1. Ñanyi kintu Yesu kyo akooba katataka?

 TUBENA kwikala mu kimye mukamweka bintu byanema bingi. Katatakatu Yesu akachibile mambo bantu bonse pano pa ntanda. Yesu waambile pa bintu bikamwekanga mu ntanda saka akyangye kuchibila bantu mambo. Kabiji waambijile baana banji ba bwanga “kiyukilo” kya kwikalapo kwanji ne kya “mpelo ya buno bwikalo.” (Mat. 24:3) Buno bungauzhi buji mu Mateo bitango 24 ne 25, mu Mako kitango 13 ne mu Luka kitango 21.

2. Ñanyi bintu byo tusakwisambapo mu uno mutwe, kabiji mambo ka o bisakwitukwashisha?

² Yesu waambile pa bishimpi bisatu bya kwitukwasha kwinengezhezha jimo. Bino ke bishimpi byaamba pa mikooko ne bambuzhi, bazhike ba maana ne babula maana ne matalenta. Bino bishimpi byonse kimo kimo bisakwitukwasha kuyuka bantu byo bakebachibila mambo kwesakana na mwayila byubilo byabo. Byo tusakwisambanga pa bino bishimpi, tusakuyuka bintu byo tufunjilako ne byo twakonsha kwibingijisha. Kishimpi kitanshi kyo tusakwisambapo ke kya mikooko ne bambuzhi.

MIKOOKO NE BAMBUZHI

3. Ñanyi kimye Yesu kyo akachibila bantu mambo?

³ Mu kishimpi kya mikooko ne bambuzhi, Yesu waambile’mba ukachibila bantu mambo inge baumvwijilenga mambo awama ne kutundaika balongo banji bashingwa nangwa ne. (Mat. 25:31-46) Mu kimye kya “malwa akatampe,” Yesu ukachibila bantu mambo Amagedonyi saka ikyangye kutendeka. (Mat. 24:21) Byonkatu kafunga byo abanya mikooko ne bambuzhi, Yesu naye ukabanya bantu batundaika mu bukishinka  baana banji ba bwanga bashingwa kwibapusanya na boba bakaana kwibatundaika.

4. Kwesakana na Isaya 11:3, 4, mambo ka o twashiinwa kuba’mba Yesu ukachibila bantu mambo monka mo aolokela? (Monai ne nkupiko.)

⁴ Bungauzhi bumwesha’mba Yesu bamutongola kwi Yehoba kwikala Mutonyi, kabiji ukachibila mambo bantu mu bololoke. (Tangai Isaya 11:3, 4.) Utala pa byubilo bya bantu, byo balanguluka ne byo bamba kuvwangakotu ne bintu byo boba ku balongo banji bashingwa. (Mateo 12:36, 37; 25:40) Yesu ukayuka boba batundaikilenga balongo banji bashingwa ne mwingilo wabo. a Jishinda jimo janema bantu baji nobe mikooko jo batundaikilamo balongo ba kwa Kilishitu ke kwibakwashako mu mwingilo wa kusapwila. Aba batundaika bashingwa mu jino jishinda, Yesu ukebamona’mba “baoloka” kabiji bakekala na luketekelo lwa kukekala na “bumi bwa myaka ne myaka” pano pa ntanda. (Mat. 25:46; Lum. 7:16, 17) Abino ke bintu byawama bingi bikamwenamo bantu bonse batwajijila kwikala ba kishinka. Byo bakatwajijila kwikala ba kishinka mu kimye kya malwa akatampe ne kulutwe, mazhina abo akatwajijila kwikala mu “buku wa bumi.”​—Lum. 20:15.

5. Ñanyi kintu kyo tufunjilako ku kishimpi kya mikooko ne bambuzhi, kabiji bañanyi kikatakata bamwenamo?

⁵ Twajijilai kwikala ba kishinka. Kishimpi kya kwa Yesu kya mikooko ne bambuzhi kyaamba kikatakata pa boba baji na luketekelo lwa kwikala pano pa ntanda. Kechi bamweshatu luketekelo pa kukwasha balongo ba kwa Kilishitu mu mwingilo wa kusapwila ne, bino mu bukishinka baswa ne kwibatangijila ku kajibumba kacheche ka balongo bashingwa Yesu bo asala. (Mat. 24:45) Nangwatu boba baji na luketekelo lwa kukekala mwiulu nabo bafwainwa kulondela lujimuno luji mu kino kishimpi. Mambo ka? Mambo Yesu umona byubilo byabo, byo balanguluka ne byo bamba. Nabo bafwainwa kutwajijila kwikala ba kishinka. Kabiji Yesu waambile pa bishimpi bibiji muji lujimuno lwafwainwa kulondela bashingwa. Abino bishimpi biji mu Mateo kitango 25. Pano twayai twisambe pa kishimpi kya bakamwale ba maana ne bakosama.

