1, 2. (a) Bakamonyi ba kwa Yehoba bamona byepi Baibolo? (b) Ñanyi binembelo bya mu Baibolo byo mwatemwa bingi?

ATWEBA Bakamonyi ba kwa Yehoba twatemwa bingi Baibolo. Mu Baibolo muji mikambizho itutekenesha ne kwitukwasha kwikala na luketekelo. (Loma 15:4) Baibolo kechi buku muji maana a bantu ne, bino ke “mambo a Lesa.”—1 Tesalonika 2:13.

² Bonse tuji na Binembelo bimo byo twatemwa bingi mu Baibolo. Bamo batemwa mabuku a Mambo Awama mambo ebafunjisha pa byubilo byawama bya Yehoba byamwekejile mwi Yesu. (Yoano 14:9) Bakwabo batemwa mabuku a bungauzhi, nabiji buku wa Lumwekesho, witumwesha “bintu bikamweka palutwe kacheche.” (Lumwekesho 1:1) Bamo kibatekenesha bingi inge batanga buku wa Masalamo, kabiji bakwabo nabo bamwenamo bingi mu kutanga buku wa Byambo bya Maana. Kine, Baibolo ke buku ukwasha bantu bonse.

3, 4. (a) Tumona byepi mabuku etu? (b) Ñanyi mabuku o banembele bantu bapusana pusana?

³ Na mambo a kuba twatemwa Baibolo, kino kitulengela kutemwa ne mabuku etu alumbulula Mambo a Lesa. Yehoba ye  witunengezhezha mabuku, mabuloshuwa ne magazini onse. Ano mabuku etukwasha kwikala balunda nanji ne kukosesha lwitabilo lwetu.—Titusa 2:2.

⁴ Mabuku etu avula beanembela Bakamonyi ba kwa Yehoba bonse. Nangwa byonkabyo, kuji mabuku amo o banembela kikatakata banyike nangwa bansemi. Bibaaba ne mavidyo avula aji pa keyala wetu wa pa Intaneti beanengezhezha kikatakata bantu babula Bakamonyi ba kwa Yehoba. Abino byonse bimweshatu patoka’mba Yehoba walama mulaye wanji wa kunengezhezha bantu bonse mikambizho.—Isaya 25:6.

5. Yehoba usanta inge twauba ka?

⁵ Atweba bavula tukankalwa kutaanapo kimye kyabaya kya kutanga Baibolo ne mabuku onse alumbulula Baibolo. Ibyo, Yehoba usanta bingi inge twaingijisha kimye kyetu bulongo mu kutanga ne kufunda Baibolo ne mabuku alumbulula Baibolo. (Efisesa 5:15, 16) Bino na mambo a kimye, twakonsha kutaana kuba’mba tubena kutatu maana ku kutanga mabuku amo, bino akwabo ne. Inge kyaikala bino, twafwainwa kujimuka bingi. Mambo ka?

6. Ñanyi bintu byakonsha kwitulengela kubula kumwenamo mu bintu bitupa Yehoba?

⁶ Inge twabula kujimuka, twakonsha kutendeka kulanguluka’mba Binembelo bimo nangwa mabuku amo alumbulula Baibolo kechi muji mafunjisho akonsha kwitukwasha ne. Tuba byepi inge twatanga kinembelo kibena kwamba pa bintu byo tubena kubula kupitamo mu bwikalo? Nangwa inge kya kuba awo buku bamunembela banyike, atweba saka twakoma? Nanchi tutangamotu kya lubilo lubilo, nangwa apo kampe ne kutangamotu nenyi? Inge ketube bino, twakonsha kushalapo pa bintu byanema byakonsha kwitukwasha. Twakonsha kuchinuzhuka byepi luno lukatazho? Twafwainwa kuvuluka’mba bintu byonse byo betunembela bifuma kwi Yehoba. Baibolo waamba’mba: “Amiwa yami Yehoba Lesa wenu, yenka wimufunjisha kuba’mba mumwenemo.” (Isaya 48:17) Mu uno mutwe, tusakwisamba pa mashinda asatu akonsha kwitukwasha kumwenamo mu byonse bitunengezhezha Yehoba.

