MUTWE WA KUFUNDA 10
Mambo ka o Mwafwainwa Kubatizhiwa?
“Lapilai ne kubatizhiwa.”—BYU. 2:38.
LWIMBO 34 Endainga mu Bukishinka
BIJI MU UNO MUTWE a
1-2. Ñanyi kintu kimweka inge bantu babena kubatizhiwa, kabiji ñanyi bintu byo tusakwisambapo mu uno mutwe?
NANCHI mwakimonapo kala bantu bavula babena kubatizhiwa nyi? Mwaumvwine mikumbu yabo ku mepuzho abiji o bebepwizhe saka bakyangye kubatizhiwa. Kino kimulengejile kuyuka’mba bashiinwa. Mwamwene balongo babo ne balunda nabo byo basangalele. Bantu bajinga bingi na lusekelo kabiji bonse bapopwejilenga pa kumona babatizhiwenga saka batuntuka mu mema. Pa mulungu pa mulungu bantu bavula bepana, babatizhiwa ne kwikala Bakamonyi ba kwa Yehoba.
2 Nga anweba mubena kulangulukapo’mba ka? Inge mubena kulanguluka’mba mwafwainwa kubatizhiwa, yukai’mba bantu baji mu ino ntanda yatama bakazanza meso pe anweba mambo mubena “kukeba Yehoba.” (Sala. 14:1, 2) Bino byambo biji mu uno mutwe banembela anweba bonse banyike ne bakulumpe. Bino atweba babatizhiwa kala bisakwitukosesha kutwajijila kwingijila Yehoba. Onkao mambo, twayai twisambe pa bishinka bisatu byakonsha kwitulengela kutwajijila kwingijila Yehoba.
TEMWAI BUKINE NE BOLOLOKE
Bubela bwa kwa Satana bwaleta mwenga pa jizhina ja Yehoba pa myaka yavula kabiji watwajijilatu na kuba bino (Monai mafuka 3-4)
3. Mambo ka bantu ba Yehoba o batemenwa bukine ne bololoke? (Salamo 119:128, 163)
3 Yehoba wakambizhe bantu banji ‘kutemwa bukine.’ (Zeka. 8:19) Yesu naye wabuujile baana banji ba bwanga kukeba bololoke. (Mat. 5:6) Kino kibena kulumbulula’mba twafwainwa kukebeshanga kuba bintu Lesa byo amona’mba byawama kabiji byaoloka. Nanchi mwatemwa bukine ne bololoke nyi? Twayuka kuba’mba mwatemwa bino bintu mambo mwashikwa bubela ne bintu byonse byatama. (Tangai Salamo 119:128, 163.) Muntu wa bubela ulondela Satana mfumu wa pano pa ntanda. (Yoa. 8:44; 12:31) Satana ukebesha bingi kuba bintu bileta mwenga pa jizhina jazhila ja Yehoba Lesa. Satana watwajijila kwamba bya bubela pe Lesa kufumatu kimye kyo aambile bubela butanshi mu Edena. Walengejile bantu kulanguluka’mba Yehoba witemwatu mwine ne kuba’mba ke Mfumu wabula bukishinka kabiji amba utana bantu bintu byawama. (Nte. 3:1, 4, 5) Bubela bwa kwa Satana bwalengela bantu kutwajijila kulanguluka byatama pe Yehoba. Inge bantu bafuukulapo kubula ‘kutemwa bukine,’ Satana wibalengela kutendeka kuba bintu byatama.—Loma 1:25-31.
4. Yehoba wamwesha byepi kuba’mba ke “Lesa wa bukine”? (Monai ne kipikichala.)
4 Yehoba ke “Lesa wa bukine,” kabiji ufunjisha bantu bonse bamutemwa buno bukine. (Sala. 31:5) Na mambo a kuba bino, wibakwasha pa kuba’mba babule kujimbaikwa na bubela bwa kwa Satana. Kabiji Yehoba ufunjisha bantu banji kwikala ba kishinka kabiji baoloka. Kino kibalengela kunemekwa ne kwikala na mutende wa mu milanguluko. (Maana 13:5, 6) Kampe Yehoba wimubijile bino bintu kimye kyo mwafunjilenga Baibolo. Jishinda Yehoba jo obilamo bintu jikwasha bantu bonse kubikakotu ne anweba. (Sala. 77:13) Onkao mambo, mukeba kuba bintu byaoloka ku meso a Lesa. (Mat. 6:33) Mukeba bantu kuyuka bukine pe Yehoba ne kumwesha’mba byaambile Satana pe Lesa bya bubela. Mwakonsha kuba byepi bino?
