BAIBOLO KECHI BUKU WA BYA SAYANSI NE, BINO WAMBA PA BIKAMWEKA KULUTWE. MONAI BYAMWEKELE.

Kala bashayuka bavula baambanga’mba bilengwa bilengeletu bine. Bino ano moba baswa kuba’mba bilengwa kuji wibilengele. Baibolo waambijile jimo bino byonse kala kene.—Ntendekelo 1:1.

Nanchi ntanda imweka byepi?

Kala, bantu bavula balangulukanga’mba ntanda yapapakana. Mu myaka kitota kya butanu B.C E., bashayuka bangiliki baambile’mba ntanda yabuluñana. Bano bashayuka saka bakyangye kwamba bino, mu myaka kitota kya butanu na busatu B.C.E., ngauzhi Isaya waambile’mba “ntanda yabuluñana,” kyambo kyakonsha ne kulumbulula’mba “ya nzhingwile.”—Isaya 40:22; tubyambo twa munshi.

Nanchi jiulu jakonsha konaika nyi?

Shayuka wa bya sayansi aye Aristotle mungiliki wa mu myaka kitota kya buna B.C.E., wafunjishe’mba bintu bibolatu ke bya pano pa ntanda, pakuba bintu bya mwiulu kechi bibola ne. Bavula byobyo bayukile pa myaka yavula. Bino mu myaka kitota kya bu 19, bashayuka batendekele kufunjisha kuba’mba bintu bya mwiulu ne bya pano pa ntanda byonse bibola. Shayuka umo aye Lord Kelvin watundaikilenga luno lufunjisho waambile pa byaamba Baibolo pa jiulu ne ntanda amba byonse bikonaika “byonkatu byonaika kivwalo.” (Salamo 102:25, 26) Kelvin waitabijile mu byamba Baibolo amba Lesa kechi ukalengela bintu byo alenga konaika ne. —Musapwishi 1:4.

Ñanyi kintu kilengela ntanda kubula kupona?

Aristotle wafunjishenga’mba mapulaneti alamankana ne kuba’mba ntanda yafwainwe kwikala pakachi. Mu myaka kitota kya bu 18 C.E., bashayuka baswile’mba tubangabanga ne mapulaneti kechi byakwatapo ku kintu nangwa kimo ne. Kabiji buku wa Yoba wanembelwe mu myaka kitota kya bu 15 B.C.E., waamba’mba Mulenga “wakobeka ntanda pa lwelele.”—Yoba 26:7.

BAIBOLO KECHI BUKU WA BYA MICHI NE, BINO MUTANWA MAFUNDE AAMBA PA BUNTUNTULU BWA MUBIJI.

 Kulama bantu bakolwa kwa bunke.

Mizhilo Lesa yo apele Mosesa yaambile’mba bantu baji na mbumba bafwainwa kwikala kwa bunke. Byo kwamwekele bikola mu myaka kitota kya butanu na bubiji C.E., Badokotala popo batendekele kulondela ino mizhilo yaamba pa bantu bakolwa. Kabiji ne mu ano moba batwajijila kwiilondela.—Bena Levi kitango 13 ne 14.

Kowa ku maboko panyuma ya kukwata muntu wafwa.

Ku mpelo ya myaka kitota kya bu 19, badokotala baingijilanga pa bitumbi ne bantu bakolwa kwakubula kowa ku maboko. Kuba bino kwalengejile bantu bavula kufwa bingi. Bino Mizhilo Lesa yo apele Mosesa yaambile’mba muntu inge wakwata kitumbi wafwainwe kwikala wa muzhilo. Kabiji yaambile kuba’mba inge muntu wakwata kitumbi, wafwainwe kowa ku maboko. Kowa ku maboko kwalengelanga bantu kubula kusambula bikola.—Kubala 19:11, 19.

Kuzhiika bincha.

Pa mwaka pa mwaka, baana bavula bafwa na kikola kya kupolomya na mambo a kubula kuzhiika bincha byafuma munda. Mizhilo Lesa yo apele Mosesa yaambile kuba’mba bantu bafwainwa kuzhiika bincha.—Mpitulukilo ya mu Mizhilo 23:13.

Kimye kya kuchiba kalomolomo.

Mizhilo ya Lesa yaambile’mba mwana wa mulume inge wasemwa bafwainwe kumuchiba kalomolomo pa kupitapo moba atanu na asatu. (Bena Levi 12:3) Inge mwana wasemwa, mashi atendeka kuchimba pa kupitapo mulungu umo. Mu bimye byanembejilwemo Baibolo, bapembelanga papita mulungu umo ne kukilapo pa kuba’mba bebachibe kalomolomo, kuba bino kwazhikijilanga baana ba balume mambo kechi kwajinga mashinda o babena kwingijisha mu bipatela lelo jino ne.

Kukizhamo kulanguluka kwakonsha kulengela muntu kukolwa.

Bafunda pa bya michi ne basayansi bamba’mba kwikala na lusekelo ne kulekelako mambo bakwetu kulengela butuntulu bwa mubiji kuwama. Baibolo waamba’mba: “Muchima wa lusekelo ye muchi wawama, bino muchima wauba bulanda upwisha ngovu.”—Byambo bya Maana 17:22.