kabiji bengila na ngovu kwibakebela bya mu bwikalo.

2. Mambo ka o twafwainwa kwibikako kutundaika banyenga yetu?

² Mambo ka o twafwainwa kutundaikilanga banyenga? Mambo bantu mu ntanda kechi banemeka banabakazhi ne. Kabiji Baibolo witutundaika kwibakwasha. Mutumwa Paulo wabuujile kipwilo kya mu Loma kutambwila Fibe ne ‘kumukwasha mu byonse byo akajilwe.’ (Loma 16:1, 2) Na mambo a kuba wajinga Mufaliseo, kyamweka Paulo naye kechi wanemekanga banabakazhi ne. Pano byo aikele mwina Kilishitu, watendekele kulondela Yesu ne kunemeka banabakazhi ne kwibobila kifyele.—1 Ko. 11:1.

3. Yesu waubanga byepi na banabakazhi, kabiji wamonanga byepi banabakazhi baubanga kyaswa muchima wa Lesa?

³ Yesu wanemekele banabakazhi bonse. (Yoa. 4:27) Kechi wamonanga banabakazhi byonka byo bebamonanga ku bantangi ba bupopweshi bwa Bayudea bajingako pa kyokya kimye ne. Buku umo waamba’mba: “Yesu kechi waambilepo kyambo nangwa kimo kyamwesheshenga’mba walengulwile banabakazhi ne.” Bino Yesu wanemekele bingi banabakazhi baubanga kyaswa muchima wa Shanji. Wibatelanga’mba banyenga kabiji bonse banabalume ne banabakazhi wibamonanga’mba ke kisemi kyanji kya ku mupashi.—Mat. 12:50.

4. Tusakwisamba pa ka mu uno mutwe?

 ⁴ Yesu kimye kyonse wakwashanga banabakazhi baingijilanga Lesa. Wibamwesheshe’mba banema kabiji wibalamwinangako. Twayai twisambe byo twakonsha kulondela Yesu pa kukwasha banyenga.

5. Mambo ka o kyakonsha kukatezha banyenga bamo kupwanañana na bakwabo?

⁵ Atweba bonse, balongo ne banyenga tukeba bantu ba kupwanañana nabo. Pano bino, bimye bimo, banyenga kibakatazhako kutaana ba kupwanañana nabo. Mambo ka? Akyumvwai byaambapo bamo. Nyenga wa jizhina ja Jordan * waambile’mba, “Na mambo a kuba’mba nemuzhike, javula nkankalwa kumona ba kupwanañana nabo kabiji mmona nobe kechi nanema mu kipwilo ne.” Painiya wavilukijile ku mpunzha ikwabo na kwingijilako mwingilo wa kusapwila aye Kristen waambile’mba: “Inge popo wavilukilatu mu kipwilo, wakonsha kumona nobe ujitu bunke.” Ne balongo bamo nabo byo byo bomvwa byonkabye. Kabiji aba baji mu bisemi byaabenamo bupopweshi kyakonsha kwibakatazha kukwatankana na bisemi byabo, kabiji bakonsha kumona nobe betolwela kufuma ku balongo ne banyenga mu kipwilo. Banyenga bamo bekalatu pa mazubo abo na mambo a kukolwa, nangwa na mambo a kulama wa mu kisemi wakolwa. Kino kyakonsha kwibalengela kumona nobe bajitu bunke. Ba Annette baambile’mba: “Nkankalwa kuya na kutanwa pamo na balongo ne banyenga na mambo a kuba’mba mbena kulama ba mama bakolwa.”

