Luchipo ke kulaya kuba kintu kyanema bingi nangwa kufikizha kintu kyo mwalaya kuba ne kutongola Lesa kuba’mba ye kamonyi. Luchipo mwakonsha kwilwambatu nangwa kwilunemba.

Bantu bamo balanguluka’mba kyatama kuchipa luchipo mambo Yesu waambile’mba: “Kange muchipenga [luchipo] ne . . . ‘Ee’ wenu ekale ee, ne ‘Ine’ wenu ekale ine, mambo kyonse kyanungwa ku bibye kifuma kwi aye mubi.” (Mat. 5:33-37) Nangwa byonkabyo, Yesu wayukile’mba Mizhilo Lesa yo apele Mosesa yaswishishe bena Isalela kuchipa mu bintu bimo, kabiji bakalume ba Lesa bakishinka nabo bachipanga. (Nte. 14:22, 23; Lupu. 22:10, 11) Kabiji wayukile’mba Yehoba naye wachipile pa bimye byavula. (Hebe. 6:13-17) Onkao mambo, Yesu kechi walumbulwilenga’mba kechi twafwainwa kuchipa ne. Bino walumbulwilenga kuba’mba kechi twafwainwa kuchipanga kichipechipe ne. Twafwainwa kufikizha kyo twalaya mambo Yehoba byobyo akeba’mba tubenga.

Pano mwakonsha kuba byepi umvwe bemwambila’mba muchipe luchipo? Kitanshi, mwafwainwa kumona kuba’mba mukafikizha kintu kyo bemubuula kuchipa. Umvwe mubena kuzhinauka kuba’mba kechi mukekyuba ne, kyakonsha kuwama kubula kuchipa luchipo, mambo Baibolo waamba’mba: “Kyawama kubula kulaya kintu kukila kulaya ne kwikifikizha ne.” (Sapwi. 5:5.) Langulukai pa Binembelo byo byakonsha kwimukwasha kufuukulapo bulongo pa byo bemubuula kuchipa ne byo mwakonsha kwingijisha jiwi jenu ja mu muchima jo bafunjisha bulongo. Pano ñanyi Binembelo byo mwakonsha kwingijisha?

Bimo byo tuchipa byaswañana na kyaswa muchima wa Lesa. Nabiji Bakamonyi ba kwa Yehoba babena kusongola nangwa kusongolwa balaya kuba’mba bakatwajijila kwikala mu masongola. Kuno kulaya ko balaya ke luchipo. Musongwa ne musongoshi balaya kwi Lesa ne pa mvula bantu kuba’mba bakatwajijila kwitemwa, kwita muchima, kwipa mushingi kabiji bakatwajijila kuba bino mu bwikalo bwabo bonse. (Bamo babena kwisongola kechi bakonsha kwamba bino byambo sukasuka ne, pano bino nabo bachipa luchipo kwi Lesa.) Kepo bekala bamulume ne mukazhi ne kutwajijila kwikala mu masongola mu bwikalo bwabo bonse. (Nte. 2:24; 1 Ko. 7:39) Luno luchipo lwanema bingi kabiji lwaswañana na kyaswa muchima wa Lesa.

Luchipo lumo kechi lwaswañana na kyaswa muchima wa Lesa ne. Mwina Kilishitu kechi wafwainwa kuchipa luchipo nabiji lwa kuba’mba ukengijishanga bilwilo bya nkondo kuzhikijilako kyalo kyanji nangwa kusankilapo lwitabilo lwanji mwi Lesa ne. Kuba bino kwakonsha kumulengela kuzhilulula mikambizho ya Lesa. Bena Kilishitu kechi bafwainwa “kwikala ba pano pa ntanda” ne. Onkao mambo, kechi twafwainwa kwivwanganga mu milukuchi ya pano pa ntanda ne.—Yoa. 15:19; Isa. 2:4; Yako. 1:27.

