1. Mingilo ya Lesa beingila byepi kufumatu ne kala?

YEHOBA ne Yesu bakwatankana kufumatu ku ntendekelo ya kulengwa kwa bintu. Yehoba walengele Yesu saka akyangye kulenga bintu byonse. Onkao mambo, Yesu waingijilenga na Lesa kabiji wajinga “sendwe wanji.” (Byambo bya Maana 8:30) Bakalume ba Yehoba nabo bengijila pamo mingilo yonse yo bengila. Kya kumwenako, Nowa ne kisemi kyanji baingijile pamo kufiika bwato. Mu kuya kwa moba, bena Isalela baingijilenga pamo kulenga tente wa lusambakeno, kumufumya pa mpunzha imo, ne kumuvilwila ku mapunzha konse ko bayilenga. Pa nzubo ya Lesa, baimbilanga pamo ne kujizha bijimba pa kutota Yehoba na nyimbo yawama. Bantu ba Yehoba baubanga bino bintu byonse mambo baingijilanga pamo.—Ntendekelo 6:14-16, 22; Kubala 4:4-32; 1 Byambo bya Moba 25:1-8.

2. (a) Bena Kilishitu batanshi baingilanga byepi? (b) Ñanyi mepuzho o tusakukumbula?

 ² Bena Kilishitu ba mu myaka kitota kitanshi nabo baingijilanga pamo. Mutumwa Paulo walumbulwile’mba bakwatankene nangwa kya kuba bajinga na mingilo ne bya bupe byapusana pusana. Bonse balondelanga Ntangi wabo aye Yesu Kilishitu. Paulo wibesakenye ku binungwa bya mubiji byapusana pusana bingijila pamo. (Tangai 1 Kolinda 12:4-6, 12.) Pano nga atweba lelo jino kiji byepi? Twakonsha kwingijila byepi pamo mu mwingilo wa kusapwila, mu kipwilo, ne mu kisemi?

3. Ñanyi kimwesho kyamwene mutumwa Yoano?

³ Mu myaka kitota kitanshi, mutumwa Yoano mu kimwesho wamwene bamalaika batanu na babiji bavuminyenga ntolompita. Malaika wa butanu byo avuminye ntolompita yanji, Yoano wamwene “kabangabanga kufuma mwiulu kaponejile pa ntanda.” Kano “kabangabanga” katolele kii ne kushinkula kibelo kya ku kalengwa kafiita kazhika. Patanshi, mu kano kalengwa mwafumine bwishi, kabiji monka mu bwishi mwafumine nzhiye. Mu kifulo kya konauna bichi ne bijimwa, ino nzhiye yalukukile boba “babula katetesho ka Lesa pa bilungi byabo.” (Lumwekesho 9:1-4) Yoano wayukile’mba nzhiye yakonsha konauna bintu byavula; yaonawine bintu byavula mu Ijipita mu kimye kya kwa Mosesa. (Kulupuka 10:12-15) Nzhiye yamwene Yoano imenako bena Kilishitu bashingwa basapwila mambo a kuzhachisha bupopweshi bwa bubela. Kabiji bantu bavula baji na luketekelo lwa kwikala pano pa ntanda benunga ku bashingwa. Bakwatankena pamo mu uno mwingilo wa kusapwila. Uno mwingilo wakwasha bantu bavula kufuma mu bupopweshi bwa bubela ne kukasuluka ku bulume bwa kwa Satana.

4. Ñanyi mwingilo wafwainwa kwingila bantu ba Lesa, kabiji bakonsha kumwingila byepi?

⁴ Tuji na mwingilo wa kusapwila “mambo awama” ku bantu ntanda yonse mpelo saka ikyangye kwiya. Uno ke mwingilo wabaya bingi. (Mateo 24:14; 28:19, 20) Twafwainwa kwita bonse ‘bafwa kilaka’ kya kutoma “mema a bumi,” ko kuba’mba twafwainwa kufunjisha bukine bwa mu Baibolo ku bantu bonse bakeba kwibuyuka. (Lumwekesho 22:17) Pano bino, twakonsha kubatu bino inge ‘twanungakana’ ne kwingijila pamo na bakwetu mu kipwilo.—Efisesa 4:16.