BAKAMWALE BA MAANA NE BAKOSAMA

6. Bakamwale batanu bamwesheshe byepi’mba bajinga ba maana? (Mateo 25:6-10)

⁶ Mu kishimpi kya bakamwale, Yesu waambile pa bakamwale jikumi bayile na kutundaila musongoshi. (Mat. 25:1-4) Bonse bakebelenga kuya nanji ku kijiilo kyanji kya masongola. Yesu waambile’mba batanu bajinga na “maana” kabiji bakwabo batanu bajinga “bakosama.” Bakamwale ba maana benengezhezhe kabiji batwajijile kulaba. Benengezhezhe kupembela musongoshi pa kimye kyabaya nangwa kya kuba wakonsheshe kufika bufuku. Onkao mambo, basendele malampi a kumunyikilako bufuku. Kabiji basendele ne manyi akwabo a kwingijisha inge musongwa wabanda kwiya. Onkao mambo, malampi abo atwajijile na kuteema. (Tangai Mateo 25:6-10.) Musongoshi byo afikile, bakamwale ba maana bayile nanji ku kijiilo kya masongola. Po pamotu, bena Kilishitu bashingwa bakatwajijila kwikala ba kishinka kufikatu ne kimye kikeya Yesu bakebaswisha kwikala pamo na musongoshi ko kuba’mba mu Bufumu bwanji mwiulu. b (Lum. 7:1-3) Pano ñanyi kintu kyamwekejile bakamwale bakosama?

7. Ñanyi bintu byamwekejile bakamwale batanu bakosama, kabiji mambo ka?

 ⁷ Kupusanako na bakamwale ba maana, bakamwale batanu bakosama kechi benengezhezhe kimye musongoshi kyo afikile ne. Malampi abo ajinga pepi kuzhima kabiji kechi basendele manyi akwabo a kwingijisha ne. Byo baumvwine kuba’mba musongoshi katatakatu afike, bayile na kupota manyi akwabo. Musongoshi byo afikile, wataaine bakyangye kubwela. Pa kyokya kimye, “bakamwale benengezhezhe bayile nanji ku kijiilo kya masongola kabiji bashinkile ne kinzhilo.” (Mat. 25:10) Byo papichile kimye, bakamwale bakosama babwelele kabiji bakebelenga kutwela. Pano bino musongoshi wibambijile amba: “Kechi nemuyuka ne.” (Mat. 25:11, 12) Bano bakamwale kechi benengezhezhe kupembela musongoshi pa kimye kyabaya ne. Ñanyi kintu bashingwa kyo bafunjilako?

8-9. Ñanyi bintu bashingwa byo bafunjilako ku kishimpi kya bakamwale? (Monai ne kipikichala.)

⁸ Inengezhezhai jimo ne kutwajijila kwikala balaba. Yesu kechi waambilenga’mba kukekala mabumba abiji a bashingwa, ko kuba’mba jibumba jimo jikenengezhezha jimo kufika ne ku mpelo ya buno bwikalo ne jikabula kwinengezhezha jimo ne. Pakuba walumbulwilenga bikamwekela bashinga inge babula kutwajijila kwikala ba kishinka kufika ne ku mpelo. Inge kyaikala bino, ko kuba’mba kechi bakatambula mfweto yabo ne. (Yoa. 14:3, 4) Kabiji kino kyakonsha kutama bingi. Inge tuji na luketekelo lwa kuya mwiulu nangwa lwa kwikala pano pa ntanda, atweba bonse twafwainwa kulondela luno lujimuno luji mu kishimpi kya bakamwale. Atweba bonse pa muntu pa muntu twafwainwa kutwajijila kulaba ne kukenkenta ne kwinengezhezha jimo ne kutwajijila kuchinchika kufika ne ku mpelo.​—Mat. 24:13.

⁹ Byo apwishishe kushimikizha kishimpi kyaamba pa bakamwale, kumwesha ene mambo o kyanemena kwinengezhezha jimo ne kutwajijila kulaba, Yesu waambile pa kishimpi kya matalenta. Kino kishimpi kitutundaika kwingila na mukoyo.

 MATALENTA

10. Bakalume babiji bamwesheshe byepi’mba batwajijile kwikala ba kishinka? (Mateo 25:19-23)

¹⁰ Mu kishimpi kya matalenta, Yesu waambile pa kishimpi kya bakalume babiji batwajijile kwikala ba kishinka kwi nkambo yabo ne kalume mukwabo wabujile kwikala wa kishinka. (Mat. 25:14-18) Bazha babiji batwajijile kwikala ba kishinka mambo baingijile na ngovu ne kuvuzha mali a nkambo yabo. Saka akyangye kuya ku kyalo kingi, wibapele matalenta ko kuba’mba mali avula bingi. Bazha babiji ba kishinka baingijile na mukoyo kabiji baingijishe bulongo mali. Ñanyi bintu byafuminemo? Nkambo yabo byo abwelele, bamwenejilemo ne matalenta akwabo kununga pa o ebapele. Nkambo yabo wibasanchijile kabiji ‘basekejile pamo na nkambo yabo.’ (Tangai Mateo 25:19-23.) Pano nga kalume wa busatu waubile byepi? Waingijishe byepi mali amupele nkambo yanji?

