Nasemekelwe mu 1934 kabiji bansemi bami bafumine mu kyalo kya Switzerland ne kuya na kwikala mu muzhi wa mikochi wa Timmins mu kibunji kya Ontario mu kyalo kya Canada. Nobe mu 1939, bamama batendekele kutanga Kyamba kya Usopa kabiji batendekele kupwila na Bakamonyi ba kwa Yehoba. Amiwa, bakolojami babiji ne bankasami bana betusendanga atweba bonse ku bamama kuya na kupwila. Palutwe kacheche, bamama baikele Bakamonyi ba kwa Yehoba.

Batata kechi batemenwe byafuukwilepo bamama ne. Nangwa byonkabyo, bamama batemenwe bingi bukine kabiji batwajijile kwikala ba kishinka kwi Yehoba. Batwajijile kuba bino, ne mu kimye kyo bakainye mwingilo wa Bakamonyi ba kwa Yehoba mu Canada, ku ntendekelo ya 1940. Kabiji bamama batwajijile kunemeka batata nangwa kya kuba bebambilanga byambo byatama. Byubilo byabo byawama byalengejile amiwa, bakolojami ne bankasami kufuukulapo kwingijila Yehoba. Kyawaminekotu ke kya kuba’mba mu kuya kwa kimye, batata bapimpwile byubilo byabo kabiji balekele kwitwambila byambo byatama.

Mu kimye kya kisalo mu 1950, natainwe ku Kubuñana kwajinga na mutwe wa kuba’mba Kuvujilako kwa Bantu ba Lesa kwajingako mu muzhi mukatampe wa New York. Natundaikilwe kutwajijila kwingijila Yehoba byo namonañene na balongo ne banyenga bafumine mu mapunzha apusana pusana mwaya ntanda ne kuteleka ku mwisambo wawama ye baipwizhenga bapwishishe Sukulu wa Gileada. Kino kyandengejile kukebesha kutendeka mwingilo wa kimye kyonse. Byo nabwelele ku nzubo, nanembele nkalata ya kwipwizhapo mwingilo wa bupainiya bwa kimye kyonse. Ofweshi wa musampi wa mu Canada wambwezhejile nkalata ne kuñambila’mba nafwainwe kubatizhiwa patanshi. Nabatizhiwe pa 1 October, 1950. Byo papichile ñondo umo, naikele painiya wa  kimye kyonse kabiji bantumine kuya na kwingijila mu muzhi wa Kapuskasing. Uno muzhi wajinga kwalepa bingi na ko naikelanga.

Mu kimye kya kisalo mu 1951, ofweshi wa musampi walombele Bakamonyi ba kwa Yehoba baambanga mulaka wa Kifulenchi, kuya na kwingijila mu kibunji kya Quebec mo baambanga mulaka wa Kifulenchi. Nayukile mulaka wa Kifulenchi ne Kizungu. Onkao mambo, naswile kabiji bantumine kuya na kwingijila mu kamuzhi ka Rouyn. Kechi nayukilepo muntu nangwa umo ku ino mpunzha ne. Najingatu na keyala ye bampele, byonka byo naji kwambapo kala. Nangwa byonkabyo, bintu byonse byaendeletu bulongo. Amiwa ne Marcel twaikele balunda kabiji naumvwinenga bingi bulongo kwingijila mu Quebec pa myaka ina kabiji palutwe kacheche naikele painiya wiikajila.

Byo nakijinga mu Quebec, naumvwine bingi bulongo byo bangichile kuya na kutanwa ku Sukulu wa Gileada wa nambala 26 mu South Lansing mu muzhi mukatampe wa New York. Juba ja kupwisha Sukulu wa Gileada jaikeleko pa 12 February, 1956 kabiji bantumine kuya na kwingijila mu kyalo kya Ghana, b ku Muzhika wa Africa. Pano bino, saka nkyangye kuya, nabwelele ku Canada pa “milungu icheche” na kupembelela’mba banengezhe mapepala ami a kunswisha kutwela mu kyalo kya Ghana.

