MUTWE WA KUFUNDA 2
LWIMBO 132 Pano twi Umo
Anweba banabalume nemekainga bakazhi benu
“Anweba banabalume, . . . Mwibanemekenga.”—1 PE. 3:7.
BYO TUSAKWISAMBAPO
Mwanamulume byo akonsha kunemeka mukazhanji mu byambo ne mu byo oba.
1. Mambo ka Yehoba o etupela bupe bwa masongola?
YEHOBA ye “Lesa wa lusekelo,” kabiji ukeba ne atweba kwikala na lusekelo. (1 Timo. 1:11) Witupa bya bupe byavula bingi bitulengela kwiyowa bumi. (Yako. 1:17) Pa bino bya bupe paji ne masongola. Inge mwanamulume ne mwanamukazhi besongola, belaya’mba bakatwajijila kwitemwa ne kwinemeka. Kabiji inge batwajijila kukosesha butemwe bwabo bekala bingi na lusekelo.—Maana 5:18.
2. Ñanyi bintu bimweka mu masongola avula lelo jino?
2 Kyatamakotu ke kya kuba’mba bantu bavula besongola balubamo luchipo lo bachipile pa juba ja masongola abo. Kino kibalengela kubula kwikala na lusekelo. Sawakya umo wafumine ku kipamo kya World Health Organization waambile’mba banabalume bavula basongola bapuma bakazhi babo, kwibambila byambo byatama ne kwibamanyikatu mu mashinda akwabo. Banabalume bamo basongola bebepekezha kunemeka bakazhi babo inge baji pa bantu. Pano bino, bamanyika bakazhi babo inge baji kwa bunke. Kabiji masongola avula onaika inge mwanamulume wasongola keatambe bya mulekese.
3. Ñanyi bintu bilengela banabalume bamo kumanyika bakazhi babo?
3 Pano ñanyi bintu bilengela banabalume bamo kumanyika bakazhi babo? Kampe bamo bebakomeshe ku nsemi wamulume wamanyikanga bakazhi banji. Onkao mambo, balanguluka’mba kijitu bulongo kuba bino. Bakwabo bakomena mu bisho mo balanguluka’mba mwanamulume wafwainwa kwikala washinta ku mukazhanji pa kuba’mba amukookelenga. Banabalume bakwabo nabo kechi bebafunjishe kwikanya inge bazhingila ne. Bakwabo baji na mweno yatama ya banabakazhi ne kwilaala na mambo a kutamba bya mulekese. Kabiji sawakya mukwabo wamwesheshe’mba mwalo wa COVID-19 naye walengela ano makatazho kuvujilako. Nangwa byonkabyo, bino bintu kechi byafwainwa kulengela mwanamulume kumanyikanga mukazhanji ne.
4. Ñanyi bintu byafwainwa kubula kuba banabalume bena Kilishitu basongola, kabiji mambo ka?
4 Banabalume bena Kilishitu basongola bafwainwa kuchinuzhuka ndangulukilo yatama ya bantu ba mu ino ntanda yo bamwenamo banabakazhi. a Mambo ka? Ke na mambo a kuba’mba javula muntu uba byonka byo alanguluka. Mutumwa Paulo wajimwineko bena Kilishitu bashingwa ba mu Loma ‘kuleka kulondela bintu bya buno bwikalo.’ (Loma 12:1, 2) Kimye Paulo kyo anembejile bino byambo bena Kilishitu ba mu Loma, bano bena Kilishitu saka baikala kala myaka yavula mu bukine. Nangwa byonkabyo, byambo byaambile Paulo bimwesha’mba bamo mu kipwilo batwajijile kulondela bisho ne ndangulukilo ya bantu bajingako pa kyokya kimye. O ene mambo o ebajimwineko kuba’mba bafwainwa kupimpula ndangulukilo yabo. Banabalume bena Kilishitu basongola lelo jino nabo bafwainwa kulondela luno lujimuno. Kyatamakotu ke kya kuba’mba bamo balondela ndangulukilo ya bantu ba mu ino ntanda kabiji bamanyika bingi bakazhi babo. b Yehoba ukeba mwanamulume kulamanga byepi mukazhanji? Mukumbu uji pa kinembelo paimena uno mutwe.
