1-3. Ñanyi bintu byaubiwe byalengejile juba ja Pentekosita kwikala janema, kabiji bino byafikizhe byepi bintu byaawile bangauzhi mu Binembelo? (Monai kipikichala kitanshi.)

JAJINGA juba ja pa Mulungu lukelo mu Yelusalema. Jino juba jajinga jawama ja lusekelo. Bantu basekejilenga juba ja Pentekosita, mambo jajinga juba ja kijiilo kyazhila kyaikalangako ku ntendekelo ya kunowa wichi. Pa joja juba lukelo mu nzubo ya Lesa, ñanga mukatampe walambulanga bitapisho byo balambulanga kimye kyonse. Kepo pa kimye kya 9 koloko, walambulanga bashinkwa babula mbizho babiji bo balenganga na wichi mutanshi, nangwa na bipangwa bya nsomo. Ñanga mukatampe wapepezhanga bano bashinkwa kuku ne kuku ne kwibapana kwi Yehoba. Ajino juba jajinga juba ja Pentekosita mu mwaka wa 33.​—⁠Bena Levi 23:​15-20.

² Pa myaka yavula bingi, ñanga mukatampe wapananga uno mulambo wa kupepezha pa mwaka pa mwaka. Uno mulambo wipashishe na kintu kyanema bingi kyaubiwe pa Pentekosita mu mwaka wa 33. Kino kintu kyaubiwe ku baana ba bwanga ba  kwa Yesu 120 balombelenga mu kibamba kya peulu mu Yelusalema. (Byubilo 1:​13-15) Myaka 800 kino saka kikyangye kubiwa, ngauzhi Yoela waawijile jimo bino byonse byamwekele. (Yoela 2:​28-32; Byubilo 2:​16-21) Ñanyi kintu kyanema kyaubiwe?

³ Tangai Byubilo 2:​2-4. Pa Pentekosita mu mwaka wa 33, Lesa wapele bano bena Kilishitu mupashi wazhila, kabiji bashingilwe. (Byubilo 1:⁠8) Kepo jibumba jatendekele kukonkana ne kwibazhokoloka, kabiji baana ba bwanga batendekele kwamba pa bintu byawama byo bamwene ne kumvwa. Mutumwa Petelo walumbulwile mwatajile kino kyamwekele ne ene mambo o kyanemejile. Kepo abuujile jibumba’mba: “Lapilai ne kubatizhiwa mu jizhina ja Yesu Kilishitu pa kuba’mba mambo enu alekelwe, kabiji musakutambula mupashi wazhila wa bupetu.” Pa jonkaja juba, bantu nobe 3,000 babatizhiwe, kabiji nabo batambwijile mupashi wazhila.​—⁠Byubilo 2:​37, 38, 41.

4. (a) Mambo ka o twafwainwa kutela muchima ku byamwekele pa Pentekosita? (b) Ñanyi kintu kikwabo kyanema kyaubiwe pa jino juba? (Monai byambo bikwabo.)

⁴ Ñanga mukatampe ne mulambo ye alambulanga pa Pentekosita byaimenangako ka? Ñanga mukatampe waimenangako Yesu. Bashinkwa baimenangako baana ba bwanga ba kwa Yesu bashingwa. Bano baana ba bwanga bebasala kufuma mu bantu bandengamambo kabiji batelwa’mba “bya nsomo.” (Yakoba 1:18) Lesa wibatambwila bano kwikala baana banji kabiji wibasala kwikala bamfumu ba kulama pamo ne Yesu mwiulu mu Bufumu bwa Lesa. (1 Petelo 2:⁠9) Yehoba ukengijisha Bufumu bwanji kupesha bantu bonse ba lukookelo. Onkao mambo, umvwe tukekala mwiulu pamo na Yesu nangwa pano pa ntanda mu paladisa, Pentekosita wa mu mwaka wa 33 wanema bingi kwi atweba. ​—⁠Monai byambo bikwabo.

