1-2. Umvwe luno kechi mwafikilamo kubatizhiwa ne, mambo ka kino o kyakonsha kubujila kwimulefula? (Monai kipikichala.)

 UMVWE mubena kukeba kubatizhiwa, mwafuukulapo kuba kintu kyawama. Nanchi mwafikilamo kubatizhiwa lonka luno nyi? Inge anweba bene mwamona kuba’mba mwafikilamo kabiji bakulumpe mu kipwilo baswa, kange mukankazhame kufikizha kyo mwafuukulapo ne. Umvwe mwauba bino mukamwenamo bintu byawama mu kwingijila Yehoba mu bwikalo bwenu.

² Nanchi pajipo muntu umo wimubuujile bintu bimo byo mwafwainwa kuba saka mukyangye kubatizhiwa nyi? Abya anweba bene mwayuka byo mwafwainwa kuba nyi? Umvwe ibyo kange mulefulwe ne. Mwafwainwatu kuba byobyo bintu pa kuba’mba mufikilemo kubatizhiwa kechi na mambo a kuba’mba mwibanyike nangwa mwibakulumpe ne.

3. Ñanyi bwipuzho kinemanga mwina Etiopya bo ashikishe Filipa, kabiji ñanyi bwipuzho bo twakonsha kwipuzha? (Byubilo 8:36, 38)

³ Tangai Byubilo 8:36, 38. Kinemanga wa mu kipango kya Mfumu wafumine ku Etiopya washikishe musapwishi aye Filipa amba: “Ñanyi kintu kisakunkanya kubatizhiwa?” Uno mwina Etiopya wakebeshe bingi kubatizhiwa, pano nanchi wafikijilemo kubatizhiwa nyi?

4. Mwina Etiopya wamwesheshe byepi amba wakebelenga kutwajijila kufunjilapo bikwabo?

⁴ Mwanamulume mwina Etiopya “wayile ku Yelusalema na kupopwela.” (Byu. 8:27) Onkao mambo, kyamweka waitabijile byaitabijilemo Bayudea. Kwa kubula nangwa kuzhinaukatu ne, wafunjile pe Yehoba mu Binembelo byazhila bya Kihebelu. Nangwa byonkabyo, wakebeshe bingi kufunda bintu bikwabo.  Filipa byo asambakene uno kineme mu mukwakwa, wamutaine na kuba ka? Watangilenga muvungilo wa Ngauzhi Isaya. (Byu. 8:28) Bino buno bukine bwajinga bwazhika. Uno kineme kechi wakebelengatu kuyuka mafunjisho atanshi a mu Baibolo ne, bino wakebelenga kutwajijila kufunjilapo bikwabo.

5. Ñanyi kintu kyaubile mwina Etiopya kyo aubilepo pa bintu byo afunjile?

⁵ Uno mwanamulume wajinga kinemanga wa mu kipango kya Mfumu wamukazhi aye Kandese wa bena Etiopya, kabiji ye “[watalanga] pa nsabo yanji yonse.” (Byu. 8:27) Wafwainwa wapayankene bingi mambo wajinga na mingilo yavula. Nangwa byonkabyo, wayanga na kupopwela Yehoba. Kechi wafunjilengatu bukine ne, bino waingijishenga bintu byo afunjilenga. Onkao mambo, wafumine ku Etiopya ne kuya ku Yelusalema kwajinga Nzubo ya Lesa na kupopwela Yehoba. Kyamweka museke walepele bingi mambo wafwainwe kwibikako ne kwingijisha mali avula. Bino wayile na kupopwela Yehoba kechi na mambo a bino bintu ne.

6-7. Mwina Etiopya watwajijile byepi kubayisha butemwe bo atemenwe Yehoba?

⁶ Filipa wafunjishe mwina Etiopya bukine bukwabo bwanema. Bukine bumo bo amufunjishe ke bwa kuba’mba Yesu wajinga Mesiasa. (Byu. 8:34, 35) Uno kinemanga wa mu kipango kya mfumu waumvwine bingi bulongo byo ayukile kintu kyawama kyamubijile Yesu. Kufunda buno bukine kwamulengejile kuba ñanyi kintu? Inge wakebelenga inge wapelejiletu pa kuyuka bintu byaitabijilemo Bayudea, bino wabayishe ne butemwe bo atemenwe Yehoba ne Mwananji. Kino kyamulengejile kuba kintu kyanema mu bwikalo bwanji. Wafuukwilepo kubatizhiwa ne kwikala mwana wa bwanga wa kwa Yesu Kilishitu. Filipa byo amwene’mba uno mwanamulume wafikilamo, wamubatizhe.

