1. Ñanyi kintu bansemi kyo bakeba baana babo kuba?

 BANSEMI twayuka kuba’mba mukeba bingi baana benu kuyuka ne kutemwa Yehoba. Lesa byo abula kumweka, mwakonsha kukwasha byepi baana benu kumuyuka bulongo ne kufwenya kwipi ne aye?—Yako. 4:8

2. Bansemi bakonsha kufunjisha byepi baana babo kuyuka byubilo bya Yeboba?

² Jishinda janema kukwashishamo baana benu kufwenya kwipi ne Yehoba ke kwibafujishanga Baibolo. (2 Timo. 3:14-17) Nangwa byokabyo Baibolo waambapo jishinda jikwabo baana jo bakonsha kufunjilako pe Yehoba. Mu buku wa byambo bya maana tutangamo shanji wavulwilemo mwananji kubula kuvulama byubilo bya Yehoba bimwekela mu bintu byo alenga. (Maana 3:19-21) Tusakwisamba pa mashinda bansemi o bakonsha kwingijisha pa kukwasha baana babo kufunda pa byubilo bya Yehoba kwingijisha bilengwa.

3. Bansemi bakonsha kukwasha byepi baana babo?

³ Baibolo waamba’mba: “Byubilo [bya Lesa] bibula kumweka byamweka patoka kufumatu kimye kyo alengele ntanda, mambo bimwekela mu bintu byo alenga.” (Loma 1:20) Anweba bansemi mumvwa bingi bulongo kwikalapo na kimye kyawama na baana benu. Mwakonsha kwingijisha kino kimye kukwasha baana benu kumona “bintu” Yehoba “byo alenga” byo byakonsha kwibakwasha kuyuka byubilo byanji byawama. Pano twayai twisambe pa bansemi byo bakonsha kufunda mashinda aingijishe Yesu kufunjisha bantu.

4. Yesu waingijishe byepi bilengwa na Lesa kufunjisha baana banji ba bwanga? (Luka 12:24, 27-30)

⁴ Akimonai Yesu byo aingijishe bilengwa na Lesa pa kufunjisha  bantu. Kimye kimo Yesu waambijile baana banji ba bwanga kulanguluka pa bikwangala ne maluba. (Tangai Luka 12:24, 27-30.) Yesu inge wakebelenga inge watongwele nyama nangwa kijimwa kikwabo. Pano bino wasajile ñonyi ne jiluba, bintu byayukile baana banji ba bwanga. Kyamweka baana banji ba bwanga bamwene bikwangala mwiulu ne maluba saka akenuka bulongo mu bujimi. Nanchi mwakonsha kufwanyikizha Yesu ubena kutongola bino bintu na munwe kimye kyo aambilenga nyi? Kabiji ñanyi kintu byo aubile pa kutongola kino kintu? Wafunjishe baana banji ba bwanga kintu kyanema bingi pa lusa ne bumpanyi bwa shabo wa mwiulu. Wibambijile’mba byonkatu Yehoba byo ajisha bikwangala ne kulengela maluba kumweka bulongo byo byo ajisha ne kuvwika bakalume banji ba kishinka

5. Bansemi bakonsha kwingijisha byepi bilengwa kufunjisha baana babo pe Yehoba?

⁵ Anweba bansemi kimye kyo mubena kufunjisha baana benu mwakonsha kulondela byepi byafunjishanga Yesu? Kimye kyo mubena kufunjisha baana benu mwakonsha kwamba pa kilengwa kyo mwatemwa bingi nabiji nyama nangwa kijimwa. Kimye kyo mubena kubuula mwanenu pa nyama nangwa kijimwa kyo mwatemwa mwafwainwa kumubuula byo kibena kwimufunjishapo pe Yehoba. Kabiji mwakonsha kwipuzha mwanenu nyama ye atemwa nangwa kijimwa. Inge mwisamba na mwanenu pa kilengwa kyo atemwa, kikamulengela kutako bingi muchima kufunda pa byubilo bya Yehoba.