7. Mambo ka o twafwainwa kutangilanga binembelo byonse bya mu Baibolo?

⁷ Tangainga binembelo byonse. Ibyo kuba’mba binembelo bimo mu Baibolo kuji bantu bo banembejile. Nangwa byonkabyo, Baibolo waamba’mba: “Binembelo byonse byanembelwe na lutangijilo lwa mupashi wa Lesa.” (2 Timoti 3:16) Onkao mambo, kimye kyo tubena kutanga Baibolo, kechi twafwainwa kusalanga binembelo ne. Mulongo umo wamba’mba kinembelo kimotu kyakonsha kumufunjisha byavula. Kino kimukwasha kumona byo akonsha kufunjilako ku kinembelo kyonse kyo abena kutanga mu Baibolo. Onkao mambo, saka tukyangye kutendeka kutanga Baibolo, twafwainwa kulomba Yehoba kwitupa maana a kumvwisha byo abena kwitufunjisha.—Ezela 7:10; tangai Yakoba 1:5.

8, 9. (a) Ñanyi mepuzho o twakonsha kwishikisha kimye kyo tubena kutanga Baibolo? (b) Kinembelo kyatongola bikebewa pa kwikala mukulumpe mu kipwilo kitufunjishapo ka pe Yehoba?

⁸ Ishikishainga mepuzho. Kimye kyo mubena kutanga Baibolo, mwakonsha kutulumanako ne kwishikisha ano mepuzho: ‘Kino kinembelo kibena kumfunjishapo ka pe Yehoba? Nakonsha kwingijisha byepi  bino byambo mu bwikalo bwami? Nakonsha kwibingijisha byepi mu kukwashako bakwetu?’ Inge ketulanguluke languluke pa ano mepuzho, tukamwenangamo bingi mu byo tutanga mu Baibolo. Twayai twisambeko pa bimo. Baibolo watongola bintu bikebewa pa kuba’mba muntu afikilemo kwikala mukulumpe mu kipwilo. (Tangai 1 Timoti 3:2-7.) Bino atweba bavula kechi twi bakulumpe mu kipwilo ne, onkao mambo, twakonsha kulanguluka’mba kafwako byo twakonsha kufunjilako ku kino kinembelo. Pano bino, twayai twishikishe mepuzho asatu atongolwa peulupo ne kumona byo twakonsha kufunjilako ku kino kinembelo.

⁹ “Kino kinembelo kibena kumfunjishapo ka pe Yehoba?” Yehoba watongola byonse bikebewa pa kuba’mba muntu afikilemo kwikala mukulumpe mu kipwilo. Ukeba’mba aba babena kutangijila bekale na byubilo byawama. Kino kimwesha’mba Yehoba wanemeka bingi kipwilo. Baibolo waamba’mba Lesa wapotele kipwilo “na mashi a Mwananji.” (Byubilo 20:28) Onkao mambo, Yehoba ukeba’mba bakulumpe mu kipwilo bekale ba kumwenako bawama, kabiji baketotolwela pa byo balama kipwilo. Ukeba’mba betuzhikijilenga. (Isaya 32:1, 2) Kino kinembelo kitufunjisha kuba’mba Yehoba wituta bingi muchima.

10, 11. (a) Kinembelo kyatongola bikebewa ku bakulumpe mu kipwilo kyakonsha kwitukwasha byepi mu bwikalo bwetu? (b) Twakonsha kwingijisha byepi bino byambo mu kukwasha bakwetu?

 ¹⁰ “Nakonsha kwingijisha byepi bino byambo mu bwikalo bwami?” Umvwe mwi bakulumpe mu kipwilo, mwafwainwa kupitulukangamo mu bintu bikebewa pa kuba’mba mutwajijila kuwamishako. Umvwe mubena “kukanamina mwingilo wa bukalama,” mwafwainwa kwibikako kufikizha bino bikebewa. (1 Timoti 3:1) Pano bino, bena Kilishitu bonse bakonsha kufunjilako ku bino bikebewa. Yehoba ukeba’mba atweba bonse tuyukenga pa kupelela mu bintu byonse ne kufuukulanga bintu bulongo. (Filipai 4:5; 1 Petelo 4:7) Inge bakulumpe mu kipwilo baikala “ba kumwenako jitanga,” twakonsha kufunjilako kwi abo ne kulondela “lwitabilo lwabo.”—1 Petelo 5:3; Bahebelu 13:7.