5. Kwesakana na byaamba 1 Petelo 3:7, mwanamulume wafwainwa kulamanga byepi mukazhanji?
5 Tangai 1 Petelo 3:7. Yehoba wakambizha banabalume kuba’mba bafwainwa kunemekanga bakazhi babo. Mwanamulume wanemeka mukazhanji umulama bulongo ne kumumwesha butemwe. Mu uno mutwe, tusakwisamba pa mwanamulume byo afwainwa kumwesha’mba unemeka mukazhanji. Patanshi, twayai twisambe pa byubilo bimwesha’mba mwanamulume kechi wanemeka mukazhanji ne.
CHINUZHUKAINGA BYUBILO BIMWESHA KUBULA KUNEMEKA BAKAZHI BENU
6. Yehoba umvwa byepi ku muchima pa banabalume bapuma bakazhi babo? (Kolose 3:19)
6 Kupumana. Yehoba washikwa muntu yense watemwa bukapondo. (Sala. 11:5) Yehoba wamwesha patoka’mba washikwa bingi banabalume bapuma bakazhi babo. (Mala. 2:16; tangai Kolose 3:19.) Kwesakana na kinembelo kya 1 Petelo 3:7 paimena uno mutwe, inge mwanamulume keabule kulama bulongo mukazhanji, bulunda bwanji ne Yehoba bwikala mu kizumba. Kabiji Yehoba kechi wakonsha kuteleka ku milombelo yanji ne.
7. Kwesakana na Efisesa 4:31, 32, banabalume basongola bafwainwa kuchinuzhuka ñambilo ya mutundu ka? (Monai ne “Kulumbulula Byambo.”)
7 Kwamba byambo byatama. Banabalume bamo bapachila bakazhi babo ne kwibambila byambo byatama. Pano bino, Yehoba washikwa “bukaji, kubwazanga ne mwenga.” c (Tangai Efisesa 4:31, 32.) Yehoba umona byonse byo boba. Jishinda mwanamulume jo ambilamo ku mukazhanji nangwatu inge baji kwa bunke, janema bingi kwi Yehoba. Mwanamulume wamba na bukaji ku mukazhanji kechi onaunatu masongola anji ne, bino onauna ne bulunda bwanji ne Lesa.—Yako. 1:26.
8. Yehoba umona byepi kutamba bya mulekese, kabiji mambo ka?
8 Kutamba bya mulekese. Yehoba umona byepi kutamba bya mulekese? Wikushikwa bingi. Onkao mambo, mwanamulume wasongola utamba bipikichala bya bunya, onauna bulunda bwanji ne Yehoba ne kulengesha bumvu mukazhanji. d Yehoba ukeba mwanamulume kutwajijila kwikala wa kishinka ku mukazhanji, kechi mu byubilo byonka ne, bino ne mu milanguluko. Yesu waambile’mba mwanamulume utajisha mwanamukazhi mukwabo kya kuba watendeka kumukumbwa wauba nanji kala bulalelale “mu muchima wanji.” e—Mat. 5:28, 29.
9. Mambo ka Yehoba o ashikilwa mwanamulume kukanjikizha mukazhanji kulaala nanji?
9 Kumukanjikizha kwilaala nanji. Banabalume bamo bakanjikizha bakazhi babo kwilaala mu jishinda jatama jilengela mwanamukazhi kumvwa nobe kechi wanema ne. Yehoba washikwa byubilo bya uno mutundu bimwesha kubula kulangulukilako mukwenu wa mu masongola. Yehoba ukeba mwanamulume kutemwa ne kulama bulongo mukazhanji ne kunemeka byo omvwa ku muchima. (Efi. 5:28, 29) Pano kyakonsha kwikala byepi inge mwanamulume mwina Kilishitu ukanjikizha mukazhanji kwilaala nanji nangwa utamba bya mulekese? Wakonsha kupimpula byepi ndangulukilo ne byubilo byanji?