 Bena Kilishitu bafwainwa kwingijisha jiwi jabo ja mu muchima pa kufuukulapo kuchipa pa bintu bimo. Pa bimye bimo saka tukyangye kufuukula kuchipa luchipo, twafwainwa kulangulukishapo bulongo pa byambo byaambile Yesu bya kuba’mba: “Panai bintu bya kwa Kesala kwi Kesala, ne bintu bya kwa Lesa kwi Lesa.”—Luka 20:25.

Twambe’mba mwina Kilishitu ubena kukeba kwikala ngikazhi mu kyalo kikwabo nangwa kutambula kitupa kya kwingijisha pa kuya mu kyalo kingi. Pano bino bamubuula kuba’mba wafwainwa kuchipa pa kuba’mba bamuswishe kwikala ngikazhi wa mu kyokyo kyalo nangwa pa kutambula kitupa kya kwingijisha pa kuya mu kyalo kikwabo. Umvwe luchipo lo bamubuula kuchipa mu kyokyo kyalo lusa kulala mizhilo ya Lesa, jiwi janji ja mu muchima jo bafunjisha bulongo jakonsha kumukanya kuchipa luno luchipo. Nangwa byonkabyo, kafulumende wakonsha kumuswisha kupimpulako mo akonsha kwambila lolo luchipo pa kuba’mba jiwi janji ja mu muchima jimuswishe kuba bino.

Muntu wachipa luchipo lo apimpulako byambo walondela jifunde jiji pa Loma 13:1 paamba’mba: “Muntu yense akookelenga bakulumpe balama kyalo.” Onkao mambo, mwina Kilishitu wakonsha kufuukulapo kuba’mba kechi kyatama kuchipa lolo luchipo lo apimpulako byambo ne, mambo ubena kulondela byakambizha Lesa.

Kabiji jiwi jenu ja mu muchima jakonsha kwimukwasha inge bemubuula kuba’mba mwingijishe kintu nangwa maboko pa kuchipa. Kala, bena Loma ne bena Sikitiya pa kuchipa baingijishanga mapoko. Kano kajinga kayukilo kamweshanga amba lesa wabo wa nkondo ukebapa bulume ne kwibaswisha kuya na kulwa yoyo nkondo. Bangiliki abo basuntulanga kuboko mwiulu pa kuchipa. Kino kyamweshanga amba bayuka’mba kuji lesa wa bulume ubena kumvwa byo babena kwamba ne kumona byo babena kuba kabiji ukatotolwesha bantu bonse.

Twayuka kuba’mba mwina Kilishitu kechi wakonsha kuchipa kwingijisha kintu nangwa kayukilo kemenako bupopweshi bwa bubela ne. Pano mwakonsha kuba byepi inge bemwambila mu kochi kuba’mba mutenteke kuboko kwenu pa Baibolo pa kuchipa kumwesha kuba’mba musakwamba kine? Mwakonsha kufuukulapo kuba bino mambo Binembelo byaambapo pa bantu bamo bakishinka baingijishe maboko pa kuchipa. (Nte. 24:2, 3, 9; 47:29-31) Mwafwainwa kuvulukanga kuba’mba inge mwachipa luchipo lwa uno mutundu, ko kuba’mba mubena kwamba kwi Lesa amba musakwamba kine. Onkao mambo, mwafwainwa kukumbula mepuzho onse o basakwimwipuzha kwakubula kwamba bubela.

Na mambo a kuba’mba twanemeka bingi bulunda bwetu ne Yehoba, twafwainwa kulangulukapo bulongo pa luchipo lo tukeba kuchipa ne kulombapo. Kabiji twafwainwa kumona kuba’mba luchipo lwetu kechi lwazhilulula mizhilo ya Yehoba nangwa konauna jiwi jetu ja mu muchima ne. Onkao mambo, inge mwafuukulapo kuchipa luchipo, mwafwainwa kwilufikizha.—1 Pe. 2:12.