¹¹ “Nakonsha kwibingijisha byepi kukwashako bakwetu?” Twakonsha kwingijisha kinembelo kyatongola bikebewa ku bakulumpe mu kipwilo pa kukwasha bantu bo tufunjisha Baibolo kuyuka lupusano lujipo pa bakulumpe mu kipwilo ne bantangi ba bupopweshi. Kino kinembelo kyakonsha ne kwitukwasha kuvulukanga mwingilo mukatampe wingila bakulumpe mu kipwilo. Kuba bino kuketukwasha kunemeka bano balongo. (1 Tesalonika 5:12) Kabiji inge ketwibanemeke, bakengilanga mwingilo wabo na lusekelo.—Bahebelu 13:17.

12, 13. (a) Twakonsha kukebakeba byepi bishinka? (b) Ambai kya kumwenako kimwesha byo twakonsha kufunjilapo bintu bikwabo inge twakebakeba bishinka.

¹² Kebai bulongo bishinka. Kimye kyo tubena kutanga Baibolo, twakonsha kwishikisha mepuzho alondelapo:

• Ñanyi wanembele uno buku wa mu Baibolo?

• Kwepi ko bamunembejile, kabiji ñanyi kimye?

• Ñanyi bintu byamwekelenga kimye kyo banembele uno buku wa mu Baibolo?

Mikumbu ya ano mepuzho yakonsha kwitukwasha kufunjilapo bintu bikwabo byo twabujile kuyuka kala.

¹³ Kya kumwenako, pa Ezikyo 14:13, 14 paamba’mba: “Umvwe ba mu kyalo bandenga mambo a kungalukamo, nkatanyikila kuboko kwami pe abo ne konauna kajo kabo, kabiji nkebatumina kipowe kya nzala ne kwipaya bantu ne banyama bajimo. Nkambo Mfumu Yehoba waamba’mba, ‘Umvwe bano bantu basatu, Nowa, Danyela ne Yoba bajinga mu kino kyalo, inge bo bonkatu bapulukile na mambo a bololoke bwabo.’” Inge twakebakeba bishinka, tutaana kuba’mba Ezikyo wanembele bino byambo mu mwaka wa 612 Kilishitu saka akyangye kusemwa. Nangwa kya kuba wibinembele saka papita myaka yavula bingi kufuma pafwijile Nowa ne Yoba, bino Yehoba kechi walubilemo bukishinka bwabo ne. Danyela aye wakijinga mumi pa kyokya kimye. Kyamweka wajinga na myaka 20 kimye Yehoba kyo amutelele’mba ke muntu waoloka byonka  byajinga Nowa ne Yoba. Kino kitufunjishapo ka? Yehoba unemeka bakalume banji, nangwa inge bakijitu banyike.—Salamo 148:12-14.

14. Mabuku o banembela banyike ebakwasha byepi, kabiji bakwabo bakonsha kumwenamo byepi inge kebeatange? (Monai kipikichala kitanshi.)

¹⁴ Mabuku o banembela banyike. Twafunda kuba’mba twakonsha kumwenamo mu binembelo byonse bya mu Baibolo. Mu jishinda jimotu, twakonsha kumwenamo mu mabuku etu onse. Twayai twisambeko pa bya kumwenako bimo. Mu ano moba, Yehoba wanengezhezha banyike mabuku avula a kufundamo. ^[1] (Monai byambo bikwabo.) Ano mabuku ebakwasha kuyuka bya kwilama byo babena kukoma, ne bya kuba inge bebakanjikizha kuba byatama ku sukulu. Nga atweba bonse twakonsha kumwenamo byepi inge ketutange mabuku ne bibaaba byo banembela banyike? Inge ketutange bino bibaaba, tukayuka makatazho apitamo banyike ne byo twakosha kwibakwasha.

