Mambo ka mwanamulume ye batela’mba “Bakananga” kyo aambijile’mba inge wasongola Luta, ukonauna, buswanyi bwanji? (Luta 4:1, 6)

Kala kane inge mwanamulume wasongola wafwa kwa kubula kusemapo mwana: Ñanyi kintu kyo baubanga ku bujimi bwanji? Nanchi jizhina janji jafwainwe kuzhiya nyi? Mizhilo ya Mosesa isakwitukwasha kukumbula ano mepuzho.

Umvwe mwanamulume mwina bujimi wafwa, mulongo wanji ye waswananga bujimi. Nangwa inge mwanamulume wapotesha bujimi na mambo a buyanji mulongo wanji wa kumukuula ye wafwainwe kwibupotolola. Onkao mambo, bujimi bwatwajijilanga kwikala bwa kisemi.—Levi 25:23-28; Bala. 27:8-11.

Kino kyafwainwe kulengela byepi jizhina ja muntu wafwa kubula kuzhiya? Bukwe yanji nangwa mulongo wa yewa wafwa ye wamusongolanga jikwabo byonka byo kyajinga kwi Luta. Mwanamulume wasongolanga muka mulongo wanji wafwilwa pa kuba’mba awa wafwilwa aseme mwana ukaswana bujimi ne kulengela jizhina ja wafwa kubula kuzhiya. Kabiji luno lunengezho lwalengelanga kulama bulongo mwanamukazhi wafwilwa.—Mpitu. 25:5-7; Mat. 22:23-28.

Langulukai pe Naomi wasongwelwe ku mwanamulume aye Elimeleka. Elimeleka ne baana banji babiji byo bafwile, Naomi washajiletu kwa kubula mwanamulume wa kumulama. (Luta 1:1-5) Naomi byo abwelele na mulokazhi wanji aye Luta ku Yuda, waambijile mulokazhi wanji amba abuule Boaza kwibakuula ne kuswana bujimi bwajinga bwa mulongo wanji aye Elimeleka. (Luta 2:1, 19, 20, 3:1-4) Bino Boaza wayukile kuba’mba kuji ne mulongo mukwabo Baibolo ye atongola’mba “Bakananga.” Uno ye wafwainwe kwikala mutanshi kufuukulapo kwibakuula nangwa ne.—Luta 3:9, 12, 13.

Patanshi mwanamulume ye batela’mba “Bakananga” wipaine kukwasha Naomi ne mulokazhi wanji aye Luta. (Luta 4:1-4) Wayukile kuba’mba mali a kupota bujimi ye ukapana kabiji wayukile ne kuba’mba Naomi wakota kala kechi wakonsha kusema mwana ukaswana bujimi bwa kwa Elimeleka ne. Kananga wafwainwe kutambula buno bujimi ne kwikala ke kya buswanyi kyanji. Onkao mambo, inge waikele na bunonshi bwavula.

Kananga wapimpwile milanguluko yanji byo auvwine’mba wafwainwa ne kusongola Luta. Waambile’mba: “Kechi nakonsha kwibupota ne, kuchiina’mba nakonauna buswanyi bwami.” (Luta 4:5, 6) Mambo ka o akaine kwibupota?

Inge Kananga nangwa muntu mukwabo ye wasongwele Luta ne kusema mwana, uno mwana ye wafwainwe kwikala mwine mwina bujimi bwa kwa Elimeleka. Kino inge ‘kyaonawine’ byepi “buswanyi” bwa kwa Kananga? Baibolo kechi waambapo ne. Kyamweka kuji bintu bimo byalengejile.

• Kitanshi, mali o akebelenga kupotamo bujimi bwa kwa Elimeleka inge ayiletu mu mema. Mambo mu kuya kwa moba bujimi inge kechi bwaikele bwanji ne. Inge bwaikele bwa mwana wa kwa Luta.

• Kya bubiji, wakonsheshe kwikala na mwingilo wa kukebela kajo Naomi ne Luta ne kwibalama.

• Kya busatu, inge Luta wasemene baana bakwabo ne Kananga, bano baana bakonsheshe kwabana kya buswanyi na baana bakwabo ba kwa Kananga bo asemejile mu mwanamukazhi mukwabo.

• Kya buna, umvwe Kananga kechi wasemenepo mwana ne, mwana ye afwainwe kusemena mwi Luta ye wafwainwe kwikala na luusa pa bujimi bwa kwa Elimeleka ne bujimi bwa kwa Kananga. Onkao mambo, inge wafwa bujimi bwanji inge bwaikele bwa mwana walengejile jizhina ja kwa Elimeleka kubula kuzhiya. Kananga kechi wakebelenga konauna kya buswanyi kyanji na mambotu a kukeba kukwasha Naomi ne. Kananga wasajilepo kuba’mba Boaza ebakuule. Boaza waubile bino mambo wakebelenga’mba “jizhina ja muntu wafwa jibwele ku buswanyi bwanji.”—Luta 4:10.

Kyamweka Kananga watele muchima pa kulamawizha jizhina janji ne kya buswanyi kyanji. Walangulukilengatu pa bintu byamuwamijile aye mwine. Nangwa kya kuba kechi wakebelenga’mba jizhina janji jibule kuzhiya ne, bino jazhiya mambo kechi twayuka jizhina janji kufika ne lelo jino ne. Kabiji kechi watambwijile mapesho atambwijilepo Boaza a kwikala ke mushakulu wa kwa Mesiasa aye Yesu Kilishitu ne. Kananga byo akaine kukwasha bakajilwe ne kwitatu muchima aye mwine mwafuminetu mpwa kubula.—Mat. 1:5; Luka 3:23, 32.