Mwaka wa 1940 byo apwile, batata ne bamama batendekele kufunda Baibolo na Bakamonyi ba kwa Yehoba. Palutwe kacheche balekele kufunda, pano bino, bamama batwajijile kutambula Kyamba kya Usopa ne Labainga! Mu 1950 mu muzhi wa New York City, mwajinga kushonkena kukatampe, kabiji kisemi kyetu kyatainweko.

Byo papichileko moba acheche, Mulongo Lawrence Jeffries watatwile kwitufwakesha. Wakebeshenga bingi kumfunjisha bukine. Patanshi, nalangulukanga kuba’mba Bakamonyi ba kwa Yehoba bafwainwa kwivwanganga mu bya bumulwila ntanda ne kwingila mwingilo wa bushilikale. Namubujile’mba inge bonse mu America bakana kwikala bashilikale, balwanyi betu bakonsha kwiya na kwitulukuka ne kwangata kyalo kyetu. Bino Mulongo Jeffries wantekenyejile ne kunshikisha mba: “Yehoba Lesa wakonsha kuba byepi inge kya kuba bantu bonse ba mu America babena kumwingijila pano balwanyi babo bebalukuka?” Buno bwipuzho ne bishinka bikwabo byo ambujile byandengejile kuyuka kuba’mba byo nalangulukanga kechi byo ibyo ne. Onkao mambo, nakebeshe bingi kufunda Baibolo.

Natatwile kutanga kimye kyabaya mu Kyamba kya Usopa kya kala ne Labainga!, byalamine bamama mu ka kibamba mo twalaminanga bintu. Mu kuya kwa moba, nataine kishinka kya kuba’mba bintu byo natangilenga mu Kyamba kya Usopa ne Labainga! byajinga bya kine. Onkao mambo, naambijile Mulongo Jeffries kutendeka kumfunjisha Baibolo. Kabiji natatwile kupwila kimye kyonse. Natemenwe bingi bintu byo nafunjilenga, kabiji kino kyandengejile kwikala musapwishi wa mambo awama. Byo nafunjile kuba’mba “juba jikatampe ja Yehoba jijitu pepi,” napimpwile milanguluko yami. (Zefwa. 1:14) Nalekele kulanguluka pa bya kuya ku Univesiti mambo nakebelenga kutatula kufunjishanga bantu bukine bwa mu mambo a Lesa.

Napwishishe sukulu wami wa ku sekondale pa 13 June 1956. Kabiji byo papichile moba asatu nabatizhiwe  pa kubuñana kwa mwanzo. Nangwa byonkabyo, kechi nayukile’mba mukafuma mapesho avula mu kwipana ku mwingijila Yehoba mu bwikalo bwami bonse ne kufunjisha bakwetu pe aye ne.

Byo papichile bañondo batanu na umo, kufuma kimye ko nabatizhiwe natendekele kwingila mwingilo wa bupainiya wa kimye kyonse. Mwingilo Wetu wa Bufumu wa December 1956 wajinga mutwe wa kuba’mba: “Nanchi Mwakonsha Kuya na Kwingijila ku Mpunzha Kwakepa Basapwishi Nyi?” ne amiwa najinga pa boba bakonsheshe kuya na kwingilako uno mwingilo. Nakebelenga kuya na kwingijila ku mpunzha kwakepele basapwishi ba mambo awama.—Mat. 24:14.

Navilukijile ku Edgefield ku Bulenge bwa Carolina. Mu kino kipwilo wajingatu basapwishi bana kabiji yami wajinga wa butanu. Twapwilanga mu kibamba kimo kyajinga mu nzubo ya mulongo. Pa ñondo pa ñondo naingilanga maola 100 mu busapwishi. Napayankananga bingi mambo yami natangijilanga mwisambo wa kuya mu mwingilo wa kusapwila ne kwamba majashi pa kupwila. Kuba bino kwandengejile kufunda byavula pe Yehoba.

Mwanamukazhi ye nafunjishanga Baibolo wajinga na Kampanyi wawamishanga mibiji ya bantu bafwa saka bakyangye kwibazhika. Mu taunyi wa Johnston waikela kwipi nako twaikelanga. Wampangapo mingilo imo kabiji witupeelepo kishimikwa kyaji kimo kicheche kuba’mba tupwilengamo.