15. Mambo ka bena Kilishitu bakoma o bafwainwa kutelako muchima ku mabuku o banembela banyike?

¹⁵ Bena Kilishitu bakoma kechi bafwainwa kulengululanga mabuku a banyike ne. Byavula binembwa mu ano mabuku byakonsha kukwasha bena Kilishitu bonse. Atweba bonse twafwainwa kufunda bya kulwilako bintu byo twaitabilamo, kwikala na ndangulukilo yawama, kukana inge betukanjikizha kuba byatama ne kusala bulongo balunda ne bya kisangajimbwe. Onkao mambo, nangwa kya kuba ano mabuku beanembela banyike, bintu bijimo byafuma mu Baibolo kabiji bena Kilishitu bonse bakonsha kumwenamo mu kwibitanga.

16. Mabuku o banembela banyike ebakwasha kuba ka?

¹⁶ Mabuku o banembela banyike ebakwasha kukosesha bulunda bwabo ne Yehoba. (Tangai Musapwishi 12:1, 13.) Bino bakulumpe nabo bakonsha kumwenamo. Kya kumwenako, mu Labainga! wa Kibemba wa July–September 2009 mwajinga mutwe wa kuba’mba “Abacaice Bepusha Ukuti . . . Kuti Nacita Shani pa Kuti Ndeipakisha Ukubelenga Baibolo?” Mu uno mutwe mwajinga mashinda awama a kukwasha banyike. Mwajinga ne jipa pajinga kakitenguluzha ko bakonsha kulama bulongo ne kulondela mutanchi wa kutanga ujipo. Abya nanchi bakulumpe bamwenejilemo mu kino kibaaba nyi? Mwana mukazhi wasongolwa uji ne na baana waambile’mba wakankalwanga kutanga Baibolo. Bino walondejile mashinda aji mu kino kibaaba, kabiji luno umvwa bulongo kutanga Baibolo. Waambile’mba kimuletela bingi lusekelo pa kumona mabuku a mu Baibolo byo akwatankana. Wanungilepo amba, “Kutanga Baibolo kundetela bingi lusekelo.”

17, 18. Twakonsha kumwenamo byepi mu kutanga mabuku o banembela bena kengi? Ambai kya kumwenako.

¹⁷ Mabuku o banembela bena kengi. Kufumatu mu 2008, twamwenamo bingi mu kutambwila Kyamba kya Usopa kya kufundamo  kyo banembela kikatakata Bakamonyi ba kwa Yehoba. Bino kuji ne magazini o banembela bena kengi. Twakonsha kumwenamo byepi mu ano magazini? Twayai twisambe pa kya kumwenako kimo. Inge muntu ye mwaichile kwiya na kupwila ku Nzubo ya Bufumu waiya, mumvwa bingi bulongo. Kimye ñambi kyo abena kwamba jashi ja mvula bantu, mutendeka kulanguluka pa mwenyi wenu. Mwishikisha inge kya kuba ubena kumwenamo mu bintu byo abena kumvwa, ne byo byakonsha kumukwasha kupimpulako bwikalo bwanji. Kulanguluka pa bino bintu kwakonsha kwimulengela kutako maana ku jashi.

¹⁸ Kino kyo kyakonsha kwitumwekela inge ketutange magazini o banembela bena kengi. Kya kumwenako, mu Kyamba kya Usopa kya bena kengi ne mu bibaaba biji pa jw.org baingijisha byambo byapeela kumvwa pa kulumbulula Baibolo. Kutanga bino byambo kwitukwasha kuyukilapo byavula pa bukine bwa mu Baibolo bo twafunda kala. Kabiji kwitufunjisha ne mashinda akwabo a kulumbulwilamo bintu byo twaitabilamo mu mwingilo. Magazini wa Labainga! naye witukwasha kushiinwa amba kine Mulenga koaji. Witukwasha ne kuyuka byo twakonsha kulumbulwila bantu byo twaitabilamo.—Tangai 1 Petelo 3:15.

19. Twakonsha kumwesha byepi amba tusanta pa bitunengezhezha Yehoba?

¹⁹ Kine, Yehoba witupa mikambizho yavula yo twakonsha kumwenamo. (Mateo 5:3) Twayai tutwajijila kutanga byonse byo etunengezhezha ne kwibingijisha mu bwikalo bwetu. Inge twauba bino, tukamwenamo bingi kabiji tukamwesha Yehoba amba tusanta pa byonse byo etunengezhezha.—Isaya 48:17.