1. Ñanyi kintu Yehoba kyo abena kukeba lelo jino?

 LELO jino Lesa ubena kukeba’mba mambo awama a Bufumu asapwilwe pano pa ntanda ponse. (Mako 13:10; 1 Timo. 2:3, 4) Uno ke mwingilo wa Yehoba kabiji watongola Mwananji ye atemwa bingi kutangijila uno mwingilo wanema. Na mambo a kuba’mba Yesu ubena kwitutangijila, twafwainwa kushiinwa’mba mwingilo wa kusapwila tukamwingila kwesakana na byonka bikeba Yehoba mpelo saka ikyangye kufika.—Mat. 24:14.

2. Ñanyi bintu byo tusakwisambapo mu uno mutwe?

² Mu uno mutwe tusakumona Yesu byo abena kwingijisha “kalume wa kishinka kabiji wa maana” kwitunengezhezha kajo ka ku mupashi ne byo akwasha bakalume banji pa kuba’mba bengile mwingilo wa kusapwila. (Mat. 24:45) Kabiji tusakumona atweba bonse pa muntu pa muntu byo twafwainwa kuba pa kuba’mba tutundaikenga Yesu ne kalume wa kishinka.

3. Ñanyi luusa lo bapa Yesu?

³ Yesu ye ubena kutangijila mwingilo wa kusapwila. Twayuka byepi bino? Yesu saka akyangye kuya mwiulu wamonañene na baana banji ba bwanga bakishinka pa mutumba mu Ngalilea. Wibambijile’mba: “Lesa wampa luusa lonse pa bintu bya mwiulu ne bya pano pa ntanda.” Pano monai byambo byalondelapo byo aambile bya kuba’mba: “Yainga na kufunjisha bantu ba mu bisaka byonse bya bantu kwikala ke baana bami ba bwanga.” (Mat. 28:18, 19) Onkao mambo, Yesu bamupeele luusa lwa kutangijila mwingilo wa kusapwila.

4. Twakonsha kushiinwa byepi kuba’mba Yesu ye ubena kutangijila mwingilo wa kusapwila?

 ⁴ Yesu waambile’mba mwingilo wa kusapwila ne kufunjisha bantu kwikala baana ba bwanga bakamwingila “mu bisaka byonse bya bantu” kabiji amba ukekala na baana banji ba bwanga “moba onse kukafikatu ne ku mpelo ya buno bwikalo.” (Mat. 28:20) Bino byambo bimwesha patoka kuba’mba Yesu ubena kutangijila mwingilo wa kusapwila kufikatu ne mu ano moba.

5. Twakonsha kukwasha byepi kufikizha bungauzhi buji pa Salamo 110:3?

⁵ Yesu kechi waakaminwe kuba’mba bamingilo bakakepa mu kimye kya ku mpelo ya buno bwikalo ne. Wayukile’mba byambo bya bungauzhi byaambile nyimbi wa masalamo bikafika. Uno nyimbi wa masalamo waambile’mba: “Bantu bobe bakepana na muchima yense mu juba ja bulume bobe.” (Sala. 110:3) Umvwe mubena kwingilako mwingilo wa kusapwila, ko kuba’mba mubena kutundaika Yesu ne kalume wa kishinka kabiji mubena kufikizha buno bungauzhi. Nangwa kyakuba kuji makatazho, bino mwingilo wa kusapwila watwajijila.

6. Ñanyi lukatazho lumo lubena kupitamo basapwishi ba Bufumu lelo jino?

⁶ Lukatazho lumo lupitamo basapwishi ba Bufumu ke kwibakanya. Bantu basenduka mu lwitabilo, bantangi ba bupopweshi ne bamulwila ntanda bamba bya bubela pa mwingilo wetu. Umvwe balongo betu, balunda netu ne bantu bo twingila nabo baumvwina buno bubela, bakonsha kutendeka kwitukanya kwingijila Yehoba ne kusapwila. Mu byalo bimo, balwanyi betu bakanya, balukuka ne kukwata balongo betu ne banyenga ne kwibakasa mu kaleya. Kechi tukumya pa bino ne. Mambo Yesu waambijile jimo kuba’mba: “Bakemushikwa ku bisaka byonse bya bantu na mambo a jizhina jami.” (Mat. 24:9) Kishinka kya kuba’mba betushikwa ku bantu bonse kimweshatu kuba’mba twaitabilwa kwi Yehoba. (Mat. 5:11, 12) Diabola ye ulengela kuba’mba bantu betumanyikenga. Nangwa byonkabyo, Yesu uji na bulume kukila Satana. Na mambo a bukwasho bwa kwa Yesu, mambo awama abena kusapwilwa ku bisaka byonse bya bantu. Akilangulukai pa bino bishinka.

