1. Mambo ka bantu bavula ano moba o babujila kuketekela Baibolo?

 BANTU bavula ano moba kechi bayuka muntu ye bakonsha kuketekela ne. Kechi bayuka inge kya kuba bantu bo banemeka nabiji bamulwila ntanda, bashayuka ba bya sayansi ne basulu bakonsha kwibobila bintu byawama ne. Kabiji bakankalwa kunemeka bantangi ba bupopweshi betela’mba bena Kilishitu. Onkao mambo, kechi tukumya inge bantu bakana kuketekela Baibolo, buku bantangi ba bupopweshi ye bamba’mba ye ye balondela ne.

2. Kwesakana na Salamo 119:160, twafwainwa kuketekela ñanyi byambo?

² Bantu ba Yehoba bonse bashiinwa kuba’mba ye “Lesa wa bukine” kabiji wibobila bintu byawama. (Sala. 31:5; Isa. 48:17) Twayuka kuba’mba twafwainwa kuketekela Baibolo mambo “kishina kya byambo [bya Lesa] bo bukine.” (Tangai Salamo 119:160.) Twakonsha kuswa byanembele shayuka umo wa Baibolo amba: “Kafwako byambo byaambile Lesa byabujile kufika nangwa bikabula kufika ne. Bantu ba Lesa baketekela bintu byonse byaambile Lesa mambo baketekela mwine Lesa wibyambile.”

3. Ñanyi bintu byo tusakwisambapo mu uno mutwe?

³ Ñanyi bintu byo twafwainwa kuba pa kuba’mba tukwashe bakwetu kuketekela mu Mambo a Lesa? Twayai twisambe pa bintu bisatu byakonsha kwitulengela kuketekela Baibolo. Ko kuba’mba tusakwisamba pa bintu bya mu Baibolo byo byabula kupimpulwa, bungauzhi bwavula bwa mu Baibolo byo bwafika ne Baibolo byo aji na bulume bwa kupimpula bwikalo bwa bantu.

4. Mambo ka bantu bamo o balangulukila’mba kampe byambo bya mu Baibolo byapimpulwa?

⁴ Yehoba waingijishe banabalume ba kishinka 40 kunemba mabuku a mu Baibolo. Nangwa byonkabyo, mamanyusikilipiti anembele bano banabalume kechi ko aji lelo jino ne. b Byambo byo tuji nabyo ke byambo byo bakopolweletu. Kino kyakonsha kulengela bantu kulanguluka’mba byo tutanga mu Baibolo kampe kechi biji byonka byo bebinembele patanshi ne. Nanchi mwakilangulukapo kala kuba’mba kampe byambo biji mu Baibolo kechi biji byonka byo bebinembele patanshi nenyi?

5. Binembelo bya Kihebelu bebikopolwele byepi? (Monai kipikichala kya pa nkupiko.)

⁵ Pa kuba’mba byambo bya Lesa bibule kupimpulwa Yehoba waambijile bantu kwibikopolola. Yehoba waambijile bamfumu balaminenga mu Isalela kwikopolwela Mizhilo kabiji watongwele bena Levi kufunjisha bantu ino Mizhilo. (Mpitu. 17:18; 31:24-26; Ne. 8:7) Bayudea byo bajinga mu buzha mu Babilona, jibumba ja bantu bayukile kunemba bulongo batendekele kukopolola Binembelo bya Kihebelu byavula bingi. (Eze. 7:6, tubyambo twa munshi.) Bano banabalume bateleko bingi muchima kukopolola bino byambo. Kabiji bano banabalume kechi babajilengatu byambo byonka ne, bino babajilenga ne bisopelo pa kuba’mba babule kushapo kyambo nangwa kimo. Nangwa byonkabyo, na mambo a bumbulwa kulumbuluka mu mamanyusikilipiti amo balubankenyepo pamo pamo. Bino byambo bintutu bimo bebinembele pa mamanyusikilipiti avula. Kino kyakwashisheko kuwamisha ponse po balubankenye pa kukopolola. Mu ñanyi jishinda?

6. Bashayuka ba Baibolo bakonsha kuyuka byepi inge kya kuba bakopolwelenga paji po balubankenye nangwa paji byo bashilepo?

⁶ Bashayuka ba mu ano moba bengijisha jishinda jawama jibakwasha kuyuka palubankenye banabalume bakopolwelenga Baibolo. Fwanyikizhai kuba’mba banabalume 100 bebambila kukopolola byambo biji pa jipa jimo. Kampe mwanamulume umo walubankanyapo pamo pa kukopolola. Pa kuba’mba tuyuke po alubankanya, twafwainwa kwesakanya byo akopolola na byakopolola bakwabo bonse. Bashayuka ba Baibolo nabo byo byo boba. Besakanya mamanyusikilipiti avula pa kuba’mba bayuke wakopolwelenga inge washilepo byambo bimo nangwa paji po alubankenye.

