1-2. Mambo ka o tutainwa ku Kivuluko pa mwaka pa mwaka?

 MYAKA 2,000 yapitapo, Yesu witufwijile pa kuba’mba tukekale na bumi bwa myaka ne myaka. Bufuku bwapeleleko Yesu saka akyangye kufwa wakambizhe baana banji ba bwanga kwikalanga na kijiilo kicheche kya shinkwa ne binyu pa kuvuluka kitapisho kya bukuzhi kyo apaine.—1 Ko. 11:23-26.

² Tukookela mukambizho wa kwa Yesu mambo twamutemwa bingi. (Yoa. 14:15) Pa mwaka pa mwaka mu kimye kya Kivuluko, tumwesha lusanchilo byo twikala na kimye kya kulomba ne kulanguluka languluka pa lufu lwanji. Kabiji twingilako pakatampe mu mwingilo wa kusapwila, kutundaika bantu bavula kuba’mba bakatanweko ku kino kintu kyanema. Twibikako bingi kumona’mba kafwako kintu nangwa kimo kyakonsha kwitulengela kubula kutanwa ku Kivuluko ne.

3. Ñanyi mashinda o tusakwisambapo mu uno mutwe?

³ Mu uno mutwe tusakwisamba pa mashinda asatu bantu ba Yehoba mo bengila na ngovu kuvuluka lufu lwa kwa Yesu: (1) kuvuluka lufu lwa kwa Yesu kulondela byonka byo aubile, (2) kwitako bakwabo kutanwa ku Kivuluko, ne (3) kwikala na Kivuluko nangwa kya kuba bintu byakatazha.

4. Ñanyi bintu byo tufunda pa Kivuluko, kabiji mambo ka o twafwainwa kunemekela buno bukine? (Luka 22:19, 20)

⁴ Pa mwaka pa mwaka pa Kivuluko tuteleka ku jashi ja mu Baibolo jikumbula mepuzho avula bingi. Tufunda ene mambo bantu o bakebela bukuzhi kabiji tufunda lufu lwa muntu umo byo lwakonsha kufuta mambo a bantu bavula. Betuvululamo binyu ne shinkwa byo bimenako ne bafwainwa kuja shinkwa ne kutoma binyu. (Tangai Luka 22:19, 20.) Kabiji tulanguluka languluka pa bintu byawama bikeyowanga bantu bakekala pano pa ntanda myaka ne myaka. (Isa. 35:5, 6; 65:17, 21-23) Twafwainwa kunemeka bingi buno bukine. Bantu bavula kechi bayuka bino bintu ne. Kabiji kechi bayuka buneme bwa kitapisho kya kwa Yesu ne. Kabiji kechi bavuluka lufu lwa kwa Yesu kulondela byonka byo aubile ne. Mambo ka?

5. Batumwa bavula byo bafwile, bantu batatwile byepi kuvuluka lufu lwa kwa Yesu?

⁵ Batumwa ba kwa Yesu bavula byo bafwile, bena Kilishitu babubela batwelele mu kipwilo. (Mat. 13:24-27, 37-39) Bafunjishenga “mafunjisho aluwankana kukeba kongola baana ba bwanga amba bebalondelenga.” (Byu. 20:29, 30) Lufunjisho lumo ‘lwaluwankana’ lo batendekele kufunjisha ke lwa kuba’mba Kilishitu kechi wilambwile “jimotu pa kufumyapo bundengamambo bwa bantu bavula” byonka byaamba Baibolo ne, bino bafunjishenga’mba kitapisho kyafwainwa kulambulwa bimye byavula. (Hebe. 9:27, 28) Ano moba bantu bavula baitabila luno lufunjisho lwa bubela. Pa mulungu pa mulungu nangwa pa juba pa juba bakonkana pamo mu machechi na kuvuluka kitapisho kya kwa Yesu. Mabumba akwabo a bupopweshi kechi avuluka lufu lwa kwa Yesu bimye byavula ne. Pano bino bantu babo bavula kechi bayuka kitapisho kya kwa Yesu kilumbulula ne. Bamo beshikisha’mba: ‘Nanchi kine lufu lwa kwa Yesu lwakonsha kulengela mambo ami kulekelwa nyi?’ Mambo ka o bepwizha bino? Mambo bebabuula’mba lufu lwa kwa Yesu kechi lwakonsha kulengela mambo abo kulekelwa ne. Nanchi baana ba bwanga ba kwa Yesu bakwasha bantu kuyuka kitapisho kya kwa Yesu byo kilumbulula ne kuyuka jishinda ja kulondela pa kuvuluka lufu lwa kwa Yesu nyi?

