YESU saka akyangye kubwela mwiulu, wabuujile baana banji ba bwanga amba: “Mukekala bakamonyi bami . . . monse mwapela ntanda.” (Byubilo 1:8) Pano bakonsheshe kusapwila byepi monse mwapela ntanda?

Shayuka wa pa Oxford University, aye Martin Goodman, waambile’mba “bena Kilishitu bapuseneko na Bayudea ne mabumba akwabo a bapopweshi ajingako mu bufumu bwa bena Loma, na mambo a kuba abo bayukile’mba baji na mwingilo ye bafwainwa kwingila.” Yesu wayanga na kusapwila mu mapunzha monse. Bena Kilishitu ba kine nabo bafwainwe kulondela byo aubanga ne kusapwila “mambo awama a Bufumu bwa Lesa” mu mapunzha monse. Bakebelenga bantu bakebanga kuyuka bukine. (Luka 4:43) O ene mambo mu myaka kitota kitanshi o kwaikejile “batumwa,” ko kuba’mba bantu bo batuma kuya na kwingila mwingilo. (Mako 3:14) Yesu wakambizhe baana banji ba bwanga amba: “Yainga na kufunjisha bantu ba mu bisaka byonse bya bantu kwikala ke baana bami ba bwanga.”—Mateo 28:18-20.

Batumwa ba kwa Yesu 12 kechi bakiji pano pa ntanda ne, bino bakalume ba Yehoba bavula balondela byaingilanga batumwa mu mwingilo. Inge bebambila kuya kuji kukajilwa, bakumbula’mba: “Amiwa bano! Ntumai!” (Isaya 6:8) Bavula, nabiji boba bapwisha Sukulu wa Gileada, baya na kwingijila mu byalo biji kwalepa. Bakwabo nabo bavilukila mu mapunzha akwabo monka mu kyalo kyabo. Bavula bafunda milaka ikwabo pa kuba’mba bakwashe kipwilo nangwa jibumba. Kechi kyapela kuba bino ne, bino  bano balongo ne banyenga bepaine ne kusankilapo bintu bimo pa kuba’mba bamweshe byo batemwa Yehoba ne bantu. Onkao mambo, balangulukilepo bulongo ne kwingijisha kimye, bulume ne mali abo kuya na kusapwila kwakepa basapwishi. (Luka 14:28-30) Bano balongo ne banyenga babena kuba kintu kyawama bingi.

Kechi bonse twakonsha kuya na kwingijila kwakepa basapwishi nangwa kufunda mulaka ungi ne. Bino atweba bonse twakonsha kwingila nobe bamishonale mu kipwilo kyetu.

Mu myaka kitota kitanshi, bena Kilishitu babambakene mu mwingilo wa kusapwila nangwa kya kuba bavula basapwilangatu mu mapunzha mo baikalanga kabiji kechi bajinga bamishonale ne. Paulo waambijile Timoti amba: “Ingilanga mwingilo wa busapwishi ne kwingila bulongo mwingilo wobe.” (2 Timoti 4:5) Bino byambo byaingilanga ku bena Kilishitu batanshi, kabiji bikingila ne kwi atweba lelo jino. Bena Kilishitu bonse bafwainwa kukookela mukambizho wa kusapwila mambo a Bufumu ne kufunjisha bantu kwikala baana ba bwanga. Kabiji nangwatu mu kipwilo kyetu, kuji mashinda avula mo twakonsha kwingijila nobe bamishonale.

Kya kumwenako, inge bamishonale baya ku kyalo kingi, bintu bipusana na ko bafuma, kabiji bafwainwa kutaanapo mashinda a kupimpwilamo bwikalo kwesakana na byo bataana. Inge kechi twakonsha kuya na kwingijila kuji kukajilwa ne, nanchi twakonsha kukebapo mashinda a katataka a kusapwilamo nyi? Kya kumwenako, mu 1940, balongo betu bebatundaikile kwingilako busapwishi bwa mu mukwakwa juba jimo mu mulungu. Nanchi mwakyesekapo kwingilako busapwishi bwa mu mukwakwa nyi? Nanchi mwaingijishapo kala matebulu pa kutanchika mabuku nyi? Kishinka ke kino, Nanchi mwipana kwingijisha mashinda a katataka a kusapwilamo mambo awama nyi?

