1, 2. (a) Ñanyi bintu byavwangwa mu ‘kya bupe kya Lesa kya kukankalwa ne mwa kwikilumbulwila’? (b) Ñanyi mepuzho o tusakwisambapo mu uno mutwe?

YEHOBA witupele bupe bwanema bingi bumwesha butemwe kimye kyo atumine Mwananji ye atemwa, aye Yesu, kwiya pano pa ntanda. (Yoano 3:16; 1 Yoano 4:​9, 10) Mutumwa Paulo watelele buno bupe amba ke ‘kya bupe kya kukankalwa ne mwa kwikilumbulwila.’ (2 Kolinda 9:15) Mambo ka Paulo o aingijishe bino byambo?

² Paulo wayukile’mba kitapisho kya kwa Yesu ke kishiino kya kuba’mba yonse milaye ya Lesa yawama ikafika. (Tangai 2 Kolinda 1:20.) Kino kilumbulula’mba mu ‘kya bupe kya Lesa kya kukankalwa ne mwa kwikilumbulwila’ mwavwangwa kitapisho kya kwa Yesu ne bintu byonse byawama ne butemwe bubula kwaluka Yehoba bo etumwesha. Bupe bwa uno mutundu kechi twakonsha kwibulumbulula na byambo ne. Twafwainwa kumvwa byepi pa buno bupe bwanema? Kabiji buno bupe bwafwainwa kwitulengela kuba byepi byo tubena kwinengezha ku Kivuluko kya  lufu lwa Kilishitu kikekalako pa Kisatu, pa 23 March, 2016?

3, 4. (a) Mumvwa byepi inge muntu wimupapo bupe? (b) Bwikalo bwenu bwakonsha kupimpulwa byepi inge muntu wimupa bupe bwanema?

³ Tutemwa bingi inge muntu witupapo bupe. Bino bupe bumo bwanema bingi kya kuba bwakonsha ne kupimpula bwikalo bwetu. Kya kumwenako, fwanyikizhai amba mwalenga mambo. Kabiji luzhachisho lwa oo mambo ke lufu. Pano bino, muntu ye mwabula kuyuka wipana kuba’mba aye bamukambule mu kifulo kya anweba. Wipana kwimufwila. Mwakonsha kumvwa byepi pa bupe bwa uno mutundu?

⁴ Buno bupe bwanema kabiji bwa butemwe bwakonsha kwimulengela kupimpulako byubilo byenu. Bwakonsha ne kwimutundaika kwikala bampanyi, kutemwa bantu ne kulekelako mambo bonse bemufichisha ku muchima. Mu bwikalo bwenu bonse, mwakonsha kubanga bintu bimwesha’mba musanchila bingi muntu wipaine kwimufwila.

5. Bupe bwa Lesa bwa bukuzhi bwanema byepi kukila bupe bonse?

⁵ Bupe bwa Lesa bwa bukuzhi bwanema bingi kukila kya kumwenako kyo twaambapo. (1 Petelo 3:18) Akilangulukai pa kino: Atweba bonse twaswana bundengamambo kufuma kwi Adama, kabiji luzhachisho lwa bundengamambo ke lufu. (Loma 5:12) Butemwe bo bwalengejile Yehoba kutuma Yesu kwiya pano pa ntanda na kufwila bantu bonse, kuba’mba “atompele lufu bantu bonse.” (Bahebelu 2:⁠9) Bino kitapisho kya kwa Yesu kikoba byavula. Kikafumyapo lufu myaka ne myaka. (Isaya 25:​7, 8; 1 Kolinda 15:​22, 26) Bonse baitabila mwi Yesu bakekala mu mutende ne na lusekelo myaka ne myaka, mo bakekala bamfumu pamo na Kilishitu mwiulu nangwa bangikazhi ba mu Bufumu bwa Lesa pano pa ntanda. (Loma 6:23; Lumwekesho 5:​9, 10) Ñanyi mapesho akwabo avwangwamo mu bupe bwa Yehoba?

6. (a) Ñanyi mapesho afuma mu bupe bwa Yehoba o mubena kutengela? (b) Tongolaipo bintu bisatu byo twakonsha kuba na mambo a bupe bwa Lesa.

⁶ Ntanda nayo byo iji bupe bwa Lesa, ikaluka ke paladisa, bakolwa bakebabuka, kabiji bafu bakebasangula. (Isaya 33:24; 35:​5, 6; Yoano 5:​28, 29) Twatemwa Yehoba ne Mwananji pa kwitupa kino ‘kya bupe kya kukankalwa ne mwa kwikilumbulwila.’ Kino kya bupe kiketulengela kuba ka? Kiketulengela (1) kulondela bulongo Kilishitu Yesu, (2) kutemwa balongo betu, ne (3) kulekelako mambo bakwetu na muchima yense.

