NANCHI mwakibikilapo kala kikonkwanyi mu mwingilo wa Lesa bino mwakankalwa kwikifikizha nyi? b Inge ibyo, kechi yenu bonka ne. Philip wakebelenga kuwamishako milombelo yanji ne kulombanga bimye byavula, bino kyamukatezhenga kutaana kimye kya kulomba. Erika wibikijile kikonkwanyi kya kufika bukiji ku kusambakana kwa kuya mu mwingilo, pano bino, wakelwanga javula. Tomáš waesekele bimye byavula kutanga Baibolo yense. Waambile’mba: “Kechi neyowanga kutanga Baibolo ne. Naesekele pa bimye bisatu, bino pa bino bimye byonse bisatu napelelangatu mu buku wa Bena Levi ne kwikileka.”

2. Mambo ka o twafwainwa kubujila kulefulwa inge kechi twafikizha kikonkwanyi kyo twibikijile mu mwingilo wa Lesa ne?

² Inge muji na kikonkwanyi kyo mwabula kufikizha, kechi mwafwainwa kulefulwa ne. Nangwatu kikonkwanyi kicheche kikebewa kimye ne kwingila na ngovu. Kukebesha kufikizha kikonkwanyi kyenu kumwesha’mba mwanemeka bingi bulunda bwenu ne Yehoba kabiji mukeba kumupa byawamisha. Yehoba wanemeka bingi byo mwibikako. Kabiji kechi ukeba anweba kuba byakila pa bulume bwenu ne. (Sala. 103:14; Mika 6:8) Onkao mambo, mwafwainwa kwibikila kikonkwanyi kyo mwafwainwa kufikizha. Ñanyi kintu kyo mwafwainwa kuba pa kuba’mba mufikizhe kikonkwanyi kyenu? Twayai twisambe pa bintu bimo byo mwakonsha kuba.

3. Mambo ka kwikala na kizaku o kwanemena?

³ Kyanema bingi kwikala na kizaku pa kuba’mba mufikizhe kikonkwanyi kyenu. Inge mwaikala na kizaku ne kukebesha kufikizha kikonkwanyi kyenu, mukengilanga bingi na ngovu. Kizaku twakonsha kwikyesakanya ku mukuku wa pa mukola ushinjika bwato ne kwibulengela kufika bukiji ko bubena kuya. Inge mukuku watwajijila, wakonsha kulengela muntu uji mu bwato kufika bukiji ko abena kuya. Kabiji inge mukuku wabaya, muntu ukafika bingi bukiji. Kyo kimotu, inge twaikala na kizaku, tukafikizha bikonkwanyi byo twibikila. Mulongo David wikala mu El Salvador waambile’mba: “Inge mwaikala na kizaku, mukengila na ngovu ne kubula kuswisha kintu nangwa kimo kwimulengela kukankalwa kufikizha kikonkwanyi kyenu.” Onkao mambo, mwafwainwa kuba byepi pa kuba’mba mutwajijile kwikala na kizaku?

4. Ñanyi kintu kyo twafwainwa kulombangapo? (Filipai 2:13) (Monai ne kipikichala.)

⁴ Lombainga pa kuba’mba mutwajijile kwikala na kizaku. Yehoba ukengijisha mupashi wanji wazhila kwimukwasha kufikizha kikonkwanyi kyenu. (Tangai Filipai 2:13.) Bimye bimo twibikila bikonkwanyi na mambo a kuba’mba kyo kintu kyo twafwainwa kuba, kabiji kyawama bingi kuba bino. Pano bino, kampe kechi twakonsha kwikala na kizaku kya kwibifikizha ne. Kino kyo kyamwekele kwi nyenga wa ku Uganda wa jizhina ja Norina. Wibikijile kikonkwanyi kya kutendeka kufunjisha muntu Baibolo, pano bino, kechi wajinga na kizaku ne, mambo walangulukilenga’mba kechi wafikilamo kwikala mufunjishi wawama ne. Ñanyi kintu kyamukwashishe? Washimikizhe’mba: “Nalombanga kwi Yehoba pa juba pa juba kuba’mba ankwashe kwikala na kizaku kya kufunjisha muntu Baibolo. Kabiji nebikileko kuwamisha busendwe bwami bwa kufunjisha. Byo papichiletu bañondo bacheche, naikele na kizaku kya kufunjisha muntu Baibolo. Mu yenkawa mwaka natendekele kufunjisha bantu babiji Baibolo.”

