Kechi twafwainwa kulanguluka’mba baana ba bwanga 70 bamushile Yesu nangwa’mba wibasankijilepo na mambotu a kuba’mba kechi bajingapo kimye kyo atendekeshe Kijiilo kya Nkambo kya Mabanga ne. Yesu wakebelengatu kwikala na batumwa banji pa kyokya kimye.

Batumwa 12 ne baana banji ba bwanga 70 bonse bajinga baana banji ba bwanga. Yesu patanshi wasajile banabalume ba bwanga 12 kufuma mu baana banji ba bwanga bonse bo ajinga nabo ne kwibatela’mba batumwa. (Luka 6:12-16) Yesu wajinga mu Ngalilea kimye kyo “aichile batumwa Jikumi na Babiji” ne ‘kwibatuma kuya na kusapwila pa Bufumu bwa Lesa ne kubuka bakolwa.’ (Luka 9:1-6) Kabiji palutwe kacheche byo ajinga mu Yudea, Yesu ‘waichile bakwabo 70 ne kwibatuma babiji babiji.’ (Luka 9:51; 10:1) Onkao mambo, Yesu wajinga na baana banji ba bwanga bapusana pusana basapwijilenga pe aye.

Bayudea baikele baana ba bwanga ba kwa Yesu, batwajijile kwikala na Kijiilo kya Lupitailo pa mwaka pa mwaka kampe pamo na bisemi byabo. (Lupu. 12:6-11, 17-20) Byo kwashajile moba acheche kufwa, Yesu ne batumwa banji bayile ku Yelusalema. Nangwa byonkabyo, kechi waichile baana banji ba bwanga bonse kufuma mu Yudea, Ngalilea ne mu Pelia kuba’mba aye nabo na kuja Kijiilo kya Lupitailo ne. Kino kyamweshatu patoka kuba’mba Yesu wakebelengatu kwikala na batumwa banji pa kikye kimye. Wibambijile’mba: “Nakebesha bingi kuja kino Kijiilo kya Lupitailo ne anweba saka nkyangye kumanama.”​—Luka 22:15.

Kwajinga kintu kyamulengejile kuba bino. Yesu wajinga pepi kufwa nobe “Mwana Mukooko wa Lesa ufumyapo bundengamambo bwa ba pano pa ntanda.” (Yoa. 1:29) Yesu wafwainwe kufwila mu Yelusalema mo bapainanga bitapisho kwi Lesa kufumatu ne kala. Kijiilo kya Lupitailo kya mwana mukooko kyavululangamo bena Isalela kuba’mba Yehoba wibapokolwele kufuma mu Ijipita. Pano bino, kitapisho kya kwa Yesu kyanemene bingi kukila mwana mukooko mambo aye wapokolwele bantu bonse ku bundengamambo ne lufu. (1 Ko. 5:7, 8) Na mambo a kitapisho kya kwa Yesu, batumwa 12 baikele kitendekesho kya kipwilo kya bena Kilishitu. (Efi. 2:20-22) Ne muzhi wazhila Yelusalema wa mwiulu uji na “mabwe 12 pa kitendekesho” po banemba “mazhina 12 a batumwa 12 ba Mwana Mukooko.” (Lum. 21:10-14) Onkao mambo, batumwa ba kishinka bajinga na mwingilo wanema bingi wa kufikizha kyaswa muchima wa Lesa. O ene mambo Yesu o akebejilenga kujiila nabo pamo Kijiilo kya Lupitailo kyapeleleko, apa bino ne kujiila pamo nabo Kijiilo kya Nkambo kya Mabanga.

Baana ba bwanga 70 ne baana banji ba bwanga bakwabo kechi bajiijile pamo ne Yesu kino Kijiilo ne. Nangwa byonkabyo, baana banji bonse batwajijile kwikala ba kishinka bamwenejilemo mu kino Kijiilo kya Nkambo kya Mabanga kyatendekeshe Yesu. Bena Kilishitu bonse baikele bashingwa kulutwe, baikele mu lulayañano lwa Bufumu Yesu lo alayañene na batumwa banji pa bobwa bufuku.​—Luka 22:29, 30.