MUTWE WA KUFUNDA 39
Umvwe Mulongo Wetu Waleka Kwingijila Yehoba
“Javula . . . bamukozhanga ku muchima.”—SALA. 78:40.
LWIMBO 102 ‘Kwashai Bantu Babula Kukosa’
BIJI MU UNO MUTWE *
1. Kyumvwanyika byepi inge umo mu kisemi bamupanga mu kipwilo?
NANCHI muji na mulongo wenu ye bapanga mu kipwilo nyi? Kino kintu kileta bingi bulanda. Nyenga wa jizhina ja Hilda waambile’mba: “Kimye kyafwile bamwatawami bo naikele nabo mu masongola myaka 41, nalangulukilenga’mba luno lukatazho lwabayile bingi. * Bino kimye mwanami wamulume kyo bamupangile mu kipwilo ne kusha mwinakwanji ne baana banji, kyankolele bingi ku muchima kukila byo kyajinga kimye kyafwile bamwatawami.”
Yehoba wayuka bulanda bo mwikala nabo umvwe mulongo wenu bamupanga mu kipwilo (Monai mafuka 2-3) *
2-3. Kwesakana na byaamba Salamo 78:40, 41, Yehoba umvwa byepi inge kalume wanji bamupanga mu kipwilo?
2 Yehoba kyamukolele bingi ku muchima kimye ba mu kisemi kyanji, ko kuba’mba bamalaika bamo kyo bamusatukijile. (Yuda 6) Kabiji Yehoba wajinga bingi na bulanda kumona bena Isalela, bantu bo atemenwe bingi byo bamusatukijilenga pa bimye byavula. (Tangai Salamo 78:40, 41.) Yukai kuba’mba Shetu wa mwiulu wa butemwe kimukola bingi ku muchima umvwe mulongo wetu waleka kumwingijila. Yehoba wayuka bulongo bulanda bo muji nabo na mambo a mulongo wenu ya bapanga mu kipwilo. Ukemutekenesha ne kwimutundaika na kifyele pa kuba’mba mutwajijile kukosa.
3 Mu uno mutwe, tusakwisamba pa byo twakonsha kuba pa kuba’mba Yehoba etukwashe umvwe mulongo wetu bamupanga mu kipwilo. Kabiji tusakwisamba byo twakonsha kukwasha bakwetu mu kipwilo baji na luno lukatazho. Bino patanshi, twayai twisambe pa milanguluko yatama yo twafwainwa kuchinuzhuka.
KANGE MWIPENGAMO MAMBO NE
4. Bansemi bavula bomvwa byepi inge mwanabo wa mulume nangwa wa mukazhi bamupanga mu kipwilo?
4 Umvwe mwana wa mulume nangwa wa mukazhi bamupanga mu kipwilo, javula bansemi batemwa kwipamo mambo amba kechi baingijile na ngovu kukwasha mwanabo kwikala na bulunda bwakosa
na Yehoba ne. Kimye mwananji wamulume kyo bamupangile mu kipwilo, mulongo wa jizhina ja Luke waambile’mba: “Nepelengamo mambo. Aja juba nalotele ne biloto byatama. Bimye bimo najilanga kya kuba ne muchima ke akole.” Nyenga wa jizhina ja Elizabeth naye wajinga na mwana wa mulume ye bapangile mu kipwilo walangulukilenga’mba: “Kampe paji bintu bimo byo nalubankenye. Ne kuba’mba nakankelwe kufunjisha mwanami kutemwa Yehoba.”5. Umvwe muntu waleka kwingijila Yehoba, bañanyi baji na mambo?
5 Twafwainwa kuvulukanga kuba’mba atweba bonse pa muntu pa muntu Yehoba witupa luusa lwa kwifuukwila bya kuba. Kino kibena kulumbulula’mba twakonsha kufuukulapo kukookela Yehoba nangwa ne. Baana bamo bebakomeshe ku bansemi babulanga kwakamwa Lesa, bino bafuukulapo kwingijila Yehoba ne kwikala ba kishinka kwi aye. Baana bakwabo bebakomeshe ku bansemi baingijile na ngovu kwibafunjisha mafunde a mu Binembelo, bino mu kuya kwa kimye baleka kwingijila Yehoba. Kino kibena kumwesha kuba’mba atweba bene pa muntu pa muntu twafwainwa kwifuukwilapo kwingijila Yehoba. (Yosh. 24:15) Onkao mambo, bansemi kechi mwafwainwa kwipamo mambo amba yenu mwalengela mwanenu kuleka kwingijila Yehoba ne.
