1-2. (a) Mambo ka o twafwainwa kubujila kukumya inge ketupite mu makatazho? (b) Ñanyi bintu byo tusakwisambapo mu uno mutwe?

 ATWEBA bantu ba Yehoba kechi tukumya inge ketupite mu makatazho ne. Kechi tukumya ne, mambo Baibolo waamba’mba: “Pa kutwela mu Bufumu bwa Lesa, twafwainwa kupita mu bya malwa byavula.” (Byu. 14:22) Kabiji twayuka’mba makatazho etu amo kechi akapwa ne kufikatu ne byo tukatwela mu ntanda ipya ya Lesa mukabula “lufu,mabingo, kujila ne misongo.”—Lum. 21:4.

² Yehoba kechi wituzhikijila ku meseko ne. Nangwa byonkabyo, witukwasha kuchinchika. Akimonai byaambile mutumwa Paulo ku bena Kilishitu bajinga mu Loma. Patanshi wakitongwele makatazho avula aye ne balongo banji o bapichilengamo. Kepo anembele’mba: “Mu bino bintu byonse tubena kushinda kupichila mwi aye witutemenwe.” (Loma 8:35-37) Kino kibena kulumbulula’mba Yehoba wakonsha kwimukwasha nangwatu inge mubena kupita mu makatazho. Twayai tumone Yehoba byo akwashishe Yosefwa ne byo akonsha kwitukwasha.

3. Ñanyi lupimpu lwamwekejile Yosefwa?

³ Yakoba wamwesheshe’mba watemenwe bingi mwananji Yosefwa. (Nte. 37:3, 4) Kino kyalengejile baana ba kwa Yakoba bakoma kumubila kichima nkasabo. Kabiji byo bamwene jibumba ja basulu bena Mijanyi, Yosefwa bamupoteshe. Bano basulu  bamutwajile kwalepa bingi ku Ijipita ko bakamupoteshe jikwabo kwi Potifwalo kineme wa kwa Felo kabiji mukulumpe wa bakasopa. Bwikalo bwa kwa Yosefwa bwapimpwilwetu nobe mu kukopa kwa jiso. Mwana ye batemenwe bingi kwi shanji waalukile ke muzha mu Ijipita.—Nte. 39:1.

4. Ñanyi kintu kyakonsha kwitumwekela kipasha na kyamwekejile Yosefwa?

⁴ Baibolo waamba’mba “bintu byatama bibamwekela bonse.” (Sapwi. 9:11, Holy Bible—Easy-to-Read Version) Kimye kimo tupita mu makatazho ‘apitamo bantu bakwabo,’ ko kuba’mba meseko afikila bantu bonse. (1 Ko. 10:13) Kampe twakonsha kumanama na mambotu a kuba’mba twi baana ba bwanga ba kwa Yesu. Bantu bakonsha kwitwendeleka, kwitukanya kwingijila Lesa nangwa kwitumanyika na mambo a lwitabilo lwetu. (2 Timo. 3:12) Yehoba wakonsha kwimukwasha mu meseko onse o mwakonsha kupitamo. Waubile byepi pa kuba’mba akwashe Yosefwa?

5. Potifwalo wayukile’mba ñanyi wakwashishenga Yosefwa mu bintu byonse byo aubilenga? (Ntendekelo 39:2-6)

⁵ Tangai Ntendekelo 39:2-6. Potifwalo wayukile kuba’mba Yosefwa wajinga bingi na milangwe kabiji waingilanga bingi na ngovu. Wayukile ene mambo. Potifwalo wayukile kuba’mba “Yehoba wamukwashanga [Yosefwa] mu bintu byonse byo aubanga.” b Mu kuya kwa moba, uno mwina Ijipita wamutongwele Yosefwa kwikala kalume wanji. Kabiji wamupele bukulumpe pa nzubo yanji. Ñanyi kintu kyafuminemo? Potifwalo waikele na bunonshi bwavula.

6. Yosefwa waumvwine byepi ku muchima pa byo apichilengamo?

⁶ Akifwanyikizhai Yosefwa byo aumvwine ku muchima. Ñanyi kintu kyo akebeshe bingi? Nanchi wakebelenga’mba Potifwalo amumone ne kumufweta nyi? Kyamweka Yosefwa wakebelenga kukasuluka ne kubwela kwi bashanji. Nangwa kya kuba Yosefwa wajinga pa kifulo kyawama ne kwikala bulongo mu nzubo ya kwa Potifwalo, wajinga muzha ku muntu wabulanga kupopwela Yehoba. Yehoba kechi walengejile Potifwalo kukasulula Yosefwa ne. Kabiji bwikalo bwa kwa Yosefwa bwajinga pepi kupimpulwa jikwabo.