5, 6. Tukwatankana byepi inge tubena kusapwila mambo awama?

⁵ Pa kuba’mba tusapwile ku bantu bavula bingi, twafwainwa kukwatankana bulongo mu mwingilo wetu wa kusapwila. Mikambizho yo tutambwila mu bipwilo byetu itukwasha kuba bino. Pa kupwisha kusambakana kwa kuya mu mwingilo, tuya na kusapwila mambo awama a Bufumu  ku bantu. Twibapa ne mabuku alumbulula Baibolo. Kabiji twapa bantu mabuku avula bingi mwaya ntanda. Bimye bimo betubuula kwingilako mu mikwekele ya kusapwila iikajila. Inge mwauba bino, ko kuba’mba mwakwatankena pamo na basapwishi bakwenu bavula bingi mwaya ntanda babena kusapwila mambo awama onka amotu. Kabiji mwingijila pamo na bamalaika, bakwasha bantu ba Lesa kusapwila mambo awama.—Lumwekesho 14:6.

⁶ Kituletela bingi lusekelo inge twatanga mu Buku wa Mwaka sawakya wa mwingilo wa kusapwila mwaya ntanda. Langulukai ne pa byo tukwatankana ntanda yonse mu mwingilo wa kwita bantu kwiya na kutaanwa ku kushonkena. Pa kushonkena, bonse tufundatu byambo bimo. Majashi, bifwanyikizho ne bimwesho bitutundaika kwingijila Yehoba na bulume bwetu bonse. Kabiji tukwatankana na balongo ne banyenga ntanda yonse kimye kyo tutaanwa ku Kivuluko pa mwaka pa mwaka. (1 Kolinda 11:23-26) Tupwila pa juba jimo pa Nisanyi 14, panyuma ya kuzhika juba, kumwesha’mba tusanta pa bitubijile Yehoba ne kukookela mukambizho wa kwa Yesu. Kabiji mu milungu ya kunangijila ku Kivuluko, twingijila pamo kwita bantu bavula kwiya na kutaanwa ku kuno kupwila kwanema.

7. Ñanyi bintu byo tuba inge tubena kwingijila pamo?

⁷ Luzhiye umo kechi wakonsha kuba byavula ne. Ne muntu umo kechi wakonsha kusapwila bantu bonse ne. Pano na mambo a kuba’mba twingijila pamo, tubuula bantu bavula pe Yehoba ne kukwasha bamo kutendeka kumutota ne kumunemeka.

8, 9. (a) Ñanyi kya kumwenako kyaingijishe Paulo pa kufunjisha bena Kilishitu kukwatankana? (b) Twakonsha kwingijila byepi pamo mu kipwilo?

⁸ Paulo walumbulwijile bena Efisesa kipwilo byo kingila, kabiji waambile’mba bonse mu kipwilo bafwainwa ‘kukoma mu bintu byonse.’ (Tangai Efisesa 4:15, 16.) Paulo waingijishe kya kumwenako kya mubiji kulumbulula amba mwina Kilishitu yense wakonsha kukwasha kipwilo kukwatankana ne kulondela Yesu, aye Ntangi wa kipwilo. Waambile’mba binungwa byonse bya mubiji byakwatankena “mu manungi onse apana bibena kukebewa.” Onkao mambo, nangwa twi banyike nangwa bakulumpe, nangwa tuji na bumi bwawama nangwa ne, atweba bonse pa muntu pa muntu twafwainwa kubanga ka?

⁹ Yesu watongola bakulumpe mu kipwilo kutangijilanga, kabiji ukeba’mba twibanemekenga ne kulondela mikambizho yo betupa. (Bahebelu 13:7, 17) Kechi kyapela kwibakookela ne. Bino twafwainwa kulomba Yehoba amba etukwashe. Mupashi wanji wazhila wakonsha kwitukwasha kukookela mikambizho yonse itupa bakulumpe mu kipwilo. Akilangulukai ne byo twakonsha kukwasha kipwilo inge twipelula ne kwingijila pamo na bakulumpe  mu kipwilo. Kipwilo kyetu kikakwatankana, ne butemwe bo twatemwa balongo bukakoselako.

