Rose waambile’mba: “Nji na kikola kibula kupwa kinkatazha bingi. Bumi bwami bwa kwendatu na kubinza.” Kino kikola kimulengela kukankalwa kwikala na lufunjisho lwa pa bunke ne kubatu bintu bikwabo. Nangwa byonkabyo, byambo bya kwa Yesu bitanwa pa Mateo 19:26 bya kuba’mba: “Kwi Lesa bintu byonse kechi byakatazha ne” byamutundaikile bingi. Rose wayukile’mba kuji mashinda avula a kwikelamo na lufunjisho lwa pa bunke. Na mambo a kuba’mba kikola kyo ajinga nakyo kyamukatazhanga kwikala na lufunjisho lwa pa bunke, watendekele kuteleka ku Baibolo uji pa intaneti ye batangila jimo ne mabuku alumbulula Baibolo. * Waambile’mba: “Inge luno lunengezho lwa kutangila jimo mabuku kechi lwajingako ne, inge kyankatezhe kwikala na bulunda bwakosa na Lesa.”

Inge Rose waumvwa kutama ku muchima na mambo a kukankalwa kuba bintu byo aubanga kala, byambo biji pa kinembelo kya 2 Kolinda 8:12 bimutekenesha bingi. Kino kinembelo kyaamba’mba: “Umvwe kuji kufuukwila jimo, kya bupe kitabilwa ke kyokya kipana muntu mwayila bintu byo aji nabyo, kechi mwayila bintu byo abula ne.” Bino byambo bikwasha Rose kushiinwa’mba Lesa usanta bingi pa mingilo yo engila.

Ba Delphine bo twaambapo kala bavuluka’mba: “Mwanami wa mukazhi wa myaka 18 byo afwile, kyankolele bingi ku muchima kya kuba nakebelenga ne kwiipaya. Kabiji namwene’mba kafwako kintu kyakonsha kundetela lusekelo ne.” Bataaine lutekenesho byo batangile byambo byaambile Davida pa Salamo 94:19 bya kuba’mba: “Bijikila byamvujiile, anweba mwantekeneshe ne kunsangajika.” Kabiji baambile kuba’mba: “Nalombanga Yehoba kuba’mba ankwashe kutaanapo bintu byakonsha kuntekenesha.”

Batendekele kwingilako kimye kyabaya mu mwingilo wa kusapwila. Byo papichile kimye, befwanyikizhe bene ku makileyoni amokaika engijisha banyike pa kulenga bipikichala. Nangwa kya kuba amo amokaika, bino beingijisha kulenga bipikichala. Byo byo kyajinga ne kwi abo. Nangwa kya kuba bajinga na makatazho, bino bakonsheshe kukwasha bantu. Baambile’mba: “Kwingijisha mafunde a mu Baibolo ne Binembelo pa kukwasha bantu kwantekeneshanga, kyajingatu nobe Yehoba ubena kuntekenesha.” Banembele mutanchi wa mazhina a bantu banembwa mu Baibolo bajinga na makatazho ne bulanda. Bataaine kuba’mba “kulomba kimye kyonse” kwakwashishe bano bantu kuchinchika makatazho o bapichilengamo. Kabiji bataaine’mba kutanga Baibolo kwakonsha kwitukwasha kuchinchika makatazho o tubena kupitamo.”

Kufunda Baibolo kwakwasha ba Delphine kuta muchima ku bintu bya kulutwe, kechi ku bya kunyuma ne. Luketekelo lutanwa pa Byubilo 24:15 lwibatekenesha bingi. Kino kinembelo kyaamba’mba: “Kukekala lusanguko lwa baoloka ne babula koloka.” Bino byambo bibalengela kushiinwa byepi amba Yehoba ukasangula mwanabo wamukazhi? Ba Delphine baambile’mba: “Nji na luketekelo lwa kuba’mba nkamona mwanami pa kimye kyafwainwa kulutwe Yehoba byo akamusangula. Mfwanyikizha mbena kwikala na mwanami byonka byo twaikalanga saka akyangye kufwa.”