5. Twayuka byepi amba bashingwa kechi bonse bashingwa mu jishinda jimotu ne?

⁵ Baana ba bwanga bajinga mu kibamba kya peulu kechi balubilemo jino juba ne. Bonse bajinga na kintu kyamwekelenga nobe lubebe lwa mujilo pa mutwe. Yehoba wibapele bulume bwa kwamba milaka ikwabo. Kechi bazhinaukilenga amba bashingwa na mupashi wazhila ne. (Byubilo 2:​6-12) Nangwa byonkabyo, bino bintu kechi bimweka ku bena Kilishitu bonse inge bashingwa ne. Kya kumwenako, Baibolo kechi waambapo amba kintu kiji nobe lubebe lwa mujilo kyamwekele pa mitwe ya bantu bavula bashingilwe palutwe kacheche mu Yelusalema pa jonkaja juba ne. Bashingilwe kimye kyo babatizhiwe. (Byubilo 2:38) Kabiji kechi bena Kilishitu bonse bashingwa pa jonka juba jo babatizhiwa ne. Bena Samaliya bamo bashingilwe saka papita ne moba kufuma juba jo babatizhiwe. (Byubilo 8:​14-17) Kabiji kimye kikwabo, Koneleusa ne ba mu nzubo yanji bashingilwe saka bakyangye ne kubatizhiwa ne.​—⁠Byubilo 10:​44-48.

6. Ñanyi kintu kitambwila bashingwa bonse, kabiji kino kibalengela kuyuka’mba ka?

⁶ Kyamwekatu patoka’mba bena Kilishitu bayukila mu mashinda apusana pusana amba bashingwa. Bamo bayuka ponkapotu amba Yehoba wibashinga. Bakwabo nabo bayuka inge papita kimye. Bino mutumwa Paulo walumbulwile kimweka ku bano bonse. Waambile’mba: “Byo mwaitabijile  mwabikilwe katetesho na mupashi wazhila walayilwe kupichila mwi aye, ko kayukilo ko betupelejile jimo ka buswanyi bwetu.” (Efisesa 1:​13, 14) Onkao mambo, Yehoba wingijisha mupashi wanji wazhila kulengela bano bena Kilishitu kuyuka’mba kine wibasala kuya mwiulu. Mu jino jishinda, mupashi wazhila wikala ‘kayukilo ko bebapela jimo,’ nangwa kishiino kwi abo amba bakekalanga myaka ne myaka mwiulu, kechi pa ntanda ne.​—⁠Tangai 2 Kolinda 1:​21, 22; 5:⁠5.

7. Mwina Kilishitu yense washingwa wafwainwa kuba ka pa kuba’mba akatambule kilambu kyanji kya kuya mwiulu?

⁷ Mwina Kilishitu inge washingwa, nanchi kilumbulula’mba kyapwa ukaya mwiulu nyi? Ine. Ushiinwa’mba bamwita kuya mwiulu. Bino ukatambulatu kino kilambu inge watwajijila kwikala wa kishinka kwi Yehoba. Petelo walumbulwile’mba: “Onkao mambo, balongo bami, ibikishaingako kuba’mba kwitwa ne kusalwa kwenu kutwajijile kwikala byonkabyo, mambo umvwe mwatwajijila kuba bino bintu, kechi mukakankalwa ne. Monka mu kuba bino mukobilwa bingi bibusa kabiji mukatwela mu Bufumu bwa myaka ne myaka bwa Nkambo yetu kabiji Mupulushi aye Yesu Kilishitu.” (2 Petelo 1:​10, 11) Onkao mambo, mwina Kilishitu yense washingwa kechi wafwainwa kuswisha kintu nangwa kimo kumulengela kuleka kwingijila Yehoba ne. Nangwa kya kuba bamwita kuya mwiulu, inge wabula kwikala wa kishinka, kechi ukatambula kilambu kyanji ne.​—⁠Bahebelu 3:1; Lumwekesho 2:⁠10.

8, 9. (a) Mambo ka bantu bavula o kibakatezha kuyuka kimweka inge muntu washingwa? (b) Muntu uyuka byepi amba bamwita kuya mwiulu?

