MUTWE WA KUFUNDA 40
“Bakakwashanga Bakwabo Kuyuka Kuba Bintu Byaoloka”
“Bakakwashanga bakwabo kuyuka kuba bintu byaoloka bakasama nobe tubangabanga myaka ne myaka.”—DA. 12:3.
LWIMBO 151 Uketa
BIJI MU UNO MUTWE *
1. Ñanyi bintu bikamweka mu Bukalama bwa Myaka Kiumbi?
KIKAWAMA bingi kumona bantu byo bakatatula kusangulwa mu Bukalama bwa Kilishitu bwa Myaka Kiumbi. Bonse bafwisha balongo ne balunda nabo bebatonga bingi. Yehoba naye wibatonga bingi. (Yoba 14:15) Fwanyikizhai bantu bonse pano pa ntanda byo bakasangalala pa kumona balongo babo basangulwa. Byonka byo twafunjile mu mutwe wafumako, bantu “baoloka,” ko kuba’mba bonse banembwa mu buku wa bumi “bakasangukila ku bumi.” (Byu. 24:15; Yoa. 5:29) Kampe balongo betu bavula bakasangulwa aku nkondo ya Amagedonyi ipwatu. * Kabiji, bantu “babula koloka” ko kuba’mba babujile kwikala na kimye kya kuyuka Yehoba ne kumwingijila saka bakyangye kufwa “bakasangulwa.”
2-3. (a) Byonka byo baambapo mu Isaya 11:9, 10, ñanyi mwingilo mukatampe ukekalako pano pa ntanda? (b) Ñanyi bintu byo tusakufunda mu uno mutwe?
2 Bonse bakasangulwa bafwainwa kwibafunjisha. (Isa. 26:9; 61:11) Onkao mambo, uno mwingilo wa kufunjisha bantu wafwainwa kwikalako. (Tangai Isaya 11:9, 10.) Mambo ka? Mambo bantu babula koloka bakasangulwa bafwainwa kuyuka Bufumu bwa Lesa, kitapisho kya bukuzhi bwa kwa Yesu Kilishitu, ene mambo jizhina ja Yehoba o janemena ne ene mambo aye bunke bwanjitu o aikela na luusa lwavula. Bantu baoloka bakasangulwa nabo bafwainwa kufunda bintu Yehoba byo asolola katataka pa mambo a kyaswa muchima wanji pano pa ntanda. Bakalume ba kishinka ba Yehoba bamo bafwile kala kene, byambo bya Yehoba saka bakyangye kwibinemba mu Baibolo. Bonsetu baoloka ne babula koloka bakafunda bintu byavula bingi.
3 Mu uno mutwe tusakwisamba pa ano mepuzho: Uno mwingilo mukatampe wa kufunjisha bakamwingila byepi? Bintu bikobanga bantu inge bafunda bikalengela byepi mazhina abo kunembwa mu buku wa bumi kwakubula kwiafuutamo? Mikumbu ya ano mepuzho yanema bingi kwi atweba mu ano moba. Byonka byo tusakumona, bishinka bimo biji mu bungauzhi bwa kwa Danyela ne Lumwekesho byo bisakwitukwasha kumvwisha bintu bikamweka inge bafwa basangulwa. Patanshi twayai twisambe pa bungauzhi buji mu Danyela 12:1, 2.
“BAVULA BALAALA MU MUSHIJI . . . BAKABUKA”
4-5. Ñanyi bintu byo baambapo pa Danyela 12:1 bikamweka mu kimye kya ku mpelo?
4 Tangai Danyela 12:1. Buku wa Danyela witubuula bintu bikamweka monka mo byalondankena mu kimye kya ku mpelo. Danyela 12:1 waamba pe Mikela aye Yesu Kilishitu kuba’mba “wimenako bantu ba [Lesa].” Buno bungauzhi bwatatwile kufika mu 1914 kimye Yesu kyo bamutongwele kwikala Mfumu wa Bufumu bwa Lesa mwiulu.
5 Pano bino, Danyela witubuula kuba’mba Yesu “ukeya” mu kimye kyo “kukekala malwa akyangye kumwekapo kala kufumatu kimye kyatendekele kwikalako kisaka kya bantu kufikatu ne pa kyokya kimye.” Akino kimye kya “malwa” kyo kimye kya “malwa akatampe” o baambapo pa Mateo 24:21. Yesu ukeya nangwa’mba ukalwilako bantu ba Lesa ku mpelo ya kyokya kimye kya malwa ko kuba’mba pa nkondo ya Amagedonyi. Buku wa Lumwekesho waamba pa bano kuba’mba jo ‘jibumba jikatampe ja boba bafuma mu malwa akatampe.’—Lum. 7:9, 14.
