Umvwe mwanamulume wakana mwinakwanji ne kusongola jikwabo, kipwilo kikayuka’mba masongola anji a kala apwa kabiji masongola ayukanyikwa ke a katataka. Pa kuba’mba tuyuke bulongo bishinka, twayai tumone byaambilepo Yesu pa kwikana ne pa kusongola jikwabo.

Pa Mateo 19:9 Yesu waambilepo kishinka kimo muntu kyo afwainwa kukainapo mwinakwanji. Waambile’mba: “Yense ukana mukazhanji pa kubula mambo a bulalelale ne kusongola mukwabo, wauba bukende.” Byambo bya kwa Yesu bibena kwitukwasha kuyuka kuba’mba (1) masongola afwainwa kupwatu inge kya kuba umo wauba bulalelale ne (2) inge mwanamulume wakana mukazhanji pa mambo o babula kwambapo mu Binembelo amba o a kwikainapo wauba bukende. *

Nanchi byambo bya kwa Yesu bibena kulumbulula’mba mwanamulume wauba bukende ne kukana mukazhanji wakasuluka kusongola jikwabo kwesakana na byaambapo Binembelo nyi? Ine. Umvwe mwanamulume wauba bukende, mukazhanji ye uji na luusa lwa kumulekelako mambo nangwa kumukana. Umvwe wamukana kabiji ku kije kya mambo bebapa kyete kya kwikainapo, bonse babiji bakasuluka kusongola nangwa kusongolwa ku muntu mukwabo.

Kimye kimo, mukazhi wafwainwa kufuukulapo kulekelako mambo mwatawanji kufuma panshi ya muchima kuba’mba azhikijile masongola abo. Pano kyakonsha kwikala byepi inge kya kuba mwanamulume wauba bukende wakana kulondela byafuukulapo mukazhanji kuba’mba wamulekelako mambo, bino aye wafuukulapotu’mba masongola apwe? Umvwe mwanamulume wakana kulondela byafuukulapo mukazhanji kuba’mba wamulekelako mambo, kechi wakasuluka kusongola jikwabo mwayila Binembelo ne. Inge wakosapotu ne kufuukulapo kusongola jikwabo wauba bukende jikwabo kwesakana na mwaambila Binembelo. Kabiji bafwainwa kumulengela kavoto ka mambo mu kipwilo.—1 Ko. 5:1, 2; 6:9, 10.

Inge mwanamulume wabula kukasuluka mwayila Binembelo wasongola jikwabo, kipwilo kyafwainwa kumonanga byepi masongola anji a kala ne a katataka? Nanchi masongola anji a kala kechi apwa kwesakana na mwayila Binembelo nenyi? Nanchi mukazhanji wa kala ne luno wafwainwa kumulekelako mambo nyi, inyi kumukana? Nanchi masongola anji a katataka beamona’mba a bukende nyi?

Kala twayukile kuba’mba inge mwanamulume wakana mukazhanji pa kubula mambo a bukende ne kusongola mukwabo, aa masongola beamonanga’mba a bukende mambo mukazhanji wa kala ukiji mumi, kechi wasongolwa jikwabo ne, kabiji kechi walengapo mambo a bukende ne. Nangwa byonkabyo, Yesu kechi waambilepo pa muntu wabula kulenga mambo a bukende byo aambile pa kwikana, pa kusongola nangwa kusongolwa jikwabo ne. Pakuba waambile’mba mwanamulume wakana mukazhanji pa mambo o babula kwambapo mu Binembelo amba o a kwikainapo ne  kusongola mukwabo wauba bukende. Kino kibena kulumbulula kuba’mba masongola anji atanshi apwa mambo wauba bukende pa kukana mukazhanji ne kusongola jikwabo. Muno mo mwatazhizhe Yesu.

Inge mwanamulume wafuukulapo kukana mukazhanji ne kusongola mukwabo, kechi kikakonsheka mukazhanji wa kala kuba’mba amulekeleko mambo pa kuba’mba batwajijile kwikala mu masongola abo ne. Kechi wafwainwa kumonanga’mba ukiji na luusa lwa kulekelako mambo mwatawanji wa kala pa kuba’mba masongola abo atwajijile ne. Kabiji inge mukazhanji wa kala ye akaine wafwa, wasongolwa jikwabo nangwa wauba bulalelale, kino kechi kikapimpula mubena kumwena kipwilo masongola anji a katataka ne. *

Twisamba pa mwanamulume wauba bukende ne kukana mukazhanji. Pano kyakonsha kwikala byepi inge uno mwanamulume wabula kuba bukende wakana mukazhanji kabiji wasongola mukwabo? Nangwa kyakonsha kwikala byepi inge kya kuba uno mwanamulume wabula kuba bukende wakikana mukazhanji, apa bino wauba bukende ne kusongola jikwabo nangwa kya kuba mukazhanji mutanshi wafuukulapo kumulekelako mambo? Uno mwanamulume byo akana mukazhanji ne kusongola jikwabo wauba bukende. Kuba bino kwapwisha masongola abo. Kabiji masongola anji a katataka o ayukanyikwa ku kafulumende. Kyamba kya Usopa kya November 15 1979, pa jipa 32 paambile’mba: “Inge muntu wasongola nangwa wasongolwa jikwabo kechi wafwainwa kupwisha masongola anji a katataka’mba abwezhe mwinakwanji wa kala ne. Masongola anji a kala apwa mambo wauba bukende ne kusongola jikwabo.”

Aluno lupimpu kechi lubena kulumbulula’mba masongola kechi azhila ne. Nangwa kumona muntu wauba bukende kuba’mba kechi walenga mambo ne. Mwanamulume wakana mukazhanji ne kusongola mukwabo pa kubula mambo o baambapo mu Binembelo amba o bafwainwa kwikainapo, bafwainwa kumulengela kavoto ka mambo, mambo wauba bukende. (Umvwe mwanamukazhi ye asongola katataka mwina Kilishitu, naye bafwainwa kumulengela kavoto ka mambo, mambo naye wauba bukende.) Nangwa kya kuba ano masongola kechi basakwiamonanga’mba a bukende ne, bino pafwainwa kupita myaka yavula pa kuba’mba uno mwanamulume bamupepo jikwabo mingilo mu kipwilo. Bakulumpe mu kipwilo bafwainwa kumona’mba bantu batatula kumunemeka jikwabo, kechi bakizhingila pa bintu byatama byo aubile ne. Kabiji bakulumpe bafwainwa kukebakeba bishinka ne kuyuka inge mukazhanji ye akaine ne baana banji bo afutukilemo bakimunemeka.—Mala. 2:14-16.

Kukana mwanamukazhi pa mambo o babula kwambapo mu Binembelo amba o a kwikainapo ne kusongola mukwabo ke kulala mizhilo ya Lesa. Onkao mambo, bena Kilishitu bafwainwa kumonanga masongola byonka biamona Yehoba amba azhila.—Sapwi. 5:4, 5; Hebe. 13:4.