5. Ñanyi bintu byo twakonsha kulangulukapo byakonsha kwitulengela kubayisha kizaku kyetu kya kufikizha bikonkwanyi byo twibikila?

⁵ Langulukainga pa bintu bimubila Yehoba. (Sala. 143:5) Mutumwa Paulo walangulukilenga pa lusa lukatampe Yehoba lo amumwesheshe, kabiji kino kyamulengejile kwikala na kizaku kya kwingila mwingilo wa Yehoba. (1 Ko. 15:9, 10; 1 Timo. 1:12-14) Ne anweba inge ke mulanguluke languluke pa bimubila Yehoba, mukekala na kizaku kya kufikizha bikonkwanyi byenu. (Sala. 116:12) Langulukai pa kyakwashishe nyenga wa ku Honduras kufikizha kikonkwanyi kyanji kya kwikala painiya wa kimye kyonse. Waambile’mba: “Nalangulukile pe Yehoba byo antemwa. Wankwashishe kwikala mu jibumba janji. Wanta muchima kabiji unzhikijila. Kulanguluka languluka pa bino bintu kwalengejile butemwe bwami bo natemwa Yehoba kubayilako, kabiji natendekele kwingila na ngovu pa kuba’mba ntendeke bupainiya.”

6. Ñanyi kintu kikwabo kyakonsha kwitukwasha kubayisha kizaku kyetu?

⁶ Tai muchima pa bintu byawama bifuma mu kufikizha bikonkwanyi byo mwibikila. Monai kyakwashishe Erika ye twaambapo kala kufikizha  kikonkwanyi kyanji kya kufika bukiji ku kusambakana kwa kuya mu mwingilo. Waambile’mba: “Namwene kuba’mba nashalangapo pa bintu byavula na mambo a kukelwa ku kusambakana kwa kuya mu mwingilo. Bino kufika bukiji kunkwasha kwimuna balongo ne banyenga ne kwikalako na kimye kya kwisamba nabo. Kabiji kuteleka ku mashinda o bengijisha mu mwingilo kunkwasha kwingila bulongo mwingilo ne kuwamishako busendwe bwami bwa kusapwila.” Erika watele muchima pa byawama byakonsha kufumamo mu kufika bukiji ku kusambakana kwa kuya mu mwingilo, kabiji wafikizhe kikonkwanyi kyanji. Ñanyi bintu byawama byo mwafwainwa kutapo muchima? Inge mwibikila kikonkwanyi kya kutanga Baibolo nangwa kuwamishako milombelo yenu, langulukai pa kyo kyo kikonkwanyi byo kikemukwasha kukosesha bulunda bwenu ne Yehoba. (Sala. 145:18, 19) Inge kikonkwanyi kyenu kya kwikala na kyubilo kimo kya bwina Kilishitu, tai muchima pa byo kyakonsha kwimukwasha kuwamishako bulunda bwenu na bakwenu. (Kolo. 3:14) Nembai bishinka byafwainwa kwimulengela kufikizha kikonkwanyi kyenu. Talaingapo kimye kyonse pa bino bishinka byo mwanemba. Ba Tomáš bo twaambapo kala, baambile’mba: “Inge naikala na bishinka byavula byakonsha kundengela kufikizha kikonkwanyi kyami, ñingila na ngovu kwikifikizha.”

7. Ñanyi bintu byakwashishe ba Julio ne benakwabo kufikizha kikonkwanyi kyabo?

⁷ Pwanañanainga na bantu bemutundaika kufikizha kikonkwanyi kyenu. (Maana 13:20) Langulukai pa byakwashishe ba Julio ne benakwabo kufikizha kikonkwanyi kyo bebikijile kya kwingilako pakatampe mwingilo wa kusapwila. Ba Julio baambile’mba: “Twasajile balunda betutundaikanga kufikizha kikonkwanyi kyetu, kabiji twisambanga nabo pa byo twafwainwa kuba pa kuba’mba tufikizhe kikonkwanyi kyetu. Bavula pa bano, bafikizhe kala bikonkwanyi byabo bipashako na byetu, onkao mambo, betubuulangako byo twafwainwe kuba pa kuba’mba tufikizhe kikonkwanyi kyetu. Bano balunda netu betwipuzhanga byo twanengezha bintu, kabiji betutundaikanga inge kyakebewa.”