6. Baana bakonsha kumvwa byepi inge bansemi baleka kwingijila Lesa?
6 Bimye bimo, nsemi wakonsha kuleka kwingijila Yehoba ne kusha baana banji. (Sala. 27:10) Kino kyakonsha kukozha bingi baana ku muchima pa kumona nsemi ye banemekele kabiji ye balondelanga wasenduka mu lwitabilo. Esther wajinga na bashanji bo bapangile mu kipwilo waambile’mba: “Javula naendangatu na kujila mambo nayukile’mba batata kechi bafuukwilepotu kuleka kupwila ne. Bino bafuukwilepo kuba’mba kechi bakebelenga kwingijila Yehoba ne. Nebatemenwe bingi batata, onkao mambo, byo bebapangile mu kipwilo naakaminwe pa bikekala bwikalo bwabo. Kino kintu kyankolanga bingi ku muchima.”
7. Yehoba umvwa byepi pa baana baji na bansemi bo bapanga mu kipwilo?
7 Anweba banyike, umvwe bansemi benu bebapanga mu kipwilo, twimumvwina bingi lusa. Yukai kuba’mba Yehoba wayuka byo kimukola ku muchima. Wimutemwa kabiji umvwa bulongo byo mwatwajijila kumwingijila mu bukishinka. Kabiji atweba balongo ne banyenga yenu mu kipwilo, tumvwa bingi bulongo pa bukishinka bwenu kwi Yehoba. Vulukainga kuba’mba anweba kechi yenu mwalengela kuba’mba bansemi benu bafuukule kuba bintu byo bafuukulapo ne. Byonka byo twisambapo kala, Yehoba witupa atweba bonse pa muntu pa muntu bwana bwa bene bwa kwifuukwilapo kwingijila Yehoba nangwa ne. Kabiji yense wipana kwi Lesa ne kubatizhiwa wafwainwa ‘kwisendela mwine kisendwa kyanji.’—Nga. 6:5.
8. Kisemi kyakamwa Lesa kyakonsha kutwajijila kuba byepi kimye kyo babena kupembelela mulongo wabo kubwela kwi Yehoba? (Monai kakitenguluzha ka kuba’mba “ Bwelai kwi Yehoba.”)
8 Umvwe mulongo wenu bamupanga mu kipwilo, muketekela kuba’mba juba jimo ukabwela kwi Yehoba. Anweba mwakonsha kutwajijila kuba byepi? Twajijilai kukosesha lwitabilo lwenu. Umvwe kemube bino, bisemi bikwabo bikafunjilako kwi anweba kabiji kampe kikakwasha ne mulongo wenu ye bapanga mu kipwilo. Kabiji kikemukwasha ne kukepeshako bulanda bo muji nabo. Pano mwakonsha kuba byepi pa kuba’mba mutwajijile kwikala na lwitabilo lwakosa?
BYO MWAKONSHA KUBA PA KUBA’MBA MUTWAJIJILE KWIKALA NA LWITABILO LWAKOSA
9. Mwakonsha kuba byepi pa kuba’mba mutwajijile kwikala na lwitabilo lwakosa? (Monai kakitenguluzha ka kuba’mba “ Binembelo Bitutekenesha Inge Mulongo Wetu Waleka Kwingijila Yehoba.”)
9 Ubainga byonse bikebewa pa kuba mwikale na lwitabilo lwakosa. Kyanema bingi kutwajijila kwikosesha anweba bene ne ba mu kisemi. Mwakonsha kuba byepi bino? Mwakonsha kutambula bulume kufuma kwi Yehoba kupichila mu kutanga Mambo a Lesa moba onse ne kulanguluka langulukapo ne kutanwanga ku kupwila kwa bwina Kilishitu. Nyenga Joanna wajinga na bashanji ne kolojanji wamukazhi balekele kwingijila Yehoba, waambile’mba: “Kintekenesha bingi inge natanga mashimikila a mu Baibolo aamba pa bantu nabiji Abigaila, Eshita, Yoba, Yosefwa, ne Yesu. Bintu byo bapichilemo bintundaika ne kunkwasha kwikala na lusekelo. Kabiji nyimbo ikwabo iji pa musabilo wetu wa jw.org intundaika bingi.”