6. Twakonsha kufunjilako ka ku byaubanga bainanji Christopher?

⁶ Nanchi bansemi bafwainwa kutaya kimye kyabaya kufunda pa nyama nangwa kijimwa kimo pa kuba’mba besambe na mwanabo pa mingilo ya Yehoba nyi? Ine. Yesu kechi walumbulwijile byavula baana banji ba bwanga pa bikwangala byo bija nangwa maluba byo akoma ne. Nangwa kya kuba mwanenu watemwa kufunda bintu byavula pa bintu Yehoba byo alenga. Kumwipuzha bwipuzho bwapeela kwakonsha kumulengela kumvwisha kishinka kyo mubena kwambapo. Akilangulukai pa bivuluka Mulongo Christopher waambile’mba: “Bamama baambanga bintu byapeela pa kwitukwasha kunemeka bilengwa. Inge twamona mitumba baambanga’mba: ‘Monai yewa mutumba mukatampe byo awama. Nanchi Yehoba kechi wawama nenyi?’ Nangwa inge twamona kalunga ka mema baambanga’mba: ‘Nanchi Yehoba kechi uji bingi na bulume nenyi?’” Kabiji ba Christopher baambile’mba: “Bino bintu byawama bitubuujilenga bamama bitukwashishe kulanguluka languluka pa bintu byo twamwenenga ne kufunda pe Yehoba.”

7. Mwakonsha kufunjisha byepi baana benu kulanguluka pa bilengwa?

⁷ Umvwe baana benu batendeka kukoma mwafwainwa kwibafujisha kulangulukanga pa bilengwa ne pa byo byakonsha kwibakwasha kufunda pe Yehoba. Mwakonsha kwamba pa kintu kimo kyalengele Yehoba ne kwipuzha baana benu amba: “Kino kibena kwimufujishapo ka pe Yehoba?” Inge mwaumvwa bilanguluka baana benu mwakonsha kukumya ne kwikala bingi na lusekelo.—Mat. 21:16.

8. Ñanyi kintu bansemi bena Isalela kyo baubanga inge babena kwendela pamo na baana babo “mu jishinda”?

⁸ Bansemi bena Isalela bebabuujile kufunjisha baana babo mikambizho ya Yehoba pa kwenda “mu jishinda.” (Mpitu. 11:19) Mu kyalo kya Isalela mwajinga mikwakwa. Bantu bapitanga mu ino mikwakwa bamonanga banyama, bañonyi ne maluba apusana pusana. Bansemi bena Isalela inge babena kwenda pamo na baana babo mu mikwakwa besambanga pa bintu byo bamonanga byalengele Yehoba. Kampe ne anweba bansemi mwikalako na kimye kya kwisamba pa bilengwa na baana benu ne byo bakonsha kufunjilako ku  bino bintu. Pano twayai twisambe pa bansemi bamo baubapo bino.

9. Mwakonsha kufunjilako ka kwi ba Punitha ne ba Katya?

⁹ Inetu aye Punitha wikala mu muzhi mukatampe mu kyalo kya India, waambile’mba: “Inge twafwakesha kisemi kyetu kikala ku mpunzha ikwabo, twikalako na kimye kya kufunjisha baana betu pa bintu Yehoba byo alenga byo byawama. Kabiji ndanguluka kuba’mba baana bami po po bakonsha kuyuka bulongo bilengwa na Lesa kukila inge tuji mu mikwakwa iji mu muzhi wetu mukatampe mwavula bantu ne myotoka.” Anweba bansemi, baana benu kechi bakalubako kimye kyo mwikala na kwisamba nabo ku mapunzha awama ne. Nyenga wikala mu kyalo kya Moldova aye Katya waambile’mba: “Bintu byavula bya ku bwanyike byo mvuluka ke byo twisambangapo na bansemi inge twaya na kufwakesha mizhi icheche. Nebasanchila bingi byo bamfunjishe kufuma ku bwanyinke. Mambo betufunjishe kwikalapo na kimye kya kuta muchima ku bintu byalenga Yehoba, kwibilanguluka langulukapo ne kufunjilako byubilo byanji.

10. Ñanyi bintu byakonsha kuba bansemi inge kechi bakonsha kuya na kufwakasha ku mapunzha akwabo ne? (Monai kakitenguluzha ka kuba’mba “ Bya Kukwasha Bansemi.”)