7. Ñanyi bintu byaubile bashayuka ba Baibolo bavula bimwesha’mba byo bakopolwele kechi byapusana na byambo biji mu mamanyusikilipiti a kala ne?

⁷ Bantu bavula bakopolwelenga Baibolo kechi kibapeelejile kumukopolola kwa kubula kulubankanya nangwa kushapo kyambo ne. Akilangulukai pa manyusikilipiti wa kala wa Binembelo bya Kihebelu ye bapwishishe kukopolola mu 1008 nangwa mu 1009 C.E. Uno manyusikilipiti utelwa’mba Leningrand Codex. Nangwa byonkabyo, batulukile mamanyusikilipiti a Baibolo avula aikala myaka 1,000 kukila manyusikiliputi wa Leningrad Codex. Bantu bamo bakonsha kulanguluka’mba na mambo a kuba’mba ano mamanyusikilipiti a kala beakopolwele bimye byavula myaka kukila 1,000, byambo biji mu manyusikilipiti wa Leningrad Codex byakonsha kupusana nabiji mu ano mamanyusikilipiti a kala. Bino uno mulanguluko kechi wa kine ne. Bashayuka baesakenye mamanyusikilipiti atanshi na a katataka, bataine kuba’mba nangwa kya kuba apuseneko mu ntelelo ya byambo, bino, bino byambo bya mu Baibolo kechi byapimpulwa ne.

8. Ñanyi lupusano luji pa Binembelo bya Kingiliki bya Bwina Kilishitu ne mabuku akwabo a kala?

⁸ Bena Kilishitu batanshi nabo balondejile byaubile bashayuka ba Baibolo bakopolwele Binembelo bya Kihebelu. Bateleko bingi muchima kukopolola mabuku 27 a mu Binembelo bya Kingiliki, o baingijishenga pa kupwila ne mu busapwishi. Shayuka umo waesakenye mamanyusikilipiti a Benembelo bya Kingiliki ku mabuku akwabo o bakopolwele pa kimye kimotu waambile pa mamanyusikilipiti a mu Baibolo amba: “[Mamanyusikilipiti a Binembelo bya Kingiliki] avula bingi ano moba kukila a mu mabuku akwabo, . . . kabiji beakopolwele bingi bulongo.” Buku umo waamba’mba: “Twafwainwa kuketekela kuba’mba byo tutanga mu mabuku [a Binembelo bya Kingiliki] kechi byapusana na byanembele banabalume ba kala Lesa bo aingijishe ne.”—Anatomy of the New Testament.

9. Ñanyi kishinka kyaambapo Isaya 40:8 pa Baibolo?

⁹ Myaka yavula yapitapo, bantu bavula bakopolwele Baibolo baingijile bingi na ngovu kabiji bateleko bingi muchima pa kukopolola. O ene mambo lelo jino o twaikela na Baibolo muji byambo byo twaketekela’mba bya kine. c Twayuka kuba’mba Yehoba ye walengela kuba’mba twikale na bino byambo byanji kabiji kechi byapimpulwa ne. (Tangai Isaya 40:8.) Kampe bantu bamo bakonsha kwamba’mba nangwa kya kuba byambo biji mu Baibolo kechi byapimpulwa ne, bino Baibolo kechi wafuma kwi Lesa ne. Onkao mambo, twayai twisambe pa bintu byakonsha kwitulengela kushiinwa’mba Baibolo wafuma kwi Lesa.

10. Ambaipo bungauzhi bumo bumwesha’mba byo tutanga pa 2 Petelo 1:21 bya kine. (Monai bipikichala.)

¹⁰ Bungauzhi bwavula bwa mu Baibolo bwafika kabiji bungauzhi bumo bebunembele kala kene saka bukyangye kufika. Buno bungauzhi bwafikile byonkatu byaawile bangauzhi. Kechi tukumya ne, mambo twayuka’mba buno bungauzhi bonse bwafumine kwi Yehoba. (Tangai 2 Petelo 1:21.) Akilangulukai pa bungauzhi  bwaambile’mba muzhi wa Babilona bakamonauna. Pakachi ka 778 ne 732 B.C.E., ngauzhi Isaya waambijile jimo kuba’mba muzhi wa Babilona bakamubika mu kañumbwañumbwa. Kabiji waambile’mba mwanamulume aye Kilusa ukashinda muzhi kabiji waambile ne byo akamushinda. (Isa. 44:27–45:2) Isaya waambijile jimo kuba’mba Babilona bakamonauna kabiji kafwako bakekalamo jibiji ne. (Isa. 13:19, 20) Kino kyo kyamwekele. Mu 539 B.C.E., bena Media ne bena Pelisha baonawine uno muzhi mukatampe. Uno muzhi wajinga na nsakwa yakosa washalatu ke bikulukulu.—Monai vidyo kuba’mba Baibolo Waambijile Jimo Konaunwa kwa Babilona mu buku wa kuba’mba Mukekala Myaka ne Myaka!, lufunjisho 03 kishinka 5, uji pa jw.org.

