1-2. Bayudea baikalanga mu Babilona bafwainwe kufuukulapo kuba ñanyi kintu kyanema? (Ezela 1:2-4)

 MYAKA 70 byo yapwile, mfumu waambijile Bayudea bajinga mu Babilona kubwela kwabo ku Isalela. (Tangai Ezela 1:2-4.) Yehoba ye yenkatu wafwainwe kuba kino. Mambo ka o twaambila byo byo? Mambo Babilona javula wakananga kukasulula bakaili banji kubwela kwabo. (Isa. 14:4, 17) Bino pa kikye kimye Babilona bamushinjile, kabiji mfumu washinjile wakambizhe Bayudea kubwela ku kyalo kyabo. Kino kyalengejile Bayudea bonse kikatakata bansemi kufuukulapo kwikala monka mu Babilona nangwa kubwela kwabo. Kechi kyapeelejile bansemi kufuukulapo kyo bafwainwe kuba ne. Mambo ka?

² Bavula bakonsheshe kukankalwa kwenda museke walepa mambo bakotele. Kabiji Bayudea bavula basemekejilwe mu Babilona. Kafwako kukwabo ko bakikelepo kala ne. Abo kechi balangulukilenga’mba ku Isalela ko kwajinga kwabo ne, pano bino bayukile’mba ko kwafumine bashakulu babo. Bayudea bamo bajinga bingi na bunonshi mu Babilona. Kabiji kampe kyakatezhe bingi kusha mazubo abo awama ne busulu bwabo ne kuya ku mpunzha yo babujile kuyuka.

3. Yehoba wakonsheshe kufweta byepi Bayudea ba kishinka babwelele ku Isalela?

³ Bayudea ba kishinka bayukile kuba’mba bafwainwe kumwenamo bintu byavula inge basha mazubo nangwa busulu bwabo ne kubwela ku Isalela. Kintu kyanema kyavwangilemo mpopwelo yabo. Nangwa kya kuba mu Babilona mwajinga mapunzha kukila 50 a kupopwelamo balesa ba bubela, kechi mwajinga nzubo ya Yehoba mu yewa muzhi ne. Kechi mwajinga kya kusokelapo bitapisho bena Isalela kyo bakonsheshe kwingijisha kupainapo bitapisho monka mwayijile Mizhilo ya Mosesa ne. Kabiji kechi kwajinga jibumba ja bañanga jafwainwe kupana ino milambo  ne. Kabiji bantu bapopwelanga balesa ba bubela mu uno muzhi bavujile kukila banemekele Yehoba nangwa mizhilo yanji. Onkao mambo, Bayudea bavula batemenwe bingi Yehoba bakebeshe bingi kubwela kwabo na mulanguluko wa kukeba kubwezha mpopwelo ya kine.

4. Ñanyi bukwasho Yehoba bo alayile bayudea babwelelenga ku Isalela?

⁴ Museke wa kufuma ku Babilona kuya ku Isalela wajinga wa kwendapo bañondo bana. Nangwa kya kuba luno lwendo kechi lwapeelele ne, Yehoba wibalayile kuba’mba ukafumyapo mikiika yonse yafwainwe kwibalengela kubula kubwela kwabo. Isaya wanembele’mba: “Wamishai jishinda ja Yehoba! Mulengelai Lesa wetu mukwakwa waoloka wapita mungye. . . . Mushiji walundumana mumwesakanye, ne pa mushiji paji mabwe ne bichi pesakane nobe mu musanza.” (Isa. 40:3, 4) Fwanyikizhai mukwakwa ye baesakanya bulongo wapita mungye. Bantu mo bakonsha kumvwa bulongo kwendamo. Mwabula mishupiko nangwa kuzhoka mitumba, tutumbatumba nangwa kwenda mu musanza, bakonsha kufika bukiji.

5. Ñanyi jizhina jo batumbile mukwakwa wa kifwanyikizho wafumine ku Babilona kuya ku Isalela?

⁵ Mu ano moba, mikwakwa ikatampe beitumba mazhina nangwa kwiipa manambala. Uno mukwakwa wa kifwanyikizho Isaya ye anembelepo naye wajinga na jizhina. Tutanga’mba: “Mukekala mukwakwa, utelwa’mba Mukwakwa Wazhila. Awa yense uba byatama kechi ukendamo ne.” (Isa. 35:8) Uno mulaye walumbulwilenga ka ku bena Isalela bajingako kala? Kabiji ulumbulula ka kwi atweba lelo jino?