7. Byapichilengamo Yosefwa byayilenga byepi na kutaminakotu? (Ntendekelo 39:14, 15)

⁷ Byonka byo baambapo mu Ntendekelo kitango 39, muka Potifwalo wamufwalamine Yosefwa, kabiji pa bimye byavula wamwambilanga’mba alaale nanji. Bino Yosefwa wakainenga kulaala nanji. Kyapeleleko muka Potifwalo wamushikilwe bingi kya kuba wamubepejile’mba wakebelenga kulaala nanji kya kumukanjikizha. (Tangai Ntendekelo 39:14, 15.) Potifwalo byo aumvwine bino, watayile Yosefwa mu kaleya mo aikele myaka yavula. (Nte. 39:19, 20) Bwikalo bwajinga byepi mu kaleya? Kyambo kya Kihebelu Yosefwa kyo aingijishe kya kuba’mba “kaleya” kyakonsha kulumbulula “mushima” nangwa “kimbo,” kyalumbulwilenga’mba bwikalo kechi bwajinga bulongo ne, kabiji walangulukilenga’mba kechi bakamukasulula ne. (Nte. 40:15; tubyambo twa munshi.) Kabiji Baibolo ulumbulula’mba kimye kimo maulu akwa Yosefwa beakashile mu nshimbi ne nshingo yanji beibikile mu minyololo. (Sala. 105:17, 18) Byapichilengamo Yosefwa byayilengatu na kutaminako. Muzha ye baketekejile bingi waalukile ke kaili.

8. Nangwa kya kuba lukatazho lwetu lwabaya, twafwainwa kushiinwa’mba ka?

⁸ Nanchi mwakipitapo kala mu lukatazho lukatampe lwayilengatu na kubayilako nangwa kya kuba mwalombelepo pa bimye byavula nyi? Kino kyakonsha kumweka. Yehoba kechi wituzhikijila ku makatazho aji mu ntanda ibena kulamwa na Satana ne. (1 Yoa. 5:19) Nangwa byonkabyo, mwafwainwa kushiinwa’mba, Yehoba wayuka byonse byo mubena kupitamo kabiji wimuta bingi muchima. (Mat. 10:29-31; 1 Pe. 5:6, 7) Kabiji witulaya’mba: “Kechi nkakusha ne, kabiji kechi nkakulekelela ne.” (Hebe. 13:5) Yehoba wakonsha kwimukwasha kuchinchika nangwa lukatazho lwenu lubayepotu byepi. Twayai tumone byo akwashishe Yosefwa.

9. Ñanyi kintu kimwesha’mba Yehoba wajinga ne Yosefwa byo ajinga mu kaleya? (Ntendekelo 39:21-23)

⁹ Tangai Ntendekelo 39:21-23. Yehoba wakwashishe Yosefwa mu kyokya kimye kyakatezhe kyo ajinga mu kaleya. Wamukwashishe byepi? Mu kuya kwa moba, Yosefwa bamuketekejile bingi ne kumunemeka ku mukulumpe wa kaleya byonka byo bamuketekejile kwi Potifwalo. Palutwe kacheche, uno mukulumpe wa kaleya watongwele Yosefwa kwikala mukulumpe wa bakaili bonse mu kaleya. Baibolo waamba’mba: “Mukulumpe wa kaleya kechi watele muchima ku kintu nangwa kimo kyajinga mu maboko a kwa Yosefwa ne.” Yosefwa waikele na mwingilo mukatampe bingi. Luno lwajinga lupimpu lo abujilenga kuketekela. Muntu ye bakalakenyenga’mba walaajile na muka Potifwalo kya kumukanjikizha bakonsheshe kumupa byepi mwingilo mukatampe bingi? Mukumbu ujitu umo. Pa Ntendekelo 39:23 paamba’mba: “Yehoba wajinga ne Yosefwa kabiji Yehoba wamukwashanga mu bintu byonse byo aubanga.”