8. Ñanyi kintu kyakonsha kumweka inge ke twingijiletu pa kikonkwanyi kyo twibikila inge tuji na kizaku? (Monai ne kipikichala.)

⁸ Kwambatu kine, atweba bonse kwikala moba amo o tubula kwikala na kizaku. Nanchi kino kibena kulumbulula’mba kechi twakonsha kufikizha kikonkwanyi kyetu nenyi? Ine. Langulukai pa kino: Mukuku wakonsha kwikala na bulume bwa kushinjika bwato kwibutwala ko bubena kuya. Pano bino, bimye bimo, mukuku kechi wakonsha kwikala na bulume ne, kabiji pa moba amo kyakonsha kumwekatu nobe mema kechi abena kwenda mu mukola ne. Nanchi kino kibena kulumbulula’mba muntu ubena kuvuwa bwato kechi wakonsha kwenda nenyi? Ine. Muntu uji mu bwato wakonsha kutwajijila kuvuwa pa kuba’mba afike ko abena kuya. Kizaku kyetu twakonsha kwikyesakanya ku mukuku. Moba amo twakonsha kwikala na kizaku kyabaya, bino pa moba akwabo kizaku kyakonsha kukepa. Kabiji moba amo twakonsha kumona nobe kechi tuji na kizaku kya kufikizha kikonkwanyi kyetu ne. Onkao mambo, inge ke twingijiletu pa kikonkwanyi kyo twibikila  kimye kyo tuji na kizaku, kechi tukafikizha kikonkwanyi kyetu ne. Byonkatu muntu uvuwa bwato byo akonsha kwingijisha mashinda akwabo pa kuba’mba afike ko abena kuya, ne atweba twafwainwa kwingijila pa kufikizha kikonkwanyi kyetu nangwa inge kechi tuji na kizaku ne. Nangwa kya kuba kechi kyapeela kuba bino ne, bino mukekala na lusekelo inge mwafikizha kikonkwanyi kyenu. Saka tukyangye kwisamba pa byo mwakonsha kuba, twayai twisambe pa bwipuzho bo mwakonsha kwipuzha.

9. Nanchi kyatama kutwajijila kufikizha kikonkwanyi kyetu nangwa inge kechi tuji na kizaku kya kuba byobyo nenyi? Lumbululai.

⁹ Yehoba ukeba atweba kumwingijila na lusekelo ne kwipana. (Sala. 100:2; 2 Ko. 9:7) Onkao mambo, nanchi twakonsha kwikanjikizha kufikizha kikonkwanyi kyo twamona’mba kechi twakonsha kwikifikizha nenyi? Langulukai pa byaubile mutumwa Paulo. Waambile’mba: “Mpumapuma mubiji wami ne kumutwala mu buzha.” (1 Ko. 9:25-27) Nangwatu kimye Paulo kyo abujile kizaku kya kuba bintu byakebelenga Yehoba amba obe, wikanjikizhe kuba byo byo bintu. Nanchi Yehoba wamwenejilemo lusekelo mu bintu byamubijile Paulo nyi? Ee. Kabiji Yehoba wamufwetele pa kwibikako kwanji.—2 Timo. 4:7, 8.

10. Ñanyi bintu byawama bifuma mu kwibikako kufikizha kikonkwanyi kyetu nangwatu inge kechi tuji na kizaku ne?

¹⁰ Kyo kimotu, Yehoba utemwa bingi inge witumona na kwingijila pa kikonkwanyi kyetu nangwatu inge kechi tuji na kizaku kya kuba byobyo ne. Usangalala mambo a kuba’mba nangwa kya kuba bimye bimo kechi tutemwa kintu kyo tubena kuba ne, bino wayuka’mba tubena kwikyuba na mambo a kuba’mba twamutemwa. Byonkatu Yehoba byo apesheshe Paulo, ne atweba uketupesha inge twibikako. (Sala. 126:5) Kabiji inge twimwena Yehoba byo abena kwitupesha, tukekala na kizaku kya kwingila. Nyenga wa ku Poland wa jizhina ja Lucyna waambile’mba: “Bimye bimo, kechi nkeba kuya mu mwingilo wa kusapwila ne, kikatakata inge nakooka. Nangwa byonkabyo, lusekelo lo ngikala nabo pa kufuma mu mwingilo, ke kya bupe kya kukumya.” Onkao mambo, twayai tumone byo twakonsha kuba inge twabula kwikala na kizaku.