6. Kwesakana na byaamba Luka 10:38-42, Yesu wakwashishe byepi Mata ne Maliya?

⁶ Yesu wapwanañananga na banabakazhi bapopwelanga Lesa, kabiji wajinga mulunda nabo wa kine. Langulukai pa bulunda bo ajinga nabo ne Maliya ne Mata, kabiji bano banabakazhi babiji bajinga bazhike. (Tangai Luka 10:38-42.) Yesu walengejile bano banabakazhi kukasuluka kupichila mu byo aambanga ne byo aubanga. Maliya wakasulukile kwikala kwipi ne Yesu, mambo wajinga mwananji wa bwanga. * Kabiji Mata byo aumvwine kutama ku muchima na mambo a kuba’mba Maliya kechi wamukwashishengako mingilo ne, wakasulukile kubuula Yesu byajinga ku muchima wanji. Yesu wakwashishe bano banabakazhi bonse babiji kufunda bintu byanema. Kabiji wamwesheshe’mba wibatele bingi muchima bano banabakazhi ne mulongo wabo Lazalasa kupichila mu kwiya na kwibafwakesha pa bimye bikwabo. (Yoa. 12:1-3) Onkao mambo, Lazalasa byo akolelwe bingi, Maliya ne Mata bayukile’mba bafwainwe kulomba bukwasho kwi Yesu.—Yoa. 11:3, 5.

7. Ñanyi jishinda jimo jo twakonsha kutundaikilamo banyenga?

⁷ Banyenga bavula, kupwila ko kwibapa kimye kya kupwanañana na bapopweshi bakwabo. Onkao mambo, twafwainwa kwingijishanga bino bimye kwibatambwila, kwisamba nabo, ne kwibakwasha kuyuka’mba twibata muchima. Ba Jordan bo twaambapo kala baambile’mba: “Kintundaika bingi inge bakwetu bansanchila pa mikumbu yami kimye kya kupwila, nangwa banengezha kuba’mba ñingile nabo mwingilo wa kusapwila, nangwatu kunkwasha mu mashinda akwabo.” Twafwainwa kwibamweshanga banyenga yetu kuba’mba twibata muchima. Ba Kia baambile’mba: “Inge nakankalwa kuya na kupwila, ngyuka’mba balongo ne banyenga basakuntumina foni nangwa tubyambo kukeba kuyuka inge njitu bulongo. Kino kindengela kuyuka’mba balongo ne banyenga banta bingi muchima.”

8. Mu ñanyi mashinda akwabo mo twakonsha kulondela Yesu?

 ⁸ Byonka byaubanga Yesu, ne atweba twafwainwa kumonangapo kimye kya kupwanañana pamo na banyenga. Twakonsha kunengezhapo kajo ku nzubo yetu ne kwibetako nangwa kubila pamo bya kisangajimbwe. Inge twauba bino, twafwainwa kumona kuba’mba tubena kwamba byambo bya lutundaiko. (Loma 1:11, 12) Bakulumpe mu kipwilo bafwainwa kwikala na muchima wa kwa Yesu. Yesu wayukile kuba’mba kikakatazha bamo kwikala bazhike nangwa bakatanda. Pano bino, waambile’mba kusongolwa nangwa kusema baana kechi ko kulengela bantu kwikala na lusekelo lwa myaka ne. (Luka 11:27, 28) Pakuba lusekelo lwa kine lufuma mu kutangizhako mwingilo wa Yehoba.—Mat. 19:12.

9. Bakulumpe mu kipwilo bakonsha kuba byepi pa kuba’mba bakwashenga banyenga?

⁹ Kikatakata bakulumpe mu kipwilo bafwainwa kumonanga banabakazhi bena Kilishitu amba banyenga yabo ne bainabo ba mwi nkambo. (1 Timo. 5:1, 2) Bakulumpe mu kipwilo bafwainwa kumonangapo kimye kupwila saka kukyangye kutendeka ne pa kupwisha kupwila kya kwisambako na banyenga. Ba Kristen baambile’mba: “Mukulumpe mu kipwilo umo wamwene kuba’mba napayankana bingi kabiji wakebele kuyuka byajinga mutanchi wami. Nasanchile bingi pa byo amwesheshe’mba wanta muchima.” Inge  bakulumpe mu kipwilo ke besambe na banyenga kimye kyonse, bamwesha’mba bebata muchima. * Ba Annette bo twaambapo kala baambile pa kyawama kimo kifumamo mu kwisamba na bakulumpe kimye kyonse. Baambile’mba: “Kinkwasha kwibayuka bulongo, kabiji nabo bangyuka bulongo. Onkao mambo, inge naikala na lukatazho kimpelela kuya na kulomba bukwasho kwi abo.”