10. Kinembelo kya Salamo 32:6-8 kitukwasha byepi kuchinchika?
10 Mubuulai Yehoba byonse biji ku muchima wenu. Umvwe muji na bijikila, kange muleke kulomba kwi Lesa ne. Twajijilai kusashijila Lesa wetu wa butemwe kwimukwasha kumonanga bintu byonka byo ebimona ne kwimupa ‘milangwe ne kwimufunjisha jishinda jo mwafwainwa kuyamo.’ (Tangai Salamo 32:6-8.) Ibyo kuba’mba kyakonsha kukatazha kubuula Yehoba byo mubena kumvwa ku muchima. Pano bino, Yehoba wayuka bulongo lukatazho lo mubena kupitamo. Wimutemwa bingi kabiji ukeba’mba mumubuulenga byonse biji ku muchima wenu.—Lupu. 34:6; Sala. 62:7, 8.
11. Kwesakana na byamba Bahebelu 12:11, mambo ka o twakonsha kuketekela lujimuno lwa Yehoba lumwesha butemwe? (Monai kakitenguluzha ka kuba’mba “ Kupanga Muntu mu Kipwilo Kumwesha’mba Yehoba Witutemwa.”
11 Tundaikai byafuukula bakulumpe mu kipwilo. Kupanga muntu mu kipwilo ke lunengezho lwa Yehoba. Ke jishinda jawama ja kukwashishamo Bahebelu 12:11.) Bamo mu kipwilo bakonsha kwamba’mba bakulumpe mu kipwilo batamishe kupanga yewa muntu mu kipwilo. Bino vulukainga kuba’mba bantu bamba bino kechi bakeba kwamba byatama pa muntu walenga mambo ne. Kishinka ke kya kuba’mba kechi twakonsha kwikala na bishinka byonse byalengela muntu kumupanga mu kipwilo ne. Onkao mambo, kyanema kuketekela bakulumpe bajinga mu kavoto ka mambo bebikileko kulondela mafunde a mu Binembelo ne “kwimenako Yehoba” pa kuchiba mambo.—2 Moba 19:6.
muntu waleka kwingijila Yehoba kabiji jikwasha ne atweba bonse. (Tangai12. Ñanyi bintu byawama byamwenamo bamo na mambo a kukookela mukambizho wa Yehoba wa kubula kupwanañana na muntu wapangiwa?
12 Kutundaika byafuukulapo bakulumpe mu kipwilo kupanga mulongo wenu, kwakonsha kumukwasha kubwela kwi Yehoba. Ba Elizabeth bo twaambapo kala baambile’mba: “Kyakatezhe bingi kuleka kwisamba na mwanetu wamulume. Byo abwelele kwi Yehoba, waambile’mba kyajingatu bulongo kumupanga mu kipwilo. Mu kuya kwa kimye, aye waambile’mba wafunjijileko bintu byawama. Nafunjile kuba’mba lujimuno lwa Yehoba lwawama.” Bamwatawabo abo ba Mark banungilepo’mba: “Byo papichile kimye kufuma po bamupangijile, wibabuujile’mba wakebelenga kubwela kwi Yehoba mambo kechi twapwanañananga nanji ne. Mbena kusanchila Yehoba byo etukwashishe kukookela mukambizho wa kubula kupwanañana na muntu wapangiwa.”
13. Ñanyi kintu kyakonsha kwimukwasha inge muji na bijikila?
13 Isambainga na bakwenu bayuka byo mubena kumvwa. Pwanañanainga na balongo ne banyenga baji na lwitabilo lwakosa bakonsha kwimukwasha kutwajijila kwikala na lusekelo. (Maana 12:25; 17:17) Ba Joanna bo twaambapo kala baambile’mba: “Mu muchima wami nalangulukanga’mba njitu bunke. Bino kwisamba na balunda bo naketekela kwankwashishe bingi.” Pano mwakonsha kuba byepi inge bamo mu kipwilo bamba byambo bilengela lukatazho kubayilako?
