Yesu waambile pa bintu byakonsha kwitukwasha ‘kuyuka’mba Bufumu bwa Lesa buji pepi.’ (Luka 21:31) Waambijile jimo kuba’mba kukekala makondo, bitentanshi, bipowe bya nzala ne bikola. Lelo jino, tubena kwimwena bino bintu.—Luka 21:10-17.

Kabiji Baibolo waamba’mba “moba a kupelako” a bukalama bwa bantu akayukanyikilwa ku byubilo byatama bikekala na bantu. Abino byubilo bebilumbulula pa 2 Timoti 3:1-5. Inge mwamona bino byubilo biji na bantu mu ano moba, mushiinwa kuba’mba buno bungauzhi bwa mu Baibolo kine bubena kufika.

Kino kibena kulumbulula ka? Kibena kulumbulula kuba’mba katatakatu Bufumu bwa Lesa bukalete bintu byawama pano pa ntanda. (Luka 21:36) Lesa witulaya mu Baibolo kuba’mba ukobila bantu byawama bakekalanga pano pa ntanda. Akimonai bintu bimo byo alaya.

“Kabiji [Yesu] bamupele bukalama, munema ne bufumu kuba’mba bantu ba mitundu yonse, bisaka bya bantu ne bantu bonse bamba milaka yapusana pusana bamwingijilenga. Bukalama bwanji bo bwa myaka ne myaka, kechi bukapwa ne, kabiji bufumu bwanji kechi bakebonauna ne.”—DANYELA 7:14.

Akino byo kilumbulula: Mwakonsha kwikala bwikalo bwawama mu kafulumende wa Lesa ukalamwanga na Mwananji aye Mfumu.

“Kafwako muntu nangwa umo ukekala mu kyalo ukamba’mba: ‘Nakolwa ne.’”—ISAYA 33:24.

Akino byo kilumbulula: Kechi mukakolwanga nangwa kulemana ne; mukekalanga myaka ne myaka.

‘Ukapwisha nkondo pa ntanda ponse.’—SALAMO 46:9.

Akino byo kilumbulula: Kechi kukekala nkondo ne byatama bifumamo ne.

“Babi kechi bakekalako ne . . . bakimote bakaswana ntanda.”—SALAMO 37:10, 11.

Akino byo kilumbulula: Kechi kukekala bantu babi ne, kukekalatu bantu bawama bakookela Lesa.

“Bakashimika mazubo ne kwikalamo, kabiji bakajimba miñanzañanza ne kuja bipangwa byayo.”—ISAYA 65:21, 22.

Akino byo kilumbulula: Ino ntanda yonse bakeiwamisha bingi. Lesa ukakumbula lulombelo lwetu lwa kuba’mba kyaswa muchima wenu kyubiwe “pano pa ntanda.”—Mateo 6:10.