MWANAMULUME WASONGOLA BYO AFWAINWA KULEKA BYUBILO BYATAMA
10. Banabalume basongola bakonsha kufunjilako ka ku byaubanga Yesu?
10 Ñanyi bintu byakonsha kukwasha mwanamulume wasongola kuleka byubilo byanji byatama? Wafwainwa kulondela byaubanga Yesu. Nangwa kya kuba Yesu kechi wasongwele ne, bino jishinda jo alaminangamo baana banji ba bwanga jimwesha banabalume basongola byo bafwainwa kulamanga bakazhi babo. (Efi. 5:25) Akilangulukai pa banabalume basongola byo bafwainwa kufunjilako kwi Yesu byo aubanga na batumwa banji ne jishinda jo esambilangamo nabo.
11. Yesu walamanga byepi batumwa banji?
11 Yesu walamanga batumwa banji na kifyele ne kwibanemeka. Kechi wibashintaukilanga nangwa kwibambila byambo byatama ne. Nangwa kya kuba wajinga Nkambo yabo, Yesu kechi wakebanga kwimwesha’mba uji na bulume kwibakila ne. Pakuba wipelwile ne kwibengijila. (Yoa. 13:12-17) Waambijile baana banji ba bwanga amba: ‘Fundai kwi amiwa, mambo nekimote kabiji nakooka muchima, ne anweba mukakokoloka.’ (Mat. 11:28-30) Bino byambo byamwesha’mba Yesu wajinga wakooka muchima. Kukooka muchima kechi kulumbulula’mba muntu wazenzalala ne. Bino kulumbulula kwikala na muchima wa kwikanya. Muntu wa uno mutundu inge bamuzhingijisha, utwajijila kutekanya ne kwikanya.
12. Yesu waambanga byepi na bakwabo?
12 Byambo bya kwa Yesu byatekeneshanga ne kukokolosha bakwabo. Kechi washintaukilanga baana banji ba bwanga ne. (Luka 8:47, 48) Nangwatu kimye balwanyi banji kyo bamwambijilenga mwenga pa kuba’mba bamuzhingijishe, “kechi wibobilenga mwenga ne.” (1 Pe. 2:21-23) Pa bimye bimo, Yesu wafuukwilepo kuzhindamatu nzoo pa kuba’mba abule kukumbula na bukaji. (Mat. 27:12-14) Banabalume bena Kilishitu basongola bafwainwa kufunjilako ku byaubile Yesu.
13. Byonka byaamba Mateo 19:4-6, mwanamulume wasongola wakonsha ‘kulamachila byepi ku mukazhanji’? (Monai ne kipikichala.)
13 Yesu wafunjishe banabalume basongola kuba’mba bafwainwa kutwajijila kwikala ba kishinka ku bakazhi babo. Waingijishe byambo byaambile Shanji kuba’mba mwanamulume wasongola wafwainwa “kulamachila ku mukazhanji.” (Tangai Mateo 19:4-6.) Kyambo kya Kingiliki kyo baingijisha pa kino kyepelo kya kuba’mba “kulamachila” kilumbulula bintu bibiji byo balamika pamo. Onkao mambo, butemwe buji pakachi ka mwanamulume ne mwanamukazhi bwafwainwa kukosa bingi ubatu nobe bintu bibiji byo balamika pamo. Inge umo wauba kintu kyakonsha kukozha mukwabo ku muchima, ko kuba’mba bonse babiji bakayanjilamo. Mwanamulume watemwa bingi mukazhanji uchinuzhuka kutamba bya mulekese byonse. Wafwainwa ponkapotu kukana “kutala ku bintu byatutu.” (Sala. 119:37) Kuba bino kijitu nobe walayañana na meso anji kuba’mba kechi ukatala mwanamukazhi mukwabo kya kuba keamukumbwe ne, kanatu mukazhanji.—Yoba 31:1.