11. Lumbululai bungauzhi buji pa Danyela 2:41-43 byo bubena kufika lelo jino.

¹¹ Bungauzhi bwa mu Baibolo kechi bwafikiletu moba a kala ne, ne mu ano moba tubena kumona bungauzhi byo bubena kufika. Akilangulukai pa bungauzhi buji mu buku wa Danyela bwaamba pa Bufumu bwa Ntanda Yonse bwa Anglo-America. (Tangai Danyela 2:41-43.) Buno bungauzhi bwaambijile jimo kuba’mba bufumu bwa Anglo-America bukekala “aku bwakosa” nobe kyela kya kapotwe “aku bwanekena” nobe buchimba. Buno bungauzhi bwafika. Bufumu bwa Britain ne America bwakosatu nobe kyela kya kapotwe, baingijile mwingilo mukatampe pa kuba’mba bashinde Makondo onse abiji a Ntanda Yonse kabiji buji na mazhita akatampe. Kabiji buno bufumu bwanekena na mambo a bipamo bimenako bangikazhi mu bya nkito, kulwisha luusa lwabo ne bwana bwa bene. Shayuka umo wa bya bumulwila ntanda waambile’mba: “Nangwa kya kuba mu kyalo kya United States bantu besajila bandama kyalo bo bakeba bene bino muji bingi mabano.” Kyalo kya Britain, lubaji lukwabo lwa buno bufumu bwa ntanda yonse, namo baabenamo mu milanguluko ne pa bintu byo bafwainwa kubila pamo na byalo bikwabo biji mu European Union. Ano mabano alengela Bufumu bwa Ntanda Yonse bwa Anglo-America kukankalwa kwingijisha bulume bwabo bulongo.

12. Bungauzhi bwa mu Baibolo bwitulengela kushiinwa’mba ka?

¹² Bungauzhi bwa mu Baibolo bwafika kala bwitulengela kushiinwa’mba milaye ya Lesa yonse ya kulutwe ikafika. Tumvwatu byonka byaumvwine nyimbi wa masalamo walombele kwi Yehoba amba: “Nkebesha bingi lupulukilo lwenu, mambo naketekela mu byambo byenu.” (Sala. 119:81) Mu Baibolo Yehoba witulengela kwikala “na luketekelo ne bwikalo bwawama bwa kulutwe.” (Yele. 29:11) Luno luketekelo lwetu kechi lwaimena pa bulume bwa bantu ne, bino bwaimena pa milaye ya Yehoba. Twayai atweba bonse tutwajijile kukosesha luketekelo lwetu mu Mambo a Lesa. Tukobanga bino inge ketufunde bungauzhi bwa mu Baibolo.

13. Kwesakana na Salamo 119:66, 138, ñanyi kintu kikwabo kitulengela kuketekela Baibolo?

¹³ Kikwabo kitulengela kuketekela Baibolo ke bintu byavula byawama bimwenamo bonse balondela maana ajimo. (Tangai Salamo 119:66, 138.) Baji mu masongola bamo bakebelenga kwikaana luno baji bingi na lusekelo na mambo a kuba’mba baingijishe maana aji mu Baibolo. Kabiji baana babo baji bingi na lusekelo na mambo a kuba’mba baji na bansemi bena Kilishitu bebata bingi muchima kabiji bebatemwa.—Efi. 5:22-29.