Mulongo Jolly Jeffries mwana wa mulongo wafunjishanga Baibolo wafumine mu muzhi wa Brooklyn, New York, ne kuvilukila mu taunyi mo naikalanga. Kabiji twatatwile kwingijila pamo mwingilo wa bupainiya wa kimye kyonse. Twaikelenga mu kazubo ka mawilo ka mulongo umo ko twasonkelanga.

Kuno ko twaikalanga bantu bo twaingijilanga kechi betupanga mali avula ne. Mwingilo ye waingila juba jimo betupanga mali afika ku madola abiji nangwa madola asatu. Juba jimo, mali o nashajile nao onse napotelemo bya kuja mu shitolo. Byo nalupukilenga mu shitolo mwanamulume umo wansolomokele ne kungipuzha’mba: “Ubena kukeba nkito nyi? Nkakupanga dola umo inge waingila jiola jimo.” Wañambijile kwingila moba asatu kuba’mba ngwamishe pa mpunzha po ashimikilenga. Kino kyamwesheshenga’mba Yehoba wakebelenga kuba’mba twajijile kwikala mu Edgefield. Nangwa kyakuba naikalanga na mali acheche bino nayile na kutanwa ku kushonkena kukatampe kwajingako mu 1958 mu New York City.

Kintu kimo kyawama kyamwekele pa juba ja bubiji ja kushonkena. Nasambakene ba Ruby Wadlington bajinga bapainiya ba kimye kyonse bafumine ku Gallatin mu Tennessee. Na mambo a kuba’mba atweba bonse twakebelenga kwingilako bumishonale, twatainwe ku mwisambo wa bakeba kuya ku Sukulu wa Gileada wajingako pa kuno kushonkena. Palutwe kacheche twatendekele kwinembela makalata. Kepo bangichile kuya na kwamba jashi ja mvula bantu mu Gallatin. Kino kyonka kimye kyo nayile na kwamba jashi kyo kimye kyo nabuujile ba Ruby kuba’mba nkeba kwimusongola. Navilukijile ku kipwilo kwapwilanga ba Ruby kabiji twisongwele mu 1959.

Batongwele kwikala kalume wa kipwilo (ye batela luno’mba ukwatankanya mingilo ya jibumba ja bakulumpe) mu Gallatin. Pa kikye kimye najinga na  myaka 23. Kipwilo kyetu kyo kyajinga kitanshi kwikifwakesha kukalama wa mwanzo aye Charles Thompson. Waingilanga bingi bulongo kabiji wayukile bintu byavula bingi. Nangwa byonkabyo, wangipwizhe kuba’mba ayuke inge kujipo mumo mo akonsha kukwasha balongo. Ne mashinda aingijishenga bakalama ba mwanzo bakwabo pa kukwasha bipwilo. Kino kyamfunjishe’mba kyawama bingi kwipuzha ne kuyuka bishinka byonse saka ukyangye kufuukula bya kuba.

Mu May 1964 bangichile kuya na kutanwa ku Sukulu wa Mwingilo wa Bufumu wa ñondo umo ku Bulenge bwa Lansing mu muzhi wa New York. Kutanwa ku uno sukulu kwandengejile kutwajijila kufunda bintu byavula pe Yehoba ne kufwenya kwipi ne aye

Mu January mu 1965 amiwa ne mukazhami betutumine mu mwingilo wa bukalama bwa mwanzo. Mpunzha yo betupele kwingijilamo ya baile bingi. Kutatwila mu muzhi wa Knoxville ku Tennessee kukafika mu muzhi wa Richmond ku Virginia. Kabiji twafwakeshanga ne bipwilo byajinga ku Buyeke bwa muzhi wa Carolina ku Kentucky ne ku Kumuzhika wa Virginia. Nafwakeshangatu bipwilo mwajinga balongo ne banyenga bafita. Mambo mpunzha yajinga kukabeta ka ku bulenga mu United States bajinga bingi misalululo na mambo a bikoba. Onkao mambo, Balongo ne banyenga bafita kechi bapwilanga pamo na balongo ne banyenga bazungu ne. Kabiji balongo ne banyenga bafita bavula kechi baikalanga na byo bakeba bya mu bwikalo ne. Javula twibapangapo bintu byo twaikalanga nabyo. Kalama wa mwanzo umo waingijile myaka yavula wafunjishepo kintu kimo kyanema bingi. Wambuujile’mba: “Inge wafwakesha kipwilo kechi wafwainwa kwibobilanga balongo ne banyenga bu nkambo ne. Umvwe saka bakumona’mba wimulongo wabo po po ukebakwasha bulongo.”

