1, 2. (a) Butemwe bwakwatankana byepi na lwitabilo? (b) Ñanyi mepuzho o tusakwisambapo?

ATWEBA twamutemwa Yehoba “mambo aye ye wajinga mutanshi kwitutemwa.” (1 Yoa. 4:19) Jishinda jimo Yehoba jo amwesheshamo butemwe ke kupesha bakalume banji ba kishinka. Umvwe twamutemwa bingi Lesa, tukakosesha lwitabilo lwetu mwi aye, kabiji tukashiinwa’mba koaji ne kuba’mba ufweta boba bo atemwa. —Tangai Bahebelu 11:6.

² Yehoba ufweta bantu. Kino kimwekela mu byonse byo oba. Pa kuba’mba lwitabilo lwetu lukose, twafwainwa kushiinwa’mba Lesa ukafweta bantu bamukebesha, mambo “lwitabilo ke kintu kimulengela kushiinwa’mba akya kyo mwaketekela kikamweka.” (Hebe. 11:1) Kya kine, lwitabilo lwavwangamo kuketekela bintu byawama bitulaya Lesa kulutwe. Pano tumwenamo byepi mu kuketekela’mba Lesa uketufweta? Yehoba wafwetele byepi bakalume banji ba kala, kabiji ufweta byepi bakalume banji lelo jino? Twayai tumone.

3. Ñanyi mulaye uji pa Malakai 3:10?

³ Yehoba Lesa mwine wipa mutembo wa kufweta bakalume banji  ba kishinka. Onkao mambo, witubuula kuba’mba twafwainwa kukanamina ano mapesho anji. Baibolo waamba’mba: “‘Ngesekai mu kino, mumone inge kechi nakonsha kwimushinkwila bipenze bya mwiulu ne kwimwitulwila mapesho avula kya kuba kechi mukakajilwa kintu nangwa kimo ne,’ byo byaamba Yehoba wa mabumba.” (Mala. 3:10) Tumwesha lusanchilo lwetu kwi Yehoba umvwe twaketekela mwi aye ne kumona byo aketupesha.

4. Mambo ka o twafwainwa kuketekela byambo byaambile Yesu byanembwa pa Mateo 6:33?

⁴ Yesu walayile baana banji ba bwanga amba umvwe batangizhako Bufumu patanshi mu bwikalo bwabo, Lesa ukebakwasha. (Tangai Mateo 6:33.) Yesu walayile bino mambo washiinwe kuba’mba Yehoba ufikizha milaye yanji yonse. (Isa. 55:11) Ne atweba twafwainwa kuketekela’mba umvwe twaitabila mwi Yehoba na muchima yense, ukafikizha mulaye wanji wa kuba’mba: “Kechi nkakusha ne, kabiji kechi nkakulekelela ne.” (Hebe. 13:5) Uno mulaye witukwasha kuketekela byambo byaambile Yesu amba twafwainwa kutwajijila kukeba Bufumu bwa Lesa ne bololoke bwanji patanshi.

5. Mukumbu wa kwa Yesu ye akumbwile Petelo ukosesha byepi lwitabilo lwetu?

⁵ Mutumwa Petelo waipwizhe Yesu amba: “Twasha bintu byonse ne kwimulondela; pano ñanyi bintu byo tukamwenamo?” (Mat. 19:27) Yesu kechi wamukajipijile Petelo pa kwipuzha bino ne, aye wabuujile baana banji ba bwanga amba bakebafweta pa kyo baubile. Bano batumwa ba kishinka ne bakwabotu bakalamanga pamo ne Yesu mwiulu. Pano bino, ne pa kino kimye tumwenamo byawama. Yesu waambile’mba: “Yense washa nzubo, bakolojanji nangwa bankasanji ba balume, banyenga yanji,  bashanji, bainanji, baana nangwa majimi na mambo a jizhina jami, ukatambula byavula kufika ku kitota kukila pa bibye kabiji ukekala na bumi bwa myaka ne myaka.” (Mat. 19:29) Baana banji ba bwanga bamwenamo byawama byavula bingi kukila pa byo bashile. Nanchi bashetu, bainetu, bankasetu ne bakolojetu, banyenga yetu, ne baana bo twataana mu jibumba ja Lesa kechi banema kukila bintu byonse byo twasha pa kuba’mba tutangizheko Bufumu nenyi?