10. Lumbululai ene mambo Yosefwa o akonsheshe kulanguluka’mba Yehoba kechi wamukwashishenga ne.

¹⁰ Fwanyikizhai Yosefwa byo alangulukilenga pa bintu byo apichilengamo. Na mambo a kuba’mba bamubepejile ne kumukasa, nanchi mwalanguluka’mba wamwene’mba Lesa wamukwashishenga mu bintu byonse nyi? Ñanyi kintu Yosefwa kyo akebeshenga? Nanchi wakebeshenga kutokesha ku muchima mukulumpe wa kaleya nyi? Kyamweka Yosefwa wakebelenga kuba’mba bamufumye mu kaleya. Waambijile ne mukwabo kaili ye bakasulwile kuya na kwamba ne Felo kuba’mba naye bakamufumyemo mu kaleya ketamine bingi.  (Nte. 40:14) Nangwa byonkabyo, awa mwanamulume kechi wakabuujile Felo pa kyonka kya kimye ne. Kabiji kino kyalengejile Yosefwa kwikala mu kaleya myaka ikwabo ibiji. (Nte. 40:23; 41:1, 14) Bino Yehoba watwajijile kumukwasha. Wamukwashishenga byepi?

11. Yehoba wapele Yosefwa bulume bwa kuba ka, kabiji ñanyi mwingilo Yosefwa ye aingijile mu kufikizha kyaswa muchima wa Yehoba?

¹¹ Yosefwa byo ajinga mu kaleya, Yehoba walengejile mfumu wa Ijipita kulota biloto bibiji byakatezhe bingi. Felo wakebeshe bingi kuyuka mwatajile bino biloto. Mfumu byo ayukile’mba Yosefwa wajinga na bulume bwa kulotolola biloto, wakambizhe kuba’mba bamulete. Yehoba wakwashishe Yosefwa kulumbulula mwatajile bino biloto, kabiji Felo waumvwine bingi bulongo pa bintu byo amubuujile kuba. Felo wayukile kuba’mba Yehoba wakwashishenga Yosefwa, onkao mambo, wamupeele luusa pa kyalo kyonse kya Ijipita. (Nte. 41:38, 41-44) Palutwe kacheche, mu Ijipita mwaponene kipowe kya nzala ne mu Kenana mwajinga kisemi kya kwa Yosefwa. Yosefwa wapulwishe kisemi kyanji ne kuzhikijila ndonda ya kisemi mwafumine Mesiasa.

12. Yehoba wakwashishe byepi Yosefwa?

¹² Akilangulukai pa bintu bikatampe byamwekele mu bwikalo bwa kwa Yosefwa. Ñanyi walengejile Potifwalo kutemwa Yosefwa? Nangwa kya kuba wajinga muzha, ñanyi walengejile mukulumpe wa kaleya kupa Yosefwa kifulo kikatampe? Ñanyi walengejile Felo kulota biloto byakatezhe bingi, kabiji ñanyi wapele Yosefwa bulume bwa kulumbulula mwatajile bino biloto? Kabiji ñanyi walengejile kuba’mba Felo ape luusa Yosefwa lwa kutala pa kajo mu kyalo kyonse kya Ijipita? (Nte. 45:5) Kwa kubula nangwa kuzhinaukatu ne, Yehoba ye wakwashishenga Yosefwa mu bino bintu byonse. Nangwa kya kuba bakolojanji Yosefwa bakebelenga kumwipaya, bino Yehoba wamwingijishe kuba kyaswa muchima wanji.

13. Nanchi Yehoba ye ulengela’mba tupitenga mu makatazho nyi? Lumbululai.

¹³ Tufunjilako ka ku bintu byapichilemo Yosefwa? Nanchi Yehoba wituzhikijila ku byonse byo tupitamo nyi? Nanchi Yehoba ye witulengela’mba tupite mu bintu byatama pa  kuba’mba mukafume byawama nyi? Ine, kechi byo bifunjisha Baibolo ne. (Sapwi. 8:9; 9:11) Nangwa byonkabyo, twayuka kuba’mba inge ketupite mu makatazho Yehoba umona kabiji umvwa kujila kwetu kwa kukeba bukwasho. (Sala. 34:15; 55:22; Isa. 59:1) Kabiji Yehoba wakonsha kwitupa bulume bwa kuchinchika makatazho onsetu. Witukwasha byepi kuchinchika?

