1. Ñanyi kintu Yehoba kyo aubile aku Adama ne Evwa balengatu mambo? (Ntendekelo 3:15)

 AKU Adama ne Evwa balengatu mambo, Yehoba watekeneshe baana banji kwingijisha bungauzhi butanwa pa Ntendekelo 3:15.—Tangai.

2. Buno bungauzhi bwanemena ka?

² Buno bo bungauzhi butanshi buji mu Baibolo. Buno bungauzhi buji mu buku mutanshi wa mu Baibolo bebwambapo ne mu bungauzhi buji mu mabuku akwabo a mu Baibolo. Byonkatu gulu byo alamankanya mapepala pamo, ne byambo biji pa Ntendekelo 3:15 bikwatankanya byambo biji mu mabuku onse aji mu Baibolo mambo byambatu pa kintu kimo nabiji, byambo bya kuba’mba Mupokolweshi bakamutuma kwiya na konauna Diabola ne bangubabibi bonse. * Kino kiketusangajika bingi atweba bonse batemwa Yehoba.

3. Ñanyi bintu byo tusakwisambapo mu uno mutwe?

³ Mu uno mutwe, tusakukumbula ano mepuzho aamba pa bungauzhi butanwa pa Ntendekelo 3:15. Bañanyi batongolwa mu buno bungauzhi? Buno bungauzhi bukafika byepi? Kabiji ñanyi bintu byo tubena kumwenamo mu buno bungauzhi?

4. “Muloolo” ye ñanyi, kabiji twayuka byepi bino?

⁴ Pa Ntendekelo 3:14, 15 batongolapo “muloolo,” “mwana  wa muloolo,” “mwanamukazhi,” ne “mwana wa mwanamukazhi.” Baibolo witukwasha kuyuka bano bonse. * Twayai tutatwilepo kwamba pa “muloolo.” Muloolo kechi wakonsha kukwatakanya byambo byaambile Yehoba mu bujimi bwa Edena ne. Onkao mambo, kilengwa Yehoba kyo azhachishe, ke kilengwa kya mupashi. Nanchi Yehoba waambilenga ne ñanyi? Lumwekesho 12:9 waambatu patoka kilengwa kyo azhachishe kabiji kyo aambilenga nakyo. Uno “muloolo wa kala” ke Satana Diabola. Pano mwana wa muloolo ye ñanyi?

5. Bañanyi bemenako mwana wa muloolo?

⁵ Baibolo kimo kimye wingijisha kyambo kya kuba’mba mwana mu bukifwanyikizho. Uno mwana wa muloolo ye batongola pa Ntendekelo 3:15 wimenako bilengwa bya mupashi ne bantu boba bintu Yehoba byo ashikwa kabiji bamanyika bantu banji. Bano bantu boba bino bebatela‘mba baana ba kwa Satana mambo boba bintu byo oba. Bano bavwangamo ne bamalaika basatukile ne kusha bifulo byabo mwiulu mu kimye kya kwa Nowa, ne bangubabibi boba bintu byatama byubapo shabo aye Diabola.—Nte. 6:1, 2; Yoa. 8:44; 1 Yoa. 5:19; Yuda 6.

6. Mambo ka o twaambila kuba’mba uno “mwanamukazhi” ye baambapo pano kechi Evwa ne?

⁶ Pano twayai twisambe pa “mwanamukazhi.” Uno mwanamukazhi kechi Evwa ne. Mambo ka? Mambo bungauzhi bwaamba’mba mwana wa mwanamukazhi “ukafumpa” mutwe wa muloolo. Byonkatu byo twaji kwambapo kala, muloolo wimenako kilengwa kya mupashi aye Satana. Onkao mambo, kafwako muntu  mbulwakulumbuluka mwana wa kwa Evwa wafwainwa kumufumpa ne. Pano Satana bakonsha kumwipaya byepi?