Napembejile pa bañondo batanu na babiji mu kibunji kya Toronto pa kuba’mba bapwishe kwingijila pa ano mapepala. Pa kyokya kimye naikelenga ku kisemi kya mulongo Cripps kabiji twiyukile na mwanabo wamukazhi aye Sheila. Twitemenwe bingi. Byo nakebelengatu kumwambila’mba tukesongole, mapepala ami o napembejilenga bapwishishe kwingijilapo. Amiwa ne Sheila twalombele ne kufuukulapo’mba ngyenga na kwingijila ko bantumine. Pano bino, twatwajijile na kwisamba ne kukeba kuyuka inge kyakonshekele kwisongola kulutwe. Kino kechi kyapelele ne. Pano bino, kulutwe twamwene’mba twafuukwilepo bulongo.

Panyuma ya kwenda pa ñondo umo mu shitima, bwato bukatampe ne mu ndeke, nafikile mu muzhi wa Accra, mu kyalo kya Ghana. Mu uno muzhi bantongwele kwikala kalama wa nkambi. Naingijilenga mu kyalo kyonse kya Ghana, mu kyalo kya Ivory Coast  (kyo batela luno amba Côte d’Ivoire) ne mu kyalo kya Togoland (kyo batela luno amba Togo.). Javula naendangatu bunke na motoka wa musampi. Naumvwanga bingi bulongo kufwakesha balongo ne banyenga.

Ku mpelo ya mulungu nayanga na kwamba majashi pa kubuñana kwa mwanzo. Kechi kwajingapo Mazubo a Kubuñenamo ne. Onkao mambo, balongo bashimikile kimpampa kyajinga na musemi wa nsununu po bavwetele mapambo a bisonga mwa kwikala bantu kuchina mute. Na mambo a kuba’mba kechi kwajinga fuliji mu kibamba mo balamina kajo ne, balongo balamanga banyama bomi ne kwibepaya inge kebakebe kujisha bantu baiya na kubuñana.

Pa kuno kubuñana pamwekanga bintu bimo bitusekeshanga bingi. Kimye kimo mishonale mukwetu aye Herb Jennings c kimye kyo aambilenga jashi, ñombe waswatukilemo mu kibamba mo balamijilenga kajo ne kupita mapusa pakachi ka mutuntamo ne luonde. Mulongo Herb walekele kwamba jashi kabiji ñombe wamwekele nobe wavulañana. Nangwa byonkabyo, balongo bana bajinga na ngovu bamukwachile ne kumutajangizha kumubwezha mo balamijilenga kajo kabiji bantu bajinga mu luonde basekele bingi.

Mu moba a mukachi ka mulungu, natambishanga bantu baikalanga mu mizhi yajinga kipikipi filimu wa kuba’mba The New World Society in Action. Pa kutambisha filimu naingijishanga pulojekita wasaminanga pa kisapi kitoka kyo nakashijile ku bichi bibiji ne kwikitandubula. Bantu ba mu mizhi baumvwanga bingi bulongo kutamba uno filimu. Bantu bavula kyo kyajinga kimye kitanshi kutambapo filimu wa uno mutundu. Bapopwelanga na lusekelo na mambo a kutamba bantu babatizhiwenga. Uno filimu wakwashishe bantu bamutambilenga kuyuka’mba twi jibumba jimo jakwatankana mwaya ntanda yonse.

Panyuma ya kwikala mu Africa nobe myaka ibiji, najinga bingi na lusekelo byo natainwe ku kukonkana kwa byalo kwajingako mu 1958 mu Muzhi wa New York. Najinga bingi na lusekelo pa kumonañana na Nyenga Sheila waishile kufuma ku Quebec, ko aingijilenga mwingilo wa bupainiya bwiikajila. Twinembelangatu makalata, pano bino, byo kyajinga kuba’mba pa kikye kimye twamonañene, namwipwizhe inge twakonsha kwisongola kabiji naye waswile. Nanembejile nkalata Mulongo Knorr d ne kumwipuzha inge kyakonshekele Nyenga Sheila kutanwa ku Sukulu wa Gileada kuba’mba tukengijilenga pamo mu Africa. Mulongo Knorr waswile. Pa kupitapo kimye Nyenga Sheila waishile mu kyalo kya Ghana. Twisongwele  mu muzhi wa Accra, pa 3 October, 1959. Twimwenejile kuba’mba Yehoba witupesheshe bingi na mambo a kutangizhako mwingilo wanji mu bwikalo bwetu.