10. Ki ka kyakonsha kukwasha banyenga yetu kwikala na lusekelo?

¹⁰ Atweba bonse, banabalume ne banabakazhi, twikala na lusekelo inge bakwetu bamona bya bupe byo tuji nabyo nangwa mingilo yo twingila ne kwitusanchila. Pakuba inge kafwako witusanchilapo pa byo tuba ne, twakonsha kulefulwa. Nyenga painiya wa jizhina ja Abigail waswile’mba bimye bimo umona’mba bantu kechi bamuyuka ne. Waambile’mba: “Bammonatu amba nyenga ya kwa kananga nangwa’mba mwana bakananga kyapwa. Kimwekatu nobe bantu kechi bammona ne.” Pano akimonai byaambile nyenga wa jizhina ja Pam. Waingijile bumishonale pa myaka yavula bingi saka ajitu muzhike. Mu kuya kwa kimye, wabwelele kwabo na kulama bansemi banji. Luno uji na myaka kukila pa 70, kabiji watwajijila bupainiya. Nyenga Pam waambile’mba, “Kintu kinkwasha bingi ke kuyuka’mba bakwetu bansanchila pa mwingilo wami.”

11. Yesu wamwesheshe byepi amba wanemekele banabakazhi bamulondelanga kimye kyo aingijilenga mwingilo wanji?

¹¹ Yesu wasanchilanga banabakazhi ba kishinka bamukwashanga na “bintu byabo.” (Luka 8:1-3) Kechi wibaswishishetu kumukwasha ne, bino wibafunjishenga ne bukine bwanema pa kyaswa muchima wa Lesa. Pa kimye kimo, wibabuujile’mba ukafwa ne kusanguka. (Luka 24:5-8) Byonkatu byo anengezhezhe batumwa banji ku meseko ajinga kulutwe, ne bano banabakazhi nabo byo byo ebanengezhezhe. (Mako 9:30-32; 10:32-34) Kabiji twafwainwa kuvulukanga kuba’mba nangwa kya kuba batumwa banyemene kimye Yesu kyo bamukwachile, bino banabakazhi bamo bamukwashishenga, batwajijile kwikala kipikipi ne aye kimye kyo afwilenga pa kichi kya lumanamo.—Mat. 26:56; Mako 15:40, 41.

12. Ñanyi mwingilo Yesu ye apele banabakazhi?

¹² Yesu wapele banabakazhi mwingilo wanema. Kabiji banabakazhi bo bajinga batanshi kumonañana ne Yesu kimye kyo asangwilwe. Wapele bano banabakazhi mwingilo wa kuya na kubuula batumwa kuba’mba wasangulwa. (Mat. 28:5, 9, 10) Kabiji kyamweka banabakazhi bajingapo pa Pentekosita 33 C.E., kimye baana ba bwanga kyo bashingilwe mupashi wazhila. Inge kya kuba’mba bajingapo, ko kuba’mba bano banabakazhi batambwile bupe bwa kwamba milaka ingi ne kubuulako bakwabo “pa mingilo ikatampe ya Lesa.”—Byu. 1:14; 2:2-4, 11.

13. Banabakazhi bena Kilishitu bengila byepi ano moba, kabiji twakonsha kwibasanchila byepi pa mwingilo ye bengila?

¹³ Twafwainwa kusanchilanga banyenga yetu pa byonse byo boba mu mwingilo wa Yehoba. Uno mwingilo wavwangamo kushimika ne kuwamisha bishimikwa, kutundaika mabumba a mulaka ungi, ne kwipana kwingijila pa bishimikwa bya Betele. Bengilako mwingilo wa kukwasha baponenwa na bya malwa, kutuntulula mabuku etu, ne kwingila bupainiya ne bumishonale. Kabiji byonkatu biji balongo, banyenga nabo batanwa ku sukulu wa bapainiya, Sukulu wa Basapwishi ba Bufumu, ne Sukulu wa Gileada. Kunungapo, banabakazhi basongolwa bakwasha benakwabo kwingila mingilo mu kipwilo ne mu jibumba ja Lesa. Bano balongo ke “bya bupe” kabiji bengila mingilo yavula ya kwitukwasha. Pano bino, kyakonsha kwibakatazha kwingila ino mingilo inge bakazhi babo ke babule kwibatundaika. (Efi. 4:8) Nanchi mwakonsha kumonapo mashinda o mwakonsha kutundaikilamo bano banyenga pa mwingilo ye bengila nyi?

