1, 2. (a) Ñanyi bintu Yehoba byo aambile’mba bikamweka mu kimye kyetu? (b) Ñanyi mepuzho o tusakukumbula mu uno mutwe? (Monai kipikichala kitanshi.)

YEHOBA waambile’mba mu kimye kyetu, “bantu jikumi bafuma mu milaka yonse ya bisaka bya bantu bakakwata, ee kine, bakakwachisha ku munkukumba wa Muyudea ne kwamba’mba: ‘Tubena kukeba kuya nenu, mambo twaumvwa’mba Lesa uji ne anweba.’” (Zekaliya 8:23) “Muyudea” wimenako aba Lesa bo ashinga na mupashi wazhila. Kabiji batelwa ne kuba’mba “bena Isalela ba Lesa.” (Ngalatiya 6:16) “Bantu jikumi” bemenako boba baji na luketekelo lwa kwikala myaka ne myaka pano pa ntanda. Bayuka’mba Yehoba wapesha jino jibumba ja bashinga kabiji bayuka’mba ke kintu kya munema kumupopwela pamo na bano bashingwa.

² Byonka byaambile ngauzhi Zekaliya, Yesu waambile’mba bantu ba Lesa bakekala bakwatankana. Watelele boba baji na luketekelo lwa kwikala mwiulu amba “kajitanga kacheche,” ne boba baji na luketekelo lwa kwikala pano pa ntanda amba “mikooko ikwabo.” Bino Yesu waambile ne kuba’mba bakekala “jitanga  jimo” kabiji bakalondelanga “kafunga umo,” aye Yesu. (Luka 12:32; Yoano 10:16) Na mambo a kuba’mba kuji mabumba abiji, bamo bakonsha kushikisha’mba: (1) Nanchi mikoko ikwabo yafwainwa kuyuka mazhina a bashinga bonse bajipo lelo jino nyi? (2) Bashingwa bafwainwa kwimonanga byepi? (3) Inge kya kuba muntu umo mu kipwilo kyetu watendeka kujako shinkwa ne kutomako binyu pa Kivuluko, nafwainwa kumumonanga byepi? (4)  Nanchi nafwainwa kwakamwa inge namona kibelengelo kya babena kujako shinkwa ne kutomako binyu pa Kivuluko kibena kubayilako nyi? Tusakukumbula ano mepuzho mu uno mutwe.

3. Mambo ka o kyakatezha kuyuka bakekala pa ba 144,000?

³ Nanchi mikoko ikwabo yafwainwa kuyuka mazhina a bashinga bonse bajipo lelo jino nyi? Ine. Mambo ka? Mambo kechi twakonsha kuyuka inge bano bonse bakatambwila kilambu kyabo ne. (Monai byambo bikwabo.) Nangwa kya kuba Lesa wibeta kuya mwiulu, bakatambulatu kilambu kyabo inge batwajijila kwikala ba kishinka. Satana wayuka kino, kabiji wingijisha “bangauzhi ba bubela” pa kukeba ‘kwibatwala mungi.’ (Mateo 24:24) Bena kilishitu bashingwa kechi bafwainwa kukizhamo kuketekela’mba bakatambula kilambu kyabo ne, kanatu inge kimye kyafika Yehoba kyo akebalengela kushiinwa’mba wibamona kuba’mba ba kishinka. Yehoba ye witabizha nangwa’mba kubika katetesho kapelako, saka bakyangye kufwa, nangwa byo kukashala kimye kicheche “malwa akatampe” kutendeka.​—⁠Lumwekesho 2:10; 7:​3, 14.

4. Inge kechi kyakonsheka kuyuka mazhina a bashingwa bonse bajipo lelo jino, nanchi twakonsha ‘kuya nabo’ byepi?

⁴ Inge kechi kyakonsheka kuyuka mazhina a bashingwa bonse bajipo lelo jino ne, nanchi mikooko ikwabo yakonsha ‘kuya nabo’ byepi? Baibolo waamba’mba “bantu jikumi” “bakakwachisha ku munkukumba wa Muyudea ne kwamba’mba: ‘Tubena kukeba kuya nenu, mambo twaumvwa’mba Lesa uji ne anweba.’” Nangwa kya kuba Baibolo watongolatu Muyudea umo, bino wimenako bantu bavula. Kino kibena kulumbulula’mba Muyudea kechi muntu umotu ne, bino wimenako jibumba jonse ja bashingwa. Mikooko ikwabo yayuka kino kishinka, kabiji ingijila Yehoba pamo na jino jibumba. Kechi bafwainwa kuyuka mazhina a bonse baji mu jino jibumba ne kwibalondela pa muntu pa muntu ne. Yesu ye Ntangi wetu, kabiji Baibolo witubuula’mba ye yenkatu ye twafwainwa kulondela.​—⁠Mateo 23:⁠10.