Mu 1961, betutumine kuya na kwingijila mu Cameroon. Bampele mwingilo wa kuya na kushinkula ofweshi wa musampi wa katataka mu kino kyalo, onkao mambo, napayankene bingi. Byo naikele kalama wa musampi wa katataka, najinga na byavula bya kufunda. Mu 1965, Sheila wanemene pa muchima. Kitukatezhe bingi byo twatendekele kulanguluka’mba tusakwikala bansemi. Pano bino, byo twatendekele kutengela’mba tusakwikala na mwana ne kwinengezha kubwela ku Canada, kintu kyatama kitumwekejile.

Sheila wapulumwine jimi. Dokotala witubuujile’mba mwana wapitaijile wajinga wamulume. Papita kala ne myaka kukila 50 kufuma pamwekejile kino, pano bino, kechi tulubamo ne. Nangwa kya kuba twajinga na bulanda pa kino kintu kitumwekejile, twatwajijile mu uno mwingilo wetu wa bumishonale mambo uno mwingilo twamutemenwe bingi.

Balongo ne banyenga ba mu Cameroon javula bebamanyikanga na mambo a kubula kwivwanga mu bya bumulwila ntanda. Bintu byakijilemo kutama, kikatakata byo kwajinga bya bunsaji. Pa 13 May, 1970, kwamwekele kintu kyatama bingi kyo twabujilenga kuketekela. Bakamonyi ba kwa Yehoba bebalekeshe mwingilo wabo. Kafulumende waangachile ofweshi wetu wa musampi wawamine bingi, mo twavilukijile pa bañondotu batanu bapichilepo. Mu mulungutu umo, bamishonale bonse kuvwangakotu ne amiwa ne mukazhami Sheila betupangile mu kyalo. Kitukatezhe bingi kusha balongo ne banyenga mambo twibatemenwe bingi kabiji twaakaminwe pa bintu byakonsheshe kwibamwekela kulutwe.

Twaikele bañondo batanu na umo pa ofweshi wa musampi wa mu France. Byo najinga pa uno musampi, natwajijile kwingila mwingilo wa kukwasha balongo ba mu kyalo kya Cameroon. Mu December mu yenkawa mwaka betutumine kuya na kwingijila pa musampi wa mu Nigeria, watendekele kutala pa mwingilo waingijiwenga mu Cameroon. Balongo ne banyenga ba mu Nigeria betutambwijile bingi bulongo kabiji twaingijilenga bingi bulongo mu kino kyalo pa myaka yavula.

Mu 1973, kwajinga kintu kitukatezhe bingi kufuukulapo. Sheila waendangatu na kukolwakolwa. Byo twajinga mu New York na kushonkena, wambuujile byamukatezhenga ku muchima amba: “Nakooka, kechi nakonsha kutwajijila mu uno mwingilo ne. Kabiji nakolwa pa kimye kyabaya bingi.” Twaingijila pamo uno mwingilo ku byalo bya ku Muzhika wa Africa kukila pa myaka 14. Namusanchijile pa kwingila kwanji mu bukishinka. Nangwa byonkabyo, twafwainwe kupimpulako bintu bimo. Byo twisambilepo ne kulombapo kyabaya bingi pa luno lukatazho, twafuukwilepo kubwela ku Canada ko bafwainwe kumukwasha bulongo na kikola kyanji. Kuleka mwingilo wetu wa bumishonale ne mwingilo wa kimye kyonse kyajinga kintu kitukatezhe bingi kufuukulapo.

Byo twabwelele mu Canada, mulunda nami wa kala wantwezhezhe nkito yo naingilangapo kala, ya kupotesha myotoka mu muzhi waikejile ku buyeke bwa kibunji kya Toronto. Twasonkejilenga nzubo icheche, twapotele bipe bya mu nzubo byo baingijishapo kala kabiji twatendekele kwikala kwa kubula kwitaya  mu nkongole. Twapezhezheko bwikalo bwetu mambo twaketekejilenga’mba kampe juba jimo tukabwela mu mwingilo wa kimye kyonse. Ne kine, kechi papichile kimye kyabaya ne, kintu kyo twatengejilenga kyamwekele.