11. Yehoba wakonsha kwitukwasha byepi kwikala na kyubilo kya kwikanya?

¹¹ Lombainga kuba’mba mwikale na kyubilo kya kwikanya. Kwikanya kulumbulula kubula kuba byatama. Kabiji kwikanya kukebewa pa kuba’mba tubenga byawama, kikatakata inge mwingilo wakatazha nangwa inge kechi tuji na kizaku ne. Vulukainga’mba kwikanya ke kipangwa kya mupashi. Onkao mambo, lombainga kwi Yehoba kuba’mba emupe mupashi wanji wazhila kuba’mba emukwashe kwikala na kino kyubilo kyawama. (Luka 11:13; Nga. 5:22, 23) Ba David bo twaambapo kala balumbulwile lulombelo byo lwibakwashishe. Bakebele kwikalanga na lufunjisho lwa pa bunke kimye kyonse. Baambile’mba: “Nalombanga kwi Yehoba kuba’mba ankwashe kwikala na kyubilo kya kwikanya. Na bukwasho bwanji natendekele kwikala na mutanchi wawama wa kufunda kabiji kechi nakilaukilanga ne.”

12. Jifunde jiji pa Musapwishi 11:4 jitukwasha byepi kufikizha bikonkwanyi byetu?

¹² Kange mupembelelenga’mba kana bintu bikawame ne. Mu ino ntanda, bintu kechi bikawamapo ne. Inge ke tupembelele’mba kana bintu bikawame, kechi tukafikizha kikonkwanyi kyetu ne. (Tangai Musapwishi 11:4.) Mulongo wa jizhina ja Dayniel waambile’mba: “Kechi kukekalapo bimye byawama ne. Onkao mambo, kechi twafwainwa kupembelela ne, twafwainwatu kutendekako.” Mulongo wa ku Uganda wa jizhina ja Paul, waambile pa kishinka kikwabo kyafwainwa kwitulengela kubula kuzhinyazhinya. Waambile’mba: “Inge twatendekako nangwa kya kuba bintu byakatazha, Yehoba uketupesha.”—Mala. 3:10.

13. Mambo ka o kyawamina kutendekelapo na bikonkwanyi bicheche pa kuba’mba mufikizhe kikonkwanyi kyenu?

¹³ Tendekelaipo na bikonkwanyi byapeela. Kizaku kyakonsha kupwa inge kya kuba kikonkwanyi kyetu kyakatazha kwikifikizha. Inge byo byo kiji kwi anweba, nanchi kechi mwakonsha kwabanya kikonkwanyi kyenu mu tubikonkwanyi tuchetuche nenyi? Inge mwibikila kikonkwanyi  kya kwikalapo na kyubilo kimo kya bwina Kilishitu, mwakonsha kutendeka kwikimwesha mu tubintu tucheche. Inge mwibikila kikonkwanyi kya kutanga Baibolo, mwakonsha kulenga mutanchi wa kutangakotu byepelo bicheche. Ba Tomáš bo twaambapo ku ntatwilo, kibakatezhe bingi kufikizha kikonkwanyi kyabo kya kutanga Baibolo yense mu mwaka umo. Baambile’mba: “Namwene kuba’mba natangilenga bitango byavula pa kimye kimo. Onkao mambo, nafuukwilepo kwesekako jikwabo, bino pa kikye kimye, nanengezhezhe kutanga byepelo bicheche pa juba pa juba ne kulangulukapo. Kyafuminemo, natendekele kwiyowa kutanga.” Ba Tomáš’ byo batendekele kwiyowa kutanga, kibatundaikile kutendeka kutanga byepelo byavula. Kabiji batangile Baibolo yense. c

14. Ñanyi bintu byakonsha kwitubwezha panyuma?

¹⁴ Nangwa kya kuba tuji na kizaku nangwa twibikako byepi, kwakonsha kumweka kintu kyakonsha kwitubwezha panyuma. Nabiji “bintu bya kubula kuketekela” byakonsha kwitujiila kimye kyo tukeba kwingijisha pa kuba’mba tufikizhe kikonkwanyi kyetu. (Sapwi. 9:11) Kampe twakonsha kupita mu lukatazho lwakonsha kwitulengela kulefulwa ne kwitupwishisha bulume. (Maana 24:10) Bumbulwa kulumbuluka bwakonsha kwitulengela kuba bintu byakonsha kulengela kyakatazha kufikizha kikonkwanyi kyetu. (Loma 7:23) Nangwa kampe twakonsha kukooka. (Mat. 26:43) Ñanyi kintu kyakonsha kwitukwasha kubula kubwela panyuma?

