Kwambatu kishinka, inge tuji na makatazho, tuketekela’mba mulunda netu usakwitukwasha. Lelo jino bantu bamo bamba’mba Lesa kechi mulunda nabo ne, mambo balanguluka’mba kechi wibakwasha inge baji na makatazho ne. Bino kishinka ke kya kuba’mba, Lesa wauba bintu byavula bingi bitukwasha mu bwikalo bwetu. Kabiji kulutwe na lwendo, ukafumyapo makatazho onse ne buyanji bo tubena kupitamo. Pano ñanyi bintu Lesa byo akoba?

Lesa ukapwisha bubi bonse ne kufumyapo yewa uleta bubi. Baibolo waamba’mba: “Pano pa ntanda ponse paji mu bulume bwa kwa aye mubi.” (1 Yoano 5:19) Yesu watongwele uno “mubi” amba Satana Diabola kabiji ye “mfumu wa pano pa ntanda.” (Yoano 12:31) Satana ye ubena kulengela bintu byatama bibena kumweka pano pa ntanda ponse. Pano Lesa ukobapo byepi?

Katatakatu Yehoba Lesa akengijishe Mwananji aye Yesu Kilishitu kufumyapo “awa uleta lufu, ko kuba’mba Diabola.” (Bahebelu 2:14; 1 Yoano 3:8) Kabiji Baibolo waamba kuba’mba Diabola wayuka’mba “washalatu na kakimye kacheche” ka kumonauna. (Lumwekesho 12:12) Lesa ukafumyapo bubi bonse ne bantu boba byatama.—Salamo 37:9; Byambo bya Maana 2:22.

Mulenga wetu inge wafumyapo bubi bonse pano pa ntanda, po po akafikizha kyaswa muchima wanji kabiji bantu bakekalanga myaka ne myaka pano pa ntanda. Ñanyi bintu byawama byo tubena kutengela kulutwe na lwendo?

Mutende ne luzhikijilo. Baibolo waamba’mba: “Pakuba bakimote bakaswana ntanda, kabiji bakasangalelanga mu kuvula kwa mutende.”—Salamo 37:11.

Kukekala kajo kavula bingi. Baibolo witulaya’mba: “Kajo kakavula bingi pano pa ntanda; kakekala ne peulu ya mitumba.”—Salamo 72:16.

Tukashimika mazubo awama ne kwingila nkito yawama. Baibolo waamba’mba: “Bakashimika mazubo ne kwikalamo, kabiji bakajimba miñanzañanza ne kuja bipangwa byayo. . . . Kabiji bantu bami basalwa bakamwenamo lusekelo mu mingilo yo bakengilanga.”—Isaya 65:21, 22.

Nanchi mukeba kwiyowa bino bintu nyi? Abino byo byo bikekalanga bantu ba kishinka pano pa ntanda.

Ano moba bantu bonse babena kukolwa ne kufwa, pano bino, kulutwe na lwendo kechi kukekala bikola ne lufu ne. Katatakatu Lesa akapeshe bantu kwingijisha bukuzhi bwa kwa Yesu pa kuba’mba ‘bonse bamwitabila kechi bakonaika ne, poso amba bakekala na bumi bwa myaka ne myaka.’ (Yoano 3:16) Ñanyi bintu bikafumamo?

Kechi kukekala bikola ne. Baibolo waamba’mba: “Kafwako muntu nangwa umo ukekala mu kyalo ukamba’mba: ‘Nakolwa’ ne. Bantu bakekalamo bakebalekelako mambo abo.”—Isaya 33:24.

Bantu kechi bakafwanga ne. Baibolo witulaya’mba: “Lesa ukamina lufu myaka ne myaka, kabiji Nkambo Mfumu Yehoba ukashiimuna mipolo ku meso a bantu bonse.”—Isaya 25:8.

Bantu bakekalanga myaka ne myaka. Baibolo waamba’mba: “Bupe bo apana Lesa ke bumi bwa myaka ne myaka kupichila mwi Kilishitu Yesu Nkambo yetu.”—Loma 6:23.

Bafwa bakasangulwa. Lesa walaya’mba: “Kukekala lusanguko lwa baoloka ne babula koloka.” (Byubilo 24:15) Bantu bakamwenamo bingi mu bupe bwa Lesa bwa bukuzhi.

Lesa ukoba byepi bino?

Lesa ukengijisha kafulumende wa mwiulu ne Kalama ye atongola aye Kilishitu Yesu kufikizha kyaswa muchima wanji pano pa ntanda. (Salamo 110:1, 2) Uno kafulumende bo Bufumu bwaambilengapo Yesu kimye kyo afunjishenga batumwa banji kulomba’mba: “Tata wetu wa mwiulu, . . . Bufumu bwenu bwiye.”—Mateo 6:9, 10.

Bufumu bwa Lesa bukalamanga pano pa ntanda ponse kabiji bukafumyapo bintu byonse bibena kuyanjisha bantu. Buno Bufumu ke kafulumende wawama kukila makafulumende a bantu. O ene mambo Yesu o atwajijile na kusapwila “mambo awama a Bufumu” kimye kyo aingijilenga mwingilo wanji pano pa ntanda ne kubuula baana banji ba bwanga nabo kwingila yenka uno mwingilo.—Mateo 4:23; 24:14.

Yehoba Lesa walaya kubila bantu bintu byawama mambo wibatemwa bingi. Nanchi kuyuka bino kwimulengela kukeba kufunda pe Lesa ne kufwenya kwipi ne aye nyi? Ñanyi bintu byo mukamwenamo inge mwayuka Lesa? Mutwe walondelapo wakumbula ano mepuzho.