7. Kwesakana na byaamba Lumwekesho 12:1, 2, 5, 10, mwanamukazhi ye baambapo pa Ntendekelo 3:15 ye ñanyi?

⁷ Buku wa Lumwekesho walumbulula bulongo mwanamukazhi ye baambapo pa kinembelo kya Ntendekelo 3:15. (Tangai Lumwekesho 12:1, 2, 5, 10.) Uno mwanamukazhi, kechi wa pano pa ntanda ne. Uno mwanamukazhi wajinga na ñondo ku maulu anji kabiji wajinga ne na munchinya wa tubangabanga 12 ku mutwe wanji. Kabiji uno mwanamukazhi wasemene mwana ko kuba’mba Bufumu bwa Lesa. Buno Bufumu buji mwiulu, ne mwanamukazhi naye uji mwiulu. Uno mwanamukazhi wimenako jibumba ja Yehoba ja mwiulu. Kabiji mu jino jibumba muji bilengwa bya mupashi bya kishinka.—Nga. 4:26.

8. Mwana mutanshi wa mwanamukazhi ye ñanyi, kabiji waikele mwana ñanyi kimye? (Ntendekelo 22:15-18)

⁸ Kabiji Mambo a Lesa etukwasha kuyuka mwana wa mwanamukazhi. Uno mwana wafumine mu kisemi kya kwa Abalahama. (Tangai Ntendekelo 22:15-18.) Buno bungauzhi bumwesha’mba kine Yesu wafumine mu kisemi kya muntu wa kishinka aye Abalahama. (Luka 3:23, 34) Nangwa byonkabyo, uno mwana wafwainwe kwikala na bulume bwakila bwa bantu mambo ye ukakonsha konauna Satana Diabola. Onkao mambo, Yesu byo afikizhe myaka 30 ya kusemwa, washingilwe na mupashi wazhila ne kutendeka kutelwa’mba Mwana Lesa. Panyuma ya kushingwa, Yesu waikele mwana wa mwanamukazhi mutanshi. (Nga. 3:16) Yesu byo bamusangwiletu, Lesa “wamuvwikile lukumo ne buneme” kabiji bamupeele “luusa lonse pa bintu bya mwiulu ne bya panopantanda.” Kunungapo, bamupeele luusa lwa “konauna mingilo ya kwa Diabola.”—Hebe. 2:7; Mat. 28:18; 1 Yoa. 3:8.

9-10. (a) Nga baana ba mwanamukazhi bakwabo bo bañanyi, kabiji bekala baana ñanyi kimye? (b) Kabiji ñanyi bintu byo tusakwisambapo?

⁹ Bino kuji ne baana bakwabo ba mwanamukazhi. Mutumwa Paulo waambilepo pa bano baana bakwabo kimye kyo aambilenga ku Bayudea ne bena Kilishitu bashingwa ba mu bisaka bikwabo’mba: “Umvwe mwi ba kwa Kilishitu, mwi baana ba kwa Abalahama, banswanyi ba monka mwayila mulaye.” (Nga. 3:28, 29) Inge Yehoba washinga mwina Kilishitu na mupashi wazhila wikala mwana wa mwanamukazhi. Onkao mambo, mwana wa mwanamukazhi ke Yesu Kilishitu ne ba 144,000 bakalamanga pamo ne Kilishitu. (Lum. 14:1) Bano bebikako kulanguluka ne kuba bintu byonka byuba Shabo aye Yehoba Lesa.

¹⁰ Pano byo twayuka bantu bo batongola pa Ntendekelo 3:15, twayai tufunde pa bintu Yehoba byo afikizha kala ne byo byafwainwa kwitukwasha lelo jino.

11. Mwana wa mwanamukazhi bamusumine byepi “ku kashiko”?

¹¹ Bungauzhi buji pa Ntendekelo 3:15 bwaambile’mba muloolo ukasuma “ku kashiko” ka mwana wa mwanamukazhi. Satana waubile bino kimye kyo aingijishe Bayudea ne bena Loma kwipaya mwana Lesa. (Luka 23:13, 20-24) Byonkatu byo kikala inge muntu wamokoka uleka kwenda, kyo kimotu ne Yesu naye byo bamwipayile kyajingatu nobe waleka kwenda. Mambo wafwile ne kwikala mu kilende moba asatu.—Mat. 16:21.