Byo twafwakashijile kipwilo kimo kicheche, Ruby watatwile kufunjisha nsongwakazhi muka kusongolwa wajinga na mwana wa mwaka umo. Mu kyokya kipwilo byo mwabujile muntu wa kutwajijila kumufunjishanga, Ruby wa mufunjishanga kwingijisha makalata. Kimye kyo twafwakashijile kipwilo jikwabo uno nsongwakazhi watainwe ku kupwila konse mu yewa mulungu. Kimye kyo kwavilukijile banyenga babiji bapainiya batwajijile kufunda nanji. Kabiji palutwe kacheche wa batizhiwe. Byo papichile myaka 30 mu 1995 saka tuji mu Betele wa mu Patterson, uno nyenga mwanyike wasolomokele Ruby ne kwisamba nanji. Uno nsongwakazhi wajinga mwana wa mwanamukazhi Ruby ye afunjishanga Baibolo. Uno mwana ne mwatawanji baishile ku Sukulu wa Gileada wa nambala 100.

Mwanzo mukwabo ye twaingijilemo wajinga mu Florida. Pakuba twingilenga bulongo mu uno mwanzo twafwainwe kupota motoka. Onkao mambo, twapotele motoka umo pa mutengo wawama bingi. Nangwa byonkabyo, byo twamwingijishetu mulungu umo uno motoka wafwa. Kechi twajinga na mali a kumuwamishisha ne. Nabujile mulongo ye nayukile kuba’mba wafwainwa kwitukwasha. A uno mulongo watumine wa mwingilo wanji kuya na kwituwamishisha motoka. Kabiji kechi witulipilishepo mali pa uno mwingilo ye aingijile ne. Waambiletu’mba “kwakamwa ne.” Kabiji washikwile ne mali akwabo witupa. Kino kyamwesheshe patoka Yehoba byo alama bakalume banji kabiji kituvulwilemo kuba’mba ne atweba twafwainwa kwikala bampanyi.

Twafikilanga ku balongo ku bipwilo byonse byo twafwakeshanga. Kino kitulengejile kwikala na balunda bavula bingi. Juba jimo, nataipilenga Sawakya wa kipwilo kabiji kechi napwishishe kumutaipa ne. Byo nabwelele mabanga nataine kuba’mba mwana wamulume wa myaka isatu wamutakaula. Pa myaka yavula namuvululangamo kyo aubile ne kuseka nanji.

Mu 1971, natambwijile nkalata ya kwikala kalama wa nkambi mu New York City. Twakuminye bingi mambo pa kyokya kimye najingatu na myaka 34. Balongo bantambwijile bingi bulongo nangwa kyakuba yami najinga kalama wa nkambi mutanshi wa kikoba kifika.

Byo najinga kalama wa nkambi naumvwanga bingi bulongo kufunjisha pe Yehoba mulungu ne mulungu pa kubuñana kwa mwanzo. Bakalama ba mwanzo bavula baingijile bingi bulongo myaka yavula kabiji bayukile bintu byavula bingi kukila byo nayukilepo amiwa. Kalama wa mwanzo umo ye waambile jashi jami ja lubatizhilo. Mulongo mukwabo aye Theodore Jaracz, palutwe kacheche bamutongwele kwikala umo wa mu Jibumba Jitangijila. Kabiji mu mwanzo mwajinga bantu bavula bayukile bintu byavula baingijila pa Betele mu Brooklyn. Naumvwanga bulongo mambo bakalama ba mwanzo ne balongo baingijilanga pa Betele bakwashishe bingi kuba’mba ñingilenga bulongo uno mwingilo. Bano bajinga bakafunga bawama bingi mambo batele muchima ku Mambo a Lesa ne kutwajijila kutundaika  jibumba janji. Kwipelula kwabo kwandengejile kwingila bulongo uno mwingilo wa bukalama bwa nkambi.

Mu 1974 Jibumba Jitangijila jatongwele bakalama ba mwanzo bakwabo kwikala bakalama ba nkambi. Kabiji amiwa bantongwele kwilala kalama wa mwanzo jikwabo ku Bulenge bwa Carolina. Najinga bingi na lusekelo mambo nataine kuba’mba balongo bafita ne bazungu batatula kupwila pamo kabiji kino kyaletejile bingi lusekelo balongo.

