Ino mitwe yalondankana itukwasha kuyuka mukumbu wa bwipuzho bwa kuba’mba, Nanchi Lesa mwamuyuka bulongo nyi? Twafunda mu Baibolo kuba’mba Lesa jizhina janji Yehoba, kabiji butemwe kyo kyubilo kikatampe kyakila pa byubilo byonse byo aji nabyo. Twafunda bintu byavula bingi byo aubila bantu ne byo akoba kulutwe na lwendo. Kuji bintu byavula byo mwakonsha kufunda pe Lesa, bino kampe mwakonsha kwipuzha’mba, ‘Mambo ka o kyanemena kufunda pe Lesa?’

Yehoba walaya’mba ‘inge mwamukeba, aye ukesolola kwi anweba.’ (1 Byambo bya Moba 28:9) Inge mwayuka Lesa, mukamwenamo bintu byavula bingi kabiji mukekala na “bulunda bwa pa muchima ne Yehoba.” (Salamo 25:14) Mambo ka o kyanemena kwikala na bulunda bwakosa ne Lesa?

Lusekelo lwa kine. Yehoba bamulumbulula bingi bulongo amba “Lesa wa lusekelo.” (1 Timoti 1:11) Kwikala na bulunda bwakosa ne Lesa ne kulondela mashinda anji aoloka, kukemulengela kwikala na mutende wa mu milanguluko ne butuntulu bwa mubiji bwawama. (Salamo 33:12) Kabiji mukekala bwikalo bwa lusekelo, kuchinuzhuka bintu byatama ne kwikala na bulunda bwawama na bakwenu. Mwakonsha kuswa byambo byaambile nyimbi wa masalamo bya kuba’mba: “Kyangwamina kufwenya kwipi ne Lesa.”—Salamo 73:28.

Kwimwena Lesa byo emuta muchima. Yehoba walaya bakalume banji kuba’mba: “Nkakubuula bya kuba saka nkutala.” (Salamo 32:8) Abino byambo bimwesha’mba Yehoba wata bingi muchima bakalume banji kabiji wibakwasha kwesakana na byo bakajilwa. (Salamo 139:1, 2) Inge mwaikala na bulunda bwakosa ne Yehoba, naye ukemukwashanga kimye kyonse.

Bwikalo bwawama kulutwe na lwendo. Yehoba Lesa ukeba’mba mwikalenga bulongo luno, kabiji witupa ne luketekelo lwawama lwa kulutwe. (Isaya 48:17, 18) Baibolo waamba’mba: “Pa kuba’mba bakekale na bumi bwa myaka ne myaka, bafwainwa kwimuyuka anweba Lesa yenka wa kine, ne Yesu Kilishitu ye mwatumine.” (Yoano 17:3) Ano moba tubena kupita mu meseko avula bingi, bino luketekelo lwitupa Lesa luji nobe kimiko kitulengela ‘kukosa.’—Bahebelu 6:19.

Ano ke mashindatu acheche o twaambapo etukwasha kuyuka bulongo Lesa ne kwikala balunda nanji. Pa kuba’mba muyukilepo byavula, isambai na Bakamonyi ba kwa Yehoba nangwa yai pa jw.org/kqn.