1-2. Ñanyi kintu kitulengela kuzhinauka milombelo yetu?

 NANCHI mwakizhinaukapo kala umvwe Yehoba ukumbula milombelo yenu nyi? Inge ibyo, kechi yenu bonka ne. Balongo ne banyenga bavula nabo baambile’mba Yehoba kechi wakumbwile milombelo yabo ne, kikatakata kimye kyo bajinga na makatazho. Inge tubena kuyanda, kikatazha bingi kuyuka’mba Yehoba ubena kukumbula milombelo yetu.

² Tusakwisamba pa ene mambo o twafwainwa kwikela na luketekelo lwa kuba’mba Yehoba ukumbula milombelo ya bapopweshi banji. (1 Yoa. 5:15) Kabiji tusakwisamba ne pa ano mepuzho: Mambo ka kimye kimo o tulangulukila’mba Yehoba kechi ubena kukumbula milombelo yetu ne? Mu ano moba Yehoba ukumbula byepi milombelo yetu?

3. Mambo ka Yehoba o akebela atweba kulomba kwi aye?

³ Binembelo bitubuula’mba Yehoba witutemwa bingi kabiji amba twanema bingi kwi aye. (Hagai 2:7;1 Yoa. 4:10) Onkao mambo, witubuula’mba tulombenga kwi aye kuba’mba etukwashe. (1 Pe. 5:6, 7) Ukeba atweba kufwenya kwipi ne aye ne kwitukwasha kuchinchika makatazho onse o tubena kupitamo.

4. Twayuka byepi kuba’mba Yehoba ukumbula milombelo ya bapopweshi banji? (Monai ne kipikichala.)

⁴ Mu Baibolo, tutangamo mashimikila aamba pe Yehoba byo akumbwile milombelo ya bapopweshi banji. Ñanyi ye mwavulukapo? Umo ke Mfumu Davida. Mu bumi bwanji bonse wajinga na balwanyi bavula bingi, kabiji pa bimye byavula walombanga kwi Yehoba kuba’mba amukwashe. Pa kimye kimo,  wasashijile Yehoba amba: “Anweba Yehoba, umvwai lulombelo lwami; telekai ku misashijilo yami ya kukeba bukwasho. Mu bukishinka bwenu ne mu bololoke bwenu, nkumbulai.” (Sala. 143:1) Yehoba wakumbwile lulombelo lwa kwa Davida lwa kukeba kumupokolola. (1 Sam. 19:10, 18-20; 2 Sam. 5:17-25) Davida waambile’mba: “Yehoba uji kwipi na bonse bamwita.” Ne atweba twafwainwa kwikala na luno luketekelo.—Sala. 145:18.

5. Nanchi Yehoba wakumbwilenga milombelo ya bapopweshi banji ba kala mu jishinda jo baketekejilenga nyi? Lumbululai. (Monai ne kipikichala.)

⁵ Kimye kimo, Yehoba ukumbula milombelo yetu mu jishinda jo twabujilenga ne kuketekela. Kino kyo kyamwekejile mutumwa Paulo. Walombele’mba Lesa amufumye “mwiba mu mubiji.” Pa bimye bisatu, Paulo walombele pa lonka luno lukatazho. Nanchi Yehoba wakumbwile milombelo yanji nyi? Ee. Pano bino wakumbwile mu jishinda Paulo jo abujilenga kuketekela. Kechi wafumishepo lukatazho lwanji ne, pakuba Yehoba wamupele bulume bwa kuchinchika pa kuba’mba atwajijile kumwingijila mu bukishinka —2 Ko. 12:7-10.

6. Mambo ka kimye kimo o twakonsha kulangulukila’mba Yehoba kechi ubena kukumbula milombelo yetu ne?

⁶ Ne atweba lelo jino Yehoba wakonsha kwitukumbula mu jishinda jo twabujilenga kuketekela. Twafwainwa kuyuka’mba aye wayuka bingi bulongo bintu bituwamina pa kuba’mba etukwashe. Kabiji Lesa “wakonsha kuba bintu byavula kukila pa bintu byonse byo tulomba nangwa byo tulanguluka.” (Efi. 3:20) Onkao mambo, wakonsha kukumbula milombelo yetu mu jishinda jo twabujilenga ne kuketekela.