Natendekele kwingilako pa Bibelushi mwingilo wa kushimika Nzubo ya Kubuñenamo mu muzhi wa Norval mu kibunji kya Ontario. Mu kuya kwa kimye, bampele mwingilo wa kutala pa mwingilo wa kushimika Nzubo ya Kubuñenamo. Sheila watendekele kumvwako bulongo kabiji twalangulukile’mba twakonsha kwingilako uno mwingilo wa katataka. Onkao mambo, mu June 1974, twavilukile ne kutendeka kwikala mu kibamba kyaikejile pajinga Nzubo ya Kubuñenamo. Twaumvwine bingi bulongo kutendeka jikwabo mwingilo wa kimye kyonse.

Kyawaminekotu ke kya kuba’mba Sheila watwajijile kumvwako bulongo. Byo papichile myaka ibiji, twaswile kwingila mwingilo wa mwanzo. Mwanzo wetu waikejile mu Manitoba, kibunji kya mu Canada, mwatalala bingi. Nangwa byonkabyo, twajinga bingi na lusekelo kwingijila pamo na balongo ne banyenga ba mu kino kibunji. Twafunjile’mba mpunzha kechi kyo kintu kine kyanema ne. Kyanema ke kutwajijila kwingijila Yehoba konse ko tuji.

Byo twaingijile mu mwanzo pa myaka yavula, betwichile kuya na kwingijila pa musampi wa mu Canada mu 1978. Pa kupitapo kimye kicheche nafunjijile mu kitoba kintu kyanema bingi. Bampele jashi ja kwamba mu mulaka wa Kifulenchi ja jiola jimo ne kichika pa kupwila kumo kwanemene bingi mu kibunji kya Montreal. Kyataminekotu ke kya kuba’mba jashi jami kechi jafikile bantu pa muchima ne, kabiji mulongo wa mu Dipatimenti Utala pa Bibena Kwenda Mwingilo wamfunjileko kyakosa bingi pa kubula kwamba bulongo jashi. Kwambatu kine, byonka byo neyukile ne amiwa mwine, nafwainwe kuswa’mba kechi ñamba bulongo majashi byonka byamba aba bayukisha ne. Nangwa byonkabyo, kechi naswile byamfunjileko uno mulongo ne. Twapusenejilemo kabiji nazhingijile mambo wakizhizhemo kunzhachisha mu kifulo kya kunsanchila pa bintu byawama byo naubile. Natamishe pa kubula kuswa byo amfunjileko na mambotu a jishinda jo amfunjijilemo ne jishinda jo namumwenejilengamo.

Byo papichile moba acheche wa mu Kavoto ka Musampi wisambile ne amiwa pa kyamwekele. Naswile kuba’mba byo naubile pa byo bamfunjileko kechi byawamine ne. Nalombele lulekelo lwa mambo kabiji nayile na kwisamba na mulongo wamfunjileko. Naye wandekejileko mambo. Kino kyamwekele kyamfunjishe’mba nafwainwa kwikala na kyubilo kya kwipelula kabiji kechi nkalubamo ne. (Maana 16:18) Nalomba bimye byavula pa kino kabiji nafuukulapo kubula kulengulula inge bamfundako.

Naingijila pa Betele wa mu Canada kukila pa myaka 40 kabiji kufuma mu 1985 naingijila mu Kavoto ka Musampi. Mu February 2021, mukazhami Sheila wafwile. Kununga pa kufwisha mukazhami, ne amiwa nkolwakolwa. Nangwa byonkabyo, kechi ‘mmona ne moba ami byo apwa ne,’ na mambo a kupayankana mu mwingilo wa Yehoba. (Sapwi. 5:20) Nangwa kya kuba napita mu makatazho avula mu bwikalo bwami, pano bino, namwenamo bintu byawama byavula bingi byandengela kwikala na lusekelo. Kwingijila Yehoba mu bwikalo bwami ne kwingila myaka 70 mu mwingilo wa kimye kyonse kwandetela bingi lusekelo. Ndombelako balongo ne banyenga banyike kutwajijila kwingijila Yehoba mu bwikalo bwabo mambo nashiinwa kuba’mba nabo bakamwenamo byawama ne kwikala na lusekelo lujitu mu kwingijila Yehoba.