Rosie waambile’mba: “Naikalanga bingi na bijikila na mambo a kukizhamo kulanguluka pa bintu.” Ñanyi binembelo byamukwashishe? Kinembelo kyamukwashishe ke Mateo 6:34. Kyaamba’mba: “Kange mubambishenga michima na mambo a juba ja kesha ne, mambo juba ja kesha jikekala na bijikila byajo. Juba jonse jiji na makatazho ajo.” Rosie waambile’mba, bino byambo byaambile Yesu byamukwashishe kubula kwakamwa pa bikamweka kesha. Wanungilepo amba: “Kechi nafwainwe kulangulukanga pa bintu byamwekele nangwa pa bikabula kumweka ne.”

Yasmine waakaminwe bingi mambo watendekele kwikala na bijikila. Waambile’mba: “Najilanga kabiji bufuku naikalanga bingi na kilabila. Kukizhamo kwikala na bijikila kwabikilenga bumi bwami mu kizumba.” Ñanyi kinembelo kyamukwashishe? Waambile pa kinembelo kya 1 Petelo 5:7 kyaamba’mba: “Saka mutaya bijikila byenu pe aye, mambo wimuta muchima.” Kabiji Yasmine waambile’mba: “Byo papichile moba, natwajijile kulomba kwi Yehoba kabiji wakumbwile milombelo yami. Nakasulukile bingi. Kimye kimo ngikala na milanguluko yatama, bino ngyuka bya kuba.”

Nsongwakazhi aye Isabella waambile’mba: “Nasenda batata kubula kuba bintu bukiji. Ngikala na kukokoloka nangwa na kutambatu TV saka nji na mingilo. Uno muteeto watama bingi mambo ulengela kwikala na bijikila ne kubula kuba bintu bulongo. Kinembelo kya 2 Timoti 2:15, kyamukwashishe bingi mambo kyaamba’mba: “Teshakotu muchima ukefikizhe obewa mwine kwi Lesa saka waitabilwa, wa mwingilo wabula ne kya kumulengesha bumvu.” Isabella waambile ne kuba’mba: “Kechi nkeba kulengesha bumvu Yehoba na mambo a kubula kwingila mingilo yami bukiji ne.” Luno kechi ukankazhama pa kwingila nkito ne.

Abino byo byaubanga ne Kelsey. Waambile’mba: “Nakonsha kwikala na nkito ya kwingila, pano bino ntendeka kwiingila inge kwashala kimye kicheche. Njila, ngikala na kilabila ne kwakamwa. Kuba bino kechi kwawama ne.” Kinembelo kya Byambo bya Maana 13:16 kyakwashishe bingi Kelsey. Kino kinembelo kyaamba’mba: “Muntu wajimuka uba bintu na maana, pakuba wakosama umwesha kukosama kwanji.” Waambile’mba kulanguluka pa kino kinembelo kwamulengejile kuyuka’mba: “Kyanema bingi kunengezhezha jimo bya kuba. Luno nji na buku mo nemba mingilo yo nafwainwa kwingila. Kuba bino kwankwasha bingi, mambo kechi ngingila mingilo inge kwashala kimye kicheche ne.”

Ba Kirsten baambile’mba: “Balume bami bannyemene saka nji na baana bana.” Ñanyi Kinembelo kibakwashishe? Ke kinembelo kya Byambo bya Maana 17:17 kyaamba’mba: “Mulunda wa kine umwesha butemwe kimye kyonse, kabiji ye mulongo ye wakonsha kuketekela mu kimye kya bya malwa.” Ba Kirsten bebakwashishe ku balongo ne banyenga mu kipwilo. Pano bebakwashishe byepi? Baambile’mba: “Balunda nami bankwashishe bingi. Bamo natanangatu bandetela bya kwingijisha. Bakwabo nabo bankwashishe kimye kyo navilukilenga kuya mu nzubo ikwabo. Kabiji mukwabo wankebejile nkito. Kine balongo ne banyenga bankwashishe bingi.”

Ba Delphine bo twaambapo ku ntendekelo nabo baumvwanga bingi mukose. Bintu byabo byonse byo byaonaikile, baambile’mba: “Bwikalo bwatamine bingi.” Kinembelo kya Salamo 68:6 kibakwashishe bingi. Kyaamba’mba: “Lesa upa boba baji bunke nzubo mwa kwikala.” Baambile’mba: “Nayukile’mba kino kinembelo kechi kibena kulumbulula’mba Lesa wafwainwa kumpa nzubo pa kino kimye ne. Bino kyalumbulwilenga’mba Lesa witukwasha mu mashinda apusana pusana. Wituzhikijila ne kwitukwasha kwikala mu mutende na bantu batemwa Yehoba. Kabiji nayukile’mba pa kuba’mba ngikalenga mu mutende na balongo ne banyenga, nafwainwe kufwenya kwipi ne Yehoba. Onkao mambo, kinembelo kya Salamo 37:4 kyankwashishe bingi. Akino kinembelo kyaamba’mba: ‘Sangalela mwi Yehoba, ne aye ukakupa bintu bikeba muchima wobe.’”

Bapezhezheko na byambo bya kuba’mba: “Nayukile’mba nafwainwe kwikala mulunda ne Yehoba, mambo ye unkwasha kimye kyonse. Abino byonse byo byamwekele, nanembele bintu byakonsha kunkwasha kwikala na balunda batemwa Yehoba. Kabiji natendekele kumona bintu byawama mu bakwetu ne kulubako ku bilubo byabo.”

Kishinka ke kya kuba’mba bantu bengijila Lesa kechi balumbuluka ne. Bakamonyi ba kwa Yehoba nabo bapita mu makatazho onka apitamo bantu bonse. Bino Baibolo utundaika bantu kukwasha bakwabo. Kyanema bingi kwikala na balunda. Nanchi mafunde a mu Baibolo akonsha kukwasha bantu baji na makatazho, nabiji bikola bibula kupwa ne bulanda nyi?