7. Mambo ka o twafwainwa kupimpwilangako milombelo yetu? Lumbululai.

⁷ Inge twayuka bulongo kyaswa muchima wa Yehoba kechi tukalombangatu pa bintu bimo ne. Langulukai pe ba Martin Poetzinger. Mulongo Poetzinger byo asongweletu, kechi pabanjile ne, bamukashijile mu kampu wa lumanamo wa Nazi. Patanshi walombele Yehoba amba bamufumye mu kampu pa kuba’mba aye na kulama mukazhanji ne kutendeka jikwabo mwingilo wa kusapwila. Byo papichile milungu ibiji, watendekele kulanguluka’mba kechi kwamwekelengapo jishinda jamwesheshenga’mba Yehoba usakumulengela kumukasulula ne. Onkao mambo, watendekele kulomba amba: “Anweba Yehoba, mmweshai byo mubena kukeba’mba ngube.” Ponkapotu watendekele kulanguluka pa balongo bakwabo bajinga mu kampu byo  batwajijile kuchinchika. Kabiji bavula baakaminwe bingi pa bakazhi babo ne baana babo. Onkao mambo, mulongo Poetzinger walombele’mba: “Yehoba, nemusanchila bingi pa mwingilo wakatataka ye mwampa. Nkwashai nkoseshe ne kutundaika balongo bami.” Myaka yonse itanu na ina yo aikele mu makampu a lumanamo watwajijile kukosesha ne kutundaika balongo.

8. Ñanyi kintu kyanema kyo twafwainwa kuvulukanga inge tubena kulomba?

⁸ Twafwainwa kuvulukanga’mba Yehoba ukafikizha milaye yanji pa kimye mwine kyo atongola. Milaye yanji yavwangamo kufumyapo ne kupwisha makatazho onse alengela bantu kuyanda. Makatazho nabiji bya malwa biyakotu bine, bikola, ne lufu. Yehoba ukoba bino byonse kwingijisha Bufumu bwanji. (Da. 2:44; Lum. 21:3, 4) Kimye kya kufumyapo bino bintu byatama saka kikyangye kufika, Yehoba waswisha Satana kulama ino ntanda. b (Yoa. 12:31; Lum. 12:9) Inge Yehoba wafumyapo makatazho abena kupitamo bantu pa kyonka kino kimye, kyakonsha kumweka nobe Satana ubena kulamatu bantu bulongo. Onkao mambo, byo tubena kutengela Yehoba, kechi kilumbulula’mba kechi ubena kwitukwasha ne. Pano twayai twisambe pa mashinda amo Yehoba mo etukwashisha.

9. Yehoba wakonsha kwitukwasha byepi inge tukeba kufuukulapo kintu kimo? Lumbululai.

⁹ Witupa maana. Yehoba walaya kwitupa maana afwainwa kwitukwasha kufuukula bulongo. Pa kufuukulapo bintu bimo byanema mu bwikalo, nabiji inge tubena kukeba kutwela mu masongola nangwa ne, twafwainwa kwikala na maana afuma kwi Yehoba. (Yako. 1:5) Akilangulukai byapichilemo nyenga Maria. c Wajinga bingi na lusekelo kimye kyo aingijilenga bupainiya bwa kimye kyonse mu buzhike bwanji ne kimye kyo amonañene na mulongo umo. Waambile’mba: “Bulunda bwetu byo bwakosele twifwalamine. Nayukile kuba’mba nafwainwa kufuukulapo bulongo. Nalombelepo javula saka nkyangye kufuukulapo. Nakebelenga Yehoba kunkwasha, pano bino nayukile kuba’mba Yehoba kechi wafwainwa kumfuukwilako ne.” Wayukile kuba’mba Yehoba wakumbwile milombelo yanji ya kulomba maana. Mu ñanyi jishinda? Wakebele bishinka mu mabuku etu, kabiji wataaine bibaba byamukwashishe kukumbula mepuzho onse o ajinga nao. Kabiji waumvwine byamubuujile bainanji. Maana amubuujile bainanji akwashishe bingi Maria kulangulukapo bulongo inge wafwainwa kusongolwa nangwa ne, kino kyamulengejile kufuukulapo bulongo.