6. Mambo ka Yehoba o alayila’mba ukafweta bapopweshi banji?

⁶ Yehoba walaya kufweta bapopweshi banji, kabiji kuyuka kino kwibakwasha kuchinchika meseko. Kununga pa kwiyowa mapesho a Lesa lelo jino, bakalume ba kwa Yehoba Lesa ba kishinka babena kutengela bintu byavula bingi byawama biji kulutwe. (1 Timo. 4:8) Kine, inge twashiinwa’mba Yehoba “ufweta aba bamukebesha,” tukatwajijila kukosa mu lwitabilo.—Hebe. 11:6.

7. Luketekelo lwingila byepi nobe kimiko?

⁷ Mu Jashi ja pa Mutumba, Yesu waambile’mba: “Sekelai ne kusangalala, mambo mfweto yenu ya mwiulu yabaya, mambo byo byo bamanyikilenga ne bangauzhi bajingako anweba saka mukyangye kusemwa.” (Mat. 5:12) Bakalume ba Lesa bamo bakatambula mfweto ya bumi mwiulu. Kabiji bakwabo baji na luketekelo lwa kwikala myaka ne myaka mu paladisa pano pa ntanda. Onkao mambo, nabo bafwainwa ‘kusekela ne kusangalala.’ (Sala. 37:11; Luka 18:30) Umvwe tukaya mwiulu nangwa tukekala pano pa ntanda, luketekelo lwetu luji nobe “kimiko kya mweo wetu, lwa kine kabiji lwakosa.” (Hebe. 6:17-20) Byonkatu kimiko byo kikwasha bwato kubula kukumpulwa na luvula mukatampe, kuketekela kuba’mba tukatambula mfweto kwitukwasha kutwajijila kwikala bashikimana ne kubula kwakamwa. Kabiji luketekelo lwetu lwitukwasha kuchinchika makatazho.

8. Luketekelo lwetu luji byepi na bulume bwa kukepeshako bijikila?

⁸ Luketekelo lwetu lwaimena pa byo tufunda mu Baibolo luji bingi na bulume bwa kukepeshako bijikila. Byonkatu muchi wa kushinga byo abuka bilonda, ne milaye ya Lesa byo byo itukwasha kukepeshako bijikila. Kitutekenesha bingi ‘kutwika Yehoba bisendwa byetu,’ mambo twayuka’mba ‘aye uketukosesha.’ (Sala. 55:22) Twashiinwa kuba’mba “Lesa wakonsha kuba bintu byavula kukila pa bintu byonse byo tulomba nangwa byo tulanguluka.” (Efi. 3:20) Akilangulukaipotu! Kechi ukapelelatu pa kuba byavula ne, bino ukoba bintu “byavula kukila pa bintu byonse” byo tulomba.

9. Twashiinwa byepi amba Yehoba uketupesha?

⁹ Pa kuba’mba tukatambule mfweto, twafwainwa kwikala na lwitabilo mwi Yehoba ne kukookela lutangijilo lwanji. Mosesa wabuujile bena Isalela amba: “Kine Yehoba ukemupesha mu kyalo kyo abena kwimupa Yehoba Lesa wenu kwikala ke kyenu kya buswanyi, inge mwakookela jiwi ja Yehoba Lesa wenu ne kuteshako muchima kulama mikambizho yanji yo mbena kwimupa lelo jino. Mambo Yehoba Lesa wenu ukemupesha byonkatu byo emulayile.” (Mpitu. 15:4-6) Nanchi mwashiinwa kuba’mba Yehoba ukemupesha inge mwatwajijila kumwingijila mu bukishinka nyi? Muji na bishinka byavula byakonsha kwimulengela kushiinwa.

10, 11. Yehoba wafwetele byepi Yosefwa?

¹⁰ Baibolo bamunembele kuba’mba etukwashenga. Muji mashimikila avula amwesha Lesa byo afwetele bakalume banji. (Loma 15:4) Yosefwa ke muntu umo ye afwetele bingi. Bakolojanji bamupoteshe mu buzha, kabiji palutwe  kacheche bamuka nkambo yanji bamubepejile mambo akatampe, onkao mambo, bamukashile mu kaleya mu Ijipita. Bino nanchi abino byonse byalumbulwilenga’mba Lesa wanji wamushile nyi? Ine! “Yehoba wajinga ne Yosefwa kabiji wamumweshanga butemwe bubula kwaluka . . . Yehoba wajinga ne Yosefwa kabiji Yehoba wamukwashanga mu bintu byonse byo aubanga.” (Nte. 39:21-23) Mu makatazho onse o apichilengamo, Yosefwa watwajijile kuketekela mwi Lesa.