11. Ñanyi kintu kyamwekejile kalume wa muleele, kabiji mambo ka?

¹¹ Kalume wa busatu bamupele talenta umo pano bino waubile “muleele.” Nkambo yanji wakebelenga’mba engijishe bulongo uno talenta. Pano bino aye wamuzhiikile panshi. Nkambo yanji byo abwelele, uno muzha wabwezhezhe talenta yenka umo ye bamupele. Uno muzha wamwesheshe muchima watama. Mu kifulo kya kulomba lulekelo lwa mambo na mambo a kubula kuvuzha mali a nkambo yanji, waambile byatama pe nkambo yanji ne kumutela’mba “muntu wakatazha.” Nkambo yanji waumvwine kutama pa byaubile uno kalume. Kyafuminemo, bamwangachile talenta kabiji bamupangile mu nzubo ya nkambo yanji.​—Mat. 25:24, 26-30.

12. Bakalume ba kishinka babiji bemenako bañanyi lelo jino?

¹² Bakalume ba kishinka babiji bemenako bena Kilishitu bashingwa ba kishinka. Nkambo aye Yesu wibeta ‘kusekela pamo na nkambo yabo.’ Batambula mfweto yabo ya mwiulu ko kuba’mba lusanguko lutanshi. (Mat. 25:21, 23; Lum. 20:5b) Kabiji kishimpi kya kalume wa muleele kijimunako bashingwa. Mu ñanyi jishinda?

13-14. Bashingwa bafunjilako ka ku kishimpi kya matalenta? (Monai ne kipikichala.)

 ¹³ Twajijilai kwingila na kizaku ne na mukoyo. Mu kishimpi kya matalenta ne kya bakamwale, Yesu kechi waambijilenga jimo amba bashingwa bakekala na muleele ne. Pakuba walumbulwilenga kyakonsha kwibamwekela inge baleka kwingila na mukoyo. Kabiji bakonsha kwilengela abo bene kubula “kwitwa ne kusalwa” ne kubula kwibaswisha kutwela mu Bufumu bwa mwiulu.​—2 Pe. 1:10.

¹⁴ Bishimpi bya kwa Yesu byaamba pa bakamwale ne matalenta bimwesha patoka kuba’mba bena Kilishitu bonse bashingwa bafwainwa kwinengezhezha jimo ne kwikala balaba. Kabiji bafwainwa kutwajijila kwingila na kizaku ne na mukoyo. Nangwa byonkabyo, nanchi Yesu waambilepo bintu bikwabo bya kujimunako bashingwa nyi? Ee waambile. Byambo bya kwa Yesu biji pa Mateo 24:40, 41 byaamba ne pa bashingwa byo bakebachibila mambo japelako.

ÑANYI YE ‘BAKASENDA’?

15-16. Byambo biji pa Mateo 24:40, 41 bimwesha byepi’mba bashingwa bafwainwa kulabanga ne kukenkenta?

¹⁵ Saka akyangye kwamba pa bishimpi bisatu, Yesu walumbulwile bashingwa bo bakasala panyuma ya kwibachibila mambo japelako. Waambile pa banabalume babiji baingijilenga mu bujimi ne pa banabakazhi babiji bapelelenga pa mpelo. Kyamweka banabalume baingijilenga mwingilo umo, ne banabakazhi nabo baingijilenga mwingilo umo. Pano bino Yesu waambile’mba “umo bakamusenda, mukwabo bakamusha.” (Tangai Mateo 24:40, 41.) Kabiji wakambizhe baana banji ba bwanga amba: “Labainga ne kukenkenta, mambo kechi mwayuka juba Nkambo yenu jo akeshilamo ne.” (Mat. 24:42) Yesu waambile kintu kipashako na byo aambile pa kishimpi kya bakamwale. (Mat. 25:13) Nanchi bino byambo byo aambile byakwatankana nyi? Kyamweka byakwatankana. Bashingwa ba kine kabiji ba kishinka bo bonka bo ‘bakasenda’ kwi Yesu mu Bufumu bwa mwiulu.​—Yoa. 14:3.