14. Mambo ka o twafwainwa ‘kwitekenyanga atweba bene na bene ne kwilekelako mambo’?
14 Batekenyainga balongo ne banyenga yenu. Kechi bonse bakonsha kwambanga byambo byawama ne. (Yako. 3:2) Atweba bonse twibambulwa kulumbuluka. Onkao mambo, kechi mwafwainwa kukumya umvwe bamo ke bambe byambo byatama byakonsha kwimufichisha ku muchima ne. Vulukainga lujimuno lwa mutumwa Paulo lwa kuba’mba: “Itekenyainga anwe bene na bene ne kwilekelako mambo umvwe umo uji na mambo na mukwabo.” (Kolo. 3:13) Nyenga umo wajinga na mulongo wanji ye bapangile mu kipwilo waambile’mba: “Yehoba wankwashishe kulekelako mambo balongo bakebelenga kuntundaika nangwa kya kuba jishinda jo baambijilemo jankozhezhe ku muchima.” Kipwilo kyakonsha kukwasha byepi kisemi kiji na mulongo wabo ye bapanga mu kipwilo?
KIPWILO BYO KYAKONSHA KUKWASHA
15. Ki ka kyakonsha kukwasha ba mu kisemi baji na mulongo wabo ye bapanga mu kipwilo katataka?
15 Ubilainga lusa ne kifyele ba mu kisemi ba kishinka kwi Lesa. Nyenga wa jizhina ja Miriam wambile’mba waikalanga bingi na binyenge pa kuya na kupwila kimye nkasanji wamulume
kyo bamupangile mu kipwilo. Wambile’mba: “Naakamwanga pa bantu byo basakwamba inge bammona. Bino kwajinga balongo ne banyenga bavula baumvwine kutama pa kyamwekele. Kabiji kechi baambilengapo byatama pa kolojami ye bapangile mu kipwilo ne. Nebasanchila bingi, mambo bankwashishe kuyuka’mba kechi yamitu najinga na bulanda ne.” Nyenga mukwabo uvuluka’mba: “Mwanetu wamulume byo bamupangile mu kipwilo, balunda netu baishile na kwitutekenesha. Bamo betubuujile’mba bakankelwe ne bya kwamba. Bamo banjijishengapo, kabiji bakwabo bantuminanga makalata a kuntundaika. Abino bintu byankwashishe bingi.”16. Kipwilo kyakonsha kutwajijila byepi kutekenesha ne kukwasha boba baji na mulongo wabo ye bapanga mu kipwilo?
16 Twajijilai kutundaika ba mu kisemi ba kishinka. Kino kyo kimye kikebewa bingi kwibamwesha butemwe ne kwibatundaika. (Hebe. 10:24, 25) Bimye bimo, ba mu kisemi baji na mulongo wabo ye bapanga mu kipwilo bamona’mba bamo mu kipwilo baleka kupwanañana nabo, nobe nabo bebapanga mu kipwilo. Kechi twafwainwa kubanga bino ne. Baana baji na bansemi babo baleka kwingijila Yehoba bakebewa bingi kwibatakaika ne kwibatundaika. Ba Maria baji na bamwatawabo bo bapangile mu kipwilo kabiji basha ne kisemi, baambile’mba: “Balunda nami bamo baiyanga ku nzubo ne kunkwashako kunengezha kajo ne kunkwashako kufunjisha baana bami Baibolo. Kibakolanga bingi ku muchima pa lukatazho lo napichilengamo, kabiji inge natendeka kujila, nabo bajilanga. Bañambilangako umvwe bantu ke bambe bya bubela pe amiwa. Bano balunda nami bantundaikile bingi.”—Loma 12:13, 15.