7. Ñanyi bishinka bibena kumwesha kuba’mba bungauzhi buji pa Lumwekesho 14:6, 7 bubena kufika?

⁷ Lukatazho lukwabo lo twikala nalo mu mwingilo wa kusapwila ke lwa kuba’mba tutaana bantu bavula bamba milaka yapusana pusana. Mu Lumwekesho lo bapeele mutumwa Yoano, Yesu waambile kuba’mba mu ano moba mambo awama bakeasapwila kechi na mambo a milaka ya bantu ne. (Tangai Lumwekesho 14:6, 7.) Mu ñanyi jishinda? Tubena kusapwila ku bantu bavula bingi pa kuba’mba twibakwashe kumvwa mambo awama a Bufumu. Lelo jino bantu mwaya ntanda yonse batanga mabuku etu alumbulula Baibolo aji pa keyala wetu wa jw.org mambo aji mu milaka kukila 1,000. Jibumba Jitangijila jaswishishe kutuntulula buku wa kuba’mba Mukekala Myaka ne Myaka! ye tubena kwingijisha kufunjishamo bantu kwikala baana ba bwanga. Uno buku bamutuntulula mu milaka kukila 700. Kabiji mabuku alumbulula Baibolo beatuntulula mu mulaka wa kwingijisha maboko wa bashinka matwi ne mu mulaka utanga bampofu. Tubena kumona buno bungauzhi bwa mu Baibolo byo bubena kufika. Bantu “bafuma mu milaka yonse ya bisaka bya bantu” babena kufunda “mulaka wawama” wa bukine buji mu Baibolo. (Zeka. 8:23; Zefwa. 3:9) Abino byonse bibena kumweka na mambo a kuba’mba Yesu Kilishitu ye ubena kutangijila.

8. Ñanyi bintu bibena kufuma mu mwingilo wetu wa kusapwila?

⁸ Lelo jino bantu kukila 8,000,000 mu byalo 240 bo baji mu jibumba ja Yehoba kabiji  pa mwaka pa mwaka, bantu bavula babatizhiwa. Kintu kyanema ke kumona baana ba bwanga byo babena kupimpula byubilo byabo ne kwikala na byubilo bya bwina Kilishitu ko kuba’mba “bumuntu bupya.” (Kolo. 3:8-10) Bavula basankilapo byubilo byatama nabiji bukapondo, misalululo ne kutemwa kyalo kyabo. Bungauzhi buji pa Isaya 2:4 bubena kufika mambo bantu ‘kechi babena kufunda kulwa nkondo ne.’ Umvwe ke twibikeko kuvwala bumuntu bupya, tukwasha bantu kwiya mu jibumba ja Lesa kabiji tumwesha’mba tubena kulondela ntangi wetu Kilishitu Yesu. (Yoa. 13:35; 1 Pe. 2:12) Abino byonse bibena kumweka na mambo a kuba’mba Yesu ubena kwitukwasha.

9. Kwesakana na Mateo 24:45-47, Yesu waambile’mba ñanyi bintu bikamweka mu kimye kya ku mpelo?

⁹ Tangai Mateo 24:45-47. Yesu waambijile jimo kuba’mba mu kimye kya ku mpelo ukatongola “kalume wa kishinka kabiji wa maana” kuba’mba akapanenga kajo ka ku mupashi. Uno kalume ubena kwingila bingi na ngovu mu ano moba. Yesu ubena kwingijisha jino jibumba jicheche ja banabalume bashingwa kupa bantu ba Lesa ne bantu bakeba kufunda bukine “kajo [ka ku mupashi] pa kimye kyafwainwa.” Bano banabalume kechi bemona’mba bankambo ba lwitabilo lwa bakwabo ne. (2 Ko. 1:24) Pakuba bayuka kuba’mba Yesu Kilishitu ye “ntangi wa kutangijila” bantu banji.—Isa. 55:4.