6. Ñanyi kintu kikamweka inge jibumba jikatampe japuluka malwa akatampe? Lumbululai. (Kabiji monai “Mepuzho Afuma ku Batanga,” mu kino Kyamba kya Usopa aamba pa bantu bakasangulwa pano pa ntanda.)
6 Tangai Danyela 12:2. Ñanyi bintu bikamweka jibumba jikatampe umvwe japuluka malwa akatampe? Kala twalangulukanga’mba Danyela 12:2 waamba pa lusanguko lwa bakaya mwiulu nangwa kutatula jikwabo mwingilo mukatampe wa kusapwila ye balekeshe ku balwanyi mu 1918. * Pano luno twayuka kuba’mba bino byambo byaamba pa bantu bo bakasangula mu ntanda ipya. Luno lusanguko lukamweka umvwe moba apelako apwa ne nkondo ya Amagedonyi yapwa.
7. (a) Byambo bya kuba’mba bamo “bakasangukila ku bumi bwa myaka ne myaka” bilumbulula ka? (b) Luno lusanguko lwaikala byepi “lusanguko lwakilamo kuwama”?
7 Nangwa byonkabyo, Danyela 12:2 waamba ne kuba’mba bamo bakasangukila “ku bumi bwa myaka ne myaka.” Nga kino kyalumbulula ka? Kyalumbulula’mba mu Bukalama bwa Myaka Kiumbi bonse bakasangulwa bakayuka nangwa’mba bakatwajijila kufunda ne kumukookela Yehoba ne Yesu bakatambula bumi bwa myaka ne myaka. (Yoa. 17:3) Luno lukekala “lusanguko lwakilamo kuwama” mambo lukakila lusanguko lonse lwamwekapo kala. (Hebe. 11:35) Mambo ka? Mambo bonse basangwilwe kala bafwile jikwabo.
8. Byambo bya kuba’mba “bakebalengesha bumvu ne bakwabo bakebazhachisha myaka ne myaka” byatala mwepi?
8 Pano bino kechi bonsetu bakasangulwa Yehoba bo akakeba’mba bafunde ne. Bungauzhi bwa kwa Danyela bwaamba’mba bakwabo bakasangulwa “bakebalengesha bumvu ne bakwabo bakebazhachisha myaka ne myaka.” Na mambo a bunsatuki bwabo mazhina abo kechi akanembwa mu buku wa bumi ne. Kabiji kechi bakatambula bumi bwa myaka ne myaka ne. Onkao mambo, “bakebazhachisha myaka ne myaka,” nangwa’mba bakebonaunatu pelu. Danyela 12:2 ubena kwamba pa kikamwekela bonse bakasangulwa kwesakana na byo bakobanga pa kyokya kimye. * (Lum. 20:12) Bamo bakatambula bumi bya myaka ne myaka. Bakwabo kechi bakebumonapotu nangwa pacheche ne.
“BAKAKWASHANGA BAKWABO KUYUKA KUBA BINTU BYAOLOKA”
9-10. Ñanyi kintu kikwabo kikamweka inge malwa akatampe apwa kabiji bañanyi “bakasama nobe juba”?
9 Tangai Danyela 12:3. Ñanyi kintu kikwabo kikamweka inge “malwa akatampe” apwa? Kununga pa byaamba Danyela 12:2, kyepelo 3 kyaamba pa kintu kikwabo kikamweka inge malwa akatampe apwa.
10 Bañanyi “bakasama nobe jiulu”? Mateo 13:43 witukwasha kwibayuka mambo waamba’mba: “Pa kyokya kimye, baoloka bakasama nobe juba mu Bufumu bwa Shabo.” Pa kyokya kimye, baoloka bakasama nobe juba “mu Bufumu bwa Shabo.” Bino byambo bibena kumwesha’mba Yesu waambilenga pa baana ba mu Bufumu ko kuba’mba balongo banji bashingwa bakalama nanji mu Bufumu bwa mwiulu. (Mat. 13:38) Onkao mambo, Danyela 12:3 ubena kwamba pa bashingwa ne mwingilo ye bakengilanga mu Bukalama bwa Myaka Kiumbi.
