Bantu bavula bayuka’mba Lesa koaji. Pano bino, inge mwibepuzha byo bayukapo pe Lesa, bakemubuula byapusana pusana. Bamo balanguluka’mba Lesa washinta kabiji ukebatu kukambula bantu inge balubankanya. Bakwabo bamba’mba Lesa wibatemwa kabiji wibalekelako mambo nangwa bobe bintu byatama byepi. Bino bakwabo nabo balanguluka’mba Lesa uji kwalepa bingi na bantu kabiji kechi wibata muchima ne. Na mambo a ino mikumbu yapusana pusana, bavula balanguluka’mba kyakatazha kuyuka Lesa bulongo.

Nanchi kyanema kuyuka Lesa bulongo nyi? Ee, kyanema. Kumuyuka bulongo kukemukwasha kwikala bwikalo bwa lusekelo. (Byubilo 17:26-28) Inge mwayuka Lesa bulongo, mukafwenya kwipi ne aye, kabiji ukemutemwa ne kutwajijila kwimukwasha. (Yakoba 4:8) Kabiji inge mwamuyuka bulongo Lesa, mukekala na bumi bwa myaka ne myaka.—Yoano 17:3.

Mwakonsha kuyuka byepi Lesa? Akilangulukai pa mulunda nenu ye mwayuka bulongo. Mwaikele byepi balunda? Kitanshi kyo mwaubile ke kuyuka jizhina janji, byubilo byanji, bintu byo atemwa ne byo ashikwa, ne bintu byo aubapo mu bwikalo bwanji ne byo akeba kuba kulutwe. Kuyuka bino bintu ko kwimukwashishe kumuyuka bulongo uno mulunda nenu.

Mu jishinda jimotu, ne atweba pa kuba’mba tuyuke Lesa bulongo, twafwainwa kuyuka mikumbu ya ano mepuzho:

• LESA JIZHINA JANJI ÑANYI?

• LESA UJI NA ÑANYI BYUBILO?

• ÑANYI BINTU LESA BYO AUBILA BANTU?

• ÑANYI BINTU LESA BYO AKOBA KULUTWE NA LWENDO?

• MAMBO KA O KYANEMENA KUFUNDA PE LESA?

Kino Kyamba kya Usopa kyakumbula ano mepuzho. Mitwe ijimo isakwimukwasha kuyuka Lesa bulongo ne kuyuka bintu byawama byo akemubila inge mwaikala balunda nanji