⁷ Umvwe mwalondela byaubile mwina Etiopya, mukafikilamo kubatizhiwa. Kabiji mukashiinwa ne kwamba’mba: “Ñanyi kintu kisakunkanya kubatizhiwa?” Pano twayai twisambe pa byo mwafwainwa kulondela byonka byaubile mwina Etiopya watwajijile kufunda, waingijishe byo afunjile ne kutwajijila kubayisha butemwe bo atemenwe Lesa.

8. Kwesakana na Yoano 17:3 ñanyi kintu kyo mwafwainwa kuba?

⁸ Tangai Yoano 17:3. Nanchi bino byambo bya kwa Yesu byo bimulengejile kufuukulepo kutendeka kufunda Baibolo nyi? Atweba bavula bino byambo byo bitutundaikile. Nanchi bino byambo bintutu bimo bitutundaika kutwajijila kufunda nyi? Ee. Tukatwajijila  kufunda pa kuba’mba “[tumuyuke] . . . Lesa yenka wa kine.” (Sapwi. 3:11) Tukatwajijila kufunda myaka ne myaka. Kufunda byavula pe Yehoba kuketulengela kufwenya kwipi ne aye.—Sala. 73:28.

9. Inge twafunda mafunjisho atanshi a mu Baibolo, ñanyi kintu kyo twafwainwa kuba?

⁹ Umvwe twatendeka kufunda pe Yehoba, tufundatu mafunjisho atanshi. Mutumwa Paulo byo aambile’mba “mafunjisho atanshi” mu nkalata yo anembejile Bahebelu, kechi walumbulwilenga amba abula kunema ne. Bino waesakenyenga “mafunjisho atanshi” ku mukaka ulengela mwana kukoma bulongo. (Hebe. 5:12; 6:1) Kabiji wakambizhe bena Kilishitu bonse kutwajijila kufunda byazhika bya mu Mambo a Lesa. Kechi kupelelatu pa mafunjisho atanshi ne. Nanchi mukebesha kufunda mafunjisho azhika a mu Baibolo nyi? Nanchi mukeba kutwajijila kufunda pe Yehoba ne bintu byo akeba nyi?

10. Mambo ka bamo o kibakatezha kufunda?

¹⁰ Atweba bavula kitukatazha bingi kufunda. Nga anweba mulangulukapo’mba ka pa kufunda? Nanchi ku sukulu mwafunjile bya kutanga ne bya kufunda nyi? Nanchi mwaumvwanga bulongo kufunda ne kumwenamo byavula nyi? Nangwa kimukatazhanga bingi kufunda ne kutanga mabuku nyi? Umvwe ibyo, kechi muji bunke ne. Nangwa byonkabyo, Yehoba ukemukwasha. Walumbuluka kabiji ye Mufunjishi wawama.

11. Yehoba wamwesha byepi kuba’mba ye “Mufunjishi wenu Wakila”?

¹¹ Yehoba witela mwine amba ye “Mufunjishi wenu Wakila.” (Isa. 30:20, 21) Ye Mufunjishi watekanya, uji na lusa kabiji wituyuka bulongo. (Sala. 130:3) Uta muchima pa bintu byawama byuba bantu bo afunjisha. Kechi witwambila kuba bintu byo twakonsha kukankalwa kuba ne. Vulukai’mba bongo bwetu wibulenga mu jishinda ja kukumya. (Sala. 139:14) Tukebesha bingi kufunda. Mulenga wetu ukebesha’mba tutwajijile kufunda ne kwiyowa byo tufunda myaka ne myaka. Onkao mambo, twafwainwa “kukebanga” bukine buji mu Baibolo. (1 Pe. 2:2) Tanchikai bintu byo mukeba kuba ne kulondela mutanchi wenu wa kutanganga ne kufunda Baibolo kimye kyonse. (Yosh. 1:8) Na bukwasho bwa Yehoba, mukeyowanga kutanga ne kufunda byavula pe aye.

12. Mambo ka o kyanemena kufunda pa bwikalo bwa kwa Yesu ne mwingilo wanji?

¹² Kimye kyonse saka mwikalako na kimye kya kulanguluka languluka pa bwikalo bwa kwa Yesu ne mwingilo wanji. Kulondela byaubile Yesu kuketukwasha kwingijila bulongo Yehoba, kikatakata mu bino bimye byakatazha. (1 Pe. 2:21) Yesu wabuujile baana banji ba bwanga amba bakapitanga mu makatazho. (Luka 14:27, 28) Nangwa byonkabyo, wayukile kuba’mba baana banji ba bwanga ba kine bakatwajijila kwikala ba kishinka byonkatu byo aubile. (Yoa. 16:33) Fundai pa bwikalo bwa kwa Yesu ne kulondela byo aubanga mu bwikalo bwenu.

13. Ñanyi bintu byo mwafwainwa kulomba kwi Yehoba, kabiji mambo ka?