Ba 144,000 bakengijila pamo ne Yesu Kilishitu kutangijila mwingilo wa kufunjisha bantu pano pa ntanda mu Bukalama bwa Myaka Kiumbi (Monai jifuka 11)
11-12. Ñanyi mwingilo ukengila ba 144,000 mu Bukalama bwa Myaka Kiumbi?
11 Bashingwa bakakwasha byepi “bakwabo kuyuka kuba bintu byaoloka”? Bashingwa bakengijila pamo ne Yesu Kilishitu kutangijila mwingilo wa kufunjisha pano pa ntanda mu Bukalama bwa Myaka Kiumbi. Ba 144,000 bakekala bamfumu kabiji bakekala bañanga. (Lum. 1:6; 5:10; 20:6) Onkao mambo, bakakwasha mu mwingilo wa “kubuka bisaka bya bantu” ne kwibalengela kwikala balumbuluka. (Lum. 22:1, 2; Ezi. 47:12) Akino kikasangajika bingi bashingwa.
12 Bañanyi “bakwabo” bo bakakwasha kuyuka kuba bintu byaoloka? Ke bonse bakasangulwa ne bonse bakapuluka nkondo ya Amagedonyi kubikako ne baana bakasemwa mu ntanda ipya. Myaka 1,000 byo ikapwa, bonse bakekalanga pano pa ntanda bakekala balumbuluka. Pano ñanyi kimye mazhina abo kyo bakeanemba mu buku wa bumi na inki kechi na pensulu ne?
LWESEKO LUKAPELAKO
13-14. Ñanyi kintu kyafwainwa kuba bantu bonse balumbuluka bakekalanga pano pa ntanda saka bakyangye kwibapa bumi bwa myaka ne myaka?
13 Twafwainwa kuvuluka kuba’mba kwikala walumbuluka kechi kilumbulula’mba kyapwa pano muntu watambula bumi bwa myaka ne myaka ne. Akilangulukai pe Adama ne Evwa. Bajinga balumbuluka. Nangwa byonkabyo, bafwainwa kukookela Yehoba Lesa saka akyangye kwibapa bumi bya myaka ne myaka. Pano bino, bakankelwe kumukookela.—Loma 5:12.
14 Kikekala byepi ku bonse bakekalanga pano pa ntanda inge myaka 1,000 yapwa? Bonse bakekala balumbuluka. Nanchi bano bonse bakatwajijila kutundaika bukalama bwa Yehoba nyi? Inyi bamo bakankalwa kutwajijila kwikala ba kishinka byonka byakankelwe Adama ne Evwa nangwa kyakuba bajinga balumbuluka? Ano mepuzho afwainwa kukumbulwa. Pano bino afwainwa kukumbulwa byepi?
15-16. (a) Ñanyi kimye bantu bonse kyo bakebapa kimye kya kumwesha patoka bukishinka bwabo kwi Yehoba? (b) Ñanyi bintu bikafumamo mu luno lweseko lwapelako?
15 Satana bakamukasa myaka 1,000. Kechi ukajimbaikapo muntu nangwa umo mu yoya myaka ne. Pano bino, inge ino myaka 1,000 yapwa, Satana bakamukasulula. Kepo akeseka kujimbaika bantu balumbuluka. Alwe lweseko lwapelako lukalengela bantu kumwesha patoka umvwe banemeka jizhina ja Lesa ne kutundaika bukalama bwanji. (Lum. 20:7-10) Byo bakoba pa kyokya kimye byo bikamwesha inge mazhina abo kanembwa mu buku wa bumi na inki nangwa ne.
16 Baibolo witubuula’mba bantu bamo bakakankalwa kwikala ba kishinka ne kukaana bukalama bwa Yehoba byonkatu byaubile Adama ne Evwa. Ñanyi kintu kikebamwekela? Lumwekesho 20:15 wakumbula’mba: “Yense ye babujile kunemba mu buku wa bumi, bamutayile mu kino kizhiba kya mujilo.” Kwakubula nangwa kuzhinaukatu ne, bonse bakasatuka bakebonaunatu pelu. Bino bantu balumbuluka bavula bakashinda luno lweseko lwapelako. Mazhina abo akanembwa mu buku wa bumi kabiji kechi bakeafuutamo ne.