¹⁰ Mwakonsha kuba byepi inge kechi kyakonsheka kuya ku mapunzha awama ne? Ba Amol bekala mu kyalo kya India, baambile’mba: “Ku mpunzha ko ngikela bansemi bengila kimye kyabaya bingi kabiji kechi kyapeela kuya na kufwakesha mapunzha akwabo ne. Nangwa byonkabyo, inge muji mu mpunzha yawama nangwa mu bishimikwa bikwabo byawama mwakonsha kumona bintu byalenga Yehoba ne kwisamba pa byubilo byanji ne kufunjilako.” Kabiji inge mwatajishatu bulongo pa nzubo po mwikala nangwa pepi na nzubo yenu mwakonsha kumonapo bilengwa bimo byo mwakonsha kumwesha baana benu. (Sala. 104:24) Kampe mwakonsha kwibamwesha tuñonyi, bilongolo, bijimwa ne bintutu bikwabo. Ba Karina bekala ku Germany  baambile’mba: “Bamama batemwa bingi maluba. Onkao mambo, byo najinga mwanyike batemenwe bingi kwamba pa maluba byo awama inge tubena kwendela pamo.” Onkao mambo, ne anweba bansemi mwakonsha kufunjisha baana benu kwingijisha mavidyo ne mabuku aamba pa bilengwa na Lesa anengezha jibumba ja Yehoba. Kechi na mambo a mpunzha ko mwikala ne, mwakonsha kukwasha baana benu kumona bintu byalenga Lesa. Pano twayai twisambe pa byubilo bya Yehoba byo mwakonsha kufunjisha baana benu.

11. Ñanyi kintu kyuba bansemi pa kuba’mba bakwashe baana babo kutemwa Yehoba?

¹¹ Inge mukeba kukwasha baana benu kuyuka butemwe bwa Yehoba, mwakonsha kwamba pa banyama byo balama bulongo twana twabo. (Mat. 23:37) Mwakonsha kwamba pa bintu byawama byo tufunjilako ku bilengwa na Lesa. Ba Karina, bo twaambapo kala baambile’mba: “Inge paji ko tubena kuya ne bamama bino twataana maluba bamama bandumbulwilanga kuwama kwa ano maluba byo kumwesha butemwe bwa Yehoba. Ne amiwa inge nataana maluba ne atajisha bingi kabiji mmona misombelo byo yawama ne byo yapusana na maluba akwabo. Kuba bino kumvululamo kuba’mba Yehoba witutemwa bingi.”

12. Bansemi bakonsha kukwasha byepi baana babo kukwatakanya maana a Lesa? (Salamo 139:14) (Monai ne kipikichala.)

¹² Kwashai baana benu kuyuka maana a Yehoba. Yehoba uji bingi na maana kwitukila atweba bantu. (Loma 11:33) Mwakonsha kubuula baana benu mema byo aya mwiulu ne kulenga makumbi kabiji ne ano makumbi byo aluka ke mvula unoka ku mapunzha akwabo. (Yoba 38:36, 37) Kabiji mwakonsha ne kulumbulula Yehoba byo alenga mubiji wa muntu mu jishinda ja kukumya. (Tangai Salamo 139:14.) Akilangulukai pa byaubile aye Vladimir. Waambile’mba: “Juba jimo mwanetu wamulume waponene na nkinga kabiji wikozhezhe. Bino byo papichile moba acheche kilonda kyapwile. Amiwa ne mukazhami twamulumbulwejile kuba’mba Yehoba walenga mubiji wetu na bulume bwa kwibuka mwine. Kabiji twamubuujile kuba’mba bintu byalenga bantu kechi biji na bulume bwa kwibuka abyo bine ne. Nabiji motoka inge watanwa mu mapuso kechi wilungisha mwine ne. Kino kishinka kyakwashishe mwanetu kukwatakanya maana a Yehoba.”

13. Bansemi bakonsha kukwasha byepi baana babo kuyuka bulume bwa Yehoba? (Isaya 40:26)

 ¹³ Yehoba witubuula’mba tutale mwiulu ne kumona tubangabanga tonse byo tumwesha bulume bwanji bukatampe. (Tangai Isaya 40:26.) Ne anweba mwakonsha kutundaika baana benu kutala mwiulu ne kulanguluka languluka pa bintu byo bamona. Nyenga wikala ku Taiwan aye Tingting uvuluka kintu kimo kyamwekele kimye kyo ajinga mwanyike. Waambile’mba: “Juba jimo bamama bansendele ku mpunzha imo. Bufuku twatajile mwiulu ne kumona tubangabanga mambo ko twayile kechi muzhi mukatampe muji malaichi akonsheshe kwitulengela kukankalwa kumona tubangabanga twavula ne. Moba onse naakamwanga’mba kampe kechi nakonsha kutwajijila kwikala wa kishinka kwi Yehoba ne. Mambo bakwetu bo nafundanga nabo bankanjikizhanga kuba bintu byakonsheshe kundengela kubula kwikala wa kishinka kwi Yehoba. Bamama bankwashishe kulanguluka pa bulume Yehoba bo aingijishe kulenga tubangabanga tonse ne kumfunjisha kuba’mba ukengijisha buno bulume kunkwasha kushinda meseko onse. Bilengwa na Lesa byo namwene pa joja juba byandengejile kuyuka Yehoba bulongo ne kwibikako kumwingijilanga.”