¹³ Ene mambo o tufunjila ke kukeba kuyuka byavula pe Yehoba ne kwikala na byubilo nabiji lwitabilo ne butemwe bwa kutemwa Lesa. (1 Ko. 8:1-3) Twajijilai kufunda ne kulomba Yehoba kwimukwasha kwikala na lwitabilo lwakosa. (Luka 17:5) Mambo ukumbula milombelo ya uno mutundu. Kabiji lwitabilo lwa kine lwaimena pa kuyukisha bulongo Lesa lukemukwasha kumwingijila.—Yako. 2:26.

14. Mutumwa Petelo walumbulwile byepi buneme bwa kwingijisha byo tufunda? (Monai ne kipikichala.)

¹⁴ Mutumwa Petelo waambile pa ene mambo  o kyanemena baana ba bwanga ba kwa Kilishitu kutwajijila kwingijisha byo bafunda. Waambile pa jishimikila ja mu Baibolo ja kwa Nowa. Yehoba wabuujile Nowa kuba’mba ukaleta muyulo ukonauna bantu babi mu oa moba. Kuyukatu’mba Yehoba ukaleta muyulo kechi ko kwafwainwe kulengela Nowa ne kisemi kyanji kupuluka ne. Yukai’mba Petelo waambilenga pa kimye muyulo saka akyangye kufika ne “byo bafiikilenga bwato.” (1 Pe. 3:20) Kya kine, Nowa ne kisemi kyanji balondejile Lesa byo ebafunjishe ne kufiika bwato bukatampe bingi. (Hebe. 11:7) Kabiji Petelo waesakenye lubatizhilo ku byaubile Nowa byo anembele’mba: “Lubatizhilo lwaesakana na kino kyamwekele, nalo lubena kwimupulusha.” (1 Pe. 3:21) Mingilo yo mubena kwingila luno pa kuba’mba mufikilemo kubatizhiwa yakonsha kwesakana pamo na mingilo yaingijile Nowa ne kisemi kyanji myaka yavula ya kufiika bwato. Ñanyi mingilo yo mwafwainwa kwingila pa kuba’mba mufikilemo kubatizhiwa?

15. Twakonsha kumwesha byepi amba twalapila kya kine?

¹⁵ Kintu kitanshi kyo twafwainwa kuba ke kulapila. (Byu. 2:37, 38) Umvwe twalapila kya kine, tukapimpula byubilo byetu. Nanchi mwaleka byubilo bifichisha Yehoba ku muchima nabiji bulalelale, kupepa fwanka nangwa kwingijisha ñambilo yatama nyi? (1 Ko. 6:9, 10; 2 Ko. 7:1; Efi. 4:29) Inge kechi mwaleka ne, twajijilai kwibikako kupimpula byubilo byenu. Mwafwainwa kwisamba na wimufunjisha Baibolo nangwa bakulumpe mu kipwilo kuba’mba bemukwashe. Umvwe mwibanyike kabiji mukikala pa nzubo ya bansemi bambilai bemukwashe kuleka byubilo byatama byakonsha kwimulengela kubula kufikilamo kubatizhiwa.

16. Inge tubena kukeba kukosesha bulunda bwetu ne Yehoba twafwainwa kubanga ka?

¹⁶ Kabiji kyanema bingi kubanga bintu byakonsha kwitukwasha kwikala na bulunda bwawama ne Lesa. Bino byavwangamo kutanwa ku kupwila ne kukumbulapo. (Hebe. 10:24, 25) Kabiji inge mwafikilamo kwikala musapwishi, mwafwainwa kwingilanga mwingilo wa kusapwila kimye kyonse. Umvwe saka  musapwila kimye kyonse mukatemwa bingi uno mwingilo. (2 Timo. 4:5) Inge mwibanyike kabiji mukikala pa nzubo ya bansemi ishikishai’mba: ‘Nanchi bansemi bo bamvululamo kuya na kupwila nangwa kuya mu busapwishi nyi? Inyi netendekelakotu amiwa mwine?’ Umvwe kemube bino, mukamwesha’mba muji na lwitabilo kabiji mwamutemwa Yehoba Lesa ne kumusanchila pa bintu byonse byawama byo etupa. Ino yonse ke “mingilo ya kunemeka Lesa,” kabiji byo bya bupe byo tupana kwi Yehoba. (2 Pe. 3:11; Hebe. 13:15) Bya bupe byonse byo tupana kwi Lesa bimusangajika bingi. (Esakanyaiko 2 Kolinda 9:7.) Kitusangajika bingi mambo tupana bino byonse kwi Yehoba.