Mwanamulume wasongola wakishinka kechi utamba bya mulekese ne (Monai jifuka 13) g
14. Ñanyi bintu byafwainwa kuba mwanamulume wasongola umanyika mukazhanji pa kuba’mba awamishe bulunda bwanji ne Yehoba ne na mukazhanji?
14 Mwanamulume upuma ne kwambila byambo byatama mukazhanji wafwainwa kuba bintu byavula pa kuba’mba awamishe bulunda bwanji ne Yehoba ne na mukazhanji. Ñanyi bintu byo afwainwa kuba? Kitanshi, wafwainwa kuyuka’mba uji na lukatazho lukatampe. Yehoba umona byonse byo oba. (Sala. 44:21; Sapwi. 12:14; Hebe. 4:13) Kya bubiji, wafwainwa kuleka kumanyika mukazhanji ne kupimpula byubilo byanji. (Maana 28:13) Kya busatu, wafwainwa kulomba lulekelo lwa mambo ku mukazhanji ne kwi Yehoba. (Byu. 3:19) Kabiji wafwainwa kulomba kwi Yehoba kumukwasha kupimpula byubilo byanji, milanguluko ne ñambilo. (Sala. 51:10-12; 2 Ko. 10:5; Fili. 2:13) Kya buna, wafwainwa kubila monka mwayila milombelo yanji, ko kuba’mba kushikwa bukapondo ne ñambilo yatama. (Sala. 97:10) Kya butanu, wafwainwa kukeba bukwasho ku bakafunga mu kipwilo. (Yako. 5:14-16) Kya butanu na kamo, wafwainwa kulanguluka pa byo afwainwa kuba pa kuba’mba akabule kubwezhapo bintu byatama byo aubile. Mwanamulume utamba bya mulekese naye wafwainwa kuba bino bintu bitanu na kamo. Yehoba ukamukwasha kupimpula byubilo byanji. (Sala. 37:5) Pano bino, mwanamulume wasongola kechi wafwainwa kupelelatu pa kuleka kuba byubilo byanji byatama ne. Wafwainwa ne kufunda kunemeka mukazhanji. Pano wakonsha kuba byepi bino?
BYO MWAFWAINWA KUNEMEKA BAKAZHI BENU
15. Mwanamulume wakonsha kumwesha byepi amba watemwa mukazhanji?
15 Bamweshainga butemwe. Balongo bamo basongola boba bintu pa juba pa juba bimwesha’mba batemwa bakazhi babo. (1 Yoa. 3:18) Mwanamulume wakonsha kumwesha’mba watemwa mukazhanji mu bintu bicheche nabiji kumukwata ku maboko nangwa kumukumbata. Kabiji inge wafumapo wakonsha kumutumina tubyambo pa foni twa kuba’mba “Nemutonga bingi” nangwa twa kuba’mba “Mwaingila byepi?” Pa kimye ne pa kimye, wafwainwa kumweshanga amba wamutemwa kupichila mu kumupa tu bikachi paji byambo byawama. Inge mwanamulume wasongola keobe bino, ukamwesha mukazhanji amba wamunemeka kabiji ukakosesha masongola anji.
16. Mambo ka mwanamulume o afwainwa kusanchilanga mukazhanji?
16 Basanchilainga. Mwanamulume watemwa mukazhanji umuta muchima ne kumutundaika. Jishinda jimo mo obila bino ke kumusanchila pa bintu byonse byo amubila. (Kolo. 3:15) Inge mwanamulume keasanchile mukazhanji kufuma panshi ya muchima, umusangajika bingi. Kabiji mukazhanji ukayuka’mba mwatawanji wamutemwa ne kumunemeka.—Maana 31:28.