14. Kwesakana na byaamba Salamo 68:11, bakulumpe mu kipwilo boba byepi?

 ¹⁴ Bakulumpe mu kipwilo bayuka’mba banyenga jo “jibumba jikatampe” jipana kwingila kabiji bengila bulongo mwingilo wa kusapwila mambo awama. (Tangai Salamo 68:11.) Onkao mambo, bakulumpe mu kipwilo bafunjilako ku bano banyenga. Nyenga Abigail ye twambapo kala, utundaikwa bingi inge balongo bamwipuzha mashinda o amona amba engila bulongo pa kusolomoka bantu mu mwingilo. Waambile’mba: “Kino kinkwasha kuyuka’mba Yehoba wampa mwingilo wanema mu jibumba janji.” Kikwabo, bakulumpe mu kipwilo bayuka’mba banyenga ba kishinka bakoma bakwasha bingi banyenga banyike inge kebapite mu makatazho. (Titu. 2:3-5) Kwa kubula nangwa kuzhinauka ne, twafwainwa kusanchilanga banyenga yetu.

15. Ñanyi kimye banyenga kyo bakonsha kukeba muntu wa kwibambilako?

¹⁵ Bimye bimo, banyenga bakonsha kukeba muntu wa kwibambilako inge babena kupita mu makatazho. (Isa. 1:17) Nyenga wafwilwa nangwa ye bakana wakonsha kukebako muntu wa kumwambilako ne kumukwashako mingilo imo yaingilanga mwatawanji. Nyenga wakoma wakonsha kukeba muntu wa kumukwashako kwisamba na badokotala. Nangwa nyenga painiya wingila mingilo ikwabo mu jibumba ja Lesa wakonsha kukebako muntu wa kumwambilako inge bakwabo ke bamunene na mambo a kuba’mba kechi ubena kwingila mwingilo wa kusapwila byonka bingila bakwabo bapainiya ne. Ñanyi jishinda jikwabo jo twakonsha kukwashishamo banyenga? Twayai tufunjileko kikwabo kwi Yesu.

16. Kwesakana na byaamba Mako 14:3-9 Yesu wapokolweleko byepi Maliya?

¹⁶ Yesu waambilangako banyenga inge bantu baikala na milanguluko yatama pe abo. Pa kimye kimo waambijile Maliya kimye Mata kyo amunenenenga. (Luka 10:38-42) Kabiji walamwijileko Maliya ja bubiji kimye bakwabo kyo balangulukilenga’mba kechi wafuukwilepo bulongo ne. (Tangai Mako 14:3-9.) Yesu wayukile kine kintu kyalengejile Maliya kuba kyo aubile kabiji wamutakaikile’mba: “Aye wangubila kintu kyawama. . . . Waingila papelela bulume bwanji.” Kabiji waawile’mba kintu kyawama kyaubile Maliya bakekyambangapo “konse ko bakasapwila ano mambo awama pano pa ntanda ponse,” byonka bibena kuba kino kibaaba luno. Ke kintu kyawama bingi kuba’mba Yesu waambile pa mwingilo wa kusapwila mwaya ntanda yonse kimye kyo aambile pa kyaubile uno mwanamukazhi. Kyamweka byambo byanji byatekeneshe bingi Maliya mambo bamuzhachishenga ku bantu pa kyo aubile.

17. Ñanyi kimye kyo twafwainwa kwambilako nyenga mu kipwilo?