Ku mpelo ya 1976, bantumine ku mwanzo wa ku Georgia waikela pakachi ka Atlanta ne Columbus. Mvuluka kimye kyo naambile jashi ja kijilo ja baana batanu ba balongo bafita bapijile mu nzubo yasokele mbanzhi umo. Bansemi ba bano baana abo bebatwajile ku kipatela na mambo a bikozha byo bajinga nabyo. Bakamonyi ba kwa Yehoba bafita ne bazungu bapempwilenga bano bansemi bajinga mu kipatela ne kwibatekenesha. Nemwenejile butemwe bwa kine bwajinga na bano balongo ne banyenga. Buno butemwe bwakonsha kulengela bakalume ba Lesa kuchinchika makatazho apusana pusana.

Mu 1977 betwichile ku Brooklyn kuya na kwingilako mwingilo pa Betele pa ñondo bacheche. Byo kwashajiletu moba acheche kupwisha mwingilo ye betwichijile, balongo babiji ba mu Jibumba Jitangijila betusolomokele amiwa ne Ruby ne kwitushikisha inge twakonsha kutwajijila kwingijila pa Betele. Twaswile.

Pa myaka 24, naingijilanga ku Dipatimenti Utala pa Bibena Kwenda Mwingilo kabiji javula twakwashanga bipwilo ne kukumbula mepuzho akatazha o batumanga. Pa Myaka yavula Jibumba Jitangijila jitufunjishanga kwingijisha mafunde a mu Baibolo akonsha kwitukwasha. Kino kyakwashanga Dipatimenti Utala pa Bibena Kwenda Mwingilo kukumbula bulongo mepuzho. Kabiji twaingijishanga onka ano mafunde kufunjisha bakalama ba mwanzo, bakulumpe mu kipwilo ne bapainiya. Bino byonse byakwasha bavula kwikala na bulunda bwakosa ne Yehoba. Kabiji kino kyalengela jibumba jonse ja Yehoba kwikala na bulunda bwakosa ne Aye.

Kutatula mu 1995 kufika mu 2018, naingijileko mwingilo wa kwimenako ofweshi mukatampe wa ntanda yonse. Uno ke mwingilo wakufwakesha misampi. Natundaikanga ne kukwasha ba mu Kavoto ka Musampi, bengijila pa Betele ne bamishonale ne kwibakwasha kuyuka bya kuba na makatazho o bapitangamo. Kabiji kumvwa ne kuyuka bintu bimo byapichilemo balongo ne banyenga bitutundaikanga bingi. Mu 2000 byo twafwakashijile musampi wa mu Rwanda balongo ne banyenga kubikapo ne bajinga pa Betele betushimikizhe bintu bimo byo bapichilemo ne kuchinchika mu 1994, kimye bantu kyo baipayañenenga mu kyalo. Bino byapichilemo balongo ne banyenga bitutundaikile bingi. Bavula bafwishishe balongo ne balunda mu ano malwañano. Kechi na mambo a bya malwa byo bapichilemo ne, balongo ne banyenga batwajijile kwikala na lwitabilo lwakosa, luketekelo ne kutwajijila kwikala na lusekelo.

Luno tuji na myaka ya kusemwa kukila 80. Pa myaka 20, naingijila mu Kavoto ka Musampi wa mu United States. Nangwa kyakuba kechi nayilepo ku univesiti ne, pano bino, Yehoba ne jibumba janji bamfunjisha kufika palepa bingi. Nafunda bintu byanema bingi byakila masukulu akatampe onse a pano pa ntanda. Nafunda bya kufunjisha bantu bukine bwa mu Baibolo bwakonsha kwibakwasha kwikala myaka ne myaka. (2 Ko. 3:5; 2 Timo. 2:2) Nemwena bukine bwa mu Baibolo byo bwakonsha kukwasha muntu kupimpula bwikalo bwanji ne kumukwasha kwikala na bulunda bwakosa na Mulenga wanji. (Yako. 4:8) Ruby ne amiwa, twatwajijila kukwasha bantu kunemeka bintu byo bafunda pe Yehoba ne kufunjisha bakwetu bukine bwa mu Baibolo. Uno ye mwingilo mukatampe wa bakalume ba Yehoba.