5. Mwakonsha kulengela byepi bantu kuyuka bukine ne bololoke?
5 Mwakonsha kwikala na byubilo bimwesha’mba mwakana bubela bwa kwa Satana kabiji mutundaika bukine. Mwakonsha kumwesha’mba Yehoba ye kalama wenu kabiji mukeba kuba byaoloka ku meso anji. Mwakonsha kuba byepi bino? Lombai kwi Yehoba ne kumubuula’mba mwipana anweba bene kwi aye kabiji batizhiwai kumwesha’mba mwipana. Kutemwa bukine ne bololoke ko kwakonsha kwimulengela kufuukulapo kubatizhiwa.
MUTEMWAI YESU KILISHITU
6. Ñanyi bishinka biji pa Salamo 45:4 bimutundaika kutemwa Yesu Kilishitu?
6 Mambo ka o mwafwainwa kumutemenwa Yesu Kilishitu? Monai bishinka byawama biji pa Salamo 45:4. (Tangai.) Yesu watemenwe bingi bukine, kwipelula ne bololoke. Umvwe mwatemwa bukine ne bololoke, ko kuba’mba ne Yesu Kilishitu mwamutemwa. Akilangulukai Yesu byo akwashishe bantu kuyuka bukine ne bololoke. (Yoa. 18:37) Pano nanchi Yesu wamwesheshe byepi kwipelula?
7. Kwipelula kwa kwa Yesu kwimulengela kumvwa byepi ku muchima?
7 Byaubilenga Yesu bimwesha’mba wipelula. Kabiji byonse byaubilenga Yesu byamwesheshenga’mba ubena kutumbijika Shanji, kechi aye mwine ne. (Mako 10:17, 18; Yoa. 5:19) Kwipelula kwa kwa Yesu kwimulengela kumvwa byepi ku muchima? Kwimulengela kumutemwa ne kumulondela. Mambo ka Yesu o epelwila? Mambo watemwa Shanji, wipelula kabiji uba byonka byuba Shanji. (Sala. 18:35; Hebe. 1:3) Nanchi kechi mwamutemwa Yesu umwesha byubilo bijipo ne Yehoba nenyi?
8. Mambo ka o twatemenwa kuba’mba Yesu ye Mfumu wetu?
8 Twamutemwa bingi Yesu Mfumu wetu mambo ke Kalama wawama. Yehoba ye wafunjishe mwananji ne kumutongola kwikala kalama. (Isa. 50:4, 5) Kabiji langulukai pa butemwe bwa kwa Yesu bo amwesheshe. (Yoa. 13:1) Na mambo a kuba’mba Yesu ye Mfumu wenu mwafwainwa kumutemwa. Walumbulwile kuba’mba utela boba bamutemwa’mba balunda nanji kabiji bamwesha’mba bamutemwa inge ke balondele mikambizho yanji. (Yoa. 14:15; 15:14, 15) Kyanema bingi kwikala mulunda na Mwana Yehoba.
9. Lubatizhilo lwa bena Kilishitu lwipasha byepi na lwa kwa Kilishitu?
9 Mukambizho umo wa kwa Yesu ke wa kuba’mba baana banji ba bwanga bafwainwa kubatizhiwa. (Mat. 28:19, 20) Aye mwine wabatizhiwe. Lubatizhilo lwanji lwapusana na lwa baana banji ba bwanga mu mashinda avula. (Monai kakitenguluzha ka kuba’mba “ Lubatizhilo lwa kwa Yesu Lwapusana Byepi na lwa Baana Banji ba Bwanga?”) Bino mu mashinda akwabo lwipasha. Yesu byo abatizhiwe wipaine mwine kuba kyaswa muchima wa Shanji. (Hebe. 10:7) Baana ba bwanga ba kwa Kilishitu nabo inge babatizhiwa, bamwesha patoka’mba bepana kwi Yehoba Lesa. Pano kintu kyo banemeka mu bwikalo bwabo ke kuba kyaswa muchima wa Lesa, kechi kuba kyaswa muchima wabo ne. Onkao mambo, balondela byaubile Nkambo yabo.
10. Kutemwa Yesu kwakonsha kwimulengela byepi kufuukulapo kubatizhiwa?
10 Mwaitabila kuba’mba Yesu ye Mwana Yehoba yenkawa umotu kabiji ye Mfumu Lesa ye atongola kwitulama. Twayuka kuba’mba Yesu wipelula kabiji ulondelatu sukasuka byuba Shanji. Kabiji mwafunda kuba’mba wajishishe bajinga na nzala, watekeneshe bapopomenwe kabiji wabukile bakolelwe. (Mat. 14:14-21) Mwimwena byo abena kutangijila kipwilo kyanji lelo jino. (Mat. 23:10) Kabiji mwayuka kuba’mba byo aji Mfumu wa Bufumu bwa Lesa, ukoba bintu byawama kulutwe. Mwakonsha kumwesha byepi kuba’mba mwamutemwa? Mwakonsha kuba bino, inge kemulondele byo aubanga. (Yoa. 14:21) Kintu kitanshi kyo mwakonsha kuba ke kwipana kwi Yehoba ne kubatizhiwa.