6. Mu 1872, ñanyi bintu byafunjile jibumba ja bafunda Baibolo?

⁶ Ku mpelo ya myaka kitota kya bu 19, jibumba ja bafunda Baibolo jatangijilwenga na Charles Taze Russell batendekele mukwekele wa kufunda Binembelo. Bakebelenga kuyuka bishinka pa buneme bwa kitapisho kya kwa Yesu ne bya kuba pa kuvuluka lufu lwanji. Mu 1872, bayukile kuba’mba Yesu wapaine bukuzhi bwa kukuula bantu bonse. Kechi bafwainwe kwilamina bino bishinka byo bafunjile ne. Basampainye bino byambo mu mabuku, mapepala a byambo, ne mu magazini. Kabiji palutwe kacheche, batendekele kuvuluka lufu lwa kwa Yesu jimo pa mwaka byonkatu byaubanga bena Kilishitu batanshi.

7. Ñanyi bintu byo tumwenamo mu byafunjile bafunda Baibolo?

⁷ Lelo jino tumwenamo bingi mu bintu byafunjile bano bena Kilishitu myaka ya kunyuma. Mu ñanyi jishinda? Yehoba witukwasha kuyuka bukine pa kitapisho kya kwa Yesu byo kilumbulula ne byo kitukwasha. (1 Yoa. 2:1, 2) Baibolo walumbulula  luketekelo lubiji lwa bantu batokesha Lesa ku muchima. Bamo bakekala na bumi bwa kubula kufwa mwiulu kabiji bavula bakekala na bumi bwa myaka ne myaka pano pa ntanda. Kulanguluka pa butemwe bwa Yehoba ne pa byo tumwenamo mu kitapisho kya kwa Yesu kwitulengela kufwenya kwipi ne Yehoba. (1 Pe. 3:18; 1 Yoa. 4:9) Onkao mambo, tuvuluka lufu lwa kwa Yesu kulondela byonka Yesu byo afunjishe baana banji ba bwanga kabiji twitako bantu bakwabo byonka byaubanga bena Kilishitu batanshi.

8. Ñanyi bintu bantu ba Yehoba byo baubile pa kwitako bakwabo kutanwa ku Kivuluko? (Monai kipikichala.)

⁸ Myaka yavula yapitapo bantu ba Yehoba betako bakwabo ku Kivuluko. Kutatula mu 1881, baichile balongo ne banyenga kwiya kutanwa ku kuno kupwila kwanema kwa kuvuluka lufu lwa kwa Yesu kwaikejile mu nzubo ya mulongo mu Allegheny, Pennsylvania mu United States. Palutwe kacheche, bipwilo byonse byaikelenga na Kivuluko. Mu March 1940, basapwishi bebabuujile kwitako bantu bakwabo mu nyaunda yabo bafunjilenga bukine. Mu 1960, pa Betele bapulinchile tupepala twakwichilapo bantu ne kwitutuma ku bipwilo. Kutatula kyo kya kimye, tusampanya tupepala twakwichilapo bantu ku Kivuluko twavula bingi. Mambo ka o twibikilako bingi kwitako bantu bakwabo kutanwa ku Kivuluko?