10. Bankwasho bakwasha byepi kipwilo kukwatankana?

¹⁰ Bankwasho nabo bakwasha kipwilo kukwatankana. Bengila na ngovu kukwasha bakulumpe mu kipwilo kabiji twibasanchila pa mingilo yonse yo bengila. Kya kumwenako, bankwasho bamona kuba’mba tuji na mabuku avula a kwingijisha mu mwingilo, kabiji batambwila ne benyi beya na kupwila. Kabiji bengila na ngovu kuwamisha byaonaika ku Nzubo ya Bufumu ne kwiilama ya butooto. Inge ketwingijile pamo na bano balongo, tukwatankana ne kwingijila Yehoba mu jishinda jawama.—Esakanyaiko Byubilo 6:3-6.

11. Banyike bakonsha kuba byepi pa kuba’mba bakwashe kipwilo kukwatankana?

¹¹ Bakulumpe bamo baingila na ngovu kukwasha kipwilo pa myaka yavula. Bino kampe luno kechi bakonsha kwingila byonka byo baingilanga kala ne, mambo bakoma. Balongo banyike bakonsha kwibakwashako. Inge bebafunjisha mingilo, bakonsha kwingila mingilo yavula mu kipwilo. Kabiji bankwasho inge babena kwingila na ngovu, bakonsha kwikala bakulumpe kulutwe na lwendo. (1 Timoti 3:1, 10) Bakulumpe mu kipwilo bamo bakiji banyike babena kwingila mingilo ikatampe. Luno ke bakalama ba mwanzo kabiji babena kukwasha balongo ne banyenga mu bipwilo byavula. Tusanta bingi inge twamona banyike saka bepana kwingijila balongo ne banyenga.—Tangai Salamo 110:3; Musapwishi 12:1.

12, 13. Ñanyi bintu byakonsha kukwasha bonse mu kisemi kukwatankana?

¹² Twakonsha kukwasha byepi ba mu kisemi kyetu kukwatankana? Kwikala na kupopwela kwa kisemi mulungu ne mulungu kwakonsha kwitukwasha. Inge bansemi ne baana kebekaleko na kimye kya kufunda pe Yehoba, betemwa bingi. Pa bimye bya uno mutundu, bakonsha kupituluka mu byo bakamba mu mwingilo, kabiji kuba bino kukebakwasha bonse kwinengezha bulongo. Kabiji inge baumvwa mukwabo wa mu kisemi ubena kwamba pa bukine ne kumona’mba bonse batemwa Yehoba kabiji bakeba kumutokesha ku muchima, po po bakilamo kukwatankana.

¹³ Bamulume ne mukazhi bakonsha kuba byepi pa kuba’mba bengijilenga pamo? (Mateo 19:6) Inge kya kuba bonse batemwa Yehoba ne kumwingijila pamo, bakekala na lusekelo ne kukwatankana mu masongola abo. Kabiji bafwainwa ne kwimweshanga butemwe byonka byaubanga Abalahama ne Sala, Izaka ne Libeka, ne Elekana ne Hana. (Ntendekelo 26:8; 1 Samwela 1:5, 8; 1 Petelo 3:5, 6) Inge bamulume ne mukazhi kebobe bino,  bakwatankana ne kufwenya kwipi na Yehoba.—Tangai Musapwishi 4:12.