7, 8. Twafwainwa kumvwa byepi pa butemwe bwa Kilishitu, kabiji bwafwainwa kwitulengela kuba ka?

⁷ Patanshi, buno butemwe bwafwainwa kwitutundaika kwingijisha bumi bwetu kunemekelamo Yesu. Mutumwa Paulo waambile’mba: “Butemwe bwa Kilishitu bo bwitulengela kwingila.” (Tangai 2 Kolinda 5:​14, 15.) Paulo wayukile’mba inge twatambwila butemwe bukatampe bwa Yesu, buketulengela kwingila, nangwa kwitutundaika kutemwa ne kunemeka Yesu. Kine, inge twayuka bulongo bintu bitubila Yehoba, butemwe bo twamutemwa buketulengela kwikala bwikalo bumwesha’mba twanemeka Yesu. Twakonsha kuba byepi bino?

⁸ Kutemwa Yehoba kuketulengela kulondela Yesu, kulondela bulongo mu ngayo yanji. (1 Petelo 2:21; 1 Yoano 2:⁠6) Inge twakookela Lesa ne Kilishitu, tumwesha’mba twibatemwa. Yesu waambile’mba: “Yense umvwa mikambizho yami ne kwiilama, ye wantemwa. Kabiji yense wantemwa bakamutemwa kwi Batata, ne amiwa nkamutemwa kabiji nkesolola amiwa mwine patoka kwi aye.”​—⁠Yoano 14:21; 1 Yoano 5:⁠3.

9. Ñanyi bintu byo bakonsha kwitukanjikizha kuba?

 ⁹ Mu kino kimye kya Kivuluko, kyawama kulanguluka pa byo tubena kwingijisha bumi bwetu. Ishikishai’mba: ‘Mu ñanyi mashinda mo mbena kulondela Yesu? Kabiji mu ñanyi mashinda mo nakonsha kuwamishako?’ Kyanema bingi kwishikisha ano mepuzho mambo bantu ba mu ino ntanda bakeba’mba twikalenga byonka byo bekala. (Loma 12:⁠2) Mambo inge twabula kujimuka bakonsha kwitukanjikizha kutendeka kulondela bafunjishi ba mu ino ntanda, bantu batumbalala ne baya nkuwa mu bisela bya lubekyo. (Kolose 2:8; 1 Yoano 2:​15-17) Pano twakonsha kuchinuzhuka byepi bintu byo betukanjikizha kuba?

10. Ñanyi mepuzho o twakonsha kwishikisha mu kimye kya Kivuluko, kabiji mikumbu yakonsha kwitulengela kuba byepi? (Monai kipikichala kitanshi.)

¹⁰ Mu kimye kya Kivuluko, kyawama kulangulukapo bulongo pa bivwalo byetu byo biji, mafilimu, nyimbo, ne mutundu wa bintu biji pa foni ne pa kompyuta wetu. Ishikishai’mba: ‘Inge kya kuba Yesu wamona byo navwala, nanchi nakonsha kumvwa bumvu nyi?’ (Tangai 1 Timoti 2:​9, 10.) ‘Nanchi bivwalo byami bimwesha’mba ne mwana wa bwanga wa kwa Kilishitu nyi? Nanchi Yesu wakonsha kutemwa kutamba mafilimu o ntamba nyi? Nanchi wakonsha kuteleka ku nyimbo yami nyi? Inge kya kuba Yesu watambwileko foni wami nangwa ka kompyuta kami ka ku maboko, nanchi wakonsha kuba bulanda na byo akonsha kutaanamo nyi? Nanchi kyakonsha kunkatazha kulumbulwila Yesu ene mambo o natemenwa makayo a pa vidyo ajimo nyi?’ Butemwe bo twatemwa Yehoba bwafwainwa kwitulengela kutaya byonse byabula kufwainwa mwina Kilishitu nangwa biwamepotu byepi. (Byubilo 19:​19, 20) Kimye kyo twapaine bumi bwetu kwi Yehoba, twamulayile kwingijisha bumi bwetu mu kunemeka Kilishitu. Onkao mambo, kechi twafwainwa kulamapo kiji kyonse kyakonsha kwitulengela kukankalwa kulondela Yesu ne.​—⁠Mateo 5:​29, 30; Filipai 4:⁠8.