¹¹ Byo papichile myaka, Felo wafumishe Yosefwa mu kaleya ne kumutongola kwikala kalama wa kibiji mu kyalo kya Ijipita. (Nte. 41:1, 37-43) Yosefwa ne mukazhanji baikele na baana babalume babiji. “Yosefwa watumbile mwananji mubeji amba Manase, mambo waambile’mba, ‘Lesa wandengela kuvulama makatazho ami onse ne bonse ba mu nzubo ya batata.’ Kabiji watumbile mwananji wa bubiji amba Efelaimu, mambo waambile’mba, ‘Lesa wandengela kusema baana mu kyalo mo napichile mu makatazho.’” (Nte. 41:51, 52) Na mambo a kuba Yosefwa watwajijile kwikala wa kishinka kwi Lesa, Lesa wamupesheshe, kabiji kupichila mwi aye, wapulwishe bena Isalela ne bena Ijipita ku kipowe kya nzala. Kishinka ke kino, Yosefwa wayukile’mba Yehoba ye wamufwetele ne kumupesha.—Nte. 45:5-9.

12. Yesu watwajijile byepi kwikala wa kishinka mu meseko?

¹² Yesu Kilishitu naye watwajijile kukookela Lesa mu meseko a lwitabilo lwanji onse, kabiji bamufwetele. Ñanyi kintu kyamukwashishe kuchinchika? Mambo a Lesa aamba’mba: “Na mambo a lusekelo lo bamutujile kulutwe, wachinchikile pa kichi kya lumanamo, kabiji kechi wateleko muchima ku bumvu ne.” (Hebe. 12:2) Kutumbijika jizhina ja Lesa kwaletelanga Yesu lusekelo lukatampe. Kunungapo, Shanji waitabizhe mingilo yanji ne kumupa mingilo ikwabo yawama yavula. Baibolo witubuula’mba Yesu “waikala ku kilujo kya jitanda ja Lesa.” Kinembelo kikwabo kyaamba’mba: “Lesa wamupele kifulo kikatampe ne jizhina jakila mazhina onse.”—Fili. 2:9.

13, 14. Yehoba umvwa byepi pa byo tumwingijila?

¹³ Kwa kubula ne kuzhinaukatu ne, Yehoba usanta bingi pa byo twibikako kumwingijila. Aye wayuka byo twakamwa ne byo twizhinauka atweba bene. Witubila lusa inge makatazho a mali nangwa kukolwakolwa bibena kwitulengela kukankalwa kumwingijila papelela bulume bwetu. Kabiji twayuka’mba Yehoba unemeka bingi bakalume banji pa byo bebikako kutwajijila kwikala ba kishinka kwi aye.—Tangai Bahebelu 6:10, 11.

¹⁴ Vulukai ne kuba’mba twakonsha kulomba kwi Lesa, aye yenka ‘Umvwa milombelo,’ saka twashiinwa’mba ukakumbula milombelo yetu. (Sala. 65:2) “Shanji bya lusa kabiji Lesa wa lutekenesho lonse” uketukwasha ne kwitutekenesha, kampe kupichila mu bapopweshi bakwetu. (2 Ko. 1:3) Yehoba umvwa bingi bulongo inge twaubila bakwetu lusa. Baibolo waamba’mba: “Awa ubila byawama mulanda ukongwesha Yehoba, ne aye ukamufweta pa bintu byo oba.” (Maana 19:17; Mat. 6:3, 4) Onkao mambo, inge twakwasha bakwetu babena kupita mu makatazho, Yehoba umonatu nobe tubena kumukongwesha mali. Kabiji walaya’mba ukafweta bonse bobila bakwabo lusa.

15. Ñanyi mfweto yo mutengela kutambula? (Monai kipikichala kitanshi.)

¹⁵ Kintu kimo kitundaika bena Kilishitu bashingwa ke kutengela kutambula ‘munchinya wa bololoke, Nkambo aye mutonyi waoloka ye akebafweta mu joja juba.’ (2 Timo. 4:7, 8) Kino  kechi kyalumbulula’mba bena Kilishitu babula kushingwa bakatambula mfweto icheche ne. “Mikooko ikwabo” yavula ya kwa Yesu itengela kutambula mfweto ya kwikala myaka ne myaka mu paladisa pano pa ntanda. “Bakasangalelanga mu kuvula kwa mutende.”—Yoa. 10:16; Sala. 37:11.