10. Ñanyi buku pa o bamwesha pa kipikichala wimukwashishe kutatula kwingijila Yehoba?

¹⁰ Kufumatu mu 1919, kalume wa kishinka wanengezha mabuku avula bingi akwasha bantu bakeba kufunda bukine bwa mu Mambo a Lesa. Mu 1921, kalume wanengezhezhe buku wa kizungu wa kuba’mba The Harp of God pa kuba’mba bakwashe bantu bakeba kufunda bukine kufunda mafunjisho atanshi a mu Baibolo. Pa kupitapo myaka, banengezhezhe mabuku  akwabo. Ñanyi buku wimukwashishe anweba kuyuka ne kutemwa Shetu wa mwiulu? Nanchi wajinga buku wa kuba’mba “Lesa Ekale wa Kine (Let God Be True),” Bukine Butangijila ku Bumi bwa Myaka ne Myaka (Truth That Leads to Eternal Life), Mwakonsha Kwikala Myaka ne Myaka mu Paladisa Pano Ntanda (You Can Live Forever in Paradise on Earth), Kuyuka Kutangijila ku Bumi Bwa Myaka, Nanchi Baibolo Kine Ufunjisha’mba Ka?, Nanchi Baibolo Waamba’mba Ka? nangwa buku wetu wa katataka wa kuba’mba Mukekala Myaka ne Myaka! nyi? Ano onse mabuku beanengezhezhe pa kuba’mba etukwashe kufunjisha bantu kwikala baana ba bwanga. Kabiji aingijile bingi bulongo pa kyokya kimye.

11. Mambo ka atweba bonse o twafwainwa kujiilanga kajo kakosa ka ku mupashi?

¹¹ Bantu baiya katataka mu bukine kechi bo bonka bafwainwa kuja kajo kakosa ka ku mupashi ne. Atweba bonse twafwainwa kuja kajo kakosa ka ku mupashi. Mutumwa Paulo wanembele’mba: “Kajo kakosa ko ka bantu bakoma.” Kabiji Paulo wanungilepo’mba kwingijisha byo tufunda mu Baibolo kwitukwasha “kuyuka kyawama ne kyatama.” (Hebe. 5:14) Na mambo a kuba’mba bantu baji mu ino ntanda baji na byubilo byatama bingi, kyakonsha kwitukatazha kukookela mizhilo ya Lesa. Nangwa byonkabyo, Yesu witukwasha kufunda bintu bitulengela kwikala na lwitabilo lwakosa. Tutambwila ino mizhilo kufuma mu Mambo a Lesa Baibolo. Yesu utangijila kalume wanji wa kishinka kunengezha ne kusampanya kano kajo ka ku mupashi.

12. Tumwesha byepi’mba tubena kutumbijika jizhina ja Lesa byonka byaubile Yesu?

¹² Byonka byaubile Yesu, ne atweba tutumbijika jizhina ja Lesa. (Yoa. 17:6, 26) Nabiji mu 1931, twatendekele kutelwa na jizhina ja mu Binembelo ja kuba’mba Bakamonyi ba kwa Yehoba. Jino jizhina jitulengela kuyukanyikwa’mba Yehoba ye Shetu.  (Isa. 43:10-12) Kabiji kufumatu mu uno yenka mwaka wa 1931 mu October, jizhina ja Lesa bejinemba pa nkupiko ya Kyamba kya Usopa. Kabiji Baibolo wa Binembelo bya Ntanda Ipya wabwezha jizhina ja Lesa ponka po jafwainwa kwikala. Nangwa byonkabyo, machechi avula a mu Kilishitendomu afumyamo jizhina ja Yehoba mu ma Baibolo avula o batuntulula.