Inge muji na muchima wa kwingila, mukekala na mukoyo ne kizaku mu mwingilo. Aba baya na kwingijila kuji kukajilwa nangwa boba bafunda mulaka ungi, javula bekala basapwishi bafikilamo kabiji bakonsha kukwasha bingi kipwilo. Kya kumwenako, bekala kulutwe mu mwingilo wa kusapwila. Kabiji javula bamishonale batangijila mingilo yavula mu kipwilo kufikatu ne kimye balongo ba mu kyokyo kipwilo kyo bafikilamo kwingila mingilo. Inge mwi mulongo wabatizhiwa,  nanchi mubena ‘kukanamina mingilo,’ ko kuba’mba kwipana kwingijila balongo ne banyenga mu kipwilo kyenu nobe nkwasho nangwa mukulumpe mu kipwilo nyi?—1 Timoti 3:1.

Kabiji twakonsha ne kukwasha kipwilo kyetu mu mashinda akwabo. Atweba bonse, bakulumpe ne banyike, balongo ne banyenga twakonsha ‘kukosesha’ bakwetu ba mu lwitabilo inge bakajilwa.—Kolose 4:11, tubyambo twa munshi.

Inge tukeba kukwasha balongo ne banyenga, twafwainwa kwibayuka bulongo. Baibolo witutundaika amba “twitenga muchima atwe bene na bene,” nangwa’mba kulanguluka pa byakajilwa balongo ne banyenga inge tuji nabo pa kupwila. (Bahebelu 10:24) Kino kechi kibena kulumbulula’mba twafwainwa kukeba kuyuka byavula pa bintu bya kyabo kyabo ne. Pakuba, kibena kulumbulula’mba twafwainwa kuyuka bibena kupitamo balongo ne banyenga ne bintu byo bakajilwa. Bakonsha kukebewa bukwasho, lutekenesho nangwa lutundaiko lwa mu Baibolo. Ibyo kuba’mba bimye bimo, bakulumpe mu kipwilo ne bankwasho bo bonkatu bafwainwa kwibakwasha. (Ngalatiya 6:1) Bino atweba bonse twakonsha kukwashako balongo ne banyenga bakikulumpe nangwa bisemi biji na makatazho.

Ba Salvatore bebakwashishepo mu jino jishinda. Na mambo a lukatazho lwa mali, bapoteshe byonse bibaletelanga mali, nzubo yabo ne bipe byavula bya kisemi kyabo. Baakaminwe bingi na mambo a kisemi kyabo. Kisemi kikwabo monka mu kipwilo kyamwene kukajilwa kwabo. Kino kisemi kyapelepo ba Salvatore mali ne kwibakwasha pamo na bakazhi babo kutaana nkito. Kabiji kino kisemi javula mabanga kyaikalanga na kisemi kya ba Salvatore na kumvwa byo babena kwamba ne kwibatundaika. Baikele balunda bawama. Luno, bino bisemi bibiji bivuluka na lusekelo bintu byo bapichilemo kimye kyakatezhe bintu.

Bena Kilishitu ba kine kechi bakankazhama kubuulako bakwabo bintu byo baitabilamo ne. Twafwainwa kulondela Yesu ne kubuulako bantu pa bintu byawama byalaya Lesa. Umvwe twakonsha kuya kuji kukajilwa nangwa ne, atweba bonse twakonsha kwibikako kukwasha bakwetu mu kipwilo kyetu. (Ngalatiya 6:10) Inge twakwasha bakwetu, tukekala ba lusekelo ne “kupanga bipangwa mu mingilo yonse yawama.”—Kolose 1:10; Byubilo 20:35.