16. Ñanyi byambo bya lutekenesho byo tutaana pa 1 Yoano 3:19, 20?

¹⁶ Bimye bimo twakonsha kumona nobe kafwako kibena kufumamo mu mingilo yetu ne, nangwa’mba kampe byo tuba kechi bitokesha Yehoba ku muchima ne. Twakonsha ne kuzhinauka amba kampe Lesa kechi uketufweta ne. Bino twafwainwa kuvulukanga’mba “Lesa wakila michima yetu kabiji wayuka bintu byonse.” (Tangai 1 Yoano 3:19, 20.) Witupesha pa byonse byo tuba mu kumwingijila na muchima yense na mambo a lwitabilo lwetu mwi aye ne kumutemwa ko twamutemwa, nangwatu bimweke kukepa kwi atweba.—Mako 12:41-44.

17. Ñanyi mfweto yo tumwenamo lelo jino?

¹⁷ Nangwatu mu ano moba a kupelako akatazha a ntanda ya kwa Satana, Yehoba ubena kupesha bantu banji. Ubena kupa bapopweshi ba kishinka kajo ka ku mupashi kavula bingi ne kwibakwasha kwikala mu mutende na balongo bonse mwaya ntanda. (Isa. 54:13) Byonka byalayile Yesu, Yehoba witufweta lelo jino kupichila mu kwitupa kisemi kya balongo ne banyenga ba mu lwitabilo betutemwa. (Mako 10:29, 30) Kunungapo, aba bonse bakebesha Lesa bebafweta na mutende, lusekelo, ne kwibalengela kutondwa na bwikalo bwabo.—Fili. 4:4-7.

18, 19. Bakalume ba Yehoba bomvwa byepi pa byo bebafweta luno?

¹⁸ Bakalume ba Yehoba mwaya ntanda bemwena Yehoba byo ebafweta. Ba Bianca ba ku Germany baambile’mba: “Namusanchila bingi Yehoba pa byo ankwasha ne kunkosesha pa juba pa juba. Ntanda yatama bingi. Onkao mambo, kwingijila Yehoba kundengela kufwenya kwipi ne aye ne kumvwa’mba nazhikijilwa. Jonse inge nasankilapo bintu bimo pa kuba’mba namwingijile, aye umpesha na bintu byavula kukila pa byonse byo nasankilapo.”

¹⁹ Langulukai ne pa ba Paula bekala ku Canada. Baji na myaka 70, kabiji baji na kikola kya spina bifida, ko kuba’mba kikola kya mu longololo kilengela muntu kulemana. Baambile’mba: “Kulemana kechi kulumbulula’mba kechi nakonsha kusapwila ne. Ñingijisha mashinda akwabo a kusapwilamo, nabiji kusapwila pa foni ne kusapwila ku bonse beya na kummona. Nji na kabuku mo nnemba binembelo ne byambo bya lutundaiko byo ntanga mu mabuku etu, kabiji pa kimye pa kimye, mpitulukamo mu kano kabuku. Nekatela’mba ‘Kabuku ka Bumi.’ Kuta muchima pa milaye ya Yehoba kwitukwasha kubula kulefulwa. Nangwa tupite mu bintu byakatazha byepi, Yehoba witukwasha kimye kyonse.” Kampe bintu byo mubena kupitamo byapusanako na bibena kupitamo ba Bianca ne ba Paula. Nangwa byonkabyo, mwakonsha kulangulukapo mashinda amo Yehoba mo abena kwimufwetela anweba ne bantu bo mwayuka. Kyawama kalanguluka pe Yehoba byo abena kwimufweta luno, ne byo akemufweta kulutwe na lwendo.

20. Ñanyi mfweto yo tukatambula inge twatwajijila kwingijila Yehoba na muchima yense?

²⁰ Vulukainga kuba’mba mu milombelo yenu ifuma panshi ya muchima ne kulomba kwi Lesa saka mwakasuluka “muji mfweto ikatampe.” Ketekelai kuba’mba ‘umvwe mwapwisha kuba kyaswa muchima wa Lesa, mukatambula akya kyalaiwe.’ (Hebe. 10:35, 36) Onkao mambo, twayai tutwajijile kukosesha lwitabilo lwetu mwi Yehoba ne kumwingijila na muchima yense. Twayai tubenga bino mambo twayuka’mba Yehoba uketufweta.—Tangai Kolose 3:23, 24.