¹⁶ Twajijilai kulaba ne kukenkenta. Mushingwa yense ukabula kutwajijila kulaba ne kukenkenta kechi ukekala pa boba “basalwa” ne. (Mat. 24:31) Bantu ba Lesa bonse, baji na luketekelo lwa kuya mwiulu nangwa lwa kwikala pano pa ntanda, bafwainwa kulondela byambo bya lujimuno byaambile Yesu bya kwikala balaba ne kukenkenta ne kutwajijila kwikala ba kishinka.

17. Mambo ka o twafwainwa kubujila kukumya inge Yehoba wafuukulapo kushinga bantu bamo na mupashi wanji wazhila mu ano moba?

¹⁷ Twamuyuka bingi bulongo Yehoba kabiji twaketekela’mba byonse byo oba byaoloka. Kechi twafwainwa kukumya inge Yehoba wasala bantu bamo ba kishinka kwikala bashingwa mu ano moba ne. c Tuvuluka byaambile Yesu pa ba mingilo ba kwingila mu bujimi mu jiola ja bu 11 bo baambapo mu kishimpi kya miñanzañanza. (Mat. 20:1-16) Bamingilo bapeleleko bo baichile kwiya na kwingila mu bujimi bebapele mfweto imotu na boba batendekejilepo kwingila. Po pamotu, bashingwa bashingilwe kala ne bo babena kushinga katataka bonse bakatambula mfweto yabo ya mwiulu inge batwajijila kwikala ba kishinka

LONDELAINGA LUJIMUNO

18-19. Ñanyi bintu byo twafunda mu bino bishimpi?

¹⁸ Ñanyi bintu byo twafunda? Kishimpi kya mikooko ne bambuzhi kivululamo boba baji na luketekelo lwa kukekala na bumi bwa myaka ne myaka pano pa ntanda kuba’mba bafwainwa kutwajijila kwikala ba kishinka kwi  Yehoba, pa kino kimye ne mu kimye kya malwa akatampe abena kwiya. Pa kyokya kimye, Yesu ukachibila bantu mambo ba kishinka ne kwibamona’mba bafwainwa kwikala na “bumi bwa myaka ne myaka.”​—Mat. 25:46.

¹⁹ Kabiji twisamba ne pa bishimpi bibiji muji lujimuno lwafwainwa kulondela bashingwa. Mu kishimpi kya kwa Yesu kya bakamwale ba maana ne bakosama, batanu bamwesheshe’mba bajinga na maana. Benengezhezhe ne kutwajijila kwikala balaba kabiji bapembejile musongoshi pa kimye kyabaya. Pakuba bakamwale bakosama kechi benengezhezhe ne. Onkao mambo, musongoshi kechi wibaswishishe kuya nabo ku kijiilo kyanji kya masongola ne. Ne atweba twafwainwa kwinengezhezha jimo ne kutwajijila na kupembela kufikatu ne kimye Yesu kyo akaleta mpelo ya buno bwikalo. Kabiji mu kishimpi kya kwa Yesu kya matalenta, twafunda pa bakalume babiji ba kishinka baingijilenga na kizaku ne na mukoyo. Baingijile na ngovu mwingilo wibapele nkambo yabo kabiji wibapesheshe. Nangwa byonkabyo, kalume wa muleele bamukaine. Ñanyi kintu kyo tubena kufunjilako? Twafwainwa kutwajijila kwingila na mukoyo mu mwingilo wa Yehoba kufikatu ne ku mpelo. Ne mu kupezhako, twafunda kuba’mba bashingwa bafwainwa kutwajijila kulaba ne kukenkenta pa kuba’mba ‘bakebasende’ kwi Yesu ne kutambula mfweto yabo ya mwiulu. Bano bashingwa batengela ‘kwibakonkanya pamo’ ne Yesu mwiulu. Panyuma ya Amagedonyi, bakekala musongwa wa kwa Yesu mu masongola a Mwana Mukooko.​—2 Tesa. 2:1; Lum. 19:9.

20. Ñanyi bintu Yehoba byo akobila bantu bomvwina lujimuno lwanji?

²⁰ Nangwa kya kuba kimye kya kuchibila bantu mambo kyafwenya kala pepi, kechi twafwainwa kwakamwa ne. Inge twatwajijila kwikala ba kishinka, Shetu wa mwiulu wa butemwe uketupa “bulume bwakila bwa bantu” pa kuba’mba ‘tukapuluke . . . ne kwimana ku Mwana muntu.’ (2 Ko. 4:7; Luka 21:36) Inge tuji na luketekelo lwa kukekala mwiulu nangwa pano pa ntanda, tukatokesha ku muchima Shetu wa mwiulu inge ke tumvwine lujimuno luji mu bishimpi bya kwa Yesu. Na mambo a lusa lukatampe lwa Yehoba, mazhina etu ‘akanembwa mu buku’ wa bumi.​—Da. 12:1; Lum. 3:5.