Paulo waambile byambo biji pa 1 Kolinda 15:8, amba: “Bino kyapeleleko wamwekele ne kwi amiwa nobe ku mwana wasemwa mubishi.” Kala twayukile’mba Paulo waambilenga pe aye mwine kimye kyo amwene Yesu mu lukumo lwa mwiulu. Kyajingatu nobe Paulo wasemwa bukiji nangwa’mba wasangulwa ne kuya mwiulu lusanguko lwa baji na luketekelo lwa kuya mwiulu saka lukyangye kutendeka. Pano bino, twataana bishinka bikwabo byalengela kupimpula mo twaumvwijile kala kino kyepelo.

Kyakine kuba’mba Paulo waambilenga pa kintu kyamulengejile kuba’mba etabile. Pano bino, watazhizhe mwepi byo aambile’mba wajinga nobe mwana ‘wasemenwe mubishi’? Mwavula mo atazhizhe.

Waitabijiletu nobe mu kukopa kwa jiso kabiji kyamumwekejile kyamukumishe bingi. Mwana mubishi usemwa juba jo mwabula kuketekela. Byo kyajinga ne kwi Saulo ye batendekele kutela’mba Paulo. Wayilenga ku Damasakasa kuba’mba akamanyike bena Kilishitu kabiji kechi waketekejile kuba’mba wakonsha kumona Yesu mu kimwesho ne. Kwitabila kwa kwa Paulo kwamukumishe aye mwine ne bena Kilishitu ba mu Damasakasa. Kino kintu kyamwekele kyalengejile Paulo kwikala na lubazhibazhi kabiji walekele kumona.—Byu. 9:1-9, 17-19.

Waitabijile pa ‘juba jo abujile kuketekela.’ Mu Kingiliki kyambo kyatuntululwa’mba: ‘Mwana wasemenwe mubishi’ kyakonsha ne kutuntululwa’mba “mwana wasemwa juba bantu jo babula kuketekela.” Baibolo umo waamba’mba: “Kijitu nobe nasemenwe juba bantu jo babujile kuketekela ne.” (The Jerusalem Bible) Paulo wapimpwile byubilo byanji Yesu saka aya kala mwiulu. Bantu bonse Paulo bo atongaula mu byepelo byafumako bamumwenepo Yesu lo asangwilwe. Bino aye kechi wamumwenepo ne. (1 Ko. 15:4-8) Yesu byo amwekele kwi Paulo kya kubula kuketekela kyajinga nobe mwana wasemenwe pa juba jo “babujile kuketekela.”

Wipelwile. Bashayuka bamo baambile’mba byambo byaingijishe Paulo byamwesheshenga’mba wilengulwile. Inge Paulo walangulukilenga bino ko kuba’mba walangulukilenga’mba kechi kyamufwainwe kwikala mutumwa ne. Mambo wanungilepo’mba: “Amiwa yami mucheche pa batumwa, kabiji kechi nafwainwa kutelwa’mba mutumwa ne, mambo namanyikanga kipwilo kya Lesa. Bino na mambo a lusa lukatampe lwa Lesa, lo lwalengela’mba ngikale byonka bino byo nji.”—1 Ko. 15:9, 10.

Kyamweka Paulo walumbulwilenga kuba’mba Yesu wamwekele kwi aye pa juba jo abujile kuketekela. Mambo pa kikye kimye Paulo kechi wajinga mulunda na Lesa ne. Paulo wanemekele bingi kino kintu kyamumwekejile mambo kya mulengejile kushiinwa’mba Yesu bamusangwile mu bafu. O ene mambo, o aambilangapo pa bino inge ubena kusapwilanga bantu pa lusanguko lwa kwa Yesu.—Byu. 22:6-11; 26:13-18.