10. Kwesakana na Filipai 4:13, ñanyi bintu Yehoba byo akonsha kuba pa kuba’mba akwashe bapopweshi banji? Lumbululai. (Monai ne kipikichala.)

 ¹⁰ Witupa bulume bwa kuchinchika. Yehoba witupa bulume bwa kuchinchika makatazho o tupitamo, byonkatu byo aubile kwi mutumwa Paulo. (Tangai Filipai 4:13.) Akilangulukai pe Yehoba byo akwashishe Mulongo Benjamin kuchinchika bintu byo apichilemo. Mu myaka yavula ya bwanyike bwanji, Benjamin, bashanji, bainanji ne baana bakwabo basatu baikalanga mu makampu apusana pusana a babipuluka mu Africa. Benjamin waambile’mba: “Nalombanga kimye kyonse kwi Yehoba kuba’mba ampe bulume bwa kuba bintu bimutokesha ku muchima. Yehoba wakumbwile milombelo yami, wandengejile kwikala kwa kubula bijikila, kabiji wantundaikile kutwajijila kusapwila ne kundengela kwikala na mabuku ankwashishe kufwenya kwipi ne aye.” Kabiji waambile’mba: “Kutanga pa bintu byapichilemo balongo ne banyenga ne kufunda pe Yehoba byo ebakwashishe kuchinchika, kwankwashishe ne amiwa kutwajijila kwikala wa kishinka kwi aye.”

11-12. Yehoba wakonsha kwingijisha byepi balongo ne banyenga kukumbula milombelo yetu? (Monai ne kipikichala.)

¹¹ Wingijisha balongo ne banyenga. Bufuku bwapeleleko Yesu saka akyangye kupana bumi bwanji kwikala kitapisho, walombele bingi. Walombele kwi Yehoba kuba’mba alengele bantu kubula kulanguluka’mba waubilenga Lesa mwenga. Yehoba kechi wafumishepo mambo o bamupelengamo ne, bino watumine malaika kwiya na kumukosesha. (Luka 22:42, 43) Kabiji Yehoba wakonsha kwitukwasha kwingijisha balongo ne banyenga byonka byo aubile kwi Yesu. Bakonsha kwitufwakesha kuba’mba betukoseshe nangwa kwitutuminatu foni. Atweba bonse twafwainwa kwambanga “byambo byawama” ku bapopweshi bakwetu pa kuba’mba twibatundaike.—Maana 12:25.

¹² Akilangulukai pa byapichilemo nyenga Miriam. Byo papichile milungu icheche kufuma pafwijile bamwatawanji, Miriam wajinga bingi na bulanda byo ashajile bunke bwanji kabiji wapopomenwe bingi. Kechi wikilekele kujila ne, wakebelenga wa kwisamba nanji. Waambile’mba: “Kechi najinga na bulume ne,  nakankelwenga ne kutumatu foni, onkao mambo nalombele kwi Yehoba. Byo natwajijile kujila ne kulomba, bantumijile foni. Watumine wajinga mulunda netu mukulumpe mu kipwilo.” Uno mukulumpe mu kipwilo ne mwinakwanji batekeneshe bingi Miriam. Washiinwe kuba’mba Yehoba ye walengejile uno mulongo kutuma foni.

13. Lumbululai Yehoba byo akonsha kwingijisha babula bapopweshi banji kukumbula milombelo yetu.

¹³ Wakonsha kwingijisha bantu babula bapopweshi banji. (Maana 21:1) Kimo kimye, Yehoba wingijisha bantu babula kwitabila kukumbula milombelo ya bapopweshi banji. Waingijishe mfumu Atazakeshi kuswisha Nehemiya kuba’mba abwele ku Yelusalema na kukwasha kushimukulula muzhi. (Ne. 2:3-6) Ne mu ano moba, Yehoba wakonsha kwingijisha bantu babula bapopweshi banji kwitukwasha inge twakajilwa.