12. Muloolo bakamufumpa byepi ku mutwe, kabiji ñanyi kimye?

¹² Bungauzhi buji pa Ntendekelo 3:15 bwamwesheshe kuba’mba Yesu kechi ukatwajijila  kwikala mu kilende ne. Mambo ka? Mambo bungauzhi bwaamba’mba mwana wa mwanamukazhi ukafumpa muloolo ku mutwe. Kino kibena kulumbulula kuba’mba Yesu bafwainwe kumusangula. Ne kyakine byo papichile moba asatu Yesu bamusangwile ne kwikala na bumi bwa mwiulu bwa kubula kufwa. Kulutwe na lwendo, Yesu ukamonauna Satana. (Hebe. 2:14) Kabiji Kilishitu ne bo akalamanga nabo, bakonauna balwanyi ba Lesa bonse baji pano pa ntanda ko kuba’mba mwana wa muloolo.—Lum. 17:14; 20:4, 10. *

13. Ñanyi bintu byo tubena kumwenamo mu kufika kwa buno bungauzhi?

¹³ Inge mwipana kwingijila Lesa ko kuba’mba mubena kumwenamo mu kufika kwa buno bungauzhi. Yesu byo aishile pano pa ntanda, wamwesheshetu sukasuka byubilo bijipo ne Shanji. (Yoa. 14:9) Kufunda pe Yesu kwitulengela kumuyuka bulongo Yehoba Lesa ne kumutemwa bingi. Twamwenamo mu byafunjishe Yesu ne byo atangijila kipwilo kya bena Kilishitu lelo jino. Witufunjisha ne byo twakonsha kuba pa kuba’mba tutokeshe Yehoba ku muchima. Kabiji twamwenamo bingi na mambo a kuba’mba Yesu bamusumine ku kashiko nangwa’mba wafwile. Yesu byo afwile, Yehoba wamusangwile kabiji mashi a kwa Yesu aikele mulambo wa ‘kwitutokesha ku bundengamambo bonse.’—1 Yoa. 1:7.

14. Twayuka byepi kuba’mba bungauzhi bwaambile Yehoba mu Edena kechi bwafikile pa kyonkakya kimye ne? Lumbululai.

¹⁴ Byambo byaambile Yehoba mu bungauzhi mu bujimi bwa Edena byamwesheshe kuba’mba kechi bikafika pa kyonkakya kimye ne. Byamwesheshenga’mba pakapita kimye kyabaya pa kuba’mba mwanamukazhi akaseme mwana, Diabola akekale na bantu banji ne pa kuba’mba bulwanyi bukamweke pa ano mabumba abiji. Kuyuka buno bungauzhi kwitukwasha kuyuka kuba’mba bantu ba mu ino ntanda babena kutangijilwa na Satana bashikwa bapopweshi ba Yehoba. Kabiji palutwe kacheche, Yesu naye wajimwineko baana banji ba bwanga pa kino. (Mako 13:13; Yoa. 17:14) Twimwena kufika kutanshi kwa buno bungauzhi kikatakata pa myaka 100 yapitapo. Pano bwafika byepi?

15. Mambo ka bantu ba mu ino ntanda o batwajijila na kushikwa bantu ba Lesa, kabiji mambo ka o twafwainwa kubujila kuchiina Satana?

