BAIBOLO pa Ntendekelo 22:6 waamba’mba Abalahama byo anengezhezhenga kuya ku mpunzha kwalepa na kutapisha kitapisho, “watolele nkunyi ya kusokelapo mulambo wa kusoka ne kubika pa kipuzhi kya kwa Izaka. Kepo asendele mujilo ne mupenyi mu maboko anji, kabiji bonse babiji baimene ke baye ne kuya.”

Binembelo kechi byaamba jishinda bantu jo babanzhilangamo mujilo kala ne. Nembi umo waambile’mba Abalahama ne Izaka “kechi bakonsheshe kusenda mujilo saka abena kuteema pa lwendo lwalepa bino ne.” Onkao mambo, kyamweka byo basendele ke bintu byo baingijishanga pa kubanza mujilo.

Pano bino, banembi bakwabo bamba’mba kechi kyapeelele kubanza mujilo mu kimye kya kala ne. Javula bantu kibapeelelangako kulomba makala a mujilo ku bakwabo ne kubanza mujilo kukila kwitendekelatu abo bene. Onkao mambo, bashayuka bamo balanguluka’mba Abalahama wasendele kipe kya buchimba nabiji mpuki ne kubikamo makala a mujilo ne kukashila ino mpuki ku chenyi. (Isa. 30:14) Makala o basendanga mu jino jishinda babikangapo nsala ne kubanza mujilo jibiji inge baji pa lwendo.