⁸ Bakalume ba Lesa bavula lelo jino kyakonsha kwibakatazha kuyuka kimweka inge muntu bamushinga kwi Lesa. Kechi twakonsha kukumya ne, mambo abo kechi bashingwa ne. Lesa walengele bantu kwikala myaka ne myaka pano pa ntanda, kechi mwiulu ne. (Ntendekelo 1:28; Salamo 37:29) Bino Yehoba wasala bamo kwikala bamfumu ne bañanga mwiulu. Onkao mambo, inge washinga muntu, luketekelo lwa uno muntu ne ndangulukilo yanji byaluka, kya kuba utendeka kutengela kwikala mwiulu.​—⁠Tangai Efisesa 1:⁠18.

⁹ Pano muntu uyuka byepi amba bamwita kuya mwiulu? Akyumvwai byaambile mutumwa Paulo ku balongo bashingwa bajinga mu Loma, “batelwa’mba bazhijikwa.” Wibambijile’mba: “Kechi mwatambwile mupashi wa buzha uleta moyo ne, bino mwatambwile mupashi wa kwimutongola kwikala baana, kabiji yenka uno mupashi witulengela kwamba’mba: ‘Abba, Tata!’ Uno mupashi ushimuna pamo na mupashi wetu kuba’mba twi baana ba Lesa.” (Loma 1:7; 8:​15, 16) Na mupashi wanji wazhila, Lesa ulengela muntu kuyuka’mba waitwa kwikala mfumu na kulama pamo ne Yesu mwiulu.​—⁠1 Tesalonika 2:⁠12.

10. 1 Yoano 2:27 watazha mwepi byo aamba’mba mwina Kilishitu washingwa kechi ukeba muntu wa kumufunjisha ne?

 ¹⁰ Aba batambwila luno lwito kufuma kwi Lesa kechi bakebewa muntu wa kuya na kwibabuula’mba bashingwa ne. Yehoba wibalengela kushiinwa. Mutumwa Yoano waambijile bena Kilishitu bashingwa amba: “Anweba mwashingwa kwi yewa wazhila, kabiji bonse mwayuka bukine.” Kabiji waambile’mba: “Anweba Lesa wimutongola na mupashi wanji ne uno mupashi uji mwi anweba, kabiji kechi mukebewa kwimufunjisha ku muntu nangwa umo ne; bino kuno kutongolwa na mupashi wazhila kwa kine kechi kwa bubela ne, kabiji ubena kwimufunjisha pa bintu byonse. Twajijilai kwikala mwi aye byonkatu mupashi wazhila byo emufunjishe.” (1 Yoano 2:​20, 27) Bena Kilishitu bashingwa bakebewa kwibafunjisha kwi Yehoba byonkatu byo afunjisha bantu bonse. Bino kechi bakeba muntu wa kwibabuula’mba bashingwa ne. Yehoba wingijisha bulume bukatampe, ko kuba’mba, mupashi wanji wazhila, pa kwibalengela kushiinwa’mba bashingwa.

11, 12. Mwina Kilishitu washingwa wakonsha kuzhinauka’mba ka, bino ñanyi kintu kyo abula kuzhinauka?

¹¹ Bena Kilishitu inge bashingwa na mupashi wazhila, baluka bingi. Yesu waambile’mba ‘basemwa jibiji’ nangwa’mba “kusemwa mwiulu.” (Yoano 3:​3, 5; tubyambo twa munshi) Kepo alumbulwile’mba: “Kange ukumye pa byo nakwambila’mba: Anweba bantu mwafwainwa kusemwa jibiji ne. Mwela upupila ko akeba kabiji mumvwa ne byo apupa, bino kechi muyuka ko abena kufumina ne ko abena kuya ne. Byo byo kiji ne ku yense wasemwa ku mupashi.” (Yoano 3:​7, 8) Kwambatu kine, kyakatazha kulumbulwila muntu wabula kushingwa byo kyumvwanyika kushingwa.​—⁠Monai byambo bikwabo.