17-18. Ñanyi kyubilo kyanema kyakonsha kwimukwasha kufikilamo kubatizhiwa, kabiji kino kyubilo kyakonsha kwimukwasha byepi? (Byambo bya Maana 3:3-6)

¹⁷ Inge mwafuukulapo kubatizhiwa mukapitanga mu makatazho. Bantu bamo bakemwendelekanga na mambo a bintu byo mwaitabilamo kabiji bakwabo bakemumanyikanga. (2 Timo. 3:12) Kampe mubena kwibikako kuleka kintu kimo kyo mwayuka’mba kyatama, bino pa bimye bimo muba kyokyo kintu kyatama. Nangwa kampe mwakankalwa kutekanya nangwa mwalefulwa mambo mwamona’mba kechi mubena kufikazha kyo mukeba kuba ne. Ñanyi kintu kikemukwasha kuchinchika? Ke butemwe bo mwatemwa Yehoba.

¹⁸ Kutemwa Yehoba ke kyubilo kyawama bingi kyo muji nakyo. (Tangai Byambo bya Maana 3:3-6.) Butemwe bwa kutemwa Lesa bukemukwasha kuchinchika makatazho a mu bwikalo. Javula Baibolo wamba pa butemwe bwa Yehoba bubula kwaluka bo atemwa bantu banji. Kino kilumbulula’mba kechi ukaleka kutemwa bantu banji ne. (Sala. 100:5) Mwalengwa mu kipasha kya Lesa. (Nte. 1:26) Mwakonsha kumwesha byepi butemwe bo ajipo nabo?

19. Mwakonsha kumwesha byepi amba musanchila Yehoba pa bintu byonse byo emubila? (Ngalatiya 2:20)

¹⁹ Tendekelaipo kusanta. (1 Tesa. 5:18) Pa juba pa juba, ishikishai’mba, ‘Yehoba wammwesha byepi amba wantemwa?’ Kepo mwafwainwa kutongaula byonse byo emubila pa jojo juba mu lulombelo lwenu. Byonka byo kyajinga ku mutumwa Paulo, ne anweba mwafwainwa kuyuka kuba’mba Yehoba wimubila bintu byawama mambo wimutemwa. (Tangai Ngalatiya 2:20.) Ishikishai’mba, ‘Nanchi ne amiwa  mmwesha’mba namutemwa nyi?’ Butemwe bo mwatemwa Yehoba bukemukwasha kushinda meseko ne kuchinchika makatazho. Bukemukwasha kutwajijila kupopwela Yehoba kimye kyonse ne kumwesha’mba mwatemwa Shenu moba onse.

20. Ñanyi bintu byo mwafwainwa kuba pa kuba’mba mwipane kwi Yehoba, kabiji kufuukula bino kwanemena ka?

²⁰ Mu kuya kwa moba, mwafwainwa kulomba kwi Yehoba ne kwipana kwi aye. Mwafwainwa kuvulukanga’mba inge mwipana kwi Yehoba, mukekala na luketekelo lwakosa lwa kuba’mba: Mukamwingijilanga myaka ne myaka. Umvwe mwipana kwi Yehoba mumulaya kuba’mba kechi mukaleka kumwingijila ne, nangwa bintu bikakatazhepotu byepi. Uno mulaye mumwambatu jimo kwapwa. Kwipana kwi aye ke kintu kimo kyanema kyo twafuukulapo. Akilangulukai pa kino: Mukafuukula kuba bintu byavula mu bwikalo bwenu. Bimo byo mukafuukula kuba byawama, bino kyakila pa byonse ke kufuukulapo kwipana kwi Yehoba mu bwikalo bwenu. (Sala. 50:14) Satana ukeba kwimulengela kuleka kutemwa Shenu ne kwimulengela kubula kutwajijila kwikala ba kishinka. Kumushila kanya Satana ne. (Yoba 27:5) Kutemwa Yehoba kukemulengela kufwenya kwipi na Shenu wa mwiulu ne kutwajijila kumwingijila.

21. Mambo ka o twakonsha kwambila’mba lubatizhilo kechi yo mpelo ne, bino yo ntatwilo?

²¹ Umvwe mwipana kwi Yehoba, buulai bakulumpe mu kipwilo kuba’mba mubena kukeba kubatizhiwa. Kabiji mwafwainwa kuvulukanga’mba lubatizhilo kechi yo mpelo ne, bino yo ntatwilo. Yo ntatwilo ya mwingilo ukabula kupwa wa kwingijilatu Yehoba. Onkao mambo, kino kyo kimye kya kubayisha butemwe bo mwatemwa Shenu. Pa juba pa juba ubainga bintu byakonsha kubayisha butemwe bwenu bo mwatemwa Lesa. Buno butemwe bukemulengela kufikilamo kubatizhiwa. Aja juba kechi mukejilubamo ne. Pano bino ino ke ntatwilotu. Twajijilai kubayisha butemwe bwenu bo mwatemwa Yehoba ne Mwananji.