13. Ñanyi kintu kimulengela kushiinwa kuba’mba Yesu ubena kwingijisha “kalume wa kishinka kabiji wa maana” lelo jino? (Yoa. 6:68)

¹³ Kwingijisha “kalume wa kishinka kabiji wa maana” Yesu walenga jibumba pano pa ntanda jibena kutundaika bupopweshi bwa kine. Mumvwa byepi pa kwikala mu jino jibumba? Kampe mwakonsha kukumbula byonka byakumbwile mutumwa Petelo pa kukumbula Yesu amba: “Tukaya kwi ñanyi? Anweba muji na byambo bipana bumi bwa myaka ne myaka.” (Yoa. 6:68) Atweba bonse lelo jino inge tuji kwepi umvwe kyakuba kechi twajinga mu jibumba ja Yehoba ne? Kilishitu ubena kwingijisha jino jibumba kwitupa bintu bitulengela kutwajijila kwikala bakishinka kwi Lesa. Witufunjisha byo twafwainwa kwingila bulongo mwingilo wa kusapwila. Kabiji witukwasha kuvwala “bumuntu bupya” pa kuba’mba tutokeshenga Yehoba ku muchima.—Efi. 4:24.

14. Ñanyi bintu byo mwamwenamo pa kwikala mu jibumba ja Yehoba mu kimye kya mwalo wa COVID-19?

¹⁴ Yesu witupa mikambizho yawama ne mu bimye bya malwa. Twimwena bino kufumatu kimye kyatendekele mwalo wa COVID-19. Bantu mu ino ntanda kechi bayukile bya kuba ne. Pakuba Yesu witupele mikambizho ya kwituzhikijila. Betukambizhe kuvwala bya pa kanwa inge tuji pa mvula bantu ne kwimena palepa na bantu. Bakulumpe mu kipwilo bebavulwilemo kwisambanga na basapwishi bonse mu kipwilo  pa kuba’mba bayuke bintu byo bafwainwa kwikala nabyo pa kuba’mba bezhikijile ne kwibakwasha kukosesha bulunda bwabo ne Lesa. (Isa. 32:1, 2) Kabiji mu masawakya a Jibumba Jitangijila betupelenga mikambizho ne kwitutundaika.

15. Ñanyi mikambizho yo twatambwijile mu kimye kya mwalo yaamba pa kupwila ne pa kusapwila, kabiji ñanyi bintu byawama byafuminemo?

¹⁵ Kabiji mu kimye kya mwalo, twatambwijile mikambizho ikwabo yaamba pa kupwila ne pa kusapwila. Ponkapotu, twatatwile kupwila kwa bwina Kilishitu, kubuñana ne kushonkena kwingijisha bintu nabiji makompyuta ne mafoni. Kabiji twatendekele kusapwila kwingijisha makalata ne mafoni. Yehoba witupesheshe pa kwibikako kwetu kabiji misampi yavula yatuma masawakya abena kumwesha kuvujilako kwa basapwishi. Mu kyonka kino kimye kya mwalo, bavula bashimikizhe bintu byawama byafuminemo mu mwingilo.—Monai kakitenguluzha ka kuba’mba “ Yehoba Wapesheshe Mwingilo Wetu wa Kusapwila.”

16. Nangwa kyakuba tubena kupita mu makatazho twafwainwa kushiinwa’mba ka?

¹⁶ Bamo balangulukilenga’mba jibumba ja Lesa jakizhamo kupaana mikambizho ya kwizhikijila ku mwalo wa COVID-19. Nangwa byonkabyo, pa kupitapo moba, bantu bashiinwe kuba’mba ino mikambizho yajingatu bulongo. (Mat. 11:19) Kabiji umvwe saka tulanguluka languluka pe Yesu byo abena kutangijila bantu banji, tushiinwa kuba’mba nangwa kyakuba bintu bikakatazhepotu byepi kulutwe, Yehoba ne Mwananji ye atemwa bakatwajijila kwitukwasha.—Tangai Bahebelu 13:5, 6.

17. Mumvwa byepi ku muchima kuyuka’mba Yesu ye ubena kwimutangijila?

¹⁷ Kituletela bingi lusekelo kuyuka’mba Yesu ye ntangi wetu. Tuji mu jibumba muji bantu bafuma mu bisho byapusana pusana, mu byalo byapusana pusana, kabiji baamba milaka yapusana pusana. Tutambwila mikambizho yavula ifuma mu Mambo a Lesa Baibolo kabiji tufunda bintu byavula bitukwasha kwingila bulongo mwingilo wa kusapwila. Atweba bonse pa muntu pa muntu tufunda byo twafwainwa kuvwala bumuntu bupya. Kabiji tufunda byo twafwainwa kwitemwanga atweba bene na bene. Tuji na bishinka byavula bingi bitulengela kwikala na lusekelo mambo Yesu ye ntangi wetu.