5. Ñanyi lujimuno bashingwa lo bafwainwa kulangulukapo bingi, kabiji mambo ka?

⁵ Bashingwa bafwainwa kulangulukapo bingi pa lujimuno luji mu 1 Kolinda 11:​27-29. (Tangai.) Mushingwa wakonsha kujako byepi shinkwa ne kutomako binyu pa Kivuluko “saka abula kufwainwa”? Inge wabula kwikala na bulunda bwawama na Yehoba ne kubula  kwikala wa kishinka kwi aye, umvwe wajako shinkwa ne kutomako binyu, ko kuba’mba ubena kulengulula kitapisho. (Bahebelu 6:​4-6; 10:​26-29) Luno lujimuno lwakosa luvululako bashingwa amba bafwainwa kutwajijila kwikala ba kishinka inge bakeba kutambula “kilambu kya lwito lwa mwiulu lufuma kwi Lesa kupichila mwi Kilishitu Yesu.”​—⁠Filipai 3:​13-16.

6. Bena Kilishitu bashingwa bafwainwa kwimonanga byepi?

⁶ Paulo waambijile bena Kilishitu bashingwa amba: “Amiwa kaili mwi Nkambo, nemusashijila namba mwendenga monka mwayila lwito lo mwaichilwe.” Bafwainwa kuba byepi bino? Paulo walumbulwile’mba: “Na kwipelula konse, kukooka muchima, ne na butekanye, saka mwitekenya anwe bene na bene mu butemwe, ne kwibikishako kulama buumo bwa mupashi mu mutende ulengela kukwatankana.” (Efisesa 4:​1-3) Mupashi wazhila wa Yehoba ukwasha bakalume banji kwipelula, kechi kwilundumika ne. (Kolose 3:12) Onkao mambo, bashingwa kechi bafwainwa kulanguluka’mba banema kukila bakwabo ne. Bayuka’mba Yehoba kechi upa bashingwa mupashi wazhila wavula kukila ye apa bakalume banji bakwabo ne. Kechi balanguluka’mba bo bayukisha bukine bwa mu Baibolo kukila bantu bonse ne. Kabiji kechi bafwainwa kwambila mukwabo amba naye washingwa ne kumwambila’mba atendeke kujako shinkwa ne kutomako binyu pa Kivuluko ne. Pakuba, bafwainwa kwipelula ne kuyuka’mba Yehoba ye yenkatu wakonsha kwita bantu kuya mwiulu.

7, 8. Ñanyi kintu bena Kilishitu bashingwa kyo bafwainwa kubula kuketekela, kabiji mambo ka?

⁷ Nangwa kya kuba bashingwa bayuka’mba kwibeta kuya mwiulu ke munema mukatampe, kechi baketekela bakwabo kwibanemeka kukila bantu bonse ne. (Efisesa 1:​18, 19; tangai Filipai 2:​2, 3.) Kabiji bayuka’mba kimye Yehoba kyo ebashingile, kechi wabuujileko muntu mukwabo ne. Onkao mambo, mushingwa kechi wafwainwa kukumya inge bamo bakankalwa kuswa ponkapotu amba washingwa ne. Uvuluka’mba Baibolo witubuula’mba kechi twafwainwa kupelawizha kuswa inge muntu keambe’mba Lesa wamupa mwingilo wanema ne. (Lumwekesho 2:⁠2) Na mambo a kuba’mba mushingwa kechi uketekela bakwabo kukizhamo kumunemeka ne, kechi wafwainwa kwambilanga bonse bo ataana amba washingwa ne. Kechi wafwainwatu ne kubuulako muntu nangwa umo ne. Kabiji kechi wafwainwa kwitota pa bintu byawama byo akobanga mwiulu ne.​—⁠1 Kolinda 1:​28, 29; tangai 1 Kolinda 4:​6-8.

⁸ Bena Kilishitu bashingwa kechi balanguluka’mba bafwainwa kupwanañanangatu na bakwabo bashingwa, uba nobe balenga kabungwe ne. Kechi bafwainwa kuya na kukeba bashingwa bakwabo pa kuba’mba besambenga nabo pa kushingwa kwabo, nangwa kusambakana mu mabumba na kufunda Baibolo mulwabo ne. (Ngalatiya 1:​15-17) Inge bashingwa ke bobe bino, kipwilo kechi kyakonsha kukwatankana ne. Bakonsha kupusenamo na mupashi wazhila, ukwasha bantu ba Lesa kwikala mu mutende ne kukwatankana.​—⁠Tangai Loma 16:​17, 18.

9. Mambo ka o twafwainwa kujimukila na byo tumona boba bajako shinkwa ne kutomako binyu pa Kivuluko? (Monai kakitenguluzha ka kuba’mba, “ Butemwe ‘Kechi Buba bya Bumvu Ne.’”)