BINTU BIKAMWEKA “MU KIMYE KYA KU MPELO”
17. Danyela bamubuujile ñanyi bintu bibena kumweka mu ano moba? (Danyela 12:4, 8-10)
17 Kyanema bingi kulangulukanga pa bino bintu bikamweka kulutwe. Nangwa byonkabyo, malaika waambijile Danyela bintu bikwabo bikamweka “mu kimye kya ku mpelo.” (Tangai Danyela 12:4, 8-10; 2 Timo. 3:1-5) Wamwambijile’mba: “Maana a kuyuka bintu akavula bingi.” Kinetu, bantu ba Lesa bo bonkatu bafwainwa kumvwisha mwatala bino byambo bya bungauzhi. Kabiji malaika wanungilepo amba mu kimye kya ku mpelo “bantu batama bakobanga bintu byatama, [kabiji] kafwako muntu mubi ukakwatakanya bino byambo ne.”
18. Ñanyi bintu bikamwekela babi katataka?
18 Ano moba bantu babena kumona’mba bantu babena kuba byatama kechi babena kwibakambula ne. (Mala. 3:14, 15) Bino katatakatu Yesu akachibile mambo bantu batama baji nobe bambuzhi ne kwibabanya ku bantu baji nobe mikooko. (Mat. 25:31-33) Bantu babi kechi bakapuluka malwa akatampe ne kabiji kechi bakasangulwa ne kwikala mu ntanda ipya ne. Mazhina abo kechi akanembwa mu “buka wa kwibavulukilako” ye batongola mu buku wa Malakai 3:16 ne.
19. Ñanyi bintu byo twafwainwa kuba luno kabiji mambo ka? (Malakai 3:16-18)
19 Kino kyo kimye kya kumwesha’mba kechi twi bantu babi ne. (Tangai Malakai 3:16-18.) Yehoba ubena kukonkanya pamo bantu bo amona amba “kya bunonshi” kyanji nangwa’mba bantu bo anemeka. Ne atweba tukeba’mba twikale kya bunonshi kyanji.
Tukasangalala bingi pa kumona Danyela, balongo betu ne bantutu bakwabo byo ‘bakabuka’ ne kutambula mpunzha yabo mu ntanda ipya (Monai jifuka 20)
20. Ñanyi mulaye wapelako ye balayile Danyela kabiji mambo ka o mutongela kufika kwa uno mulaye?
20 Kinetu, tubena kwikala mu kimye kyanema. Katatakatu bintu byonse byo betulaya bifike. Kabiji katatakatu tukamone bantu babi byo bakebonauna. Kepo tukamona kufika kwa bungauzhi bwa Yehoba bo alayile Danyela bwa kuba’mba: “Ku mpelo ya moba akapelako ukabuuka ne kutambula mpunzha yobe.” (Da. 12:13) Nanchi mubena kutonga juba jo mukamona Danyela ne balongo benu ‘bakabuka’ ne kwikala na bumi jibiji nyi? Umvwe ibyo, twajijilai kuba byaoloka bikalengela mazhina enu kunembwa mu buku wa Yehoba wa bumi kwakubula kwiafuutamo ne.
LWIMBO 80 “Mutompai Yehoba Mumone byo Awama”
^ Mu uno mutwe tusakwisamba pa lupimpu lwa mo twaumvwijile byambo biji pa Danyela 12:2, 3 byaamba pa mwingilo mukatampe wa kufunjisha bakasangulwa. Tusakwisamba pa uno mwingilo ne bakamwingila. Kabiji tusakumona uno mwingilo byo akakwasha bonse pano pa ntanda kwinengezha ku lweseko lukapelako ku mpelo ya Bukalama bwa Kilishitu bwa Myaka Kiumbi.
^ Kampe bantu bakatendekelapo kusangulwa ke bantu bafwile ba kishinka mu moba a kupelako. Kepo pakalondele bafwile abo saka bakyangye kufwa. Bino inge byo byo kikekala, kikapeela bingi kutambwila bantu bo twayuka. Kishinka ke kya kuba’mba Binembelo byaamba pa bakasangulwa kuya mwiulu amba bakasangulwa “monka mo balondankena.” Onkao mambo, twashiinwa’mba bantu baji na luketekelo lwa kwikala pano pa ntanda nabo bakasangulwa mu ndonda.—1 Ko. 14:33; 15:23.
^ Luno lupimpu lo lwapinga pa byambo biji mu buku wa Pay Attention to Daniel’s Prophecy! kitango 17, ne mu Kyamba kya Usopa kya Kizungu kya July 1, 1987, ma. 21-25.
^ Byambo bya kuba’mba “baoloka” ne “babula koloka” biji pa Byubilo 24:15 ne bya kuba’mba “aba baubilenga byawama” ne “boba baubilenga byatama” biji pa Yoano 5:29 byaamba pa bintu byaubilenga bantu saka bakyangye kufwa.