6. Mambo ka uno mukwakwa o bamutelejile’mba wazhila?

⁶ “Mukwakwa Wazhila” ke jizhina jawama bingi jo mwafwainwa kutumba mukwakwa. Mambo ka mukwakwa o bamutelejile’mba wazhila? Mambo “yense uba byatama,” ko kuba’mba Muyudea yense wajinga na byubilo byatama, wapopwelanga bankishi nangwa walengele mambo a bulala kechi bakonsheshe kumuswisha mu Isalela ne. Bayudea bonse babwelelenga ku Isalela bafwainwe kwikala “bantu bazhila” kwi Lesa wabo. (Mpitu. 7:6) Kino kibena kulumbulula’mba, bonse bafumine mu Babilona bafwainwe kupimpula byubilo byabo pa kuba’mba batokeshenga Yehoba ku muchima.

7. Ñanyi lupimpu Bayudea bamo lo bafwainwe kuba? Lumbululai.

⁷ Byonka byo twaambapo kala, Bayudea bavula basemekejilwe mu Babilona, kabiji kyamweka bavula batendekele kwikala na ndangulukilo ne byubilo byajinga na bena Babilona. Byo papichile myaka yavula kufuma kimye Bayudea batanshi kyo babwelele ku Isalela, Ezela bamubuujile kuba’mba Bayudea bamo basongwelenga banabakazhi babulanga kupopwela Yehoba. (Lupu. 34:15, 16; Eze. 9:1, 2) Kabiji palutwe kacheche, Kinemanga aye Nehemiya wakuminye bingi byo ayukile’mba baana bamo basemekejilwe mu Isalela kechi bayukile mulaka wa Bayudea ne. (Mpitu. 6:6, 7; Ne. 13:23, 24) Bano baana bakonsheshe byepi kutemwa Yehoba ne kumupopwela byo babujilenga kumvwa Kihebelu, mulaka mwanembejilwe Mambo a Lesa? (Eze. 10:3, 44) Onkao mambo, bano Bayudea bafwainwe kupimpula byubilo byabo. Kabiji kyafwainwe kwibapelela mambo pa kikye kimye mu Isalela bupopweshi bwa kine bwayilenga na kubwela pachepache.—Ne. 8:8, 9.

8. Nanchi byamwekejile Bayudea kala byakonsha kwitumwekela ne atweba lelo jino nyi? (Monai kipikichala kya pa nkupiko.)

⁸ Kampe bamo bakonsha kutendeka kulanguluka’mba: ‘Nanchi bintu byamwekejile Bayudea kala, ne atweba byakonsha kwitumwekela  lelo jino nyi?’ Ee, byakonsha kwitumwekela, mambo byo tubena kuba bijitu nobe tubena kwenda mu “Mukwakwa Wazhila.” Inge twashingwa nangwa twi “mikooko ikwabo,” twafwainwa kutwajijila kwenda mu “Mukwakwa Wazhila.” Kuba bino kuketulengela kutwajijila kupopwela Yehoba byo tubena kutengela Bufumu bwa Lesa kuleta bintu byawama pano pa ntanda. b (Yoa. 10:16) Kutendekatu mu 1919 C.E., ma milyonyi a banabalume, banabakazhi ne baana bafuma mu Babilona Mukatampe, ko kuba’mba bupopweshi bwa bubela bwa ntanda yonse kabiji babena kwenda mu mukwakwa wa kifwanyikizho. Ne anweba muji pa bano bantu. Bantu bavula batendekele kwenda mu uno mukwakwa myaka nobe 100 yapitapo. Pakuba bakwabo batendekele kala kene kunengezha uno mukwakwa.