11. (a) Butemwe bo twatemwa Yehoba ne Yesu bwitulengela kuba byepi mu mwingilo wa kusapwila? (b) Butemwe bwakonsha kwitutundaika byepi kukwasha bakwetu mu kipwilo?

¹¹ Butemwe bo twatemwa Yesu bwitulengela kufunjisha ne kusapwila na kizaku. (Mateo 28:​19, 20; Luka 4:43) Mu kimye kya Kivuluko, nanchi mwakonsha kwinengezha kwingilako bupainiya bwa kukwasha, ko kuba’mba bwa maola 30 nangwa maola 50 mu mwingilo nyi? Mwanamulume wafwilwa wajinga na myaka 84 walangulukilenga’mba kechi wakonsha kwingilako bupainiya ne, na mambo a kukoma ne kukolwakolwa. Bino bapainiya bajinga mu mpunzha mo aikalanga bakebelenga kumukwasha. Bamukwashishengako mu ñendelo ne kumupa nyaunda yo akonsheshe kwingijilamo. Onkao mambo, uno mulongo wafikizhe kikonkwanyi kya maola 30. Nanchi mwakonsha kukwashako muntu mu kipwilo kyenu kwingilako bupainiya bwa kukwasha mu March nangwa mu April nyi? Ibyo kuba’mba kechi bonse bakonsha kwikala bapainiya ne, bino bonse twakonsha kwingijisha kimye kyetu ne bulume bwetu kwingilako pakatampe mu mwingilo wa Yehoba. Inge twauba bino, tukamwesha’mba butemwe bwa Yesu bwitulengela kwingila, byonka byamwesheshe Paulo. Butemwe bwa Lesa buketulengela kuba ñanyi bintu bikwabo?

12. Butemwe bwa Lesa bwitulengela kuba ka?

¹² Kya bubiji, butemwe bwa Lesa bwafwainwa kwitulengela kutemwa balongo betu. Mutumwa Yoano wanembele’mba: “Anweba batemwe, umvwe Lesa witutemenwe byonka bino,  ne atweba twafwainwa kwitemwa atwe bene na bene.” (1 Yoano 4:​7-11) Onkao mambo, inge twaswa butemwe bwa Lesa, twafwainwa kutemwa balongo betu. (1 Yoano 3:16) Twakonsha kwibamwesha byepi amba twibatemwa?

13. Yesu witumwesheshe byepi bya kutemwa bantu?

¹³ Yesu witumwesheshe byo twakonsha kutemwa bakwetu. Kimye kyo ajinga pano pa ntanda, wakwashanga bantu, kikatakata aba bepelwile. Wabukilenga bakolwa, balemana, bampofu, bashinka matwi, ne bakamaama. (Mateo 11:​4, 5) Yesu wapuseneko na bantangi ba bupopweshi, mambo aye watemenwe bingi kufunjisha bantu bakebelenga kufunda pe Lesa. (Yoano 7:49) Watemenwe bano bantu bepelwile kabiji waingilanga bingi na ngovu kuba’mba ebakwashe.​—⁠Mateo 20:⁠28.

14. Mwakonsha kuba byepi pa kuba’mba mumweshe byo mwatemwa balongo?

¹⁴ Kimye kya Kivuluko ke kimye kyawama kya kulangulukapo mashinda o mwakonsha kukwashishamo balongo ne banyenga baji mu kipwilo kyenu, kikatakata bakikulumpe. Nanchi mwakonsha kufwakesha bano batemwe betu bakikulumpe nyi? Abya mwakonsha kwibanengezhezhapo tukajo, kwibakwasha na mingilo ya pa nzubo, kwibakwasha mu ñendelo pa kuya na kupwila, nangwa kwibasendako mu mwingilo nyi? (Tangai Luka 14:​12-14.) Lekai butemwe bwa Lesa bwimulengele kumwesha byo mwatemwa balongo.

15. Ñanyi kishinka kyo twafwainwa kuyuka?

¹⁵ Kya busatu, butemwe bwa Yehoba bwitulengela kulekelako mambo balongo ne banyenga yetu. Atweba bonse twaswana bundengamambo ne lufu kwi Adama, onkao mambo, kafwako wakonsha kwamba’mba, “Amiwa kechi nkebewa bukuzhi ne.” Nangwatu kalume wa Lesa mwine wa kishinka ukebewa kumukuula na bukuzhi. Atweba bonse betulekelako mambo akatampe bingi. Kuyuka kino kishinka kwanemena ka? Mukumbu wa buno bwipuzho uji mu kishimpi kimo kya kwa Yesu.