9-10. Bañanyi bamwenamo byo twingila na ngovu kwitako bantu ku Kivuluko? (Yoano 3:16)

⁹ Twita bakwetu kwiya na kutanwa ku Kivuluko pamo ne atweba mambo tukeba’mba  batanwako kimye kitanshi bafunde bukine pa bitubila Yehoba ne Yesu. (Tangai Yoano 3:16.) Twaketekela’mba byo bamona ne kumvwa pa Kivuluko bibalengela kukeba kufunda byavula ne kwikala bantu ba Yehoba. Bantu bakwabo nabo bamwenamo.

¹⁰ Kabiji twitako baleka kwingijila Yehoba. Twibavululamo kuba’mba Lesa wibatemwa bingi. Bavula batanwako, kabiji kitusangajika bingi. Kutanwa ku Kivuluko kwibavululamo lusekelo lo bajinga nalo byo baingijilanga Yehoba. Akilangulukai pe Monica. b Mu kimye kya mwalo wa COVID-19 watatwile kusapwila jikwabo. Byo atainwe ku Kivuluko mu 2021, waambile’mba: “Kivuluko kya uno mwaka kyanema bingi kwi amiwa. Mambo papita myaka 20, kusapwilapo ne. Bino uno mwaka nasapwila ku bantu bavula bingi ne kwibetako ku Kivuluko. Nebikileko bingi kwita bantu mambo nsanta bingi pa byangubila Yehoba ne Yesu.” (Sala. 103:1-4) Umvwe bantu baswa nangwa bakana kwiya ku Kivuluko, atweba tutwajijilatu kwita bantu mambo twayuka’mba Yehoba witusanchila pa byo twibikako kumwingijila.

11. Yehoba upesha byepi mwingilo wetu wa kwita bantu ku Kivuluko? (Hagai 2:7)

¹¹ Yehoba wapesha mwingilo wetu wa kwitako bantu ku Kivuluko. Mu 2021, nangwa kya kuba kwajinga mwalo wa COVID-19, bantu batainwe ku Kivuluko bajinga 21,367,603. Ko kuba’mba kibelengelo kya Bakamonyi ba kwa Yehoba ntanda yonse kyakonsha kutwelamo bimye bibiji ne kichika. Pano bino, Yehoba kechi uta muchima pa kuvula kwa bantu ne. Aye uta muchima pa muntu umo umo. (Luka 15:7; 1 Timo. 2:3, 4) Umvwe twaingilako uno mwingilo wa kwita bantu Yehoba witukwasha kutaana bantu baji na michima ya bukishinka.—Tangai Hagai 2:7.

12. Ñanyi bintu byakonsha kulengela kuvuluka lufu lwa kwa Yesu kukatazha? (Monai kipikichala.)

¹² Yesu waambijile jimo kuba’mba mu moba a kupelako tukapitanga mu bintu bavula byakatazha nabiji ba mu kisemi kwitwimena ku ntundwa, kwitumanyika, makondo, myalo ne bikwabotu. (Mat. 10:36; Mako 13:9; Luka 21:10, 11) Na mambo a bino bintu kyakonsha kukatazha kuvuluka lufu lwa kwa Yesu. Ñanyi bintu byaubapo balongo ne banyenga bibakwasha kuchinchika ano makatazho kabiji Yehoba wibakwasha byepi?