14. Inge kya kuba benakwenu kechi bengijila Yehoba ne, mwakonsha kuba byepi pa kuba’mba masongola enu atwajijile kukosa?

¹⁴ Baibolo waambatu patoka amba kechi twafwainwa kwisongola na muntu ubula kwingijila Yehoba ne. (2 Kolinda 6:14) Pano bino, kuji balongo ne banyenga baji mu masongola na bantu babula Bakamonyi ba kwa Yehoba. Bamo bafunjile bukine saka besongola kala, bino benakwabo bakana kwikala Bakamonyi. Bakwabo kampe besongwele na kalume wa kwa Yehoba, bino pa kupitapo kimye benakwabo bafumine mu kipwilo. Inge kyaikala bino, bena Kilishitu bengila papelela bulume bwabo kukosesha masongo abo kupichila mu kulondela mafunde a mu Baibolo. Kuba bino kechi kwapela ne. Kya kumwenako, ba Mary ne bamwatawabo ba David, baingijilanga Yehoba pamo. Pano bino, ba David balekele kupwila. Bino ba Mary batwajijile kwikala bakazhi bawama ne kumwesha byubilo bya bwina Kilishitu. Bafunjishe ne baana babo batanu na umo pe Yehoba kabiji batwajijile kupwila ne kutaanwa ku kushonkena. Pa kupitapo myaka, baana babo byo bakomene ne kufuma pa nzubo, ba Mary batwajijile kwingijila Yehoba nangwa kya kuba kechi kibapelejile ne. Kepo ba David batendekele kutanga magazini o bebashilanga kwi ba Mary. Palutwe kacheche, batendekele jibiji kutaanwako ku kupwila bimye bimo. Munkanabo wa myaka itanu na umo, kimye kyonse wibalaminanga kipona, kabiji ba David inge babula kutaanwako, uno munkanabo wibambilanga’mba, “Nkambo, lelo naji kwimutonga bingi ku kipwilo.” Ba David babwelele kwi Yehoba panyuma ya myaka 25, kabiji abo ne bakazhi babo baji bingi na lusekelo mambo babena kwingijila Yehoba pamo.

15. Babanda mu masongo bakonsha kukwasha byepi banyike baji mu masongola?

¹⁵ Lelo jino, Satana ubena kulukuka bisemi. O ene mambo bamulume ne mukazhi  bengijila Yehoba o bafwainwa kwingijilanga pamo. Nangwa kya kuba mwabanda mu masongola, langulukaipo bintu byo mwakonsha kwamba nangwa kuba pa kuba’mba mukoseshe masongola enu. Inge mwabanda mu masongola, banyike baji mu masongola bakonsha kufunjilako kwi anweba. Kampe mwakonsha kwibetako ku kupopwela kwenu kwa kisemi. Bakafunjilako kuba’mba nangwatu inge bamulume ne mukazhi babanda mu masongola, bafwainwa kutwajijila kwimwesha butemwe ne kukwatankana.—Titusa 2:3-7.

16, 17. Ñanyi bintu byawama bibena kutengela bakalume ba Lesa bakwatankana?

¹⁶ Kimye bena Isalela kyo bayanga ku bijiilo byabo ku Yelusalema, baingijilanga pamo. Banengezhanga byonse bya pa lwendo. Kabiji baendelanga pamo ne kwikwasha mulwabo. Inge bafika pa nzubo ya Lesa, batotelanga Yehoba pamo ne kumupopwela. (Luka 2:41-44) Ne atweba lelo jino, byo tubena kwinengezha kutwela mu ntanda ipya, twafwainwa kukwatankana ne kwingijila pamo na bakwetu. Nanchi mwalangulukapo mashinda amo mo mwakonsha kwingijila pamo na bakwenu nyi?

¹⁷ Bantu ba mu ino ntanda bepachika ne kulwila pa bintu byavula. Bino atweba tusanta mambo Yehoba witukwasha kwikala mu mutende ne kumvwisha bukine. Bantu banji mwaya ntanda babena kumupopwela mu jishinda jo akeba. Kikatakata mu ano moba a kupelako, bantu ba Yehoba bakwatankana bingi kukila ne kala. Byonkatu byaawile Isaya ne Mika, tubena kuyila pamo ku “mutumba wa Yehoba.” (Isaya 2:2-4; Tangai Mika 4:2-4.) Tukekala bingi na lusekelo kulutwe na lwendo bantu bonse pano pa ntanda byo ‘bakanungakena pamo’ ne kukwatankana na bakwabo mu kupopwela Yehoba.