⁹ Mwafwainwa kumonanga byepi balongo  ne banyenga bashingwa? Yesu waambijile baana banji ba bwanga amba: “Anweba bonse mwi balongo na balongo.” Wanungilepo’mba: “Yense witumbijika mwine bakamupelula, pakuba yense wipelula mwine bakamutumbijika.” (Mateo 23:​8-12) Onkao mambo, kyatama kukizhamo kukumbwa muntu, nangwatu kya kuba ke mulongo wa kwa Kilishitu washingwa. Baibolo byo aamba pa bakulumpe, witutundaika kulondela lwitabilo lwabo, bino kechi witubuulapo’mba twafwainwa kulengela muntu kwikala ntangi wetu ne. (Bahebelu 13:⁠7) Ibyo kuba’mba Baibolo waamba’mba bamo twafwainwa kwibapa “mushingi mukatampe.” Bino twafwainwa kuba bino na mambo a kuba’mba “batangijila bulongo” kabiji “bengila na ngovu mu kwamba ne mu kufunjisha,” kechi na mambo a kuba’mba bashingwa ne. (1 Timoti 5:17) Inge twakizhamo kutakaika bashingwa ne kwibanemeka, twakonsha kwibalengela kumvwa bumvu. Nangwa twakonsha kwibalengela kutendeka kwilundumika, kabiji kino kyakonsha kutama bingi. (Loma 12:⁠3) Kafwako nangwa umo pe atweba ukeba kuba kintu kyakonsha kulengela mulongo wa kwa Kilishitu washingwa kulenga mambo akatampe a uno mutundu ne.​—⁠Luka 17:⁠2.

10. Mwakonsha kumwesha byepi amba mwanemeka bena Kilishitu bashingwa?

¹⁰ Twakonsha kumwesha byepi amba twanemeka boba Yehoba bo ashinga? Kechi twafwainwa kwibepuzha byo bashingilwe ne. Muntu mwine washingwa ye wafwainwa kuyuka, kabiji atweba kechi tujipo na luusa lwa kukeba kuyuka byo kyajinga ne. (1 Tesalonika 4:11; 2 Tesalonika 3:11) Kabiji kechi twafwainwa kulangulukanga’mba benakwabo, bansemi babo, nangwa bakwabo ba mu kisemi nabo bashingwa ne. Muntu kechi wikala mushingwa na mambo a kuba mu kisemi mujipo bashingwa ne. (1 Tesalonika 2:12) Twafwainwa kuchinuzhuka kwipuzha mepuzho akonsha kuzhingijisha bakwetu. Kya kumwenako, kechi twafwainwa kwipuzhanga mukazhi wa mulongo washingwa byo alangulukapo pa kwikala pano pa ntanda myaka ne myaka kwa kubula mwatawanji ne. Mambo twaketekela’mba mu ntanda ipya, Yehoba ‘ukapa bilengwa byumi bintu byonse byo bikeba.’​—⁠Salamo 145:⁠16.

11. Twizhikijila byepi inge twachinuzhuka “kukumbwa byubilo bya bantu”?

¹¹ Inge twaleka kumona bashingwa nobe banema kukila bakwabo, kyakonsha ne kwituzhikijila. Mu ñanyi jishinda? Baibolo witubuula’mba mu kipwilo mwakonsha kwikala “balongo ba bubela” bakonsha kubepa’mba bashingwa. (Ngalatiya 2:​4, 5; 1 Yoano 2:19) Kunungapo, bashingwa bamo bakonsha kuleka kwikala ba kishinka. (Mateo 25:​10-12; 2 Petelo 2:​20, 21) Bino inge twachinuzhuka “kukumbwa byubilo bya bantu,” kechi tukalondelanga bakwetu ne, nangwatu boba bashingwa nangwa bayukanyikwa bingi nangwa boba baingijila Yehoba pa myaka yavula ne. Kabiji inge bakankalwa kutwajijila kwikala ba kishinka nangwa bafuma mu kipwilo, kechi tukaleka kwitabila mwi Yehoba nangwa kuleka kumwingijila ne.​—⁠Yuda 16, tubyambo twa munshi.

12, 13. Mambo ka o twafwainwa kubujila kwakamwa pa kibelengelo kya bajako shinkwa ne kutomako binyu pa Kivuluko?

¹² Pa myaka yavula, kibelengelo kya boba bajangako shinkwa ne kutomako binyu pa Kivuluko kyailenga na kukepelako. Bino mu  myaka yakatataka, kino kibelengelo kyatwajijila kubayilako pa mwaka pa mwaka. Nanchi twafwainwa kwakamwa pa kino nyi? Ine. Twayai tumone ene mambo.