17. Mwanamulume wakonsha kumwesha byepi amba wanemeka mukazhanji?
17 Bamweshainga lusa ne kwibanemeka. Mwanamulume watemwa mukazhanji umunemeka ne kumubila byawama. Umumona’mba bupe bwanema bwafuma kwi Yehoba. (Maana 18:22; 31:10) Onkao mambo, umumwesha lusa ne kumunemeka nangwatu pa kimye kyo babena kwilaala. Kechi wafwainwa kumukanjikizha kwilaala nanji mu jishinda jabula kufwainwa jakonsha kulengela jiwi janji ja mu muchima kumukatazha ne. f Kabiji mwanamulume naye kechi wafwainwa kuba bintu byakonsha kumulengela kwikala na jiwi ja mu muchima jatama ne.—Byu. 24:16.
18. Banabalume bafwainwa kwibikangako kuba ka? (Monai ne kakitenguluzha ka kuba’mba “ Mashinda ana Akonsha Kukwasha Mwanamulume Kunemeka Mukazhanji.”)
18 Anweba banabalume, yukai’mba Yehoba umona ne kwimusanchila pa byo mwibikako kunemeka bakazhi benu mu bintu byonse byo muba mu bwikalo bwenu. Ibikaingako kwibanemeka kimye kyonse kupichila mu kubula kuba bintu byakonsha kwibafichisha ku muchima. Kabiji mwafwainwa kwibanemekanga, kwibamwesha kifyele ne kwibobila bintu bimwesha’mba mwibatemwa. Inge kemube bino, mukamwesha’mba mwibatemwa ne kwibanemeka. Inge kemunemeke bakazhi benu mukekala na bulunda bwawama ne Yehoba.—Sala. 25:14.
LWIMBO 131 “Akya Kyasambakanya Lesa”
a Banabalume bafwainwa kutanga mutwe wa kuba’mba “Nanchi Mumona Banabakazhi Byonka Yehoba byo Ebamona Nyi?” uji mu Kyamba kya Usopa kya January 2024.
b Aba bo bayanjisha mu mazubo bafwainwa kutanga mutwe wa kuba’mba“Help for Victims of Domestic Abuse” uji pa jw.org po banemba’mba “Bibaaba Byalondankana,” pa kipungu kya kuba’mba “Mitwe Ikwabo.” Pa JW Library® yai po banemba’mba Libyary, Article Series, Mitwe Ikwabo.
c KULUMBULULA BYAMBO: “Ñambilo yatama” yavwangamo kwambila muntu byambo byatama bya mwenga ne kutwajijila kwamba pa bintu byo washikwa mu yewo muntu. Onkao mambo, ñambilo yatama ke byambo byatama bikozha ku muchima mwanamulume wasongola byo akonsha kwambila mukazhanji.
d Monai mutwe wa kuba’mba “Pornography Can Shatter Your Marriage” uji pa jw.org ne mu JW Library.
e Mwanamukazhi wasongolwa ku mwanamulume utamba bya mulekese wafwainwa kutanga mutwe wa kuba’mba “Umvwe Mwina Kwenu Watamba bya Mulekese” uji mu Kyamba kya Usopa kya August 2023.
f Baibolo kechi waambapo pa kwilaala kwawama ne kwatama inge mwanamulume ne mwanamukazhi besongola basambakana ne. Bena Kilishitu bonse baji mu masongola bafwainwa kufuukulapo bulongo pa kuba’mba batumbijike Yehoba, kwisangajika ne kwikala na jiwi ja mu muchima jawama. Bamulume ne mukazhi kechi bafwainwa kwisambanga na bakwabo pa bino bintu bya bumfyamfya byubiwa mu masongola abo ne.
g KULUMBULULA KIPIKICHALA: Mulongo babena kumwambila kutala pa bipikichala bya mulekese biji mu magazini ku mukwabo wabula Kamonyi mo bengijila.