14. Lumbululai bukine buji mu Baibolo byo bupimpula bwikalo bwa bantu.

¹⁴ Kwingijisha maana aji mu Baibolo kwakwasha bantu bavula bingi kupimpula bwikalo bwabo, kubikapotu ne bajinga bambanzhi.  Akilangulukai pa lujimuno lwa mu Baibolo byo lwakwashishe kaili aye Jack. d Wajinga mbanzhi kabiji bamuzhachishe kuba’mba wafwainwa kufwa. Bino juba jimo Jack watainwe pa lufunjisho lwa Baibolo. Byubilo byawama byajinga na bano balongo bafunjishenga bakwabo byamulengejile naye kutendeka kufunda Baibolo. Watatwile kupimpula byubilo byanji na mambo a bukine bo afunjilenga mu Baibolo. Mu kuya kwa moba, wafikijilemo kwikala musapwishi wabula kubatizhiwa. Kabiji palutwe kacheche wabatizhiwe. Wasapwijilenga na mukoyo ku bakwabo bakaili pa Bufumu bwa Lesa, kabiji wakwashishe bakaili bana kufunda bukine. Juba ja kumwipaya jafikile Jack saka apimpula byubilo byanji. Shabyambo umo waambile’mba: “Jack kechi ukiji byonka byo ajinga myaka 20 yapitapo ne. Mafunjisho a Bakamonyi ba kwa Yehoba apimpula bwikalo bwanji.” Nangwa kya kuba Jack bamwipayile kwesakana na byo bamuzhachishe, lupimpu lwanji lumwesha’mba twakonsha kuketekela Mambo a Lesa kabiji aji na bulume bwa kupimpula bwikalo bwa bantu.—Isa. 11:6-9.

15. Bukine bwa mu Baibolo bwalengela bantu ba Yehoba kuba ñanyi kintu? (Monai Kipikichala.)

¹⁵ Bantu ba Yehoba bakwatankana bingi mambo bengijisha bukine bwa mu Baibolo. (Yoa. 13:35; 1 Ko. 1:10) Atweba twayukanyikwa’mba twi bantu ba mutende kabiji bakwatankana. Bya bumulwila ntanda, misalululo ya kikoba, ne kubula kubila bintu pamo byalengela bantu mu ntanda kwabenamo. Nsongwalume umo aye Jean byo amwene bantu ba Yehoba byo bakwatankana wakuminye bingi. Wakomejile mu kyalo kimo kya mu Africa. Malwañano byo atendekele mu kyalo kyabo watwelele bushilikale, bino mu kuya kwa moba wanyemejile mu kyalo kingi. Akwa wakamonañene na Bakamonyi ba kwa Yehoba. Jean waambile’mba: “Nafunjile kuba’mba bapopweshi bakine kechi bevwanga mu bya bumulwila ntanda ne, kabiji kechi baabenamo ne. Betemwa bene na bene.” Watwajijile  kwamba’mba: “Natwelele bushilikale amba nzhikijile kyalo kyetu. Bino byo nafunjile bukine bwa mu Baibolo, nafuukwilepo kutatula kwingijila Yehoba mu bwikalo bwami.” Jean wapimpwile bwikalo bwanji. Luno waleka kulwa na bantu, bino usapwila bukine bwa mu Baibolo bukwatankanya bantu. Twakonsha kuketekela mambo a Lesa na mambo a kuba’mba maana ajimo akwasha bantu ba mu bisho byonse.

16. Mambo ka o kyanemena kukosesha luketekelo lwetu mu Mambo a Lesa?

¹⁶ Bintu bibena kuya na kutaminakotu mu ntanda kabiji kino kikalengela bantu bavula kubula kuketekela bukine bwa mu Baibolo. Bantu bakakebanga kwitulengela kuzhinauka inge byambo biji mu Baibolo bya kine, nangwa kwitulengela kuzhinauka inge Yehoba watongola kalume wa kishinka kabiji wa maana kutangijila bapopweshi banji lelo jino. Bino inge twashiinwa kuba’mba Mambo a Yehoba bo bukine kechi tukalondela ino ñambilo yatama yakonsha konauna lwitabilo lwetu ne. Bino tukafuukulapo “kukookela malamuna [a Yehoba] kimye kyonse kukafikatu ne ku mpelo.” (Sala. 119:112) ‘Kechi tukomvwanga bumvu’ kubuulako bantu bukine buji mu Baibolo ne kwibatundaika kulondela mafunde ajimo ne. (Sala. 119:46) Kabiji tukachinchika makatazho nangwa kwitumanyika, ‘saka twatekanya ne kwikala na lusekelo.’—Kolo. 1:11; Sala. 119:143, 157.

17. Kinembelo kyetu kya mwaka kituvululamo amba ka?

¹⁷ Tumusanchila bingi Yehoba pa kwitulengela kuyuka bukine. Bukine bwitukwasha kwikala na mutende, luketekelo ne kwitufunjisha byo twafwainwa kwikala mu ino ntanda yaluwankana. Bonka buno bukine bwitulengela kuketekela mu bintu byawama bya kulutwe biketubila Bufumu bwa Lesa. Kinembelo kyetu kya mwaka wa 2023 kitukwasha kutwajijila kuketekela mu Mambo a Lesa kuba’mba bo bukine.—Sala. 119:160.