¹² Muntu washingwa wakonsha kwishikisha’mba, ‘Mambo ka Yehoba o ansajijile mu kifulo kya kusala mukwabo?’ Wakonsha ne kuzhinauka inge wafikilamo kwingila uno mwingilo. Bino kechi uzhinauka’mba Yehoba wamusala ne. Pakuba, usangalala bingi ne kusanta pa buno bupe. Bashingwa bomvwa byonka byaumvwine Petelo byo aambile’mba: “Atotwe Lesa Shanji Nkambo yetu Yesu Kilishitu, witusemene jibiji monka mwayila lusa lwanji lukatampe kuba’mba etupe luketekelo lumi kupichila mu kusangulwa mu bafu kwa Yesu Kilishitu, ne kwitupa buswanyi bubula kubola, bwabula kuzhilululwa kabiji bubula kwaluka. Buno buswanyi bemulaminabo mwiulu.” (1 Petelo 1:​3, 4) Bashingwa inge batanga bino byambo, bayuka kwa kubula ne kuzhinauka’mba Shabo ye ubena kwamba ne abo.

13. Ndangulukilo ya muntu ipimpulwa byepi inge washingwa na mupashi wazhila, kabiji ki ka kilengela luno lupimpu?

¹³ Yehoba saka akyangye kwita bano bena  Kilishitu kuya mwiulu, bajinga na luketekelo lwa kwikala myaka ne myaka pano pa ntanda. Batengelanga kimye Yehoba kyo akalenga ino ntanda kwikala ke paladisa ne kufumyapo bubi bonse. Kampe bafwanyikizhanga babena kutambwila wa mu kisemi nangwa mulunda wafwile. Kabiji batengelanga kushimika nzubo ne kwikalamo nangwa kubyala bichi ne kuja bipangwa byabyo. (Isaya 65:​21-23) Pano ki ka kilengela’mba batendeke kulanguluka byapusanako? Nanchi luno lupimpu lwaubiwe na mambo a kupopomenwa nangwa kuyanda nyi? Nanchi balangulukile’mba bakomvwanga mukose kwikala pa ntanda myaka ne myaka ne kuba’mba kechi bakekala na lusekelo nenyi? Nangwa kampe bakebelenga kuyuka byo kyumvwanyika kwikala mwiulu nyi? Ine. Bino Lesa ye wibasajijile luno lwito. Kimye kyo ebechile, waingijishe mupashi wanji wazhila kwalula ndangulukilo yabo ne ko batengela kwikala.

14. Bashingwa bomvwa byepi kwikala pano pa ntanda?

¹⁴ Nanchi kino kilumbulula’mba bashingwa bakeba kufwa nyi? Paulo walumbulwile byumvwa bashingwa. Waesakenye mibiji yabo ya bumuntu ku “tente” ne kwamba’mba: “Kabiji atweba tuji mu uno tente tubinza, tunemenwa, mambo kechi tukeba kumuvuula ne, bino tukeba kuvwajilapo mukwabo, kuba’mba akya kifwa bekimine ku bumi.” (2 Kolinda 5:⁠4) Bano bena Kilishitu kechi bakeba kufwa ne. Bomvwa bulongo kwikala bomi kabiji bakeba kwingijila Yehoba pamo na bisemi byabo ne balunda nabo moba onse. Bino mu bintu byonse byo boba, kechi balubako bibalaya Lesa amba byo bakekala kulutwe ne.​—⁠1 Kolinda 15:53; 2 Petelo 1:4; 1 Yoano 3:​2, 3; Lumwekesho 20:⁠6.