MUTEMWAI YEHOBA LESA
11. Ñanyi kintu kyanema kyakonsha kwimulengela kubatizhiwa, kabiji mambo ka?
11 Ñanyi kintu kyanema kyakonsha kwimulengela kubatizhiwa? Yesu waambile mukambizho mukatampe wa Lesa amba: “Wafwainwa kutemwa Yehoba Lesa wobe na muchima wobe yense ne na mweo wobe yense ne na maana obe onse ne na bulume bobe bonse.” (Mako 12:30) Nanchi a bino byo byo mwamutemwa Lesa nyi?
Yehoba ye Nsulo ya bintu byonse byawama byo mwiyowa luno kabiji byo mukatwajijila kwiyowa (Monai mafuka 12-13
12. Mambo ka o mwamutemenwa Yehoba? (Monai ne kipikichala.)
12 Kuji bintu byavula bingi byakonsha kwimulengela kutemwa Yehoba. Kishinka kimo ke kya kuba’mba, twayuka kuba’mba ye “nsulo ya bumi” ne kuba’mba ye upana “bya bupe byonse byawama ne byalumbuluka.” (Sala. 36:9; Yako. 1:17) Byonse byawama byo twiyowa bifuma kwi Lesa wetu wa butemwe kabiji mpanyi.
13. Mambo ka bukuzhi o bwaikela bupe bwanema bingi?
13 Bukuzhi ke bupe bwanena bingi bwitupa Yehoba. Mambo ka o twaambile bino? Langulukai pa bulunda buji pe Yehoba ne mwananji. Yesu waambile’mba: ‘Batata bantemwa’ ne kuba’mba “natemwa Batata.” (Yoa. 10:17; 14:31) Bulunda bwabo bwakosele bingi byo bajinga pamo myaka yavula bingi. (Maana 8:22, 23, 30) Pano langulukai Lesa byo kyamukolele ku muchima pa kuswisha Mwananji kumanama ne kufwa. Yehoba watemwa bingi bantu, kubikapotu ne anweba kya kuba wapaine Mwananji yenkawa umotu kwikala kitapisho pa kuba’mba anweba ne bantu bakwabo mwikale myaka ne myaka. (Yoa. 3:16; Nga. 2:20) Kino kyo kishinka kikatampe kitulengela kutemwa Lesa.
14. Ñanyi kintu kyawama kyo mwafwainwa kufuukulapo kuba mu bwikalo bwenu?
14 Butemwe bo mwatemwa Yehoba bwabayile byo mwafunjile byavula pe aye. Mukebesha bingi kufwenya kwipi ne aye luno ne myaka ne myaka. Ne kya kine mwakonsha kufwenya kwipi ne aye. Wimutundaika kusangajika muchima wanji. (Maana 23:15, 16) Mwakonsha kumusangajika mu byo mwamba ne byo muba. Bintu byo muba mu bwikalo bwenu bikamwesha’mba kine mwatemwa Yehoba. (1 Yoa. 5:3) Kino kyo kintu kyawama kyo mwafwainwa kufuukulapo kuba.
15. Mwakonsha kumwesha byepi amba mwatemwa Yehoba?
15 Mwakonsha kumwesha byepi amba mwatemwa Yehoba? Patanshi mwafwainwa kulomba ne kwipana anweba bene kwi Lesa wa kine. (Sala. 40:8) Kepo mwafwainwa kubatizhiwa pa kuba’mba mumweshe patoka kuba’mba mwipaine kwi Lesa. Byonka byo twisambapo kala mu uno mutwe, juba ja kubatizhiwa ke juba janema bingi kabiji ja lusekelo mu bwikalo bwenu. Mutendeka kwikala bwikalo bupya bwa kutookesha Yehoba ku muchima. (Loma 14:8; 1 Pe. 4:1, 2) Kino kyo kintu kyanema kyo mwafwainwa kufuukulapo. Kabiji kufuukulapo kuba bino kukemulengela kwikala bwikalo bwawama. Mu ñanyi jishinda?
16. Kwesakana na byaamba Salamo 41:12, ñanyi bintu Yehoba byo apa bamwingijila?
16 Yehoba mpanyi bingi. Witupa bintu byakila kyonse kyo twakonsha kumupa. (Mako 10:29, 30) Nangwatu mu ino ntanda yatama, witupa bintu byawama bitulengela kwikala na lusekelo mu bwikalo bwetu. Kino kibena kulumbulula’mba uketupa bintu byawama byavula kulutwe. Umvwe mwabatizhiwa kechi yo mpelo ne. Yo ntatwilo ya kwingijila Shenu wimutemwa myaka ne myaka. Mukatwajijila kubayisha butemwe bo mwatemwa Shenu kabiji mukekalanga myaka ne myaka nobe aye.—Tangai Salamo 41:12.