16, 17. (a) Twafwainwa kufunjilako ka ku kishimpi kya kwa Yesu kya mfumu ne bazha? (b) Panyuma ya kulanguluka pa kishimpi kya kwa Yesu, mwafuukulapo kuba ka?

¹⁶ Yesu waambilepo kishimpi kya mfumu umo walekejileko muzha wanji nkongole ikatampe ya mali a mandenali 60,000,000. Bino palutwe kacheche, uno muzha wakaine kulekelako muzha mukwabo wajinga na nkongole yanji ya mandenali 100. Lusa lwamwesheshe mfumu ku uno muzha lwafwainwe kumulengela kulekelako mambo muzha mukwabo. Mfumu wazhingijile bingi byo aumvwine’mba muzha wanji wakankalwa kulekelako mukwabo nkongole icheche. Wamwambijile’mba: “Obewa muzha mubi, amiwa nakulekejileko nkongole yami byo wansashijile. Nanchi kechi wafwainwe kumubila lusa muzha mukwenu byonka byo nakubijile lusa nenyi?” (Mateo 18:​23-35, tubyambo twa munshi) Byonka byaubile mfumu, Yehoba witulekelako mambo etu akatampe. Butemwe bwa Yehoba ne lusa lwanji byafwainwa kwitulengela kuba ka?

 ¹⁷ Byo tubena kwinengezha ku Kivuluko, twafwainwa kwishikisha’mba: ‘Nanchi paji mulongo wanzhingijisha nyi? Nanchi kinkatazha kumulekelako mambo nyi?’ Inge byo byo kiji, kino kyo kimye kyawama kya kulondela Yehoba, aye “waswila jimo kulekela mambo.” (Nehemiya 9:17; Salamo 86:⁠5) Inge twayuka mwatala lusa lukatampe lwa Yehoba, tukobilanga bakwetu lusa ne kwibalekelako mambo na muchima yense. Inge twabula kutemwa ne kulekelako mambo balongo betu, kechi twafwainwa kuketekela’mba Yehoba uketutemwa ne kwitulekelako mambo ne. (Mateo 6:​14, 15) Ibyo kulekelako mambo bakwetu kechi kulumbulula’mba kechi betufichishe ku muchima ne, bino kuketukwasha kwikala na lusekelo kulutwe.

18. Butemwe bwa Lesa bwakwashishe byepi nyenga umo kubula kuta maana pa bumbulwa kulumbuluka bwa nyenga mukwabo?

¹⁸ Kyakonsha kukatazha kulubako ku bumbulwa kulumbuluka kwa balongo betu ne banyenga. (Tangai Efisesa 4:32; Kolose 3:​13, 14.) Lily ke nyenga umo waubile bino. (Monai byambo bikwabo.) Wakwashishe nyenga wafwijilwe aye Carol. Kya kumwenako, watwalangako ba Carol na motoka konse ko bakebanga kuya, kwibakwashako kupota bintu, ne kwibobilako bintu bikwabo byavula bingi. Nangwa kya kuba Lily waubilenga bino byonse, bino ba Carol kechi basantanga ne, kabiji bimye bimo kyakatazhanga bingi kwibakwasha. Bino Lily watele muchima pa byubilo byawama bya ba Carol kabiji wibakwashishe pa myaka yavula kufikatu ne kimye kyo bakolelwe bingi ne kufwa. Nangwa kya kuba kyakatazhanga bingi kukwasha ba Carol, Lily waambile’mba: “Nkebesha bingi kumona ba Carol inge bakasanguke. Mbena kukeba nkebayuke kimye kyo bakekala balumbuluka.” Kine, butemwe bwa Lesa bwakonsha kwitulengela kulekelako mambo balongo ne banyenga ne kutengelanga kimye bumbulwa kulumbuluka kyo bukapwa kikupu.

19. ‘Kya bupe kya Lesa kya kukankalwa ne mwa kwikilumbulwila’ kikemulengela kuba ka?

¹⁹ Kine Yehoba witupa ‘kya bupe kya kukankalwa ne mwa kwikilumbulwila.’ Twayai tumweshenga kimye kyonse amba tusanta. Kimye kya Kivuluko ke kimye kyawama bingi kya kulanguluka languluka pa bintu byonse bitubila Yehoba ne Yesu. Lekai butemwe bo betumwesha bwitulengelenga kulondela Yesu, kutemwa balongo ne kwibalekelako mambo na muchima yense.