15. Ki ka kilengela muntu kubula kushiinwa inge washingwa na mupashi wazhila?

¹⁵ Kampepo mubena kulanguluka inge kya kuba Yehoba wimwita kuya mwiulu. Inge mwalanguluka’mba wimwita, langulukai pa ano mepuzho: Nanchi mumvwa’mba muji bingi na mukoyo mu mwingilo wa kusapwila nyi? Nanchi mumvwa bulongo kufunda Baibolo ne kufunda pa bintu “byazhika bya Lesa” nyi? (1 Kolinda 2:10) Nanchi mulanguluka’mba Yehoba ubena kwimulengela kwingila bintu bikatampe mu busapwishi bwenu nyi? Nanchi mukebesha kuba bikeba Yehoba kukila bintu bikwabo nyi? Nanchi mwatemwa bingi bakwenu ne kukebesha kwibakwasha kwingijila Yehoba nyi? Nanchi mwimwena bishiino bya kuba’mba Yehoba wimukwasha mu mashinda avula mu bwikalo bwenu nyi? Inge mwakumbula’mba ee ku ano mepuzho onse, nanchi kyalumbulula’mba bemwita kuya mwiulu nyi? Ine, kechi byo kyalumbulula ne. Mambo ka? Mambo bakalume ba Lesa bonse bakonsha kumvwa byonka bino, umvwe bashingwa nangwa ne. Kabiji kupichila mu mupashi wanji wazhila, Yehoba wakonsha kupa bulume ku kalume wanji uji yense, umvwe ukaya mwiulu nangwa ne. Kabiji kishinka ke kya kuba’mba, inge mubena kuzhinauka inge mukaya mwiulu nangwa ne, ko kuba’mba kechi bemwita ne. Aba bo basala kwi Yehoba kechi bazhinauka ne, bino bayuka.

16. Twayuka byepi amba kechi bonse batambwila mupashi wa Lesa bo baita kuya mwiulu ne?

¹⁶ Mu Baibolo mwanembwa bantu bavula  bajinga ba kishinka batambwijile mupashi wazhila wa Yehoba bino babujile kuya mwiulu. Umo pa bano ke Yoano Mubatizhi. Yesu waambile’mba kafwako nangwa umo wakila Yoano, bino waambile’mba Yoano kechi ukalama nobe mfumu mwiulu ne. (Mateo 11:​10, 11) Davida naye bamutangijilanga ku mupashi wazhila. (1 Samwela 16:13) Mupashi wazhila wamukwashishe kumvwisha byazhika byaamba pe Yehoba ne kumutangijila kunembako mbaji imo ya mu Baibolo. (Mako 12:36) Nangwa byonkabyo, mutumwa Petelo waambile’mba Davida “kechi wayile mwiulu ne.” (Byubilo 2:34) Yehoba waingijishe mupashi wanji wazhila kwibapa ngovu ya kuba bintu bikatampe, bino kechi waingijishe mupashi wanji kwibechilamo kuya mwiulu ne. Nanchi kino kibena kulumbulula’mba kechi bajinga na lwitabilo lwakosa lwa kuba’mba bafikilemo kuya mwiulu nenyi? Ine. Kino kibena kulumbulula’mba Yehoba ukebasangula kabiji bakekala mu Paladisa pano pa ntanda.​—⁠Yoano 5:​28, 29; Byubilo 24:⁠15.

17, 18. (a)Ñanyi kilambu bakalume ba Lesa bavula kyo batengela lelo jino? (b) Ñanyi mepuzho o tukesambapo mu mutwe walondelapo?

¹⁷ Bakalume ba Lesa bavula lelo jino kechi bakaya mwiulu ne. Byonkatu biji Abalahama, Davida ne Yoano Mubatizhi ne bantu bakwabo bavula bo baambapo mu Baibolo, batengela kwikala pano pa ntanda kimye kikalamanga kafulumende wa Lesa. (Bahebelu 11:10) Ba 144,000 bo bakalamanga ne Yesu mwiulu. Bino Baibolo waamba’mba kuji ne ‘bashalapo’ mu bano bashingwa bakiji pano pa ntanda mu kino kimye kya kupelako. (Lumwekesho 12:17) Onkao mambo, bavula ba mu ba 144,000 bafwa kala kabiji baji mwiulu.

¹⁸ Inge kya kuba muntu ubena kwaamba’mba washingwa, aba baji na luketekelo lwa kwikala pano pa ntanda bafwainwa kuba byepi? Inge kya kuba muntu umo mu kipwilo kyenu watendeka kujako shinkwa ne kutomako binyu pa Kivuluko, mwafwainwa kumumonanga byepi? Ibyepi inge kya kuba kibelengelo kya boba babena kwamba’mba bashingwa kibena kubailako? Nanchi mwafwainwa kwakamwa nyi? Tukakumbula ano mepuzho mu mutwe walondelapo?