BANTU bavula bayuka jishimikila jaamba pe Yesu kuba’mba bamupopele pa kichi pamo na tupondo tubiji ne kufwila ponka. (Mat. 27:35-38) Nangwa byonkabyo, bantu bamo kechi baswa jishimikila ja mu Baibolo jaamba pe Yesu kuba’mba banengezhezhe mubiji wanji kuba’mba bamuzhiike ne kumubika mu kilende ne.—Mako 15:42-46.

Bantu bamo bakana byanembwa mu mabuku a mambo awama ana bazhinauka kuba’mba muntu wafwila pa kichi bafwainwe kumuzhiika bulongo nabiji kumuzhiika mu kilende. Bino abano bantu bakana bazhinauka’mba abano bantu bo baipayanga nobe tupondo bebazhiikanga mu jishinda japusanako. Ntapatwambo aye Ariel Sabar wanembele mu buku wanji wa Smithsonian amba “bangubabibi bebapopelanga pa kichi. Kabiji bashayuka bakwabo baambile’mba ke bumbulwa maana kuzhiika bulongo muntu wafwila pa kichi na mambo a byubilo byanji byatama. Bena Loma bakebanga kulengesha bumvu muntu wajinga na byubilo bya bumbanzhi.” Onkao mambo, mibiji ya bano bambanzhi beilekelanga pa kichi kuba’mba beije ku banyama. Pakuba bikupa byo byo bayanga na kuzhiika, abino bikupa nabyo kechi be bizhiikanganga ku bilende byawama ne.

Bapoya bya kupoyapoya baambapo byapusanako pa bikupa bya Bayudea bamo bo baipayile. Mu 1968 batulukile bikupa bya muntu umo ye baipayile kimye Yesu kyo ajingako pano pa ntanda. Bebitaine mu kilende kimo kyaikejile kwipi na Yelusalema kisemi kimo kya Bayudea mo kyazhiikanga bantu babo. Bino bikupa byajinga mu mbokoshi nangwa mu kibokoshi kyo babikangamo bikupa. Mu kino kibokoshi mwajinga ne kikupa kya ku kashiko. Kino kikupa bekipopejile ku jipulanga na musomali mukatampe walepa masentimita 11.5. Sabar waambile’mba “kano kashiko kajinga ka kwa Yehochanan” kalengejile bantu bapachika pa jishimikila ja byo bazhiikile Yesu jiji mu ma buka a mambo awama ana kuswa’mba byo baambapo mu ano ma buku bya kine. “Kano kashiko ka kwa Yehochanan kyajinga kishiino kya kuba’mba muntu ye baipayile pa kichi mu moba a kwa Yesu bena Loma baswishe kuba’mba bamuzhiike mu kilende kya Bayudea.”

Bantu bamba byapusana pusana pe Yesu byo bamupopele pa kichi na mambo a musomali ye bataine mu kashiko ka kwa Yehochanan. Nangwa byonkabyo, kino kyamwesha patoka kuba’mba mibiji ya tupondo tumo to baipailanga pa bichi kechi beitayangatu ne. Bino beinengezhanga bulongo ne kwiizhiika mu bilende. Onkao mambo, twafwainwa kwitabila byambo biji mu Baibolo byaamba pa mubiji wa kwa Yesu kuba’mba ba munengezhezhe bulongo ne kumuzhiika mu kilende kyawama bya kine. Kino kishinka kimwesha’mba byo baambapo mu Baibolo kechi bya bubela ne.

Kishinka kikwabo kyanema ke kya kuba’mba Yehoba waambijile jimo kuba’mba Yesu bakamuzhiika ko bazhiika banonshi kabiji kafwako wakonsha kulengela byambo bya Lesa kubula kufika ne.—Isa. 53:9; 55:11.