17. Ñanyi kintu kyabula Yehoba kyo mwafwainwa kumupa?
17 Umvwe mwipana kwi Lesa ne kubatizhiwa ko kuba’mba mwapana kintu kyanema bingi kwi Shenu. Wimupa bintu byawama ne kwimulengela kwikala na lusekelo. Kino kyakonsha kwimulengela kupa mwine mwina jiulu ne ntanda kintu kyo abula, ko kuba’mba mwafwainwa kwipana ne kutwajijila kumwingila. (Yoba 1:8; 41:11; Maana 27:11) Kabiji kwipana ne kwingijila Yehoba kyo kintu kyawama kyo mwafwainwa kuba mu bwikalo bwenu. Butemwe bo mwatemwa Yehoba bo bwafwainwa kwimulengela kubatizhiwa.
NANCHI MWAFIKILAMO KUBATIZHIWA NYI?
18. Ñanyi mepuzho o mwafwainwa kwishikisha anweba bene?
18 Nanchi mwafikilamo kubatizhiwa nyi? Mwakonsha kukumbula’mba ka buno bwipuzho? Anweba yenu mwakonsha kukumbula. Saka mukyangye kukumbula mwakonsha kwishikisha’mba: ‘Mambo ka o mbena kukankazhamina kubatizhiwa?’ (Byu. 8:36) Vulukai bishinka bisatu byo twisambapo kala. Kitanshi temwai bukine ne bololoke. Kya bubiji, temwai Yesu Kilishitu, ne kya busatu kya kilamo kunema, temwai Yehoba. Ishikishai’mba: ‘Nanchi mbena kukeba kukamona kimye bantu bonse kyo bakambanga bya kine ne kuba bintu byaoloka nyi? Nanchi mbena kukeba Mwana Lesa kwikala Mfumu wami ne kwikala na byubilo byo ajipo nabyo nyi? Nanchi ñingijila Yehoba ne kumusangajika nyi?’ Umvwe mwakumbula’mba ee, mambo ka o mubena kukankazhamina kubatizhiwa?—Byu. 16:33.
19. Mambo ka o mwafwainwa kubujila kukankazhama kubatizhiwa? Lumbululai. (Yoano 4:34)
19 Umvwe mubena kukankazhama kubatizhiwa langulukai pa byaambile Yesu. (Tangai Yoano 4:34.) Yesu waesakenye kuba kyaswa muchima wa Shanji ku kajo. Mambo ka? Mambo kajo kawama. Yesu wayukile kuba’mba bintu byonse bitubuula Yehoba byafwainwa kwitukwasha. Kabiji Yehoba kechi ukeba atweba kuba kintu kyakonsha kwituletela lukatazho ne. Nanchi Yehoba ukeba anweba kubatizhiwa nyi? Ee. (Byu. 2:38) Onkao mambo, mwafwainwa kushiinwa’mba mukamwenamo byawama inge mwakookela mukambizho wa kubatizhiwa. Inge kechi mwakonsha kukaana kajo ko mwatemwa ne, mambo ka akukankazhamina kubatizhiwa?
20. Ñanyi bintu byo tukesambapo mu mutwe walondelapo?
20 Nanchi mwafikilamo kubatizhiwa nyi? Bavula bakumbula’mba, “Kechi nafikilamo ne.” Kufuukulapo kwipana ne kubatizhiwa kyo kintu kyanema kyo mwafwainwa kuba mu bwikalo bwenu. Onkao mambo, mwafwainwa kulangulukapo bulongo saka mukyangye kufuukulapo kubatizhiwa, kabiji mwafwainwa kwibikangako pa kuba’mba mufikilemo. Bino umvwe mukebesha bingi kubatizhiwa, ñanyi bintu byo mwafwainwa kuba pa kuba’mba mufikilemo? Tukakumbula buno bwipuzho mu mutwe walondelapo.
LWIMBO 28 Kwikala Balunda na Yehoba
a Yense ufunda Baibolo wafwainwa kubatizhiwa. Ñanyi bintu byafwainwa kulengela ufunda Baibolo kufuukulapo kubatizhiwa? Ke butemwe. Bino ñanyi bintu byo afwainwa kutemwa? Mu uno mutwe tusakutaana mikumbu ya ano mepuzho ne kwisamba pa bwikalo bwetu byo bwafwainwa kwikala inge twabatizhiwa ne kwikala bena Kilishitu.