Kipwilo kyakonsha kutundaika ba mu kisemi ba kishinka (Monai jifuka 17) *
17. Bakulumpe mu kipwilo bakonsha kuba byepi pa kuba’mba batekeneshe boba baji na bijikila?
17 Bakulumpe mu kipwilo, monaingapo kimye kya kukosesha ba mu kisemi ba kishinka. Muji na mwingilo wa kutekenesha boba baji na balongo babo baleka kwingijila Yehoba. (1 Tesa. 5:14) Pa kuba’mba mwibatundaike, isambainga nabo kupwila saka kukyangye kutendeka ne pa kupwisha kupwila. Bafwakashishainga ku mazubo abo ne kulombela nabo pamo. Ingilaingako nabo mu mwingilo wa kusapwila, kabiji bimye bimo, betaingako ku kupopwela kwa kisemi kyenu. Bakafunga bafwainwa kumwesha butemwe ne kifyele mikooko ya Yehoba iji na bulanda ne kwiita muchima.—1 Tesa. 2:7, 8.
TWAJIJILAI KUKETEKELA MWI YEHOBA
18. Kwesakana na byaamba 2 Petelo 3:9, Lesa ukeba’mba bandengamambo bobe byepi?
18 Yehoba “kechi usaka muntu nangwa umo amba akafwe ne, bino ukeba’mba bonse balapile.” (Tangai 2 Petelo 3:9.) Nangwa kya kuba muntu walenga mambo akatampe, Lesa utwajijila kunemeka bumi bwanji. Langulukai pa kintu kyanema bingi kyapaine Yehoba, ko kuba’mba kitapisho kya bukuzhi kya Mwananji ye atemwisha, pa kuba’mba atweba bonse bandengamambo tukekale na bumi. Na mambo a butemwe, Yehoba ukwasha boba baleka kumwingijila kuba’mba babwele kwi aye. Uketekela kuba’mba bakabwela kwi aye, byonka byaubile mwana waelekele wa mu kishimpi kya kwa Yesu. (Luka 15:11-32) Bavula bashile bukine pa kupitamo kimye babwelele kwi Shabo wa mwiulu wa butemwe. Kabiji balongo ne banyenga mu kipwilo bebatambwijile na lusekelo. Ba Elizabeth bo twaambapo kala, basangalele bingi kimye mwanabo wamulume kyo bamubwezhezhe mu kipwilo. Baambile’mba, “Mbena kusanchila balongo ne banyenga betutundaikilenga kubula kubwela panyuma.”
19. Mambo ka o twakonsha kutwajijila kuketekela mwi Yehoba?
19 Twafwainwa kuketekela mwi Yehoba kimye kyonse. Lutangijilo lwanji lonse lo apana lwitukwasha. Yehoba mpanyi kabiji Shetu wa kifyele watemwa bingi bapopweshi banji bamutemwa. Shiinwai kuba’mba Yehoba kechi ukemusha mu kimye kya malwa ne. (Hebe. 13:5, 6) Ba Mark bo twaambapo kala, baambile’mba: “Yehoba kechi witushile bunke ne. Ukatwajijila kwitukwasha inge ke tupite mu makatazho.” Yehoba ukatwajijila kwimupa “bulume bwakila bwa bantu.” (2 Ko. 4:7) Kya kine, mwakonsha kutwajijila kwikala ba kishinka ne kwikala na luketekelo nangwatu inge mulongo wenu waleka kwingijila Yehoba.
LWIMBO 44 Lulombelo lwa Mulanda
^ jifu. 5 Kileta bingi bulanda inge mulongo wetu waleka kwingijila Yehoba. Uno mutwe waamba pe Lesa byo omvwa inge kino kyamweka. Waamba pa bintu byakonsha kuba balongo ba kishinka ba muntu ye bapanga mu kipwilo pa kuba’mba batambule lutekenesho ne kwikala na lwitabilo lwakosa. Kabiji uno mutwe waamba pa bonse mu kipwilo byo bakonsha kutekenesha ne kutundaika kisemi kiji na mulongo wabo wapangiwa mu kipwilo.
^ jifu. 1 Mazhina amo o twaingijisha mu uno mutwe apimpulwa.
^ jifu. 79 KULUMBULULA BIPIKICHALA: Mulongo inge waleka kwingijila Yehoba ne kusha kisemi kyanji, mwinakwanji ne baana bayanda.
^ jifu. 81 KULUMBULULA BIPIKICHALA: Bakulumpe mu kipwilo babiji baiya na kutundaika kisemi kwingijisha binembelo.