FWANYIKIZHAI’MBA mubena kwenda mu jishinda mabanga saka pafiita. Nangwa kya kuba juba jazhika kala, kechi musakulubilamo ne, mambo muji na tochi. Mubena kumunyika ko mubena kuya kabiji mubena kumona byonse biji mu jishinda ne ko mubena kuya.

Baibolo naye uji nobe uno tochi ubena kwimukwasha kumona ko mubena kuya. Byonkatu byo twaji kwisamba mu bibaaba byafumako, Mambo a Lesa akonsha kwitukwasha kuyuka bya kuba na makatazho akonsha kwitufikila mu ino ntanda. Baibolo wakonsha kwitukwasha mu bintu byavula. Witulengela kwikala na luketekelo mu bintu byawama biji kulutwe ne kwitukwasha kwenda mu jishinda jakonsha kwitulengela kwikala na lusekelo. (Salamo 119:105) Pano Baibolo wakonsha kwitukwasha kuba byepi bino?

Twayai twisambe pa mashinda abiji Baibolo mo etukwashisha kwikala na luketekelo mu bintu biji kulutwe: 1 Witukwasha kwikala na lusekelo mu bwikalo. 2 Witufunjisha byo twafwainwa kwikala balunda ne Lesa.

Baibolo witukwasha byo twafwainwa kuba na makatazho, kabiji witukwasha ne mu bintu bikwabo. Baibolo itutundaika kubula kwikala na bijikila inge ke tupite mu makatazho. Kuba bino kwitukwasha kwikala na lusekelo mu bwikalo bwetu.

Akilangulukai pa jino jifunde ja mu Baibolo jaamba’mba: “Mu kupana mufuma lusekelo lukatampe kukila mu kutambula.” (Byubilo 20:35) Nanchi mwavulukamo kimye kyo mwakwashishe muntu wakajilwa nyi? Nangwa kampe mwatelekelenga kimye mulunda nenu byo emubuujilenga lukatazho lo ajingamo. Nanchi kechi mwaumvwine bulongo byo mwamutundaikile nenyi?

Twikala bingi na lusekelo inge twakwasha mukwetu kwakubula kuketekela kwitupapo bimo. Shayuka umo waambile’mba: “Javula tukeba bantu kwitubilapo bimo inge paji byo twibobila. Kanatu inge wibakwasha kwakubula kuketekela’mba bakubilepo bimo.”  Bino inge twipana kukwasha bantu bakonsha kubula kwitubilapo kiji kyonse, mufuma byawama bingi. Twingijila pamo na Mulenga wetu inge ke tukwashe bakwetu kabiji tukongwesha Yehoba pa byubilo byetu byawama byo tumwesha. (Byambo bya Maana 19:17) Lesa usanta bingi inge twakwasha balanda kabiji witulaya’mba uketupa bumi bwa myaka ne myaka mu paladisa pano pa ntanda. Kino kitulengela kwikala na luketekelo lwa bintu byawama biji kulutwe!—Salamo 37:29; Luka 14:12-14. *

Kyakilamo kunema ke kya kuba’mba, Baibolo waamba’mba tukekala na lusekelo mu bwikalo inge ke tupopwele Lesa wa kine aye Yehoba. Mambo anji etutundaika kumutota, kumupa lukumo ne kumukookela. (Musapwishi 12:13; Lumwekesho 4:11) Inge twauba bino, tukoba kintu kyanema kikatookesha Mulenga wetu ku muchima. Lesa witutundaika’mba: “Wikale wa maana ne kusangajika muchima wami.” (Byambo bya Maana 27:11) Akilangulukaipotu! Inge ke tulondele mafunde a mu Baibolo pa kufuukula bintu, tusangajika muchima wa Shetu wa mwiulu. Mambo ka? Mambo wituta muchima kabiji ukeba’mba tumwenengamo byawama pa kulondela byo etufunjisha. (Isaya 48:17, 18) Kya kine, tukekala na lusekelo mu bwikalo bwetu inge ke tupopwele Nkambo walengele bintu byonse ne kwikala bwikalo bumutokesha ku muchima.

Baibolo witufunjisha kwikala balunda na Mulenga wetu. Binembelo bitubuula’mba: “Fwenyai kwipi ne Lesa ne aye ukafwenya kwipi ne anweba.” (Yakoba 4:8) Kimye kimo twakonsha kuzhinauka’mba kechi twakonsha kwikala na bulunda na Mulenga wa bulume bonse ne. Pakuba Baibolo witubuula’mba inge ‘twakeba Lesa, tukamutaana’ mambo “kechi uji kwalepa ne atweba bonse ne.” (Byubilo 17:27) Bitufunjisha Baibolo bitukwasha kwikala balunda ne Lesa kabiji kulutwe tukamwenamo bingi. Mu ñanyi mashinda?

Langulukai pa kino: Kafwako muntu wakonsha kunyema lufu ne. (1 Kolinda 15:26) Pakuba Lesa wa myaka ne myaka. Aye kechi ufwa ne, kabiji ukeba balunda nanji kwikala myaka ne myaka. Kwesakana na bino byambo, Baibolo wamwesha bikeba Yehoba ku bantu balondela mikambizho yanji. Baibolo waamba’mba: “Mwikale na bumi myaka ne myaka.”—Salamo 22:26.

Mwakonsha kuba byepi pa kuba’mba mwikale balunda na Lesa? Twajijilai kufunda pe aye kupichila mu kutanga Baibolo. (Yoano 17:3; 2 Timoti 3:16) Lombainga mupashi wazhila kwimukwasha kumvwisha Binembelo. Baibolo witubuula’mba inge twatwajijila ‘kulomba Lesa,’ uketupa maana. * (Yakoba 1:5) Onkao mambo, londelainga byo mubena kufunda ne kuswisha Mambo a Lesa kwikala “lampi wa ku maulu [enu]” ne “kyeya kya mu jishinda [jenu]” pa kino kimye ne kimye kya kulutwe.—Salamo 119:105.