9. Kwesakana na byaamba Isaya 57:14, uno “Mukwakwa Wazhila” bamunengezhezhe byepi?

⁹ Yehoba wazhikijile Bayudea bafuminenga mu Babilona ku bintu byafwainwe kwibalengela kubula kwenda bulongo. (Tangai Isaya 57:14.) Nga Yehoba wauba ñanyi kintu ku “Mukwakwa Wazhila” wa mu ano moba? Pa myaka yavula mwaka wa 1919 saka akyangye kufika, Yehoba watendekele kwingijisha banabalume ba kishinka kukwasha bakwabo kufuma mu Babilona Mukatampe. (Esakanyaiko Isaya 40:3.) Bano banabalume baingijile bingi na ngovu kukwasha bantu bajinga na michima ya bukishinka kufuma mu bupopweshi bwa bubela ne kwibalengela kutendeka kupopwela Yehoba na bantu banji. Ñanyi bintu byavwangiwe mu “kulenga mukwakwa”? Twayai tumone byakebewenga pa kulenga uno mukwakwa.

10-11. Kupulinta ne kutuntulula Baibolo kwalengejile byepi bukine bwa mu Baibolo kusampana? (Monai ne kipikichala.)

¹⁰ Kupulinta. Byo kyafikilenga mu 1450, Baibolo bamukopolweletu na maboko. Nangwa byonkabyo, uno mwingilo watayile kimye kyabaya bingi, ma Baibolo akatezhe kwiataana kabiji ajinga bingi na mutengo. Inge kya kuba kwajinga munkinyi wa kwingijisha pa kulenga Baibolo, inge kyapelele kulenga ma Baibolo avula ne kwiapana ku bantu.

¹¹ Kutuntulula. Pa myaka yavula, Baibolo wajingatu mu Kilatini, mulaka waumvwangatu bantu bafunda. Minkinyi ya kwingijisha pa kupulinta byo yavujile, banabalume baakamwanga Yehoba baingijile bingi na ngovu kutuntulula Baibolo mu milaka yavula yaambanga bantu. Pano pa kikye kimye, batanga Baibolo batendekele kwesakanya byo bebafunjishenga ku bantangi ba bupopweshi na Baibolo byo afunjisha.

12-13. Lumbululai bafunda Baibolo byo batendekele kusolola mafunjisho a bubela.

¹² Mabuku a kwingijisha pa kufunjisha. Bafunda Baibolo bafunjile byavula pa byo batangilenga mu Mambo a Lesa. Pano bino bantangi babupopweshi bazhingijile bingi bafunda Baibolo byo batendekele kubuulako bakwabo bintu byo bafunjilenga. Nabiji kutendeka mu 1835, jibumba ja banabalume ba kishinka jatendekele kulenga matalakiti asolwele mafunjisho a bubela afunjishanga bantangi ba mu machechi.

¹³ Nobe mu 1835, ufunda Baibolo umo wa jizhina ja Henry Grew wanembele talakiti waambilenga pa kimweka inge muntu wafwa. Mu uno talakiti mwajinga Binembelo byalumbulwilenga’mba Lesa mwine ye yenkatu wakonsha kulengela muntu kwikala na mweo ubula kufwa, ko kuba’mba kechi tusemwa na mweo ubula kufwa byonka byafunjishanga machechi  avula ne. Mu 1837, wa mwingilo aye George Storrs wataine talakiti byo aendeshenga shitima. Byo atangile uno talakiti washiinwe kuba’mba wataana bukine. Kabiji wafuukwilepo kubuulako bakwabo bintu byo afunjile. Mu 1842, waambile majashi avula ajinga na mutwe wakuba’mba “Kukebakeba Bishinka—Nanchi Babi Baji na Mweo Ubula Kufwa Nyi?” Muntu umo wafunjile ku byanembele George Storrs wajinga Charles Taze Russell.

14. Mu ñanyi mashinda Mulongo Russell ne balunda nanji mo bamwenejilemo mu mwingilo wa kulenga mukwakwa waingijile banabalume bo twaambapo? (Monai ne kipikichala.)

¹⁴ Mu ñanyi mashinda Mulongo Russell ne balunda nanji mo bamwenejilemo mu mwingilo wa kulenga mukwakwa waingijile banabalume bo twaambapo? Pa kufunda Baibolo, bakebele kebelenga bishinka mu ma Baibolo apusana pusana ne mu mabuku aamba pa Baibolo. Kabiji bino byonse byo baingijishenga byanembelwe kala saka bakyangye kutendeka mwingilo wabo. Bukine bwataine ba Henry Grew, ba George Storrs ne bakwabo, bwibakwashishe bingi. Onkao mambo, Mulongo Russell ne balunda nanji baingijileko mwingilo wa kulenga mukwakwa byo balupwile mabuku avula ne matalakiti alumbulwilenga byaamba Baibolo.