15. Mambo ka o mwafwainwa kubujila kuleka kufikizha bikonkwanyi byenu nangwatu inge kya kuba bintu byakatazha? Lumbululai. (Salamo 145:14)

¹⁵ Vulukainga kuba’mba inge kwamweka kintu kyakonsha kwimulengela kubwela panyuma, kechi kilumbulula’mba mwakankalwa ne. Baibolo waamba’mba twakonsha kupita mu makatazho bimye byavula. Nangwa byonkabyo, waamba ne kuba’mba twakonsha kufikizha kikonkwanyi kyetu na bukwasho bwa Yehoba. (Tangai Salamo 145:14.) Mulongo wa jizhina ja Philip ye twaambapo kala waambile’mba: “Kechi nta muchima pa bimye byo nakankalwa kufikizha kikonkwanyi  kyami ne. Bino ntatu muchima pa kutendeka jikwabo kuba bintu byakonsha kundengela kufikizha kikonkwanyi kyami.” Ba David bo twaambapo kala nabo baambile’mba: “Bintu byakonsha kumbwezha panyuma kechi nebimona’mba mikiika ne, bino nebimona’mba jo jishinda jo nakonsha kumwesheshamo Yehoba amba namutemwa bingi.” Inge mwatwajijila kwibikako kufikizha bikonkwanyi byenu, nangwa kya kuba mubena kupita mu makatazho, mumwesha’mba mukeba kutokesha Yehoba ku muchima. Yehoba usangalala bingi inge wamona byo mwibikako kufikizha bikonkwanyi byenu.

16. Mwakonsha kufunjilako ka ku bintu bimulengejile kubula kufikizha kikonkwanyi kyenu?

¹⁶ Funjilaiko ku bintu bimulengejile kubula kufikizha bikonkwanyi byenu. Langulukai pa kyamwekele ne kwishikisha’mba, ‘Nakonsha kuba byepi pa kuba’mba kino kikabule kumweka jikwabo?’ (Maana 27:12) Bimye bimo inge kimukatazha kufikizha kikonkwanyi kyo mwibikijile, kyakonsha kumwesha’mba mwibikijile kikonkwanyi kyakila pa bulume bwenu. Inge mwamona’mba bino byo byo kiji kwi anweba, pitulukaimo jikwabo mu kikonkwanyi kyenu ne kumona inge mwakonsha kwikifikizha nangwa ne. d Yehoba kechi ukamona’mba mwakankalwa inge mwabula kufikizha kikonkwanyi kyakila pa bulume bwenu ne.—2 Ko. 8:12.

17. Mambo ka o twafwainwa kuvulukilanga mingilo yo twaingila?

¹⁷ Vulukainga mingilo yo mwaingila. Baibolo waamba’mba “Lesa waoloka kabiji kechi wakonsha kuvulama mingilo yenu ne.” (Hebe. 6:10) Onkao mambo, ne anweba kechi mwafwainwa kulubamo mingilo yo mwaingila ne. Langulukainga pa bintu byo mwauba, nabiji kwikala balunda ne Yehoba, kubuulako bantu pe aye, nangwa kubatizhiwa. Byonkatu byo mwibikileko kufikizha bikonkwanyi bya mu mwingilo wa Lesa kunyuma, twajijilai kwingila na ngovu pa kuba’mba mufikizhe ne kikonkwanyi kyo mwibikila luno.—Fili. 3:16.

18. Byo tubena kwibikako kufikizha bikonkwanyi byetu, twafwainwa kuvulukanga ka? (Monai ne kipikichala.)

¹⁸ Na bukwasho bwa Yehoba, mwakonsha kufikizha kikonkwanyi kyenu, byonkatu muntu ubena kuvuwa bwato byo afika ko abena kuya. Bino vulukainga kuba’mba bantu bavuwa maato beyowa bingi lwendo lwabo. Ne anweba byo mubena kwibikako kwingila mingilo yakonsha kwimulengela kufikizha kikonkwanyi kyenu, langulukainga pe Yehoba byo abena kwimukwasha, ne kuba’mba ukemukwasha kwikala na lusekelo byo mubena kwibikako kufikizha bikonkwanyi byenu. (2 Ko. 4:7) Inge mwabula kubwela panyuma, mukatambula mapesho avula kulutwe.—Nga. 6:9.