14. Byapichilemo Soo Hing bimutundaika kuba ka? (Monai ne kipikichala.)

¹⁴ Nyenga Soo Hing washiinwe kuba’mba Yehoba waingijishe dokotala kumukwasha. Mwananji wakolelwe bimye byavula kikola kya ku bongo. Byo atainwe mu mapuso, Soo ne bamwatawanji balekele nkito pa kuba’mba bamulamenga. Kabiji baikele na lukatazho lwa kubula mali. Soo Hing waambile’mba kechi wakonsheshe kuchinchika makatazho akwabo ne. Walombele kwi Yehoba kuba’mba ebakwashe. Dokotala wafuukwilepo kwingijisha jishinda jimo kuba’mba amukwashe aye ne kisemi kyanji. Na mambo a byaubile dokotala, batambwijilenga bukwasho kufuma ku kafulumende ne nzubo mwa kwikala. Palutwe kacheche, Soo Hing waambile’mba: “Twamwene Yehoba byo etukwashishe. Kine Yehoba ‘Umvwa milombelo.’”—Sala. 65:2.

15. Ñanyi kintu kyakwashishe nyenga kuyuka’mba Yehoba ukumbula milombelo yanji?

¹⁵ Milombelo yetu kechi ikumbulwa mu mashinda a kukumya ne. Bino mikumbu ya ino milombelo itukwashatu kwikala ba kishinka kwi shetu wa mwiulu. Onkao mambo, yukainga Yehoba byo akumbula milombelo yenu. Nyenga Yoko walangulukilenga’mba Yehoba kechi ukumbula milombelo yanji ne, bino watendekele kunemba byonse byo alombanga kwi Yehoba. Byo papichile kimye watajile mu buku wanji ye anembelengamo, kabiji wataine’mba milombelo yanji yavula Yehoba wakumbula  nangwatu bintu bimo byo abujilenga ne kuvuluka. Kimye kyonse twafwainwa kulangulukanga pe Yehoba byo akumbula milombelo yetu.—Sala. 66:19, 20.

16. Lwitabilo lwakonsha kwitukwasha byepi umvwe tubena kulomba? (Bahebelu 11:6)

¹⁶ Lwitabilo lwetu lwitulengela kulomba kwi Yehoba ne kuswa kuba’mba Yehoba ukumbula milombelo yetu. (Tangai Bahebelu 11:6.) Akilangulukai pa byaubile ba Mike ne benakwabo ba Chrissy. Bakebelenga kuya na kwingijila pa Betele. Ba Mike baambile’mba: “Amiwa ne benakwami twanembele pepala wa kwipwizhapo mwingilo wa pa Betele bimye byavula kuba’mba betwite. Pano bino kechi betwichile ne.” Ba Mike ne ba Chrissy batwajijile kuketekela’mba Yehoba ye wayuka bulongo bya kwibengijisha mu mwingilo wanji. Batwajijile kwibikako kwingila bulongo mwingilo wa bupainiya bwa kimye kyonse kwakepa basapwishi ne kwingilako mwingilo wa kushimika bishimikwa mu jibumba ja Yehoba. Luno ke bakalama ba mwanzo. Ba Mike baambile’mba: “Yehoba kechi wakumbwilenga milombelo yetu monka mo twakebejilenga ne. Bino wakumbwile milombelo yetu, kabiji mashinda o akumbwijilemo awamine bingi.”

17-18. Kwesakana na byaamba Salamo 86:6, 7, ñanyi kintu kyo twafwainwa kuketekela?

¹⁷ Tangai Salamo 86:6, 7. Nyimbi wa salamo aye Davida waitabijile kuba’mba Yehoba umvwa ne kukumbula milombelo yanji. Ne atweba twakonsha kwikala na luno lwitabilo. Balongo ne banyenga bo twisambapo mu uno mutwe betulengela kuyuka’mba Yehoba upana maana ne bulume bwa kuchinchika. Wakonsha kwingijisha balongo ne banyenga nangwatu bantu babula kumupopwela kwitukwasha byonka byo bebakwashishe ne abo.

¹⁸ Kampe Yehoba kechi wakonsha kukumbwila milombelo yetu monka mo tubena kukebela ne, bino twayuka kuba’mba ukakumbula. Uketupa bintu byonkatu byo tubena kukeba, kabiji uketupa pa kimye kyonkatu kyo tubena kwibikebelapo. Onkao mambo, twajijilai kulomba ne kuketekela kuba’mba Yehoba ukemukwashanga mu ano moba. Kabiji mu ntanda ipya ‘ukapa bilengwa byumi bintu byonse byo bikeba.’—Sala. 145:16.