13. Yehoba wakwashishe byepi ba Artem byo bebikileko kwikala na Kivuluko nangwa kya kuba bajinga mu kaleya?

¹³ Kwitukasa. Balongo betu bamo bo bakasa na mambo lwitabilo lwabo bebikako bingi kuvuluka lufu lwa kwa Yesu. Akilangulukai pa byaubile ba Artem. Mu kimye kya Kivuluko mu 2020 bebakashile ne kwibabika mu kakibamba kacheche kabiji mu kano kakibamba bajingamo batanu. Nangwa kya kuba bajinga mu kaleya bebikileko bingi kwikala na bintu bya kwingijisha pa Kivuluko kabiji benengezhezhe kwamba jashi ja Kivuluko pa kuba’mba bamwenemo abo bene. Bino bakaili bakwabo bo bajinga nabo bapepelenga fwanka ne kwamba bingi mwenga. Ñanyi kintu kyo baubile? Bebambijile kubula kupepa fwanka ne kubula kwamba bya mwenga pa jiola jimo. Bano bakaili bakwabo baswile kubula kuba bino bintu. Ba Artem baambile’mba: “Nakebelenga kwibabuulako pa bya Kivuluko.” Nangwa kya kuba bakaine  kumvwa, byo bamwene byaubile ba Artem pa kuvuluka lufu lwa kwa Yesu, bebepwizhe mepuzho avula.

14. Ñanyi bintu byaubile bantu ba Yehoba pa kuba’mba bekale na Kivuluko mu kimye kya mwalo wa COVID-19?

¹⁴ Mwalo wa COVID-19. Na mambo a mwalo, bantu ba Yehoba kechi bakonsheshe kupwila pamo pa Kivuluko ne. Nangwa byonkabyo, kino kechi kyalengejile kubula kwikala na Kivuluko ne. c Ku mapunzha kuji intaneti bipwilo byaingijishe biñambañamba. Pano nga bantu bavula baji ku mapunzha kwabula intaneti baubile byepi? Mu byalo bimo jashi bejibikile pa televizhonyi ne pa waileshi.  Mu mapunzha amo batelekele ku jashi ja Kivuluko jo bakopele mu milaka kukila 500 kabiji balongo bakopolwele ano majashi ne kwiapana ku balongo ne banyenga mu ano mapunzha.

15. Mwafunjilako ka ku byapichilemo ufunda Baibolo wa jizhina ja Sue?

¹⁵ Kwitwimena ku ntundwa ku ba mu kisemi. Bamo lukatazho lukatampe lo bekala nalo pa kuba’mba batanwe ku Kivuluko ke kwibemena ku ntundwa ku ba mu kisemi. Akilangulukai pa byapichilemo ufunda Baibolo umo wa jizhina ja Sue. Mu 2021, byo kwashajiletu juba jimo kwikala na Kivuluko, Sue wabuujile umufunjisha Baibolo kuba’mba na mambo a kumwimena ku ntundwa ku ba mu kisemi kechi ukakonsha kutanwa ku Kivuluko ne. Bamufunjisha Baibolo bamutangijile Luka 22:44. Bamulumbulwijile’mba inge tubena kupita mu makatazho twafwainwa kulombanga kwi Yehoba ne kumuketekela na muchima yense byonka byaubanga Yesu. Juba jalondejilepo, Sue wanengezhezhe shinkwa ne binyu kabiji watelekele ku kupopwela kwa lukelo kwa pa juba ja Kivuluko pa jw.org. Pa kuzhika juba, watwelele mu kibamba mwabunke ne kuteleka ku jashi ja Kivuluko kwingijisha foni. Kivuluko byo kyapwile, Sue wanembejile nkalata bamufunjisha Baibolo mo anembele’mba: “Kesha mwantundaikile bingi. Naingijishe mashinda onse pa kuba’mba mvuluke lufu lwa kwa Yesu kabiji Yehoba wampesheshe. Nji bingi na lusekelo kabiji nemusanchila bingi.” Nanchi mwalanguluka’mba Yehoba wakonsha kwimukwasha ne anweba inge kemupite mu bintu bya uno mutundu nyi?

16. Mambo ka o twashiinwa’mba Yehoba upesha byo tuba pa kuba’mba tutanwe ku Kivuluko? (Loma 8:31, 32))

¹⁶ Yehoba wanemeka bingi byo twibikako pa kuba’mba tuvuluke lufu lwa kwa Yesu. Uketupesha inge ke tumweshe lusanchilo pa bintu byo etubila. (Tangai Loma 8:31, 32.) Twayai twinengezhe kutanwa ku Kivuluko uno mwaka ne kwingilako pakatampe mwingilo wa kusapwila mu kimye kya Kivuluko.