15. Ñanyi bintu byanema byaubiwe mu 1919?

¹⁵ Mu 1919, bantu ba Lesa bafumine mu Babilona Mukatampe, ko kuba’mba bupopweshi bwa bubela bwa ntanda yonse. Mu yenkawa mwaka, “kalume wa kishinka kabiji wa maana” watendekele kukwasha bantu bajinga na michima ya bukishinka kutendeka kwenda mu “Mukwakwa Wazhila.” (Mat. 24:45-47) Mwingilo waingijile banabalume ba kishinka ba kala, wakwashishe bantu kutendeka kwenda mu Mukwakwa wazhila kabiji bafunjile byavula pe Yehoba ne byo akeba kwitubila. (Maana 4:18) Bafwainwe kupimpula byubilo byabo ne kutendeka kuba kyaswa muchima wa Yehoba. Yehoba wayukile kuba’mba, pafwainwe kupita kimye pa kuba’mba bantu banji bapimpule byubilo byabo. Onkao  mambo, wibatokeshenga pachepache. (Monai kakitenguluzha ka kuba’mba: “ Yehoba Watokesha Bantu Banji Pachepache.”) Atweba bonse tukekala bingi na lusekelo inge twatwajijila kutokesha Yehoba ku muchima mu bintu byonse byo tuba.—Kolo. 1:10.

16. Kutendeka mu 1919, “Mukwakwa Wazhila” bamunengezha byepi? (Isaya 48:17; 60:17)

¹⁶ Mukwakwa yense ukebewa kumuwamisha kimye kyonse pa kuba’mba bantu bendengamo bulongo. Kutendeka mu 1919, Mwingilo wa kuwamisha “Mukwakwa Wazhila” watwajijila, pa kuba’mba bantu bavula bafume mu Babilona Mukatampe. Aku kalume wa kishinka kabiji wa maana bamutongolatu, watendekele kwingila. Kabiji mu 1921, balupwile buku wa kwingijisha pa kukwasha bantu kufunda bukine. Uno buku wajinga wa kuba’mba The Harp of God. Basampainye mabuku nobe 6 milyonyi mu milaka 22, kabiji bavula bafunjile bukine kwingijisha uno buku. Luno tuji na buku wa katataka ye tubena kwingijisha pa kufunjisha bantu Baibolo wa kuba’mba Mukekala Myaka ne Myaka! Mu ano moba akupelako, Yehoba ubena kwingijisha jibumba janji kwitupa mikambizho yafuma mu mambo a Lesa pa kuba’mba itutangijilenga byo tubena kwenda mu “Mukwakwa Wazhila.”—Tangai Isaya 48:17; 60:17.

17-18. “Mukwakwa Wazhila” ubena kwitutwala kwepi?

¹⁷ Umvwe muntu waswa kufunda Baibolo twakonsha kwamba’mba watendeka kwenda mu “Mukwakwa Wazhila.” Bino bamo bendamotu pa kakimye kacheche ne kufumamo. Pakuba bakwabo batwajijilatu kwenda mu uno mukwakwa ne kufika ko babena kuya. Nanchi uno mukwakwa waya kwepi?

¹⁸ Aba baji na luketekelo lwa kuya mwiulu, “Mukwakwa Wazhila” wibatangijila ku “paladisa wa Lesa” wa mwiulu. (Lum. 2:7) Ku boba baji na luketekelo lwa kwikala pano pa ntanda, Mukwakwa Wazhila wibatangijila ku bumi bwalumbuluka ku mpelo ya bukalama bwa kwa Kilishitu bwa myaka kiumbi kimo. Inge mubena kwenda mu uno mukwakwa lelo jino, kange mulangulukenga pa bintu byo mwasha ne. Kange muleke kwenda mu uno mukwakwa ne, kufikatu ne kimye kyo mukatwela mu ntanda ipya. Twajijilai kwenda mu uno mukwakwa.