¹⁷ Abya mwambilako banyenga yenu mu kipwilo inge kyakebewa nyi? Fwanyikizha kino: Basapwishi bamo bamona kuba’mba nyenga uji na balume babula kwitabila jonsetu ukelwa ku kupwila kabiji aku kupwila kupwatu walupuka waya. Kabiji bamona’mba javula kechi usenda baana ku kipwilo ne. Onkao mambo, ke bambe’mba wazenzalala kechi ukosako na kwambila bamwatawanji amba bamuswishenga kusenda baana ku kipwilo ne. Pano bino, kishinka ke kya kuba’mba uno nyenga ubena kwibikako papelela bulume bwanji bonse. Kechi bamupapo luusa lwa kwitanchikila mwine mutanchi wa bintu bya kuba ne, kabiji kechi ujipo na luusa pa baana ne. Mwakonsha kuba byepi? Inge kya kuba mwatakaika uno nyenga pa byo abena kwibikako ne kubuula bakwabo kuba’mba ubena kwingila bingi bulongo, mwakonsha kukiba miyebe.

18. Mu ñanyi mashinda mo twakonsha kukwashisha banyenga yetu?

¹⁸ Twakonsha kumwesha banyenga yetu amba twibata muchima umvwe twibakwashako mu bintu bikebewa mu bwikalo. (1 Yoa. 3:18) Nyenga Annette walamine bainanji bakolelwe pa ñondo umo, waambile’mba: “Balongo ne banyenga  bamo baiyanga na kunkwashako kulama bamama pa kuba’mba ngubeko bintu bikwabo. Bakwabo baletanga kajo. Kino kyandengejile kuyuka’mba bantemwa kabiji kipwilo kyannemeka.” Nyenga wa jizhina ja Jordan naye bamukwashishe. Mulongo umo wamufunjisheko mashinda a kulaminamo bulongo motoka. Waambile’mba: “Kindetela bingi lusekelo kuyuka kuba’mba balongo ne banyenga bakeba’mba mbule kutanwa mu mapuso pa kwendesha motoka.”

19. Mu ñanyi mashinda akwabo bakulumpe mu kipwilo mo bakonsha kukwashisha banyenga?

¹⁹ Bakulumpe nabo bamonapo mashinda a kukwashishamo banyenga. Bayuka kuba’mba Yehoba ukeba’mba tulamenga bulongo. (Yako. 1:27) Onkao mambo, bakulumpe mu kipwilo balondela Yesu kupichila mu kwikala na muchima wakooka ne kubula kulenga mizhilo, pakuba bafwainwa kwikala na kifyele ne lusa. (Mat. 15:22-28) Bakulumpe mu kipwilo bebikako kukwasha banyenga yabo mu kipwilo kuyuka’mba Yehoba ne jibumba janji bebata muchima kabiji bebatemwa. Kalama wa jibumba ja mwingilo muji nyenga Kia byo aumvwine’mba uno nyenga ubena kuvilukila mu nzubo ikwabo, wamukwashishe bukiji bukiji. Ba Kia baambile’mba: “Buno bukwasho bwakepesheko bijikila byo najinga nabyo. Na mambo a kuba’mba bakulumpe mu kipwilo bantundaikilenga ne kunkwasha, bammwesheshe kuba’mba kipwilo kyannemeka kabiji inge naikala mu makatazho kechi nji bunke ne.”

20-21. Twakonsha kumwesha byepi amba twanemeka banyenga bonse mu kipwilo?

²⁰ Inge twakenkenta mu kipwilo lelo jino, muji banyenga bavula bingi bengila na ngovu bo twafwainwa kutundaikanga. Byonka byo twafunjilako kwi Yesu, twakonsha kwibakwasha kupichila mu kumonapo kimye kya kwikala nabo pamo ne kwibayuka bulongo. Twafwainwa kwibasanchilanga pa byo babena kuba mu mwingilo wa Lesa. Kabiji twafwainwa kwibambilangako kimye kyonse inge kyakebewa.

²¹ Ku mpelo ya nkalata mutumwa Paulo yo anembejile bena Loma, watongolwe banabakazhi bena Kilishitu batanu na bana. (Loma 16:1, 3, 6, 12, 13, 15) Kwa kubula nangwa kuzhinaukatu ne, bano banabakazhi batundaikilwe bingi pa kumvwa mutende wibatumijile Paulo ne kwibatakaika. Ne atweba twayai tutundaikenga banyenga bonse mu kipwilo. Umvwe twauba bino, tumwesha’mba twibanemeka bingi mambo baji mu kisemi kyetu kya bwina Kilishitu.