¹⁵ Yesu byo bamwikajikile pa Bufumu bwa Bumesiasa mu 1914, Satana bamupangilemo mwiulu. Luno ujitu pano pa ntanda kabiji ubena kupembelela kumonauna. (Lum. 12:9, 12) Pano bino, kechi waikalatu na kupembelela kuba’mba bamonaune ne. Satana waakamwa bingi kabiji wazhingila o ene mambo o azhingijila bantu ba Lesa. (Lum. 12:13, 17) Kino kyalengela bantu ba mu ino ntanda kutwajijila na kumanyika bantu ba Lesa. Nangwa byonkabyo, kechi twafwainwa kuchiinanga Satana ne bantu banji ne. Pakuba twafwainwa kushiinwa na byambo byaambile mutumwa Paulo bya kuba’mba: “Umvwe Lesa uji ne atweba, ñanyi uketushinda?” (Loma 8:31) Twafwainwa kwikala na lwitabilo lwakosa mwi Yehoba mambo twimwena kufika kwa bungauzhi buji pa Ntendekelo 3:15.

16-18. Ba Curtis, ba Ursula ne ba Jessica bamwenamo byepi mu kumvwisha bungauzhi buji pa Ntendekelo 3:15?

¹⁶ Mulaye wa Yehoba uji pa Ntendekelo 3:15 wakonsha kwitukwasha kuchinchika makatazho  onse o twakonsha kupitamo. Ba Curtis bengila mwingilo wa bumishonale mu Guam baambile’mba: “Bimye bimo mpita mu meseko eseka bukishinka bwami kwi Yehoba. Pano bino kulanguluka languluka pa bungauzhi buji pa Ntendekelo 3:15 kwankwasha kuketekela mwi shetu wa mwiulu.” Ba Curtis batengela juba Yehoba jo akapwisha makatazho onse o tupitamo.

¹⁷ Nyenga aye Ursula wikala ku Bavaria waambile’mba kuyuka bungauzhi buji pa Ntendekelo 3:15 kwamukwashishe kushiinwa’mba Baibolo kine mambo a Lesa. Kabiji wayukile kuba’mba bungauzhi bonse buji mu Baibolo bwaimena pa buno bungauzhi, kino kyamuletejile bingi lusekelo. Kabiji wanungapo’mba: “Nafunjile kuba’mba Yehoba waubilepo kintu kimo kitulengela kwikala na luketekelo kabiji kino kyandengejile kumutemwa bingi.”

¹⁸ Ba Jessica bekala ku Micronesia baambile’mba: “Ne luno nkivuluka byo naumvwine ku muchima kimye kitanshi kyo nafunjile bukine. Bungauzhi buji pa Ntendekelo 3:15 bwatendekele kufika. Kino kyandengela kuyuka kuba’mba Yehoba kechi wakebelenga’mba tupitenga mu ano makatazho ne. Kabiji bwandengela kuyuka’mba mu kwingijila Yehoba mufuma bintu byawama bitulengela kwikala na lusekelo mu bwikalo bwetu luno.”

19. Ñanyi bintu bitulengela kushiinwa’mba lubaji lwapelako lwa bungauzhi buji pa Ntendekelo 3:15 lukafika?

¹⁹ Twamona kuba’mba bungauzhi buji pa Ntendekelo 3:15 bubena kufika. Mwana wa mwanamukazhi ne mwana wa muloolo, bonse bayukanyikwa. Mwana mutanshi wa mwanamukazhi aye Yesu, ye basumine ku kashiko watumbijikwa ne kwikala Mfumu ukabula kufwa. Luno bavula bakaya na kulama pamo ne Yesu mwiulu Yehoba wibasala kala. Na mambo a kuba’mba lubaji lutanshi lwa buno bungauzhi lwafika kala, twashiinwa kuba’mba ne lubaji lwapelako lwa buno bungauzhi ko kuba’mba kufumpa muloolo kumutwe nalo lukafika. Bantu ba Lesa bakekala bingi na lusekelo byo bakamonauna Satana. Byo tubena kupembelela kufika kwa buno bungauzhi, kange tubwele panyuma ne. Twafwainwa kutwajijila kuketekela Lesa. Yehoba ukengijisha mwana wa mwanamukazhi kupesha “bisaka byonse bya bantu.”—Nte. 22:18.