BAMO BAMBA’MBA INE. Dokotala umo wafwanyikizhe kulondela byaamba Baibolo ku mabuku aamba pa bya sayansi anembelwe mu myaka ya mu ma 1920 o bengijisha pa kufunjisha bantu bya sayansi. Muntu ubula kunemeka Baibolo waambile’mba, kechi mwakonsha kwingijisha kabuku kaamba pa byakwingijisha kompyuta wa kala pa kwingijisha kompyuta wakatataka ne. Bino byambo bimwesha kuba’mba bantu bamo balanguluka’mba Baibolo kechi wakonsha kwibakwasha ne.

Bantu bamo bamba’mba kyawama kwingijisha intaneti kukila kwingijisha Baibolo. Kabiji bamba’mba kwingijisha intaneti kwawama mambo babikapo byambo byakatataka kimye kyonse. Pa TV batambisha bantu baji bingi na maana, nabiji bafunda pa bilanguluka bantu, bakwasha bantu kwikala bulongo mu bwikalo ne banemba mabuku. Kabiji bantu bapotesha mabuku apusana pusana o balanguluka’mba akwasha bantu ne kwikala na mali avula bingi.

Na mambo a kuba’mba kuji bintu byavula byakonsha kukwasha bantu, mambo ka bantu o bafwainwa kwingijishanga Baibolo wanembelwe myaka nobe 2,000 yapitapo kwibatangijila? Nanchi byambo byamba bantu babula kunemeka Baibolo bya kuba’mba, kyawama kwingijisha intaneti kukila kwingijisha Baibolo byayilamo nyi? Kulanguluka bino kechi kwayilamo ne. Mambo bya sayansi ne bya kulengalenga bipimpulwa pa kupitapo kimye, pa kuba bintu bikeba bantu kechi bipimpulwa ne. Bantu bakeba bingi kuyuka kyo baikelako pano pa ntanda, kwikala na lusekelo mu bwikalo ne mu kisemi ne kwikala na balunda bawama.

Nangwa kya kuba Baibolo wanembelwe kala, bino waambapo pa bino bintu. Kabiji Mulenga wetu ye wanembele uno buku. Baibolo witutangijila mu bintu byonse ne kwitukwasha mu makatazho akonsha kwitumwekela. (2 Timoti 3:16, 17) Kabiji Baibolo upana lujimuno lwitukwasha moba onse. Baibolo waamba’mba: “Mambo a Lesa o omi.”—Bahebelu 4:12.

Nanchi byamba Baibolo bya kine nyi? Nanchi Baibolo ukingila nyi, abya wakonsha kwitukwasha mu bwikalo bwetu nyi? Akino Kyamba kya Usopa kibena kwambatu pa Baibolo, kisakwimukwasha kutaana mikumbu ya ano mepuzho.