14. Bansemi bakonsha kwingijisha byepi bilengwa kukwasha baana babo kwimwena Yehoba byo aji Lesa wa lusekelo?

¹⁴ Bintu byalenga Yehoba bimwesha’mba ye Lesa wa lusekelo kabiji ukeba ne atweba kwikalanga na lusekelo. Bashayuka ba sayansi bamona’mba banyama bavula batemwa kukaya kubikapotu ne bañonyi ne masabi. (Yoba 40:20) Nanchi baana benu bomvwa bingi bulongo inge bamona nyama saka akaya nyi? Kampe bakimonapo twana twa kamenshi nangwa twana twa kabwa saka tukaya lumpelengwe. Kimye kikwabo kyo mukamona baana benu saka baseka pa kumona bibena kuba nyama, mukebavululemo’mba Yehoba ye twingijila ke Lesa wa lusekelo.—1 Timo. 1:11.

15. Ñanyi bintu byakonsha kukwasha bansemi kuyuka biji mu michima ya baana babo? (Byambo bya maana 20:5) (Monai ne kipikichala.)

¹⁵ Kimye kimo baana bakankalwa kubuula bansemi babo makatazho o bapitamo. Umvwe lo  lukatazho luji na baana benu mwafwainwa kwibakwasha pa kuba’mba bemikasulukile ne kwimubuulanga byo bapitamo. (Tangai Byambo bya Maana 20:5.) Bansemi bamo kibapeelela bingi kuba bino inge babena kwisamba na baana babo pa bilengwa. Mambo ka? Mambo bintu byakonsha kuvulañanya baana ne bansemi bikepa. Shetu wa ku Taiwan wa jizhina ja Masahiko waambile kishinka kikwabo amba: “Inge twaya na kukaya na baana betu ku mitumba nangwa kwenda ku kitulu kya kalunga ka mema betukasulukila bingi. Onkao mambo, kitupeelela bingi kwisamba nabo ne kuyuka biji mu michima yabo.” Ba Katya, bo twaambapo kala baambile’mba: “Inge nakotoka ku sukulu bamama bantwalanga ku mpunzha yawama. Inge twaya ku ino mpunzha yawama kyampeelelanga kwibabuula bya kumweka ku sukulu nangwa bintu bindengela kwakamwa.”

16. Bisemi byakonsha kumwenamo byepi mu kutamba bilengwa bya Yehoba?

¹⁶ Umvwe bisemi byaikalako na kimye kya kulanguluka pa bintu byalenga Yehoba, bakasuluka ne kusangalela pamo. Kino kibakwasha kukosesha butemwe mu kisemi. Baibolo waamba’mba “kuji kimye kya kuseka” ne “kimye kya kukilauka.” (Sapwi. 3:1, 4, tubyambo twa munshi.) Yehoba walenga mapunzha awama pano pa ntanda ko twakonsha kumona bintu byo twatemwa. Bisemi byavula biyila pamo na kumona bilengwa na Lesa ku mapunzha awama, nabiji ku mitumba nangwa ku bitulu. Baana bamo bomvwa bingi bulongo kunyema ne kukayila mu mapunzha o balama bulongo, kutamba banyama, kowa mu mukola, pa kizhiba nangwa pa kalunga ka mema. Kituletela bingi lusekelo kuya na kukayila ku mapunzha awama ne kutamba bilengwa bya Yehoba.

17. Mambo ka bansemi o bafwainwa kukwashisha baana babo kwiyowa bilengwa na Lesa?

¹⁷ Mu ntanda ipya ya Lesa bansemi ne baana bakeyowanga bilengwa bya Yehoba kukila byo babena kuba luno. Kabiji pa kyokya kimye kechi tukachiinanga banyama ne, kabiji banyama nabo kechi baketuchiinanga ne. (Isa. 11:6-9) Tukeyowanga bintu byalenga Yehoba myaka ne myaka. (Sala. 22:26) Bino bansemi kechi mwafwainwa kupembelela ntanda ipya pa kuba’mba mukakwashe baana benu kwiyowa bilengwa bya Lesa ne. Mwafwainwa kutendekako lonka luno. Umvwe ke mwingijishe bilengwa kufunjisha baana benu pe Yehoba bakakonsha kuswa byambo byaambile Mfumu Davida bya kuba’mba: “Anweba Yehoba kafwako mingilo yaesakana na mingilo yenu ne.”—Sala. 86:8.