¹³ “Yehoba wayuka banji.” (2 Timoti 2:19) Kupusanako ne Yehoba, balongo babala bantu bajako shinkwa ne kutomako binyu pa Kivuluko kechi bayuka bashingwa ba kine ne. Onkao mambo, mu kino kibelengelo mwikala ne boba balanguluka’mba bashingwa bino saka babula kushingwa. Kya kumwenako, bamo bajangako shinkwa ne kutomako binyu bekilekele mu kuya kwa kimye. Kabiji bakwabo nabo bekala na makatazho a kuvulañanako mu milanguluko ne kuketekela’mba bakalamanga ne Kilishitu mwiulu. Kyamwekatu patoka amba kechi twayuka kibelengelo kine kya bashingwa bashalapo pano pa ntanda ne.

14. Baibolo waambapo’mba ka pa kibelengelo kya bashingwa bakekala pano pa ntanda kimye kikatendeka malwa akatampe?

¹⁴ Mu mapunzha avula pano pa ntanda mukekala bashingwa kimye Yesu kyo akeya na kwibasenda mwiulu. Baibolo waamba’mba Yesu “ukatuma bamalaika banji na kuvuma kukatampe kwa ntolompita, ne abo bakakonkanya pamo basalwa banji kufuma ku luvula luna lwa ntanda ne konse kwapela jiulu.” (Mateo 24:31) Baibolo waamba ne kuba’mba mu moba a kupelako, pano pa ntanda pakekala bashingwa bacheche. (Lumwekesho 12:17) Bino kechi waamba kibelengelo kya bashingwa bakekalapo kimye kikatendeka malwa akatampe ne.

15, 16. Ñanyi bintu byo twafwainwa kuyuka pa ba 144,000 Yehoba bo asala?

¹⁵ Yehoba ye ufuukula kimye kya kusala bashingwa. (Loma 8:​28-30) Yehoba watendekele  kusala bashingwa panyuma ya lusanguko lwa kwa Yesu. Kyamweka mu myaka kitota kitanshi, bena Kilishitu ba kine bonse bajinga bashingwa. Pa myaka yavula yapichilepo kufuma kyokya kimye, bavula betelanga’mba bena Kilishitu kechi balondelanga Kilishitu mu bukishinka ne. Nangwa byonkabyo, mu yonka ino myaka, Yehoba washingilepo bantu bacheche bajinga bena Kilishitu ba kine. Bajinga nobe wichi Yesu yo aambile’mba ikakomenanga pamo na bincha. (Mateo 13:​24-30) Mu moba a kupelako, Yehoba watwajijila kusala bantu ba kwikala mu ba 144,000. (Monai byambo bikwabo.) Onkao mambo, inge Lesa wafuukula kusalapo bamo saka kwashalatu pacheche mpelo kufika, kechi twafwainwa kuzhinauka’mba ubena kuba kintu kyawama ne. (Isaya 45:9; Danyela 4:35; tangai Loma 9:​11, 16.) (Monai byambo bikwabo.) Twafwainwa kujimuka pa kuba’mba tubule kuba byonka byaubile ba mingilo bejizhenye kwi nkambo yabo pa bakwabo batendekele kwingila mu jiola japeleleko.​—⁠Tangai Mateo 20:​8-15.

¹⁶ Kechi bonse baji na lwitabilo lwa kuya mwiulu batelwa’mba “kalume wa kishinka kabiji wa maana” ne. (Mateo 24:​45-47) Yehoba ne Yesu babena kwingijisha bantu bacheche kujiisha, nangwa’mba kufunjisha bavula, byonka byo baubilenga mu myaka kitota kitanshi. Mu myaka kitota kitanshi, kwajingatu bena Kilishitu bashingwa bacheche bo baingijishe kunemba Binembelo bya bwina Kilishitu bya Kingiliki. Ne lelo jino, ke bena Kilishitu bashingwa bachechetu baji na mwingilo wa kupa bantu ba Lesa “kajo pa kimye kyafwainwa.”

17. Ñanyi bintu byo mwafunda mu uno mutwe?

¹⁷ Ñanyi bintu byo twafunda mu uno mutwe? Yehoba wafuukulapo kupana bumi bwa myaka ne myaka ku bantu bavula bakekala pano pa ntanda ne bumi bwa mwiulu ku boba bakalama ne Yesu. Yehoba ufweta bakalume banji bonse, “Muyudea” ne “bantu jikumi,” kabiji ukeba’mba bonse bakookelenga mizhilo imotu ne kwikala ba kishinka. Bonsetu bafwainwa kwikala bepelula. Bonse bafwainwa kumwingijila pamo ne kukwatankana. Kabiji bonse bafwainwa kwibikako kulama mutende mu kipwilo. Byo tubena kunangijila ku mpelo, twayai bonse tutwajijile kwingijila Yehoba ne kulondela Kilishitu nobe jitanga jimo.