14. Yehoba witukwasha byepi mu bimye bya makatazho?

¹⁴ Jishinda jimo Yehoba mo etukwashisha ke kwitutekenesha ne kwitutundaika, kabiji uba bino pa kimye kyafwainwa. (2 Ko. 1:3, 4) Kino kyo kyamwekejile mulongo wa ku Turkmenistan wa jizhina ja Eziz, yebakashile myaka ibiji na mambo a lwitabilo lwanji. Washimikizhe’mba: “Juba jo bantotolweshenga, mulongo wantangijile kinembelo kya Isaya 30:15, kyaamba’mba: ‘Mukekala na bulume inge mwatekanya ne kunketekela.’ Kino kyepelo kyankwashishe kwikala watekanya ne kuketekela mwi Yehoba mu bintu byonse. Kulanguluka languluka pa kino kinembelo kwankwashishe bingi myaka yonse yo najinga mu kaleya.” Nanchi mwakonsha kuvulukapo kimye Yehoba kyo emutekeneshe ne kwimutundaika pa kimye kyafwainwa nyi?

15-16. Tufunjilako ka ku byapichilemo ba Tori?

¹⁵ Javula inge tubena kupita mu lukatazho, kechi tumona’mba Yehoba ubena kwitukwasha ne. Bino inge lukatazho lwapwa po po tumona’mba Yehoba witukwashishenga. Nyenga wa jizhina ja Tori waswile kino. Mwananji Mason, wakolelwe kikola kya kansa myaka itanu na umo kufikatu ne byo afwile. Ba Tori bajinga bingi na bulanda. Baambile’mba: “Luno lwajinga lukatazho lukatampe bingi mu bwikalo bwami byo nji nsemi.” Banungilepo’mba: “Bansemi bakwetu bakonsha kuswa kino kuba’mba kyatama bingi kumona mwanobe  na kumanama kukila inge ubena kumanama obewa mwine.”

¹⁶ Nangwa kya kuba kino kyalengejile Tori kwikala bingi na bulanda, walangulukilenga pe Yehoba byo amukwashishe kuchinchika. Waambile’mba: “Inge navuluka oa moba mmona Yehoba byo ankwashishe kimye kyakolelwe mwanami. Nangwa kya kuba Mason wakolelwe bingi kya kuba wakankelwenga ne kumona baishilenga na kumupempula, balongo ne banyenga baendelenga maola abiji kwiya ku kipatela na kumupempula. Kimye kyonse kuji baiyanga na kwitutundaika. Betuletelanga kajo ne bintu bikwabo bikebewa. Nangwatu kimye bintu po byakatezhe bingi twajinga na byonse bikebewa.” Yehoba wakwashishe ba Tori ne Mason kuchinchika.—Monai kakitenguluzha ka kuba’mba, “ Yehoba Witupele Byonse byo Twakebelenga.”

17-18. Ñanyi bintu biketukwasha kuyuka’mba Yehoba ubena kwitukwasha mu bimye bya makatazho? (Salamo 40:5)

¹⁷ Tangai Salamo 40:5. Muntu wakonsha kufuukulapo kukanjila mutumba. Umvwe ubena kukanjila wakonsha kwimanako pa bimye byavula ne kumona mpunzha byo yawama. Kyo kimotu ne atweba, twafwainwa kutulumanangako ne kulanguluka pa bintu bitubila Yehoba pa kwitukwasha kuchinchika makatazho. Pa juba pa juba mwafwainwa kwiipuzha’mba, ‘Ñanyi bintu Yehoba byo angubila lelo? Nangwa kya kuba lukatazho kechi lwapwa ne, Yehoba wa kunkwasha byepi kuchinchika?’ Mwafwainwa kuvulukapo kintu kimo kimubila Yehoba pa kwimukwasha.

¹⁸ Ibyo kuba’mba mwakonsha kulomba’mba lukatazho lwenu lupwe. Kino kijitu bulongo kabiji kyanema bingi. (Fili. 4:6) Nangwa byonkabyo, twafwainwa kuvulukanga bintu bitubila Yehoba mambo Yehoba witulaya kuba’mba uketukosesha ne kwitukwasha kuchinchika. Onkao mambo, saka mumusanchila Yehoba pa bukwasho bo emupa. Po po mukayuka’mba Yehoba ubena kwimukwasha byonkatu byo akwashishe Yosefwa kimye kyo apichilenga mu meseko.—Nte. 41:51, 52.